អន្តរជាតិ

ហ្សាការតា៖ រដ្ឋាភិបាលឥណ្ឌូណេស៊ីបានទទួលជំនួយឥតសំណង ជាទឹកប្រាក់ចំនួន១០០លានដុល្លារ ពីប្រទេសន័រវែស បន្ទាប់ពីបាកជួយកាត់បន្ថយការបំភាយឧស្ម័នកាបូន និងការកាប់បំផ្លាញព្រៃឈើ ក្នុងអំឡុងឆ្នាំ២០២១–២០២៣។ កាលពីថ្ងៃទី១២​ ខែវិច្ឆិកា ឆ្នាំ២០២៦ បេសកជនទទួលបន្ទុកផ្នែកអាកាសធាតុ និងថាមពល របស់ប្រទេសឥណ្ឌូណេស៊ី បានមានប្រសាសន៍ថា ភាពជាដៃគូជាមួយប្រទេសន័រវែស បានបង្ហាញពីលទ្ធផលជាក់ស្តែងនៃកិច្ចសហប្រតិបត្តិការអន្តរជាតិ ក្នុងការកាត់បន្ថយការបំភាយឧស្ម័នកាបូន។ កន្លងមកប្រទេសន័រវែសក៏បានផ្តល់ថវិកាដល់ប្រទេសឥណ្ឌូណេស៊ី ជាទឹកប្រាក់ចំនួន២១៦លានដុល្លារ ដើម្បីទទួលស្គាល់សមិទ្ធផលរបស់ប្រទេសឥណ្ឌូណេស៊ី ក្នុងការកាត់បន្ថយការបំភាយឧស្ម័នក្នុងវិស័យព្រៃឈើ និងការប្រើប្រាស់ដី។ លោកបេសកជន បានបញ្ជាក់ថា ឥណ្ឌូណេស៊ីបានកោតសរសើរចំពោះការរួមចំណែករបស់ប្រទេសន័រវែសក្នុងការកាត់បន្ថយការបំភាយឧស្ម័នកាបូន ហើយបានបង្ហាញក្តីសង្ឃឹមថា រដ្ឋាភិបាលន័រវែស នឹងពង្រីកការគាំទ្រផ្នែកហិរញ្ញវត្ថុជាសកល សម្រាប់ការអភិរក្សព្រៃឈើ សហគមន៍មូលដ្ឋាន និងនិរន្តរភាពអាកាសធាតុ។ ព្រមជាមួយគ្នានេះ រដ្ឋមន្ត្រីក្រសួងអាកាសធាតុ និងបរិស្ថាន ន័រវែស បានកោតសរសើរចំពោះប្រទេសឥណ្ឌូណេស៊ី ដែលបានកាត់បន្ថយការកាប់បំផ្លាញព្រៃឈើ ក្នុងអំឡុងឆ្នាំ២០២១–២០២៣។ លោកស្រីបានមានប្រសាសន៍ថា នេះគឺជាលទ្ធផលកើតចេញពីគោលនយោបាយប្រកបដោយមហិច្ឆតា ភាពជាអ្នកដឹកនាំខ្លាំង និងការប្តេជ្ញាចិត្តប្រកបដោយនិរន្តរភាព។ ប្រទេសឥណ្ឌូណេស៊ី បានបង្ហាញឱ្យឃើញពីលទ្ធផលនៃការរួមបញ្ចូលគ្នារវាងមហិច្ឆតា និងសកម្មភាពប្រកបដោយតុល្យភាព។ លោកស្រីរដ្ឋមន្ត្រីបានចាត់ទុកការលើកទឹកចិត្តផ្នែកហិរញ្ញវត្ថុនេះថា ជាយន្តការដ៏សំខាន់មួយក្នុងការជំរុញឱ្យប្រទេសផ្សេងទៀតកាន់តែច្រើនចូលរួមអភិរក្សផ្ទៃដីព្រៃឈើរបស់ខ្លួន។ លោកស្រីក៏បានសម្តែងក្តីសង្ឃឹមថា ជំនួយឥតសំណងថ្មីនេះនឹងជួយគាំទ្រដល់កិច្ចខិតខំប្រឹងប្រែងរបស់ឥណ្ឌូណេស៊ី ក្នុងការធ្វើឱ្យព្រៃឈើ និងដីក្លាយជាប្រភពស្រូបយកកាបូនតាមបែបធម្មជាតិ។ លោកស្រីក៏បានលើកឡើងពីការប្តេជ្ញាចិត្តរបស់ឥណ្ឌូណេស៊ី ក្នុងការទទួលស្គាល់ និងកំណត់ទុកព្រៃឈើរបស់សហគមន៍ជនជាតិដើមភាគតិច ចំនួន១,៤លានហិកតា […]

ប៉េកាំង៖ ប្រទេសចិនកំពុងពង្រឹងតួនាទីគាំទ្ររបស់ធនធានមនុស្ស និងឧបករណ៍ឌីជីថល ទៅក្នុងការអភិវឌ្ឍឧស្សាហកម្មជនបទ ស្របពេលប្រទេសចិនកំពុងតែធ្វើទំនើបកម្មវិស័យកសិកម្ម។ ប្រទេសចិនកំពុងតែខិតខំជំរុញពលករចំណាកស្រុក និងយុវជនមានជំនាញបច្ចេកវិទ្យា ឱ្យក្លាយជាប្រភពធនធានមនុស្សប្រកបដោយនិរន្តរភាព សម្រាប់ធ្វើទំនើបកម្មកសិកម្ម ព្រមទាំងអាចពង្រីកការប្រើប្រាស់បច្ចេកវិទ្យាឌីជីថលក្នុងវិស័យកសិកម្ម។ ចិនបានលើកយកបទពិសោធថ្មីមួយរបស់ប្រជាជនរស់នៅតាមជនបទ ក្នុងខេត្តហ៊ូប៉ី ភាគកណ្តាលប្រទេសចិន ដែលពលករចំណាកស្រុកវ័យក្មេងកាន់តែច្រើនឡើងៗ បានវិលត្រឡប់ពីទីក្រុងទៅកាន់ស្រុកកំណើតរបស់ពួកគេវិញ ហើយប្រឹងប្រែងបង្កើតមុខរបរថ្មី។ ដូច្នេះ អាជ្ញាធរមូលដ្ឋានបានបង្កើតកម្មវិធីបណ្តុះបណ្តាលពួកគេឱ្យមានជំនាញផ្នែកបច្ចេកទេស