អន្តរជាតិ

ម៉ានីល៖ ក្រសួងកសិកម្មហ្វីលីពីន នៅថ្ងៃទី១៤ ខែមីនា ឆ្នាំ២០២៦ បានធានាថា វិធានការកាត់បន្ថយផលប៉ះពាល់ ដែលអាចកើតមានករណីអាក្រក់បំផុតនៃការឡើងថ្លៃប្រេងឥន្ធនៈជាបន្តបន្ទាប់ ដោយសារសង្គ្រាមកំពុងបន្តនៅមជ្ឈិមបូព៌ា។ ក្នុងអំឡុងពេលសួរដេញដោលគណៈកម្មាធិការឆ្លើយតប និងត្រួតពិនិត្យសម្រាប់យុទ្ធសាស្ត្រដោះស្រាយវិបត្តិទាន់ពេលវេលា និងមានប្រសិទ្ធភាព រដ្ឋមន្ត្រីក្រសួងកសិកម្ម លោក ហ្វ្រេស៊ីស្កូ ធៀវ ឡូរ៉ែល (Francisco Tiu Laurel) បានមានប្រសាសន៍ថា កិច្ចខិតខំប្រឹងប្រែងកំពុងដំណើរការដើម្បីទប់ស្កាត់ផលប៉ះពាល់ដល់កសិករ អ្នកនេសាទ និងអ្នកប្រើប្រាស់នៅក្នុងប្រទេសហ្វីលីពីន។ លោកបានមានប្រសាសន៍ដូច្នេះថា សន្តិសុខស្បៀងមិនត្រឹមតែជាបញ្ហារបស់កសិកម្មប៉ុណ្ណោះទេ វាគឺជាស្ថិរភាពជាតិ។​ ទោះបីជាតម្លៃបច្ចុប្បន្ននៃទំនិញកសិកម្មចាំបាច់មួយចំនួននៅក្នុងកម្រិតមុនជម្លោះក៏ដោយ ក៏ក្រសួងកសិកម្មបានព្យាករពីការកើនឡើងតម្លៃទំនិញ ប្រសិនបើតម្លៃប្រេងឆៅពិភពលោកឡើងដល់២០០ ដុល្លារក្នុងមួយធុងបារ៉ែល ហើយភាពតានតឹងនៅតែបន្តរហូតដល់១៨០ថ្ងៃទៀត។ លោក ហ្វ្រេស៊ីស្កូ ធៀវ ឡូរ៉ែល បានបន្ថែមថា ទីភ្នាក់ងារក្រសួងកសិកម្មហ្វីលីពីនមានវិធានចំនួនប្រាំមួយជំហាន ដើម្បីដោះស្រាយការកើនឡើងនៃថ្លៃប្រេងឥន្ធនៈ ជី ការដឹកជញ្ជូន និងថ្លៃភស្តុភារកម្មជាដើម។ លោកបានមានប្រសាសន៍ថា ការឆ្លើយតបរបស់យើងមានអាទិភាពចំនួនប្រាំមួយ។ ទីមួយ ពង្រឹងផលិតកម្មក្នុងស្រុកដោយគាំទ្រដល់ដំណាំសំខាន់ៗ ចែកចាយគ្រាប់ពូជដែល្អ និងធន់នឹងអាកាសធាតុ និងកែលម្អសេវាកម្មពង្រីក។ ទីពីរ កាត់បន្ថយការចំណាយលើធាតុចូល ដោយការឧបត្ថម្ភធនប្រេងឥន្ធនៈ ការប្រើប្រាស់ជីជីវៈ ជីសរីរាង្គ និងធ្វើពិពិធកម្មប្រភពជី។ […]

ហ្សាការតា៖ ក្រសួងកសិកម្មឥណ្ឌូណេស៊ី កំពុងលើកទឹកចិត្តដល់កសិកររបស់ខ្លួនឱ្យប្រើប្រាស់ពូជស្រូវណាអាចស៊ូទ្រាំនឹងគ្រោះរាំងស្ងួត ខណៈរដូវប្រាំងឆ្នាំ២០២៦ ត្រូវបានព្យាករណ៍ថា នឹងចូលមកដល់ឆាប់ជាងបណ្តាឆ្នាំមុនៗ។ រដ្ឋមន្ត្រីក្រសួងកសិកម្ម ឥណ្ឌូណេស៊ី លោក អានឌី អាំរ៉ាន ស៊ូឡៃម៉ាន (Andi Amran Sulaiman) បានណែនាំដល់រដ្ឋាភិបាលក្នុងតំបន់ទាំងអស់ឱ្យចាត់វិធានការបង្ការជាបន្ទាន់ រាប់ចាប់ពីការធ្វើផែនទីតំបន់ងាយរងគ្រោះដោយគ្រោះរាំងស្ងួត រហូតដល់ការពង្រឹងប្រព័ន្ធគ្រប់គ្រងព្រមាន។ លោករដ្ឋមន្ត្រីបានមានប្រសាសន៍នៅក្នុងសេចក្តីថ្លែងការណ៍មួយ កាលពីថ្ងៃសប្តាហ៍មុនថា កសិករត្រូវប្រើប្រាស់ពូជស្រូវណា ដែលស្រាលឆាប់ចេញផ្លែ និងធន់នឹងគ្រោះរាំងស្ងួត ឬពូជស្រដៀងគ្នាផ្សេងទៀត ដើម្បីរក្សាកម្រិតផលិតកម្មក្នុងគ្រោះរាំងស្ងួតមុនរដូវប្រាំងចូលមកដល់។ លើសពីនេះ ក្រសួងកសិកម្មកំពុងជំរុញការគ្រប់គ្រងទឹកឱ្យកាន់តែប្រសើរឡើងតាមរយៈប្រព័ន្ធធារាសាស្ត្រ ម៉ាស៊ីនបូមទឹក និងបំពង់ទឹក ក៏ដូចជាការពន្លឿនកាលវិភាគនៃការដាំដុះនៅក្នុងមជ្ឈមណ្ឌលផលិតកម្មស្រូវផ្សេងៗ។ ចំណែកទីភ្នាក់ងារឧតុនិយម អាកាសធាតុ និងភូគព្ភសាស្ត្រ បានព្យាករណ៍ថា រដូវប្រាំងនឹងមកដល់ឆាប់ៗនេះ នៅតាមតំបន់មួយចំនួនក្នុងប្រទេសឥណ្ឌូណេស៊ី រួមមានផ្នែកខ្លះនៃកោះស៊ូម៉ាត្រា កោះជ្វា កោះបាលី កោះនូសាតេងការ៉ា និងកោះកាលីម៉ាន់តាន់ ភាគខាងត្បូង និងភាគខាងកើត កោះស៊ូឡាវ៉េស៊ី កោះម៉ាលូគូ និងផ្នែកខ្លះនៃកោះប៉ាពួ នៃប្រទេសឥណ្ឌូណេស៊ី។ លោករដ្ឋមន្ត្រីបានព្រមានថា “លក្ខខណ្ឌអាកាសធាតុបែបនេះអាចបង្កឱ្យមានគ្រោះរាំងស្ងួតលើផ្ទៃដីកសិកម្ម ប្រសិនបើមិនបានគិតទុកជាមុន។” ព្រមជាមួយគ្នានេះដែរ ប្រធានទីភ្នាក់ងារជំនាញរបស់ក្រសួងកសិកម្ម បានពន្យល់ថា ក្រសួងបានបង្កើតពូជស្រូវល្អៗជាច្រើនប្រភេទ ដែលអាចសម្របខ្លួនទៅនឹងលក្ខខណ្ឌគ្រោះរាំងស្ងួត។ […]

ប៉ារីស៖ សង្គ្រាមនៅមជ្ឈិមបូព៌ា និងការបិទច្រកសមុទ្រ ប័រមូស (Hormuz )ដែលជាច្រកយុទ្ធសាស្ត្រសម្រាប់ពាណិជ្ជកម្មពិភពលោក កំពុងបង្កការរំខានយ៉ាងខ្លាំងដល់លំហូរពាណិជ្ជកម្មនៅលើពិភពលោក។ ជាលទ្ធផល ការដឹកជញ្ជូនស្បៀងអាហារមួយចំនួនបានជាប់គាំង ដូចករណីផ្លែប៉ោមបារាំងដែរ។ កុងតឺន័រជាង២៥០ទូ និងមានផ្លែប៉ោមសរុបប្រហែល៥ ០០០តោន ដែលកំពុងជាប់គាំងនៅលើផ្ទៃសមុទ្រ ដោយមានតម្លៃប៉ាន់ស្មានចន្លោះពីប្រាំបី និង៩,២លានដុល្លារ។ បន្ថែមលើស្ថានភាពនេះ គឺការចំណាយជាច្រើនសម្រាប់ក្រុមហ៊ុនដឹកជញ្ជូន ដែលជាប់ទាក់ទងនឹងហានិភ័យសង្រ្គាម រួមទាំងកុងតឺន័រ ដែលមានស្រាប់នៅលើផ្ទៃទឹកសមុទ្រ។ ប្រធានទំនាក់ទំនងសាធារណៈនៃសមាគមដាំប៉ោមរបស់បារាំង បានពន្យល់ថា ការដឹកជញ្ជូន និងថ្លៃថែទាំផ្លែប៉ោមនៅលើកប៉ាល់ត្រូវចំណាយប្រាក់រហូតជាងមួយលានដុល្លារ ដែលជាការចំណាយបន្ថែមរបស់បារាំង។ បន្ថែមលើការចំណាយបន្ថែមទាំងនេះ គឺជាបញ្ហានៃការធានារ៉ាប់រងហានិភ័យនៃសង្រ្គាម គ្របដណ្តប់ទាំងការបាត់ទំនិញ ឬ ការចំណាយខ្ពស់ពេក។ ប្រឈមមុខនឹងឧបសគ្គទាំងនេះ ប្រតិបត្តិករកំពុងព្យាយាមស្វែងរកជម្មើសថ្មី ដោយអ្នកនាំចេញផ្លែប៉ោមបារាំងកំពុងស្វែងរកមធ្យោបាយដើម្បីដឹកជញ្ជូនកុងតឺន័ររបស់ពួកគេ ប៉ុន្តែត្រូវការពេលប្រហែលដប់ថ្ងៃទើបធ្វើដំណើរទៅដល់ដៅអាស៊ី។ តាមការវាយតម្លៃសម្រាប់ទីផ្សារផ្លែប៉ោមឆ្នាំ២០២៥-២០២៦ – ខែមីនាជាធម្មតាជាខែដ៏សំខាន់សម្រាប់ការប្រើប្រាស់ផ្លែប៉ោម ដែលមើលទៅមិនគួរឱ្យមានសង្ឃឹមសោះ ព្រោះរហូតមកដល់ពេលនេះ ការប្រើប្រាស់ផ្លែប៉ោមនៅតែបន្តធ្លាក់ចុះចាប់តាំងពីដើមរដូវប្រមូល។ កម្រិតតម្លៃទាំងនេះជះឥទ្ធិពលផ្ទាល់លើការប្រើប្រាស់ ហើយសង្គ្រាមនៅមជ្ឈិមបូព៌ាក៏កំពុងបង្កការព្រួយបារម្ភផងដែរ។ ជាពិសេស តម្លៃថាមពលកំពុងតែឡើងខ្ពស់ ដូច្នេះពាណិជ្ជករត្រូវចំណាយបន្ថែមទៀតដែរ៕

