ហាណូយ៖ ការផ្លាស់ប្តូរការដាំដុះដំណាំស្រកានាគសរីរាង្គរបស់កសិករវៀតណាម គឺជាការផ្លាស់ប្តូរពីកសិកម្មតម្រង់ទិសផលិតភាព ទៅជាកសិកម្មសេដ្ឋកិច្ច ដែលទាមទារការវិនិយោគ និងហានិភ័យទាប ប៉ុន្តែផ្តល់នូវប្រសិទ្ធភាពខ្ពស់ជាងមុន។
ខណៈពេលកសិករវៀតណាមជាច្រើនជួបការលំបាកចំពោះតម្លៃកសិផល ដែលមិនស្ថិតស្ថេរចំពេលមានការប្រែប្រួលទីផ្សារ សហគមន៍ និងអ្នកដាំដំណាំស្រកានាគមួយចំនួននៅក្នុង តាយ នីញ (Tay Ninh) ប្រទេសវៀតណាម អាចរក្សាបានប្រាក់ចំណេញជាប់លាប់ ដោយបន្តអនុវត្តតាមវិធីសាស្រ្តផលិតកម្មស្អាត ដែលបំពេញតាមស្តង់ដារតឹងរឹងនៃតម្រូវការទីផ្សារ។
នៅតំបន់ដាំដុះផ្លែស្រកានាគនេះ កសិករភាគច្រើនបានស្គាល់ដំណើរការរបស់ការអនុវត្តកសិកម្មល្អរបស់វៀតណាម (Good Agricultural Practice)។ ទោះបីជាយ៉ាងណាក៏ដោយ ដើម្បីបង្កើនតម្លៃផលិតផល និងពង្រីកទីផ្សារ គ្រួសារកសិករជាច្រើនបានបន្តផ្លាស់ប្តូរទៅរកស្តង់ដារសរីរាង្គ ដើម្បីបំពេញតម្រូវការរបស់អ្នកនាំចេញទៅកាន់ទីផ្សារប្រទេសជប៉ុន និងទីផ្សារសហភាពអឺរ៉ុប។ ជាលទ្ធផល ការយល់ដឹងរបស់កសិករវៀតណាមអំពីការអនុវត្តកសិកម្មល្អ បានធ្វើឱ្យការដាំដុះល្អប្រសើរឡើង គុណភាពផលិតផលកាន់តែស៊ីសង្វាក់គ្នា និងប្រសិទ្ធភាពសេដ្ឋកិច្ចកាន់តែមាននិរន្តរភាព។
កសិករវៀតណាមម្នាក់ ដែលធ្វើកសិកម្មសរីរាង្គអស់រយៈជាង១២ឆ្នាំកន្លងមកហើយ ដែលពេលនោះមានមនុស្សជាច្រើននៅចិត្តស្ទាក់ស្ទើរ ប៉ុន្តែគាត់បានបង្កើតផែនទីបង្ហាញផ្លូវបីដំណាក់កាល គឺការពិសោធន៍ ការធ្វើតេស្តជី និងការបញ្ចប់ដំណើរការ។ តាមរយៈការដឹកនាំ និងបង្ហាញពីប្រសិទ្ធភាព គាត់បានបញ្ចុះបញ្ចូលអ្នកដទៃឱ្យផ្លាស់ប្តូរផ្នត់គំនិត និងទម្លាប់របស់ពួកគាត់។
យោងតាមកសិករម្នាក់នេះ បានឱ្យដឹងថា បញ្ហាប្រឈមធំបំផុតមិនស្ថិតនៅលើបច្ចេកទេសទេ ប៉ុន្តែនៅក្នុងទីផ្សារ។ កង្វះខាតទិន្នផលមានស្ថិរភាព បានធ្វើឱ្យកសិករមានការខកចិត្ត។ ទោះបីជាយ៉ាងណាក៏ដោយ បទពិសោធន៍ជាង១២ឆ្នាំ បានបង្ហាញថា ផ្លែស្រកានាគសរីរាង្គលូតលាស់បានល្អ ដោយសារការប្រើប្រាស់មីក្រូសរីរាង្គ ដែលបង្កើនភាពធន់នឹងអាកាសធាតុ និងកាត់បន្ថយការពឹងផ្អែកលើថ្នាំគីមីសម្លាប់សត្វល្អិត។