និងការគ្រប់គ្រងអាជីវកម្ម ដើម្បីជួយឱ្យពួកគេក្លាយជាកសិករអាជីពជំនាន់ថ្មី។ គោលដៅសំខាន់របស់អាជ្ញាធរមូលដ្ឋាន គឺជួយឱ្យកសិករជំនាន់ថ្មី អាចផ្លាស់ប្តូរពីការធ្វើកសិកម្មបែបប្រពៃណី ទៅជាការធ្វើកសិកម្មឆ្លាតវៃ។ បច្ចុប្បន្ន យុវជនទាំងនេះកំពុងតែប្រើប្រាស់គ្រឿងយន្តឆ្លាតវៃ និងបណ្តាញឧបករណ៍ចាប់សញ្ញា។ ចំណែកអ្នកដាំដំណាំបានបបួលគ្នាបង្កើតជាសហគមន៍ ដើម្បីដាំដំណាំមានតម្លៃខ្ពស់ សម្រាប់ផ្គត់ផ្គង់តាមតម្រូងការទីផ្សារ។ អាជ្ញាធរចិនបានចាត់ទុកថា ការអភិវឌ្ឍភូមិមួយ ត្រូវពឹងផ្អែកលើសមត្ថភាពរបស់អ្នកជំនាន់ថ្មី ដែលសម្រេចចិត្តរស់នៅ និងកសាងជីវភាពនៅក្នុងស្រុកកំណើតរបស់ខ្លួន។ ចំណែក នាយកមជ្ឈមណ្ឌលស្រាវជ្រាវសេដ្ឋកិច្ចជនបទ នៃក្រសួងកសិកម្ម និងកិច្ចការជនបទរបស់ចិន បានកត់សម្គាល់ថា ឧបករណ៍ឌីជីថលក៏កំពុងដើរតួនាទីកាន់តែធំក្នុងការជំរុញការធ្វើកសិកម្មឆ្លាតវៃផងដែរ។ លោកបានមានប្រសាសន៍ថា កាលពីមុន កសិករភាគច្រើនធ្វើកសិកម្មដោយសង្កេតមើលមេឃ និងដី ព្រមទាំងពឹងផ្អែកលើបទពិសោធន៍។ ប៉ុន្តែ អ្វីដែលកំពុងផ្លាស់ប្តូរនាពេលនេះ គឺកសិករចាប់ផ្តើមពឹងផ្អែកលើទិន្នន័យ វិធីសាស្ត្រដោះស្រាយ និងមើលអេក្រង់បច្ចេកវិទ្យាឌីជីថល។ ការផ្លាស់ប្តូរនេះ ទទួលបានការគាំទ្រ តាមរយៈការកែលម្អហេដ្ឋារចនាសម្ព័ន្ធឌីជីថលនៅតាមតំបន់ជនបទ។ ភូមិជាង៩៥ភាគរយ […]

សេអ៊ូល៖ ក្រសួងកសិកម្ម ស្បៀងអាហារ និងកិច្ចការជនបទរបស់កូរ៉េខាងត្បូង គ្រោងបំផ្លាញចោលស្ពៃបូកគោ ចំនួន៣០ ០០០តោន នៅតាមតំបន់ដាំដុះមួយចំនួន បន្ទាប់ពីតម្លៃទីផ្សារក្នុងស្រុកធ្លាក់ចុះខ្លាំងពេក។ បរិមាណប្រមូលផលស្ពៃរបស់កូរ៉េ បានឈានដល់បិរមាណជា១លានតោន កើនឡើង១៩ភាគរយ បើធៀបនឹងឆ្នាំមុន។ ចំណែកផលិតកម្មស្ពៃបូកគោ ដែលគ្រោងចាប់ផ្តើមប្រមូលនៅខែធ្នូ ត្រូវបានព្យាករថា នឹងមានបរិមាណជាង២៦ម៉ឹនតោន កើនឡើង៧ភាគរយ បើធៀបនឹងឆ្នាំមុន និងខ្ពស់ជាងមធ្យមភាគ១១ភាគរយ។ ចាប់ពីថ្ងៃទី១ ដល់ថ្ងៃទី១០ ខែវិច្ឆិកា ឆ្នាំ២០២៦ តម្លៃលក់ដុំស្ពៃបូកគោជាមធ្យមមានប្រហែល១,៣០ដុល្លារក្នុងមួយដុំ ខណៈតម្លៃលក់រាយប្រហែល២,២០ដុល្លារក្នុងមួយដុំ។ ក្រសួងមានបំណងបំផ្លាញចោលស្ពៃបូកគោប្រមាណ៣០ ០០០តោន ដោយផ្តល់សំណងដល់កសិករ ក្នុងតម្លៃខ្ពស់ជាងថ្លៃដើមផលិត។ រដ្ឋាភិបាលកូរ៉េខាងត្បូង ក៏កំពុងពិចារណាទិញស្ពៃបូកគោបន្ថែមផងដែរ ប្រសិនបើតម្លៃនៅតែបន្តធ្លាក់ចុះក្រោយរដូវធ្វើគីមឈី។ កាលពីពាក់កណ្ដាលខែតុលា ឆ្នាំ២០២៦ កូរ៉េបាននាំចេញស្ពៃបូកគោចំនួន៩០តោន ទៅកាន់ទីផ្សារប្រទេសជប៉ុន ដើម្បីកាត់បន្ថយសម្ពាធធ្លាក់ថ្លៃនៅក្នុងស្រុក ព្រមទាំងនាំមកវិញនូវប្រាក់ចំណូលសម្រាប់កសិករកូរ៉េ។ តម្រូវការស្ពៃបូកគោនាំចេញពីប្រទេសកូរ៉េខាងត្បូង បានកើនឡើងនៅក្នុងប្រទេសជប៉ុន បន្ទាប់ពីមានសេចក្តីរាយការណ៍អំពីការរកឃើញសារធាតុថ្នាំហ្វ័រម៉ុលបង្កមហារីក មានជ្រលក់នៅក្នុងស្ពៃបូកគោរបស់ចិន៕ (ផាន់ អាណា)