សិង្ហបុរី៖ ទីភ្នាក់ងារសុវត្ថិភាពចំណីអាហារ និងទីភ្នាក់ងារទប់ស្កាត់ជំងឺឆ្លងរបស់ប្រទេសសិង្ហបុរី បានប្រកាសកាលពីថ្ងៃទី១៨ ខែមីនា ឆ្នាំ២០២៦ថា ខ្លួនបានរកឃើញម៉ាកម្សៅទឹកដោះគោពីរឡូដិ៍មានផ្ទុកសារធាតុពុល សេរឺលីដ (Cereulide )ហើយត្រូវបានប្រមូលយកមកវិញ ដោយមិនបណ្តោយឱ្យលក់ចែកចាយឡើយ។ បើតាមការចុះផ្សាយរបស់សារព័ត៌មាន Channel News Asia ជាតិពុលនេះអាចបង្កឱ្យមានអាការៈចង់ក្អួត និងចង្អោរ។ វាត្រូវបានគេរកឃើញនៅក្នុងម្សៅទឹកដោះគោ ម៉ាក Nestle NAN HA2 សម្រាប់ទារក និងម្សៅទឹកដោះគោ Nature One Dairy Premium Toddler សម្រាប់កុមារអាយុលើសពីមួយឆ្នាំ។ ម្សៅទឹកដោះគោម៉ាក់ Nestle នឹងផុតសុពលភាពប្រើប្រាស់នៅថ្ងៃទី៣១ ខែតុលា ឆ្នាំ២០២៧ រីឯម្សៅទឹកដោះគោ Nature One Dairy កាលបរិច្ឆេទផុតកំណត់នៅថ្ងៃទី១០ ឬថ្ងៃទី១១ ខែវិច្ឆិកា ឆ្នាំ២០២៧។ ចាប់តាំងពីថ្ងៃទី៨ ខែមករា ឆ្នាំ២០២៦ ផលិតផលម្សៅទឹកដោះគោ ដែលត្រូវបានប្រមូលមកវិញដោយសាររកឃើញជាតិពុល រួមមានផលិតផលម៉ាក Nestle NAN, Nature One Dairy និង Dumex […]

ម៉ានីល៖ ប្រទេសហ្វីលីពីន កំពុងពិភាក្សាជាមួយក្រុមហ៊ុនផលិតជីធំៗ រួមមានចិន និងរុស្ស៊ី ដើម្បីការពារការផ្គត់ផ្គង់ ព្រោះខ្លាចអ្នកនាំចេញមិនទទួលបានកិច្ចសន្យា ដោយសារសង្គ្រាមនៅមជ្ឈិមបូព៌ាធ្វើឱ្យតម្លៃឡើងខ្ពស់។ រដ្ឋមន្ត្រីក្រសួងកសិកម្មហ្វីលីពីន លោក ហ្វ្រេនសីស្កូ ធៀវ ឡូរ៉េល (Francisco Tiu Laurel) បានមានប្រសាសន៍ថា លោកនឹងជួបជាមួយឯកអគ្គរដ្ឋទូតចិន ប្រចាំទីក្រុងម៉ានីល លោក ជីង គួន (Jing Quan) ដែលបានធានាថា ទីក្រុងប៉េកាំងនឹងមិនផ្អាកការនាំចេញឡើយ។ លោកបានបន្តថា ស្តុកជីរបស់ប្រទេសហ្វីលីពីន នៅមានគ្រប់គ្រាន់ ដើម្បីប្រើប្រាស់រហូតដល់ខែឧសភា។ លោករដ្ឋមន្ត្រីបានបញ្ជាក់ទៀតថា លោកក៏កំពុងពិភាក្សាជាមួយឥណ្ឌា រុស្ស៊ី និងនិយាយជាមួយប្រទេសបេឡារុស ដើម្បីឱ្យបន្តលក់ជីឱ្យប្រទេសហ្វីលីពីន។ កសិករនៅទូទាំងពិភពលោក កំពុងប្រញាប់ប្រញាល់ស្វែងរកជី បន្ទាប់ពីច្រកសមុទ្រ ហ័រមូស (Hormuz) ត្រូវបានបិទមិនឱ្យដឹកទំនិញឆ្លងកាត់ ហើយបានធ្វើឱ្យតម្លៃហ្គាសកើនឡើងយ៉ាងគំហុក។ នៅអាស៊ីអាគ្នេយ៍ តម្លៃអ៊ុយរ៉េ បានកើនឡើងប្រហែល៤០ភាគរយ ចាប់តាំងពីការផ្ទុះសង្គ្រាម។ រោងចក្រផលិតជីអ៊ុយរ៉េមួយចំនួន នៅក្នុងប្រទេសឥណ្ឌា និងបង់ក្លាដែស បានផ្អាកដំណើរការផលិតដោយសារការផ្គត់ផ្គង់ឧស្ម័នធ្លាក់ចុះ ខណៈពេលប្រទេសចិនក៏បានរឹតបន្តឹងលើការនាំចេញជី។ កង្វះខាតជីណាមួយនៅក្នុងប្រទេសហ្វីលីពីន អាចប៉ះពាល់ដល់ដំណាំស្រូវ ដែលជាអាហារចម្បងរបស់ប្រទេស ក៏ដូចជាប៉ះពាល់ដល់ការនាំចេញប្រេងដូង […]