បើនិយាយពីថ្លៃដើមវិញ រួមទាំងកម្លាំងពលកម្មផង ថ្លៃដើមផលិតផ្លែស្រកានាគសរីរាង្គ ត្រូវចំណាយប្រមាណ១២ ០០០ដុង ឬស្មើនឹង០,៤៦ដុល្លារ ក្នុង១គីឡូក្រាម រីឯតម្លៃលក់របស់កសិករឡើងដល់ ២៥ ០០០ដុង ឬស្មើនឹង០,៩៥ដុល្លារ ក្នុងមួយគីឡូក្រាម ដែលនាំឱ្យកសិករទទួលបានប្រាក់ចំណេញប្រមាណ៥០ភាគរយ ខ្ពស់ជាងផលិតកម្មធម្មតា ដែលត្រូវចំណាយបន្ថែមលើជីគីមី និងថ្នាំសម្លាប់សត្វល្អិត។ អត្ថប្រយោជន៍សេដ្ឋកិច្ចនេះបានបញ្ចុះបញ្ចូលកសិករវៀតណាមជាច្រើនឱ្យទទួលយកគំរូដាំដំណាំស្រកានាគសរីរាង្គ។
ទោះបីជាយ៉ាងណាក៏ដោយ ភាពជោគជ័យអាស្រ័យលើវិន័យ ភាពស្មោះត្រង់។ បើមានគ្រួសារមួយបំពានស្តង់ដារ ឬប្រើប្រាស់សារធាតុហាមឃាត់ដើម្បីទទួលបានផលផ្លែស្រកានាគច្រើន នោះអាចបំផ្លាញកេរ្តិ៍ឈ្មោះទីផ្សារទាំងមូល និងនាំឱ្យបាត់បង់កិច្ចសន្យា។ ដូច្នេះការផលិតផ្លែស្រកានាគសរីរាង្គទាមទារឱ្យមានភាពស្មោះត្រង់ជានិច្ច និងប្រកាន់ខ្ជាប់យ៉ាងតឹងរ៉ឹងចំពោះកិច្ចសន្យា ជាពិសេសសម្រាប់ទីផ្សារសហភាពអឺរ៉ុប ដែលមានបទប្បញ្ញត្តិហាមសំណល់សារធាតុថ្នាំគីមីលើសកម្រិត។
ដើម្បីផ្លាស់ប្ដូរពីកសិកម្មតម្រង់ទិសផលិតភាព ទៅជាកសិកម្មសេដ្ឋកិច្ច កសិករគំរូរបស់វៀតណាម បានបង្កើតសហគមន៍ប្រមូលផ្តុំសមាជិកជាង១០០នាក់ ដែលកំពុងដាំដំណាំស្រកានាគលើផ្ទៃដីជាង១០០ហិកតា។ សហគមន៍នេះដំណើរការក្រោមគោលការណ៍ “ការទិញ-លក់រួម” ដោយជួយកសិករកាត់បន្ថយការពឹងផ្អែកលើឈ្មួញកណ្តាល និងជៀសវាងការកេងប្រវ័ញ្ចតម្លៃគ្នា។
ដំបូងឡើយ សមាជិកសហគមន៍ភាគច្រើនបានបន្តធ្វើតាមវិធីប្រពៃណី។ ដូច្នេះ ការផ្លាស់ប្តូរទៅជាកសិកម្មសរីរាង្គមិនងាយស្រួលទេ ប៉ុន្តែតាមរយៈការតស៊ូមតិ និងគោលនយោបាយលើកទឹកចិត្តរបស់រដ្ឋាភិបាលវៀតណាម គ្រួសារជាច្រើនបានផ្លាស់ប្តូរដោយជឿទុកចិត្ត។ កត្តាសំខាន់បំផុត គឺប្រសិទ្ធភាពជាក់ស្តែងនៃការលក់ផលិតផលក្នុងតម្លៃខ្ពស់។
តាមទស្សនៈរបស់សហគមន៍នេះ បង្ហាញពីការផ្លាស់ប្តូរពីកសិកម្មតម្រង់ទិសផលិតភាព ទៅជាកសិកម្មសេដ្ឋកិច្ច ដោយចំណាយទុនតិច ហានិភ័យទាប តែមានប្រសិទ្ធភាពខ្ពស់។ បច្ចុប្បន្ន ផ្លែស្រកានាគរបស់សហគមន៍ លក់បានក្នុងតម្លៃរហូតដល់២៥ ០០០ដុង ឬសើ្មីពី០,៩៥ដុល្លារ ក្នុងមួយគីឡូក្រាម គឺខ្ពស់ជាងតម្លៃផ្លែស្រកានាគទូទៅ។
តាមរយៈការផលិតក្រោមស្តង់ដារសរីរាង្គ ដែលបំពេញតាមតម្រូវការរបស់សហភាពអឺរ៉ុប ក្រុមហ៊ុនជាច្រើនមកពីប្រទេសសិង្ហបុរី និងប្រទេសហូឡង់ បានបង្ហាញចំណាប់អារម្មណ៍បោះទុនដំាដំណាំស្រកានាគនៅក្នុងប្រទេសវៀតណាម៕