រ៉ូម៖ អង្គការស្បៀងអាហារ និងកសិកម្មនៃអង្គការសហប្រជាជាតិ បានចេញផ្សាយសៀវភៅណែនាំថ្មីមួយ ដោយអំពាវនាវឱ្យមានការផ្លាស់ប្តូរបច្ចេកទេស និងការអនុវត្តក្នុងផលិតកម្មដំណាំ ដើម្បីបង្កើនផលិតភាពកសិកម្ម ដោយប្រើប្រាស់ធនធានតិចជាងមុន និងកាត់បន្ថយផលប៉ះពាល់ដល់បរិស្ថាន។ សៀវភៅដែលមានចំណងជើងថា «ការបង្កើនប្រសិទ្ធភាព និងការកាត់បន្ថយ៖ ឆ្ពោះទៅរកផលិតកម្មដំណាំប្រកបដោយនិរន្តរភាព» (Optimization and Minimization: Towards Sustainable Plant Production) រៀបរាប់ពីរបៀប ដែលវិទ្យាសាស្ត្រ បច្ចេកវិទ្យា នវានុវត្តន៍ និងគោលនយោបាយគាំទ្រអាចជួយកសិករខ្នាតតូចអាចផលិតស្បៀងអាហារបានច្រើនជាងមុន ព្រមទាំងអាចកាត់បន្ថយការខូចខាតដំណាំ ការបំពុលបរិស្ថាន និងការបំភាយឧស្ម័នផ្ទះកញ្ចក់។ អង្គការស្បៀងអាហារ និងកសិកម្ម បានពិពណ៌នាអំពីវិធីសាស្ត្រនេះថា កសិករគួរផលិតឱ្យបានច្រើន និងមានគុណភាពល្អជាងមុន ដោយប្រើប្រាស់ធនធានតិចជាងមុន។ ការចេញផ្សាយសៀវភៅណែនាំនេះធ្វើឡើងក្នុងពេលប្រព័ន្ធស្បៀងអាហារសកលកំពុងប្រឈមនឹងសម្ពាធកាន់តែខ្លាំងពីការប្រែប្រួលអាកាសធាតុ ការរិចរិលបរិស្ថាន និងការផ្លាស់ប្តូរតម្រូវការរបស់ប្រជាជន។ យោងតាមអង្គការស្បៀងអាហារ និងកសិកម្ម សត្វល្អិតចង្រៃបំផ្លាញផលិតកម្មកសិកម្មនៅទូទាំងពិភពលោកមានរហូតដល់៤០ភាគរយក្នុងមួយឆ្នាំ ដែលបង្ហាញពីភាពចាំបាច់ក្នុងការបង្កើនប្រសិទ្ធភាពការការពារដំណាំតាមវិធីសាស្ត្រមាននិរន្តរភាពជាងមុន។ បច្ចុប្បន្ន ផលិតកម្មដំណាំផ្គត់ផ្គង់ម្ហូបអាហារច្រើនជាង៨ភាគរយនៃតម្រូវការសរុបរបស់ប្រជាជនពិភពលោក ហើយត្រូវបានរំពឹងថា នឹងរួមចំណែកប្រហែល៨០ភាគរយនៃតម្រូវការផលិតកម្មស្បៀងអាហារបន្ថែមនៅត្រឹមឆ្នាំ២០៥០។ អគ្គនាយកអង្គការស្បៀងអាហារ និងកសិកម្ម បានសង្កត់ធ្ងន់ក្នុងសេចក្តីផ្តើមនៃសៀវភៅនេះថា មានភាពចាំបាច់ជាបន្ទាន់ក្នុងការផ្លាស់ប្តូរទៅរកផលិតកម្មដំណាំប្រកបដោយនិរន្តរភាព ដែលអាចបង្កើនផលិតភាព ព្រមទាំងអាចការពារបរិស្ថានថែមទៀត៕ (ផាន់ អាណា)

ម៉ានីល៖ ប្រទេសហ្វីលីពីនបានចុះកិច្ចព្រមព្រៀងពាណិជ្ជកម្មមានតម្លៃសរុប២៧លានដុល្លារ ជាមួយក្រុមហ៊ុនចិន ដែលបើកឱកាសទីផ្សារបន្ថែមទៀតសម្រាប់អ្នកផលិត និងអ្នកនាំចេញផ្លែទុរេនហ្វីលីពីន។ ក្រសួងកសិកម្មហ្វីលីពីន បានឱ្យដឹងថា កិច្ចព្រមព្រៀងទាំងនេះត្រូវបានចុះហត្ថលេខាក្នុងអំឡុងពេលរៀបចំពិព័រណ៍នាំចូលអន្តរជាតិចិន លើកទី៩ ឆ្នាំ២០២៦ ដោយផ្តោតលើកិច្ចសហប្រតិបត្តិការយុទ្ធសាស្ត្រ និងការទិញផ្លែទុរេនបង្កក។ កិច្ចព្រមព្រៀងទីមួយ ក្នុងក្របខ័ណ្ឌសហប្រតិបត្តិការយុទ្ធសាស្ត្ររយៈពេលមួយឆ្នាំ ក្នុងតម្លៃ១៧លានដុល្លារ ដោយទិញផ្លែទុរេនចាប់ពីខែវិច្ឆិកាឆ្នាំ២០២៦ រហូតដល់ខែវិច្ឆិកា ឆ្នាំ២០២៧។ ចំណែកកិច្ចព្រមព្រៀងទីពីរ គឺជាកិច្ចសន្យាទិញផ្លែទុរេនបង្កក មានតម្លៃ១០លានដុល្លារ ចាប់ពីថ្ងៃទី១ ខែវិច្ឆិកា ឆ្នាំ២០២៦ ដល់ថ្ងៃទី៣១ ខែតុលា ឆ្នាំ២០២៧។ ក្រសួងកសិកម្មបានឱ្យដឹងថា ប្រតិបត្តិការក្រោមយុទ្ធសាស្ត្រអភិវឌ្ឍន៍រួមបញ្ចូលគ្នារវាងក្រុមហ៊ុនចិន និងក្រុមហ៊ុនហ្វីលីពីន មានគោលបំណងទិញ និងចែកចាយផ្លែទុរេនបង្កកនៅទូទាំងទីផ្សារប្រទេសចិន ដោយសហការជាមួយកសិករប្រមាណ២ ០០០នាក់។ មន្ត្រីជាន់ខ្ពស់ក្រសួងកសិកម្មហ្វីលីពីន បានមានប្រសាសន៍ថា