ហ្សាការតា៖ ក្រសួងកសិកម្មឥណ្ឌូណេស៊ី  កំពុងស្វែងរកការវិនិយោគ ដើម្បីអភិវឌ្ឍកសិដ្ឋានចិញ្ចឹមគោខ្នាតធំ នៅខេត្តកាលីម៉ាន់តាន់ភាគកណ្តាល (Kalimantan)  ដោយកំណត់គោលដៅបង្កើនសត្វគោរហូតដល់២០០ ០០០ក្បាល ដែលជាផ្នែកមួយនៃប្រព័ន្ធអេកូឡូស៊ីអាជីវកម្មរួមបញ្ចូលគ្នា ដើម្បីធានាបាននូវការផ្គត់ផ្គង់សាច់គោនៅក្នុងប្រទេស។ រដ្ឋមន្ត្រីក្រសួងកសិកម្ម ឥណ្ឌូណេស៊ី លោក អានឌី អាំរ៉ាន់ ស៊ូឡៃម៉ាន (Andi Amran Sulaiman) បាននិយាយនៅក្នុងសេចក្តីថ្លែងការណ៍មួយកាលពីសប្តាហ៍មុនថា ផែនការនេះ គាំទ្រដល់ការជំរុញរបស់ប្រទេសឥណ្ឌូណេស៊ី ក្នុងការទទួលបានភាពគ្រប់គ្រាន់ខាងសាច់ និងទឹកដោះគោ ខណៈពេលកំពុងសាងសង់មជ្ឈមណ្ឌលផលិតកម្មបសុសត្វដ៏ទំនើប ដែលពឹងផ្អែកទាំងស្រុកលើភាពជាដៃគូវិនិយោគ។ គម្រោងនេះនឹងបង្កើតនៅខេត្តកាលីម៉ាន់តាន់ ដែលកសិដ្ឋានចិញ្ចឹមគោចម្រុះ នឹងត្រូវបានអភិវឌ្ឍលើផ្ទៃដីប្រហែល៤០ ០០៦ហិកតា។ ចំនួនគោក្នុងស្តុកដំបូងនឹងចាប់ផ្តើមប្រហែល១ ០០០ក្បាល ដោយពង្រីកបន្តិចម្តងៗតាមគ្រោងទុក។ លោករដ្ឋមន្ត្រីក្រសួងកសិកម្ម បានមានប្រសាសន៍ថា គម្រោងនេះអនុវត្តតាមគំរូឧស្សាហកម្មចិញ្ចឹមគោរួមបញ្ចូលគ្នា ដែលរួមមានគោយកសាច់ គោះយកទឹកដោះ និងឧស្សាហកម្មកែច្នៃឡើងវិញ ក្នុងតំបន់ផលិតកម្មតែមួយ។ គំរូនេះ ក៏បានរួមបញ្ចូលការចិញ្ចឹមគោនៅតាមចម្ការដូងប្រេង ដោយលែងគោឱ្យដើរស៊ីស្មៅនៅក្នុងចម្ការ ដើម្បីកាត់បន្ថយបញ្ហាខ្វះខាតចំណី ព្រមទាំងបង្កើតឱ្យមានជីសរីរាង្គ និងបង្កើននិរន្តរភាពផងដែរ។ ការអភិវឌ្ឍនឹងពឹងផ្អែកលើប្រព័ន្ធស៊ីស្មៅបែបទំនើប គាំទ្រដោយការស្រាវជ្រាវលើពូជស្មៅ ដែលសមស្របនឹងស្ថានភាពដី រួមទាំងកន្លែងកែច្នៃសាច់ និងផលិតផលទឹកដោះគោ និងហេដ្ឋារចនាសម្ព័ន្ធគាំទ្រ ដើម្បីធានាបាននូវប្រតិបត្តិការប្រកបដោយប្រសិទ្ធភាព។ រដ្ឋមន្ត្រីក្រសួងកសិកម្ម ឥណ្ឌូណេស៊ី […]

ណៃពិដោ៖ ប្រទេសភូមា និងឥណ្ឌា បានចរចាដើម្បីនាំចេញផ្លែប័របង្កករបស់ភូមាទៅកាន់ប្រទេសឥណ្ឌា និងបានដោះស្រាយឯកសារចាំបាច់សម្រាប់អនុញ្ញតនាំចូល ដោយបំពេញតាមលក្ខខណ្ឌបទប្បញ្ញត្តិស្រីសុវត្ថិភាព និងធានាគុណភាពចំណីអាហារ។ នាយកអង្គការជំរុញពាណិជ្ជកម្មភូមា ដែលស្ថិតនៅក្រោមក្រសួងពាណិជ្ជកម្ម អ្នកប្រឹក្សាយោបល់សេដ្ឋកិច្ចភូមា តំណាងសមាគមអ្នកផលិត និងនាំចេញផ្លែប័រភូមា និងសហព័ន្ធអន្តរជាតិនៃធុរជន និងនាំចេញ ប្រចាំនៅប្រទេសឥណ្ឌា បានបើកកិច្ចប្រជុំ នៅថ្ងៃទី១២ ខែមីនា ឆ្នាំ២០២៦ ស្តីពីកិច្ចសហការក្នុងការផលិតកែច្នៃផ្លែប័រ ដើម្បីបង្កើតតម្លៃបន្ថែម។ ផ្លែប័ររបស់ភូមា