ប្រតិបត្តិការពាណិជ្ជកម្មទាំងនេះនឹងជួយពង្រីកទីផ្សារសម្រាប់ផលិតផលកសិកម្មក្នុងស្រុក។ ដោយឡែក លោក ហ្វ្រែនស៊ីស្កូ ធៀវ ឡូរ៉ែល (Francisco Tiu Laurel) រដ្ឋមន្ត្រីក្រសួងកសិកម្ម បានមានប្រសាសន៍ថា ឱកាសនាំចេញ ដែលកាន់តែល្អមិនត្រឹមតែជួយបង្កើនប្រាក់ចំណូលរបស់កសិករប៉ុណ្ណោះទេ ប៉ុន្តែថែមទាំងជួយកាត់បន្ថយឱនភាពពាណិជ្ជកម្មកសិកម្មរបស់ប្រទេសហ្វីលីពីនជាមួយប្រទេសចិន។ លោកបានមានប្រសាសន៍ទៀតថា តាមរយៈការពង្រីកទីផ្សារនៅក្រៅប្រទេស ហ្វីលីពីនមិនត្រឹមតែពង្រឹងជំហរពាណិជ្ជកម្មកសិកម្មរបស់ខ្លួន តាមរយៈការបង្កើនចំណូលពីការនាំចេញប៉ុណ្ណោះទេ ប៉ុន្តែថែមទាំងជំរុញការវិនិយោគលើវិស័យកសិកម្មផងដែរ៕ […]

ហ្សាការតា៖ ក្រសួងកិច្ចការដីធ្លី និងនគរូបនីយកម្មរបស់ប្រទេសឥណ្ឌូណេស៊ី បានដកហូតសិទ្ធិប្រើប្រាស់ដីធ្លី របស់ក្រុមហ៊ុនក្នុងស្រុកយ៉ាងហោចណាស់១១ក្រុមហ៊ុន ដែលជាប់ពាក់ព័ន្ធនឹងករណីដុតព្រៃ ដើម្បីទន្ទ្រានយកដីធ្វើជាកម្មសិទ្ធិ។ ក្រុមហ៊ុនត្រូវបានដកហូតសិទ្ធិប្រើប្រាស់ដីទាំងនេះ ដោយផ្អែកលើការពិនិត្យរបស់ក្រសួង និងអនុសាសន៍របស់នាយកដ្ឋានស៊ើបអង្កេតបទល្មើសព្រហ្មទណ្ឌនៃនគរបាលជាតិ ក្រោយពីរកឃើញបទល្មើសដុតបំផ្លាញព្រៃឈើ ដើម្បីវាទយកដីដោយខុសច្បាប់។ រដ្ឋមន្ត្រីក្រសួងកិច្ចការដីធ្លី លោក នូស្រុន វ៉ាហ៊ីដ (Nusron Wahid) បានប្រកាសកាលពីដើមសប្តាហ៍នេះថាប្រធាននាយកដ្ឋានស៊ើបអង្កេតបទល្មើសព្រហ្មទណ្ឌនៃនគរបាលជាតិ បានសុំឱ្យដកហូតសិទ្ធិប្រើប្រាស់ដីដាំដុះរបស់ក្រុមហ៊ុន។ ក្រុមហ៊ុនទាំងនេះ កំពុងគ្រប់គ្រងលើដីសម្បទានមានទំហំសរុបជា១ ៣០០ហិកតា ហើយតំបន់ទាំងនោះធ្លាប់រងគ្រោះដោយសារភ្លើងឆេះព្រៃឈើ និងដីធ្លីជាញឹកញាប់​ ជាពិសេសពាក់ព័ន្ធនឹងករណីភ្លើងឆេះព្រៃក្នុងទ្រង់ទ្រាយធំ ពេលមានរលកកម្ដៅ បង្កឡើងដោយបាតុភូតអែលនីញ៉ូ ឆ្នាំ២០២៦នេះ។ លោករដ្ឋមន្ត្រីបានឱ្យដឹងថា ក្រសួងនឹងមិនចេញសិទ្ធិសម្បទានដីឱ្យក្រុមហ៊ុនទាំងនេះទៀតឡើយ ហើយអាជ្ញាធរនឹងបន្តតាមដានសកម្មភាពរបស់ក្រុមហ៊ុនទាំងនេះ ដើម្បីកុំឱ្យលួចដុតព្រៃទៀត។ កាលថ្ងៃទី២៩ ខែតុលា ឆ្នាំ២០២៦ ភ្នាក់ងារស៊ើបអង្កេតបទល្មើសព្រហ្មទណ្ឌនៃនគរបាលជាតិឥណ្ឌូណេស៊ី បានសុំឱ្យរដ្ឋាភិបាលដកហូតអាជ្ញាបណ្ណអាជីវកម្មក្រុមហ៊ុនចំនួន២៣ ដែលជាប់សង្ស័យថា មានការទទួលខុសត្រូវចំពោះករណីភ្លើងឆេះព្រៃយ៉ាងធ្ងន់ធ្ងរនៅទូទាំងប្រទេសឥណ្ឌូណេស៊ី។ សំណើរនេះត្រូវបានធ្វើឡើងបន្ទាប់ពីការស៊ើបអង្កេតនៅទូទាំងប្រទេសឥណ្ឌូណេស៊ី ដែលបានរកឃើញថា ភ្លើងបានឆាបឆេះព្រៃម្តងហើយម្តងទៀត នៅក្នុងព្រំប្រទល់ដីសម្បទានរបស់ក្រុមហ៊ុនទាំងនេះ។ ទិន្នន័យរបស់នគរបាលឥណ្ឌូណេស៊ី បានបង្ហាញថា មានរបាយការណ៍ផ្លូវការចំនួន១០៤ករណី ពាក់ព័ន្ធនឹងការទទួលខុសត្រូវរបស់ក្រុមហ៊ុនសម្បទាន ដែលធ្វើឱ្យឆេះព្រៃអស់ទំហំសរុបជាង២៩ ០០០ហិកតា៕ (ផាន់ អាណា)

ឡុងដ៍៖ អង្គការសុខភាពពិភពលោក បានស្នើសេចក្តីព្រាងគោលការណ៍ណែនាំថ្មី ដោយជំរុញឱ្យរដ្ឋាភិបាលនានាដាក់ចេញនូវបទប្បញ្ញត្តិគ្រប់គ្រងលើចំណីអាហារ ដែលមានការបន្ថែមសារធាតុពណ៌ សារធាតុផ្តល់ក្លិន និងរសជាតិ ដើម្បីជួយកាត់បន្ថយជំងឺបង្កឡើងពីរបបអាហារ។ យោងតាមសេចក្តីព្រាងគោលការណ៍ណែនាំថ្មីរបស់អង្គការសុខភាពពិភពលោក បានឱ្យដឹងថា បណ្ដារដ្ឋាភិបាលដឹកនាំប្រទេសគួរចេញច្បាប់គ្រប់គ្រងចំណីអាហារបន្ថែមល័ក្ត បន្ថែមក្លិន និងមេស្ករ ដែលត្រូវបានប្រើប្រាស់ក្នុងគោលបំណងទាក់ទាញដល់អ្នកប្រើប្រាស់។ សេចក្តីព្រាងគោលការណ៍ណែនាំនេះ មានគោលបំណងជួយរដ្ឋាភិបាលកំណត់ថា តើចំណីអាហារប្រភេទណាខ្លះ គួរបរិភោគតិចល្មមក្នុងរបបអាហារមានសុខភាពល្អ និងផលិតផលប្រភេទណាខ្លះអាចត្រូវស្ថិតក្រោមវិធានការដូចជាដាក់ស្លាកព្រមាន ឬយកពន្ធខ្ពស់ ដោយអាស្រ័យលើអាទិភាពរបស់ប្រទេសនីមួយៗ។ ប៉ុន្តែសេចក្តីព្រាងនេះ បានធ្វើឱ្យឧស្សាហកម្មចំណីអាហារចេញប្រតិកម្មយ៉ាងខ្លាំង និងភ្លាមៗតែម្តង។ គំរូថ្មីសម្រាប់ចាត់ថ្នាក់ចំណីអាហារតាមលក្ខណៈសមាសធាតុ និងបានផ្សព្វផ្សាយកាលពីសប្តាហ៍មុន គឺជាការងារលើកដំបូងហើយ ដែលទីភ្នាក់ងារសុខភាពរបស់អង្គការសហប្រជាជាតិមួយនេះ បានបញ្ចូលសារធាតុផ្សំប្រភេទនេះទៅក្នុងគោលការណ៍ណែនាំរបស់ខ្លួន។ កន្លងមក គោលការណ៍ណែនាំនេះផ្តោតតែលើសមាសធាតុអាហារូបត្ថម្ភ រួមមានជាតិខ្លាញ់ និងអំបិលប៉ុណ្ណោះ។ មន្ត្រីបច្ចេកទេសនៃនាយកដ្ឋានអាហារូបត្ថម្ភ និងសុវត្ថិភាពចំណីអាហាររបស់អង្គការសុខភាពពិភពលោក បានមានប្រសាសន៍ថា សេចក្តីព្រាងនេះមានវិសាលភាពលើសពីការចាត់ថ្នាក់ចំណីអាហារតាមសារធាតុចិញ្ចឹមបែបធម្មតា ដោយទទួលស្គាល់ថា ការពិចារណាលើចំណីអាហារមិនគួរផ្អែកតែលើបរិមាណសារធាតុចិញ្ចឹមប៉ុណ្ណោះទេ ប៉ុន្តែក៏គួរពិចារណាលើទិដ្ឋភាពផ្សេងៗទៀតនៃរូបមន្តផ្សំរបស់ផលិតផលផងដែរ ដើម្បីបង្ការជំងឺ ដែលបណ្តាលមកពីរបបអាហារមិនត្រឹមត្រូវ។ យោងតាមទិន្នន័យពីការសិក្សាសកលមួយរបស់អង្គការសុខភាពពិភពលោក បានឱ្យដឹងថា របបអាហារមិនល្អ បានធ្វើឱ្យមនុស្សនៅលើសកលលោកស្លាប់ប្រមាណ១១លាននាក់ក្នុងមួយឆ្នាំ។ គំរូថ្មីដែលបានស្នើឡើងនេះ ក៏ជាការព្យាយាមរបស់អង្គការសុខភាពពិភពលោក ក្នុងការផ្តល់ការណែនាំដល់រដ្ឋជាសមាជិក ដើម្បីឱ្យមានគោលការណ៍ច្បាស់លាស់ ក្នុងការពិចារណាអំពីចំណីអាហារកែច្នៃជ្រុលហួស ដែលកំពុងក្លាយជាប្រធានបទចម្រូងចម្រាស់យ៉ាងខ្លាំង។ ចំណីអាហារកែច្នៃជ្រុល គឺជាប្រភេទចំណីអាហារ ឬភេសជ្ជៈ […]

ម៉ានីល៖ធនាគារអភិវឌ្ឍន៍អាស៊ីថា ប្រទេសជាសមាជិកអាស៊ានទាំង១១ រួមមាន ព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី ភូមា ហ្វីលីពីន សិង្ហបុរី ថៃ ទីម័រខាងកើត និងប្រទេសវៀតណាម ត្រូវការទុនវិនិយោគជាង៧ទ្រីលានដុល្លារ សម្រាប់ហេដ្ឋារចនាសម្ព័ន្ធរហូតដល់ឆ្នាំ២០៤០។ ទោះយ៉ាងណា របាយការណ៍ខាងលើនេះមិនបានបញ្ជាក់ពីទំហំទឹកប្រាក់ ដែលប្រទេសនីមួយៗត្រូវការឡើយ។ យោងតាមរបាយការណ៍ថ្មីមួយរបស់ធនាគារអភិវឌ្ឍន៍អាស៊ី (ADB) បានឱ្យដឹងថា បណ្តាប្រទេសក្នុងតំបន់អាស៊ីអាគ្នេយ៍ត្រូវការទុនវិនិយោគជាង៧ទ្រីលានដុល្លារ សម្រាប់អភិវឌ្ឍន៍ហេដ្ឋារចនាសម្ព័ន្ធរហូតដល់ឆ្នាំ២០៤០ ដើម្បីគាំទ្រកំណើនសេដ្ឋកិច្ច ពង្រឹងសន្តិសុខថាមពល និងកសាងសេដ្ឋកិច្ច ដែលមានទំនាក់ទំនងតភ្ជាប់គ្នា និងមានភាពធន់។ លោក ម៉ាសាតូ កាន់ដា ប្រធានធនាគារ ADB