ត្រូវប្រមូលផលនៅរៀងរាល់ខែកញ្ញា នៅតាមចម្ការប័រជាង២០ ០០០ហិកតានៅទូទាំងប្រទេសភូមា។ ពូជផ្លែប័រប្រណីតរបស់ភូមា មានដូចជាឈ្មោះ ហាស់ (Hass), ប៊ូកានៀ (Buccaneer( និងឈ្មោះ អមរា (Amara) ត្រូវដឹកជញ្ជូននាំចេញទៅកាន់ទីផ្សារអន្តរជាតិ។ កន្លងមកថ្មីៗនេះ អង្គការលើកកម្ពស់ពាណិជ្ជកម្មភូមា កំពុងតែធ្វើការយ៉ាងសកម្ម ដើម្បីបង្កើតពិធីសារនាំចេញផ្លែប័រជាមួយប្រទេសចិន ដោយមានគោលបំណងចាប់ផ្តើមការដឹកជញ្ជូន នៅក្នុងឆ្នាំ២០២៦-២០២៧ ស្របតាមស្តង់ដារនាំចូលរបស់អគ្គរដ្ឋបាលគយនៃសាធារណរដ្ឋប្រជាមានិតចិន។ បច្ចុប្បន្ននេះ ផ្លែប័រភូមា មិនទាន់បានចុះបញ្ជីក្នុងចំណោមក្រុមផលិតផលចំនួន១៨មុខ ដែលតម្រូវឱ្យមានការចុះឈ្មោះរបស់អគ្គរដ្ឋបាលគយចិនទេ ដែលអនុញ្ញាតឱ្យអ្នកនាំចេញត្រូវដាក់ពាក្យស្នើសុំលិខិតអនុញ្ញាតដោយផ្ទាល់ តាមរយៈច្រកចេញចូលតែមួយរបស់ភ្នាក់ងារពាណិជ្ជកម្មអន្តរជាតិចិន ដោយប្រើគណនីផ្ទាល់ខ្លួនតែម្តង។ ចំណែកនាយកដ្ឋានចត្តាឡីស័កសត្វ និងរុក្ខជាតិនៃអគ្គរដ្ឋបាលគយចិន នឹងត្រួតពិនិត្យចត្តាឡីស័កសម្រាប់ទំនិញកសិកម្មនាំចូល មានដូចជា គ្រាប់កាហ្វេមិនទាន់លីង គ្រាប់កាកាវ […]

រីយ៉ាដ៖ អាជ្ញាធរចំណីអាហារ និងឱសថ របស់ប្រទេសអារ៉ាប៊ីសាអូឌីត បានចេញបម្រាមលើការនាំចូលសាច់សត្វបក្សីឆៅ និងស៊ុតពីជាង៤០ប្រទេស ដើម្បីទប់ស្កាត់ការឆ្លងរាលដាលនៃជំងឺផ្តាសាយបក្សី ដែលវិធានការនេះធ្វើឲ្យអ្នកនាំចេញនៅតាមបណ្តាប្រទេសក្នុងតំបន់មជ្ឈិមបូព៌ាមួយចំនួនអះអាងថា អាចជះឥទ្ធិពលអវិជ្ជមានដល់អាជីវកម្មរបស់ពួកគេ។ តាមរយៈការដាក់ចេញបម្រាមនេះ ប្រទេសដែលរងផលប៉ះពាល់រួមមានប្រទេសឥណ្ឌា ចិន អាល្លឺម៉ង់ និងប្រទេសឥណ្ឌូនេស៊ី ខណៈពេលការរឹតត្បិតនេះ ត្រូវបានអនុវត្តចំពោះប្រទេសចំនួន១៦ផ្សេងទៀតរួចហើយ រួមមានសហរដ្ឋអាមេរិក បារាំង និងកាណាដា ជាដើម។ យោងតាមសេចក្តីរាយការណ៍នៅក្នុងស្រុក បានឱ្យដឹងថា ប្រទេសអារ៉ាប៊ីសាអូឌីតនាំចូលសាច់សត្វបក្សីច្រើនជាងគេពីប្រទេសប្រេស៊ីលប្រហែល៧០ភាគរយ ក្នុងឆ្នាំ២០២៥។ ជាមួយគ្នានេះ ប្រទេសអេមីរ៉ាតអារ៉ាប់រួម រុស្ស៊ី អ៊ុយក្រែន និងប្រទេសអេហ្ស៊ីប ក៏ស្ថិតក្នុងចំណោមប្រទេសផ្គត់ផ្គង់សាច់បក្សីផងដែរ។ បើយោងតាមទិន្នន័យផ្លូវការរបស់រដ្ឋាភិបាលអារ៉ាប៊ីសាអូឌីត បានឱ្យដឹងថា​​ តាមរយៈក្រសួងបរិស្ថាន ទឹក និងកសិកម្ម របស់ប្រទេសអារ៉ាប៊ីសាអូឌីត ផលិតកម្មសាច់សត្វបក្សីក្នុងប្រទេសមានបរិមាណជាង១,៣១លានតោន ក្នុងមួយឆ្នាំៗ។ គ្រាន់តែនៅក្នុងឆ្នាំ២០២៣ មានបរិមាណប្រហែល១,១លានតោន។ ទោះបីជាយ៉ាងណា វិធានការបែបនេះរបស់ប្រទេសអារ៉ាប៊ីសាអូឌីត បានបង្កឲ្យមានការរិះគន់ពីប្រទេសជិតខាងមួយចំនួន។ លោក អាប់ដែល អាហ្ស៊ីស អែលសាយ៉េត (Abdel Aziz El-Sayed) សមាជិកសភាពាណិជ្ជកម្មទីក្រុងគែរ ប្រទេសអេហ្ស៊ីប បានសួរពីហេតុផលនៃការដាក់បញ្ចូលប្រទេសអេហ្ស៊ីបក្នុ ងបញ្ជីរឹតត្បិតនៃការនាំចូលនេះផលិតផលសាចើបក្សីនេះ ដោយលោកបានបញ្ជាក់ថា […]