បានមានប្រសាសន៍ថា កំណើនរបស់អាស៊ីអាគ្នេយ៍ពឹងផ្អែកលើអ្វី ដែលតំបន់នេះនឹងកសាងបន្តទៀត។ រោងចក្រនានាត្រូវការអគ្គិសនីផ្គត់ផ្គង់បានជាប់លាប់ ហើយអាជីវកម្មត្រូវការមធ្យោបាយដឹកជញ្ជូនលឿន និងមានសុវត្ថិភាពជាងមុន ដើម្បីទៅដល់ទីផ្សារ។ ការវិនិយោគទាំងនេះក៏ត្រូវតែរៀបចំឡើង ដើម្បីផ្តល់ផលប្រយោជន៍ក្នុងរយៈពេលវែងផងដែរ។ ធនាគារ ADB នឹងជួយបណ្តារដ្ឋាភិបាល ដើម្បីជំរុញគម្រោងវិនិយោគអាចទុកចិត្តបាន និងប្រជាជនអាចពឹងផ្អែកបាន។ របាយការណ៍បានប៉ាន់ប្រមាណថា តំបន់នេះត្រូវការទុនវិនិយោគលើហេដ្ឋារចនាសម្ព័ន្ធជាមធ្យមចំនួន៤៧៦ពាន់លានដុល្លារក្នុងមួយឆ្នាំ ចាប់ពីឆ្នាំ២០២៦ ដល់ឆ្នាំ២០៤០ ដែលស្មើនឹង៨,៧ភាគរយ នៃផលិតផលក្នុងស្រុកសរុបរបស់តំបន់នេះ។ ការវាយតម្លៃនេះឆ្លុះបញ្ចាំងពីតម្រូវការកាន់តែកើនឡើងរបស់ប្រទេសក្នុងតំបន់អាស៊ីអាគ្នេយ៍ចំពោះហេដ្ឋារចនាសម្ព័ន្ធទំនើប […]

ហូជីមិញ៖ អាជ្ញាធរខេត្តដុងថាប់ ភាគខាងត្បូងវៀតណាម ដែលមានព្រំប្រទល់ជាប់ខេត្តកណ្តាល ខេត្តព្រៃវែង គ្រោងរៀបចំពិធីជួបជុំអ្នកចិញ្ចឹមត្រីប្រា និងអបអរសាទរមុខរបរចិញ្ចឹមត្រីប្រារបស់វៀតណាម ដើម្បីលើកកម្ពស់ឧស្សហកម្មចិញ្ចឹមត្រីរបស់ប្រទេវៀតណាម។ ពិធីនេះនឹងប្រព្រឹត្តទៅពីថ្ងៃទី៣ ដល់ថ្ងៃទី៦ ខែធ្នូ ឆ្នាំ២០២៦ នៅក្នុងទីប្រជុំជនខេត្តដុងថាប់ រៀបចំឡើងដោយក្រសួងកសិកម្ម និងបរិស្ថាន ព្រមទាំងអាជ្ញាធរមកពីតំបន់ផ្សេងទៀត ដែលមានការចិញ្ចឹមត្រីប្រាច្រើន រួមមាន ខេត្តអានយ៉ាង ទីក្រុងកាន់ថឺ និងខេត្តវិញឡុង ព្រមទាំងមានការចូលរួមពីក្រុមហ៊ុន សហគ្រាសផលិត សហកគមន៍កសិកម្ម អ្នកចិញ្ចឹមវារីសត្វ អ្នកផ្គត់ផ្គង់ធាតុចូលសម្រាប់ផលិតកម្ម រោងចក្រកែច្នៃ និងអ្នកចែកចាយផលិតផលទាំងក្នុងប្រទេសវៀតណាម និងមកពីក្រៅប្រទេសផងដែរ។ ពិធីបុណ្យនេះនឹងរៀបចំឡើងក្រោមប្រធានបទ ពីទន្លេមេគង្គទៅដល់តុបាយជុំវិញពិភពលោក ក្នុងគោលបំណងបង្ហាញពីការផ្លាស់ប្តូរជាវិជ្ជមាននៃឧស្សាហកម្មចិញ្ចឹមត្រីប្រា និងបង្ហាញពីការប្តេជ្ញាចិត្តក្នុងការលើកកម្ពស់គុណភាពផលិតកម្ម ប្រសិទ្ធភាព និងនិរន្តរភាពបរិស្ថាន។ ខេត្តដុងថាប ក៏មានបំណងធ្វើឱ្យព្រឹត្តិការណ៍នេះជួយជំរុញការអភិវឌ្ឍសង្គមប្រកបដោយបរិយាបន្ន លើកកម្ពស់ជីវភាពរស់នៅ ពង្រឹងសមធម៌សង្គម និងកាត់បន្ថយហានិភ័យបរិស្ថាន ព្រមទាំងសម្ពាធលើធនធានប្រព័ន្ធអេកូឡូស៊ី នៅក្នុងប្រទេសវៀតណាម។ ពិធីបុណ្យនេះនឹងផ្តល់ឱកាសសម្រាប់បង្ហាញពីសក្តានុពល និងចំណុចខ្លាំងនៃឧស្សាហកម្មចិញ្ចឹមត្រីប្រាក្នុងតំបន់ ព្រមទាំងពង្រឹងទំនាក់ទំនងរវាងតួអង្គនានានៅទូទាំងខ្សែច្រវាក់ផ្គត់ផ្គង់ ចាប់ពីការចិញ្ចឹម ការកែច្នៃ រហូតដល់ការចែកចាយ។ ព្រឹត្តិការណ៍នេះក៏មានគោលបំណងជួយឱ្យអ្នកចិញ្ចឹមត្រូវយល់ដឹងពីលក្ខខណ្ឌនាំចូល ដែលកាន់តែតឹងរ៉ឹងនៅក្នុងទីផ្សារក្នុងស្រុក និងអន្តរជាតិ។ ខេត្តដុងថាប គឺជាខេត្តឈានមុខគេរបស់វៀតណាមទាំងផ្នែកផ្ទៃដីចិញ្ចឹមត្រីប្រា និងសមត្ថភាពកែច្នៃសម្រាប់ការនាំចេញ។ ខេត្តនេះមានរោងចក្រកែច្នៃផលិតផលជលផលចំនួន៨០ […]

ម៉ានីល៖ ក្រសួងកសិកម្មហ្វីលីពីន បានហាមឃាត់ការនាំចូលសាច់ជ្រូកមួយចំនួន បន្ទាប់ពីការស៊ើបអង្កេតបានរកឃើញថា ការនាំចូលជាបន្តបន្ទាប់កំពុងបង្កការខូចខាតដល់ឧស្សាហកម្មចិញ្ចឹមជ្រូកក្នុងប្រទេស។ យោងតាមបទបញ្ជា ក្រសួងបានដាក់កំហិតលើបរិមាណនាំចូលសាច់ជ្រូកចំនួន ៩ ប្រភេទ ក្នុងរយៈពេល៦០ថ្ងៃ ជាវិធានការការពារបណ្តោះអាសន្ន។ ផលិតផលដែលស្ថិតក្រោមការហាមឃាត់ រួមមាន ជ្រូកទាំងមូល និងពាក់កណ្តាល សាច់ជ្រូកស្រស់ ត្រជាក់ និងបង្កក។ សាច់ភ្លៅ សាច់ស្មា និងសាច់ជ្រូកជាឆ្ងឹងកាត់ជាដុំៗ។ គ្រឿងក្នុងជ្រូក និងថ្លើមជ្រូក ទាំងស្រស់ ត្រជាក់ និងបង្កក។ ក្រសួងកសិកម្មបានឱ្យដឹងថា ភស្តុតាងជាបឋមបង្ហាញថា ការកើនឡើងយ៉ាងខ្លាំងនៃការនាំចូលសាច់ជ្រូក គឺជាមូលហេតុចម្បងមួយ ដែលបង្កការខូចខាតយ៉ាងធ្ងន់ធ្ងរដល់អ្នកចិញ្ចឹមជ្រូកក្នុងស្រុក។ ក្រសួងក៏បានព្រមានថា ប្រសិនបើពន្យារពេលមិនព្រមចាត់វិធានការ វាអាចបណ្តាលឱ្យឧស្សាហកម្មចិញ្ចឹមជ្រូកអាចរងការខូចខាតមិនអាចស្តារឡើងវិញបាន។ ក្រសួងកសិកម្មបានបញ្ជាក់ថា ការកើនឡើងនៃការនាំចូលសបានធ្វើវត្តមានសាច់ជ្រូកនៅតាមទីផ្សារកើនឡើងយ៉ាងខ្លាំង ខណៈអត្រាផលិតគ្រប់គ្រាន់ដោយខ្លួនឯងរបស់ប្រទេសហ្វីលីពីនបានធ្លាក់ចុះគួរឱ្យកត់សម្គាល់ក្នុងអំឡុងពេលស៊ើបអង្កេត ដែលបានធ្វើឱ្យផលិតកម្មក្នុងស្រុកឱ្យថយចុះជាបន្តបន្ទាប់ក្នុងរយៈពេលប៉ុន្មានឆ្នាំមកនេះ។ វិធានការនេះត្រូវបានដាក់ចេញបន្ទាប់ពីក្រសួងកសិកម្មហ្វីលីពីន បានស៊ើបអង្កេតលើវិធានការការពារឧស្សាហកម្មក្នុងស្រុក សម្រាប់រយៈពេលពីឆ្នាំ២០២១ ដល់ឆ្នាំ២០២៥។ ការស៊ើបអង្កេតបានរកឃើញថា ការនាំចូលសាច់ជ្រូកបានកើនឡើងដល់បិរមាណជាង៨៣ម៉ឺនតោន ក្នុងឆ្នាំ២០២៥ បើធៀបនឹងបរិមាណជិត៦០ម៉ឺនតោន ក្នុងឆ្នាំ២០២៣។ សាច់ជ្រូកនាំចូលបានក្លាយជាអ្នកផ្គត់ផ្គង់ដ៏ធំជាងសាច់ជ្រូកក្នុងស្រុក។ ក្រសួងកសិកម្ម បានបញ្ជាក់ថា ការនាំចូលលើសកម្រិត និងការប្រមូលស្តុកសាច់ជ្រូកបង្កកកាន់តែច្រើន បានធ្វើឱ្យតម្លៃជ្រូករស់នៅតាមកសិដ្ឋានធ្លាក់ចុះយ៉ាងខ្លាំង ក្នុងឆ្នាំ២០២៦៕ (ផាន់ […]

ហាណូយ៖ អ្នកនាំចេញផលិតផលចំណីអាហាររបស់វៀតណាមទៅកាន់ប្រទេសចិន នឹងត្រូវអនុវត្តតាមលក្ខខណ្ឌចុះបញ្ជី ឱ្យស្របតាមច្បាប់របស់អគ្គនាយកដ្ឋានគយចិន ដែលទាមទារព័ត៌មានចុះបញ្ជីមានភាពត្រឹមត្រូវ និងអនុវត្តតាមវិធានការត្រួតពិនិត្យសុវត្ថិភាពចំណីអាហារ និងប្រព័ន្ធតាមដានប្រភពដើមផលិតផល កាន់តែតឹងតែងជាងមុន។ យោងតាមសេចក្តីប្រកាស បានឱ្យដឹងថា អគ្គនាយកដ្ឋានគយចិន បានធ្វើវិសោធនកម្មច្បាប់ ស្តីពីការចុះបញ្ជីអ្នកនាំចូល និងអ្នកនាំចេញផលិតផលចំណីអាហារ។ ច្បាប់នេះអនុវត្តចំពោះក្រុមហ៊ុននៅក្រៅប្រទេស ដែលនាំចេញចំណីអាហារទៅកាន់ប្រទេសចិន និងភ្នាក់ងាររបស់ក្រុមហ៊ុន ព្រមទាំងអ្នកនាំចូលចំណីអាហារក្នុងប្រទេសចិនផងដែរ។ ក្រោមវិធានការថ្មីនេះ អ្នកនាំចេញនៅក្រៅប្រទេស និងភ្នាក់ងារស្ថិតក្រោមច្បាប់នេះ ត្រូវចុះបញ្ជីជាមួយអគ្គនាយកដ្ឋានគយចិន ហើយត្រូវទទួលខុសត្រូវចំពោះការពិត ភាពត្រឹមត្រូវ និងព័ត៌មានលម្អិត ដែលខ្លួនបានប្រកាស។ ទម្រង់បែបបទចុះបញ្ជី ដែលបានកែសម្រួលថ្មី ត្រូវបានធ្វើឱ្យមានលក្ខណៈសាមញ្ញជាងមុន