រដ្ឋកាណាតាកា៖ ប្រទេសឥណ្ឌា បានសម្រេចដឹកជញ្ជូនតាមផ្លូវអាកាសលើកដំបូងនូវផលិតផលផ្លែចេក ដែលបានដាក់ស្លាកសញ្ញាសម្គាល់ភូមិសាស្ត្រ ពីរដ្ឋកាណាតាកា (Karnataka) ទៅកាន់ប្រទេសម៉ាល់ឌីវ ដែលការនាំចេញនេះ គឺជាលើកទីមួយហើយសម្រាប់ផលិតផលសាកវប្បកម្មរបស់រដ្ឋនេះ។ ការដឹកជញ្ជូន រួមមានចេក ណានចាងឌូ រ៉ាសាបាល (Nanjangudu Rasabale) និងក្រូចឆ្មារឥណ្ឌា ដែលផលិតផលទាំងនេះ ត្រូវបានចុះបញ្ជីក្រោមប្រព័ន្ធសម្គាល់ភូមិសាស្ត្ររបស់ប្រទេសឥណ្ឌា ហើយត្រូវបានភ្ជាប់ទៅនឹងតំបន់ដាំដុះជាក់លាក់ណាមួយ នៅក្នុងរដ្ឋកាណាតាកា ស្ថិតនៅភាគខាងត្បូងប្រទេសឥណ្ឌា។ ការនាំចេញនេះ ត្រូវបានសម្របសម្រួលដោយអាជ្ញាធរអភិវឌ្ឍន៍ការនាំចេញផលិតផលស្បៀងអាហារកែច្នៃ និងកសិកម្ម ដោយមានការសម្របសម្រួលជាមួយក្រសួងសាកវប្បកម្ម រដ្ឋាភិបាលនៃរដ្ឋ កាណាតាកា និងក្រុមប្រឹក្សាស្រាវជ្រាវកសិកម្មឥណ្ឌា។ ការនាំចេញនេះត្រូវបានរៀបចំឡើងជាផ្នែកមួយនៃកិច្ចខិតខំប្រឹងប្រែង ដើម្បីគាំទ្រដល់ការចូលរួមរបស់កសិករនៅក្នុងបណ្តាញនាំចេញ និងដើម្បីកែលម្អលទ្ធភាពចូលទៅកាន់ទីផ្សារអន្តរជាតិ សម្រាប់ផលិតផលជាក់លាក់ក្នុងតំបន់។ ការដឹកជញ្ជូនតាមផ្លូវអាកាសត្រូវបានបញ្ជូនពីប្រទេសឥណ្ឌា ទៅកាន់ប្រទេសម៉ាល់ឌីវ ដែលឆ្លុះបញ្ចាំងពីភាពសមស្របនៃផលិតផលទាំងនេះ សម្រាប់ផ្លូវនាំចេញឆ្លងកាត់រយៈពេលខ្លី។ ការដឹកជញ្ជូននេះ រួមមានផលិតផលបន្លែ និងផ្លែឈើស្រស់ៗ ដែលនឹងចែកចាយទៅកាន់ទីផ្សារដោយផ្ទាល់តែម្តងបន្ទាប់ពីដឹកទៅដល់គោលដៅប្រទេសនាំចូល។ យោងតាមដៃគូគម្រោង បានឱ្យដឹងថា គំនិតផ្តួចផ្តើមនេះត្រូវបានបង្កើតជាផ្នែកមួយនៃការងារកាន់តែទូលំទូលាយ ដែលមានគោលបំណងផ្សារភ្ជាប់ផលិតផលសម្គាល់ភូមិសាស្ត្រ ដែលបានចុះបញ្ជីជាមួយនឹងតម្រូវការក្រៅប្រទេស។ កិច្ចសហការនេះ ផ្តោតលើការអនុលោមតាមពិធីសារនាំចេញ ការសម្របសម្រួលនៅទូទាំងស្ថាប័ន និងអនុលោមតាមតម្រូវការទីផ្សារគោលដៅ។ រដ្ឋកាណាតាកា ដែលស្ថិតភាគខាងត្បូងប្រទេសឥណ្ឌាមានព្រំដែនជាប់សមុទ្រ ផ្តល់ជូននូវផលិតផលសាកវប្បកម្ម ដែលជាផលិតផលសម្គាល់ភូមិសាស្ត្រជាច្រើនប្រភេទ ហើយការនាំចេញបង្ហាញពីការប្រើប្រាស់ការដឹកជញ្ជូនតាមផ្លូវអាកាស សម្រាប់ទំនិញមានបរិមាណតិច […]