ដោយកាត់បន្ថយចំនួនព័ត៌មាន ដែលត្រូវបំពេញពី២០ មកនៅសល់ត្រឹម១០ប៉ុណ្ណោះ។ ពាក្យស្នើសុំចុះបញ្ជី សំណើសុំកែប្រែព័ត៌មានចុះបញ្ជី និងសំណើសុំលុបចោលការចុះបញ្ជី អាចដាក់តាមប្រព័ន្ធអនឡាញ តាមរយៈប្រព័ន្ធច្រកចេញចូលតែមួយសម្រាប់ពាណិជ្ជកម្មអន្តរជាតិរបស់ប្រទេសចិន។ អាជ្ញាធរគយចិននឹងបញ្ចប់នីតិវិធីចុះបញ្ជីក្នុងរយៈពេលបី បន្ទាប់ពីទទួលបានពាក្យស្នើសុំ ដែលមានព័ត៌មានគ្រប់គ្រាន់ និងមានឯកសារត្រឹមត្រូវ។ ប្រសិនបើពាក្យស្នើសុំណាមួយមិនបំពេញតាមលក្ខខណ្ឌតម្រូវ អាជ្ញាធរគយត្រូវជូនដំណឹងដល់អ្នកដាក់ពាក្យក្នុងរយៈពេលបីថ្ងៃដូចគ្នា។ ចំណែកក្រុមហ៊ុន ដែលបានចុះបញ្ជីរួចហើយ ត្រូវជូនដំណឹងដល់អាជ្ញាធរគយមានសមត្ថកិច្ចអំពីការផ្លាស់ប្តូរព័ត៌មានចុះបញ្ជីរបស់ខ្លួន ក្នុងរយៈពេល៦០ថ្ងៃ បន្ទាប់ពីមានការផ្លាស់ប្តូរនោះ។ លោក ង៉ោ ស្វឹន ណាម (Ngô Xuân Nam) […]

គូឡាឡាំពួរ៖ ដោយសារប្រទេសម៉ាឡេស៊ីនាំចូលចំណីអាហារមានតម្លៃប្រមាណ ១៧ ពាន់លានដុល្លារក្នុងមួយឆ្នាំ វិស័យផលិតកម្មក្នុងស្រុកនៅមានឱកាសពង្រីកតួនាទីរបស់ខ្លួនឱ្យកាន់តែធំក្នុងការធានាសន្តិសុខស្បៀង ជាពិសេសក្នុងវិស័យបសុបក្សី និងផលិតផលចំណីអាហារកែច្នៃ។ ក្រុមហ៊ុនម៉ាឡេស៊ីមួយ ដែលសកម្មក្នុងវិស័យបសុបក្សីរួចហើយ កំពុងមានគម្រោងបង្កើនសមត្ថភាពកែច្នៃផលិតផលបសុបក្សីរបស់ខ្លួន និងពង្រីកទៅកាន់ផ្នែកផលិតផលចំណីអាហារថ្មីៗបន្ថែមទៀត ដើម្បីពង្រឹងការផ្គត់ផ្គង់ចំណីអាហារក្នុងស្រុករបស់ម៉ាឡេស៊ី និងអភិវឌ្ឍអាជីវកម្មចំណីអាហារក្នុងតំបន់ឱ្យមានសមត្ថភាពប្រកួតប្រជែងកាន់តែខ្ពស់។ អនុប្រធានក្រុមប្រឹក្សាភិបាលប្រតិបត្តិ និងជានាយកគ្រប់គ្រងក្រុមហ៊ុន បានមានប្រសាសន៍ថា ក្រុមហ៊ុនមានផែនការជាច្រើន រួមមានការបង្កើតកសិដ្ឋានចិញ្ចឹមបសុបក្សី បង្កើនស្តុកគ្រាប់ធញ្ញជាតិ ពង្រីករោងចក្រកែច្នៃចំណីអាហារ និងវិនិយោគលើការចិញ្ចឹមបង្គា។ លោកបានមានប្រសាសន៍ថា ការប្រើប្រាស់សាច់បសុបក្សីជាមធ្យមក្នុងមនុស្សម្នាក់នៅម៉ាឡេស៊ីមានចំនួន៥ គីឡូក្រាម ក្នុងមួយឆ្នាំ។ ចំណែកក្នុងវិស័យជលផល ការប្រើប្រាស់ផលិតផលជលផលជាមធ្យមក្នុងមនុស្សម្នាក់មានចំនួន៥១គីឡូក្រាម។ លោកបានពន្យល់ថា ក្នុងផ្នែកផលិតកម្មបសុបក្សី ក្រុមហ៊ុនអាចប្រមូលយកផលិតផលបន្ទាប់បន្សំប្រមាណ៣០ភាគរយ មកប្រើប្រាស់ឡើងវិញ ដូចជា ឈាម និងរោមបក្សី ដែលមានជាតិប្រូតេអ៊ីន និងអាស៊ីតអាមីណូខ្ពស់ ហើយអាចយកទៅប្រើប្រាស់ជាគ្រឿងផ្សំក្នុងចំណីសត្វបាន។ បច្ចុប្បន្ន រោងចក្រកែច្នៃដំណាក់កាលដំបូងរបស់ក្រុមហ៊ុនអាចកែច្នៃបក្សីបានប្រមាណ ២០ម៉ឺន ក្បាលក្នុងមួយថ្ងៃ ហើយក្រុមហ៊ុនមានគោលដៅបង្កើនសមត្ថភាពនេះដល់៤០ម៉ឺន ក្បាលក្នុងមួយថ្ងៃ។ ចំពោះប្រតិបត្តិការចិញ្ចឹមបង្គា ក្រុមហ៊ុនកំពុងសហការជាមួយក្រុមហ៊ុនមួយចំនួននៅប្រទេសចិន ដោយផ្តោតសំខាន់លើរូបមន្តចំណីបង្គា និងការអភិវឌ្ឍគំរូសាកល្បង ដើម្បីបញ្ជាក់ពីលទ្ធភាពអនុវត្តជាក់ស្តែងនៃប្រព័ន្ធចិញ្ចឹមបង្គា។ ដើម្បីគាំទ្រដល់ការបង្កើនបរិមាណផលិតកម្ម ក្រុមហ៊ុនក៏កំពុងសហការជាមួយដៃគូបណ្តាក់ទុន រួមគ្នារបស់ខ្លួន គឺក្រុមហ៊ុន ថៃសាន់​ ហ្វូដ (Tyson […]