តេអ៊ីរ៉ង់៖ សង្រ្គាមនៅអ៊ីរ៉ង់ស្ទើរតែបានបញ្ឈប់រាល់លំហូរនៃការនាំចេញ និងការនាំចូលរវាងប្រទេស និងដៃគូពាណិជ្ជកម្មរបស់ខ្លួន ជាពិសេសសម្រាប់សហភាពអឺរ៉ុប អ៊ីរ៉ង់មិនមែនជាដៃគូសំខាន់ក្នុងការនាំចេញបន្លែ និងផ្លែឈើនោទេ ដោយការនាំចូលពីអ៊ីរ៉ង់ទៅអឺរ៉ុប មានត្រឹមតែ០,៦ភាគរយប៉ុណ្ណោះ នៃការនាំចូលសរុប។ ទោះជាយ៉ាងនេះក្តី បើយោងតាមតួលេខបឋមរបស់សម្រាប់ឆ្នាំ២០២៥ បានឱ្យដឹងថា ប្រទេសសមាជិកសហភាពអឺរ៉ុបទាំង២៧ បាននាំចូលបន្លែ ផ្លែឈើ និងគ្រាប់ធញ្ញជាតិ ដែលមានតម្លៃជាង២៥៨លានដុល្លារ ពីប្រទេសអ៊ីរ៉ង់។ ការនាំចូលទាំងនេះ ច្រើនបំផុតមានផ្លែឈើ និងគ្រាប់ធញ្ញជាតិ ក្នុងទឹកប្រាក់ទំហំប្រហែល២៤១លានដុល្លារ ឬស្មើនឹង៩៣ភាគរយ នៃចំនួនសរុប។ បន្លែមានទឹកប្រាក់ប្រហែល១៧លានដុល្លារ។ ប្រសិបបើក្រឡេកមើលលំហូរនៃការនាំចូលពីប្រទេសអ៊ីរ៉ង់ ផលិតផលលេចធ្លោជាងគេ គឺគ្រាប់ភីស្តាស៊ីអូ (pistachios) ដែលមានតម្លៃនាំចូលជាង១២៨លានដុល្លារ ក្នុងនេះបរិមាណគ្រាប់ភីស្តាស៊ីអូមានសំបក នាំចូលបានជិតពាក់កណ្តាលនៃកសិផលអឺរ៉ុបពីប្រទេសអ៊ីរ៉ង់ ដោយសរុបជាទឹកប្រាក់ចំនួន៧,៦លានដុល្លារ។ ចំណាត់ថ្នាក់ទីពីរ គឺផ្លែទំពាំងបាយជូរក្រៀម ដែលមានតម្លៃជាទឹកប្រាក់សរុបប្រហែល៥៨លានដុល្លារ បន្ទាប់មក គឺផ្លែលម៉ើ ដែលមានតម្លៃជាទឹកប្រាក់ជិត៣២លានដុល្លារ។ ផ្លែឈើទាំងបីមុខនេះ គឺជាផលិតផលកសិកម្មរបស់អ៊ីរ៉ង់ នាំចេញទៅកាន់សហភាពអឺរ៉ុប។ ចំណែកផលិតបន្លែនាំចេញតិចជាងគេ ប៉ុន្តែមានតម្លៃគួរឱ្យកត់សម្គាល់ គឺជាផ្សិតស្ថួត ដែលមានតម្លៃជាង១១លានដុល្លារ ក្នុងនោះ ក៏មានផ្លែឪឡឹក ផ្លែអាល់ម៉ុនមានសំបក ផ្លែឆឺរី ផ្លែល្វា និងផ្លែអាព្រីកត់ស្ងួតផងដែរ។ រហូតមកដល់ពេលនេះ ប្រទេសអាល្លឺម៉ង់ […]

ហ្សាការតា៖ ទីភ្នាក់ងារទំនាក់ទំនងរដ្ឋាភិបាលនៃប្រទេសឥណ្ឌូណេស៊ី បានបង្ហាញការជឿជាក់ថា ឥណ្ឌូណេស៊ីនឹងរក្សាអត្រាពន្ធសូន្យភាគរយលើផលិតផលសំខាន់ៗមួយចំនួន នៅក្នុងទីផ្សារសហរដ្ឋអាម៉េរិក ចំពេលមានការផ្លាស់ប្តូរគោលនយោបាយពាណិជ្ជកម្មរបស់សហរដ្ឋអាម៉េរិក។ អ្នកជំនាញជាន់ខ្ពស់នៅទីភ្នាក់ងារទំនាក់ទំនងរដ្ឋាភិបាល បាននិយាយថា “រដ្ឋាភិបាលនៅតែមានទំនុកចិត្តក្នុងការរក្សាពន្ធសូន្យភាគរយ”។ លោកបានពន្យល់ថា ការផ្តល់ពន្ធសូន្យភាគរយ ត្រូវបានចែងក្រោមបទប្បញ្ញត្តិដាច់ដោយឡែក ខុសពីអត្រាក្នុងពន្ធបដិការ។ គោលនយោបាយពន្ធគយរបស់សហរដ្ឋអាម៉េរិក បានផ្លាស់ប្តូរនាពេលថ្មីៗនេះ បន្ទាប់ពីតុលាការកំពូលបានលុបចោលគោលការណ៍ច្បាប់ ដែលលោកប្រធានាធិបតី ដូណាល់ ត្រាំ (Donald Trump) ប្រើប្រាស់ដើម្បីដាក់ពន្ធគយពាណិជ្ជកម្មមួយចំនួន ជំរុញឱ្យមានការប្រែប្រួលគោលនយោបាយ ដែលប៉ះពាល់ដល់ដៃគូពាណិជ្ជកម្មខ្លះ រួមទាំងប្រទេសឥណ្ឌូណេស៊ីផងដែរ។ ទោះបីជាយ៉ាងណាក៏ដោយ លោកបាននិយាយថា ជំហររបស់ឥណ្ឌូណេស៊ី នៅតែមានសុវត្ថិភាព ដោយសារតែការចរចា និងការប្រាស្រ័យទាក់ទងគ្នាជាប់ជានិច្ចជាមួយរដ្ឋាភិបាលសហរដ្ឋអាម៉េរិក។ កាលពីលើកមុន រដ្ឋមន្ត្រីសម្របសម្រួលកិច្ចការសេដ្ឋកិច្ច លោក អ៊ែឡាំងការ ហារតាតូ (Airlangga Hartarto) បានមានប្រសាសន៍ថា ប្រទេសឥណ្ឌូណេស៊ី បានស្នើសុំឱ្យអត្រាពន្ធបដិការមកនៅត្រឹមសូន្យភាគរយ ទោះបីជាមានការសម្រេចចិត្តរបស់រដ្ឋាភិបាលសហរដ្ឋអាម៉េរិក ក្នុងការដាក់ពន្ធបដិការថ្មីក៏ដោយ។ លោកបាននិយាយថា ប្រទេសឥណ្ឌូណេស៊ីបានសម្របសម្រួលជាមួយការិយាល័យតំណាងពាណិជ្ជកម្មសហរដ្ឋអាម៉េរិក ហើយការសម្រេចចិត្តរបស់គណៈរដ្ឋមន្ត្រីនឹងត្រូវចេញ បន្ទាប់ពីបានចុះហត្ថលេខាលើកិច្ចព្រមព្រៀងនេះ។ លោកបានមានប្រសាសន៍នៅទីក្រុងវ៉ាស៊ីនតោន ឌីស៊ី កាលពីថ្ងៃទី២១ ខែកុម្ភៈ ឆ្នាំ២០២៦ថា “ឥណ្ឌូណេស៊ីបានចុះហត្ថលេខាលើកិច្ចព្រមព្រៀងនេះ យើងបានស្នើសុំឱ្យផលិតផល ដែលទទួលបានអត្រាពន្ធសូន្យភាគរយ […]

ប៉េកាំង៖ សមាជិកសភាចិន នៅចុងសប្តាហ៍មុន បានបោះឆ្នោតធ្វើវិសោធនកម្មច្បាប់ ស្តីពីជលផលរបស់ប្រទេសចិន ដែលនឹងចូលជាធរមាននៅដើមខែឧសភា ឆ្នាំ២០២៦នេះ ដើម្បីកែលម្អផ្នែកជាច្រើននៃច្បាប់ក្នុងពេលបច្ចុប្បន្នរបស់ប្រទេសចិន។ ក្នុងចំណោមចំណុចត្រូវធ្វើវិសោធនកម្ម រួមមានកិច្ចខិតខំប្រឹងប្រែងបង្ក្រាបបទល្មើសនេសាទខុសច្បាប់ បទល្មើសមិនបានរាយការណ៍ និងមិនបានគ្រប់គ្រង ដើម្បីធ្វើយ៉ាងណាឱ្យស្របតាមកាតព្វកិច្ច ដែលមានចែងក្នុងកិច្ចព្រមព្រៀងវិធានការគ្រប់គ្រងកំពង់ផែ ដែលប្រទេសចិនបានផ្តល់សច្ចាប័ន នៅដើមឆ្នាំ២០២៥។ ជាឧទាហរណ៍ ចាប់ពីមាត្រា៥៥ ដល់មាត្រា៥៩ នៃវិសោធនកម្មច្បាប់ ដែលត្រូវបានចេញផ្សាយដោយសភាប្រជាជនជាតិ បានចែងថា នាវាបរទេសអាចចូលចតបានតែនៅតាមកំពង់ផែណាមួយ ដែលប្រទេសចិនកំណត់ប៉ុណ្ណោះ ខណៈពេលនាវាណាមួយ ដែលត្រូវបានរកឃើញថា មានពាក់ព័ន្ធក្នុងសកម្មភាពនេសាទខុសច្បាប់ ត្រូវបានហាមឃាត់មិនឱ្យចូលកំពង់ផែចិនឡើយ។ ចំណុចធ្វើវិសោធនកម្មផ្សេងទៀតនៅក្នុងច្បាប់នេះ រួមមានបទប្បញ្ញត្តិដ៏តឹងរ៉ឹងបន្ថែមទៀតលើវិស័យវារីវប្បកម្មរបស់ប្រទេសចិន ក្នុងគោលបំណងពង្រីក និងពង្រឹង ឱ្យចំគោលដៅកាន់តែច្បាស់លាស់ ដែលប្រទេសចិនបានធ្វើកន្លងមក ដើម្បីលុបបំបាត់ការបំពុលបរិស្ថាន និងផលប៉ះពាល់ ដែលបង្កគ្រោះថ្នាក់ផ្សេងទៀតដោយសារការចិញ្ចឹមត្រី។ ចំណែកមាត្រា១៥ ដែលត្រូវបានកែសម្រួលថ្មី បានកត់សម្គាល់ថា “រដ្ឋលើកទឹកចិត្តដល់ការអភិវឌ្ឍវារីវប្បកម្មបៃតង និងអេកូឡូស៊ី នៅក្នុងមហាសមុទ្រ ទន្លេ បឹង អាងស្តុកទឹក និងកន្លែងមានទឹកផ្សេងទៀត ក៏ដូចជាការអភិវឌ្ឍវារីវប្បកម្មទឹកជ្រៅ និងកិច្ចសហប្រតិបត្តិការវារីវប្បកម្មអន្តរជាតិ”។ រីឯចំណុចផ្សេងទៀត ត្រង់មាត្រា២៨ ត្រូវបានកែសម្រួលថា អ្នកបានចូលរួមក្នុងផលិតកម្មវារីវប្បកម្ម ត្រូវការពារបរិស្ថានអេកូឡូស៊ីនៃតំបន់ទឹក និងតំបន់ឆ្នេរលិចទឹក […]