ការ៉ាជី៖ មន្ត្រីជាន់ខ្ពស់ប៉ាគីស្ថាន បានបញ្ជាក់ថា ប្រទេសប៉ាគីស្ថានកំពុងតែសម្លឹងមើលទីផ្សារដ៏ធំមួយ ដើម្បីនាំចេញសាច់គោក្នុងទំហំទឹកប្រាក់ចំនួន២០០លានដុល្លារ ទៅកាន់ប្រទេសម៉ាឡេស៊ី ស្របពេលរដ្ឋាភិបាលកំពុងតែពង្រឹងសមត្ថភាពនាំចេញសាច់គោ ហាឡាល់ និងបើកទីផ្សារអន្តរជាតិបន្ថែមទៀត។
គោលបំណងនេះ ត្រូវបានលើមកពិភាក្សាគ្នាក្នុងអំឡុងពេលកិច្ចប្រជុំ ស្តីពីកិច្ចសហប្រតិបត្តិការប៉ាគីស្ថាន-ម៉ាឡេស៊ី ក្នុងវិស័យសាច់គោ ដែលបានធ្វើឡើងនៅក្រសួងពាណិជ្ជកម្ម ក្រោមអធិបតីភាពមន្ត្រីជាន់ខ្ពស់របស់រដ្ឋមន្ត្រីប៉ាគីស្ថាន។
សារព័ត៌មានរបស់ប៉ាគីស្ថាន បានផ្សាយកាលពីថ្ងៃទី២៩ ខែតុលា ឆ្នាំ២០២៥ថា កិច្ចប្រជុំនេះ ប្រមូលផ្តុំដោយរដ្ឋមន្ត្រីសហព័ន្ធសន្តិសុខស្បៀងអាហារ និងរដ្ឋមន្ត្រីក្រសួងឧស្សាហកម្ម រួមទាំងតំណាងមកពីវិស័យសាធារណៈ និងឯកជនរបស់ប៉ាគីស្ថានផងដែរ ។
រដ្ឋមន្ត្រីក្រសួងឧស្សាហកម្ម បានបង្ហាញថា ការនាំចេញសាច់គោ ហាឡាល់ ដែលដ៏ល្អរបស់ប៉ាគីស្ថាន ទៅកាន់ប្រទេសម៉ាឡេស៊ី អាចឈានដល់បិរមាណ២០០លានដុល្លារ ដរាបណាមានវិធានការជាបន្ទាន់ ដើម្បីដោះស្រាយបញ្ហាហាមឃាត់មួយចំនួន ដូចជាជំងឺអុតក្តាម និងបំរាមនាំចេញសាច់គោជាប់ឆ្អឹង។
លោករដ្ឋមន្ត្រី បានសង្កត់ធ្ងន់ថា ប្រទេសឥណ្ឌាទទួលបានអត្ថប្រយោជន៍ពីការប្រកួតប្រជែង ដោយនាំចេញសាច់ជាប់ឆ្អឹង ស្របពេលប្រទេសប៉ាគីស្ថាន ត្រូវបានកំណត់ឱ្យនាំចូលតែសាច់សុទ្ធប៉ុណ្ណោះ ដោយសារតែការព្រួយបារម្ភអំពីការឆ្លងជំងឺអុតក្តាម។
ដើម្បីដោះស្រាយបញ្ហាប្រឈមទាំងនេះ កិច្ចប្រជុំបានសម្រេចលើផែនការធ្វើរបាយការណ៍ភ្លាមៗក្នុងរយៈពេលបួនថ្ងៃ ដើម្បីកំណត់វិធានការចាំបាច់ ដើម្បីសម្រេចបានគោលដៅ នាំចេញសាច់គោក្នុងទឹកប្រាក់ចំនួន២០០លានដុល្លារ បន្ទាប់មកត្រូវកំណត់ក្របខ័ណ្ឌគោលនយោបាយដ៏ទូលំទូលាយក្នុងរយៈពេលដប់ថ្ងៃ ដើម្បីបញ្ជាក់ឱ្យច្បាស់លាស់ចំពោះការនាំចេញសាច់គោ ប្រកបដោយចីរភាព។
ចំណែករដ្ឋមន្ត្រីក្រសួងពាណិជ្ជកម្មវិញ បានចាត់ទុកប្រទេសម៉ាឡេស៊ីថា ជាដៃគូពាណិជ្ជកម្មងាយស្រួល សម្រាប់ឧស្សាហកម្មសាច់គោរបស់ប្រទេសប៉ាគីស្ថាន ដោយជំរុញឱ្យភាគីពាក់ព័ន្ធបង្កើនការប្រកួតប្រជែងផ្នែកតម្លៃ ស្តង់ដារអនុលោមភាព និងភាពស៊ីសង្វាក់គ្នានៃខ្សែសង្វាក់ផ្គត់ផ្គង់។
លោកបានគូសបញ្ជាក់ថា គោលនយោបាយរបស់ប៉ាគីស្ថាន នាពេលខាងមុខនឹងផ្កោតសំខាន់ល់លើការគ្រប់គ្រងជំងឺឆ្លង វិញ្ញាបនបត្រ ហាឡាល់ និងការធ្វើឱ្យប្រសើរឡើងនូវហេដ្ឋារចនាសម្ព័ន្ធ ដោយសហការជាមួយរដ្ឋបាលថា្នក់ក្រោមជាតិ។
ចំណែករដ្ឋមន្ត្រីសហព័ន្ធសន្តិសុខស្បៀងអាហារ បានធានានូវការគាំទ្រយ៉ាងពេញទំហឹងពីរដ្ឋាភិបាលប៉ាគីស្ថានចំពោះការកែលម្អផ្នែកសុខភាពសត្វពាហនៈ និងការចិញ្ចឹមសត្វ ដោយកត់សម្គាល់ថា វឌ្ឍនភាពសំខាន់ៗត្រូវបានធ្វើឡើងរួចហើយនៅក្នុងរដ្ឋមួយចំនួន ហើយគ្រោងធ្វើបន្តទៀតនៅទូទាំងប្រទេស។
ដើម្បីជួយដល់ការសម្របសម្រួល គណៈកម្មាធិការជំនាញចំនួនបួន ត្រូវបានបង្កើតឡើង ដោយផ្តោតលើការគ្រប់គ្រងជំងឺឆ្លង ការកែលម្អពូជ ការចិញ្ចឹមសត្វ និងវិធានការសម្របសម្រួលផ្សេងទៀតផងដែរ។
រីឯក្រសួងវិទ្យាសាស្ត្រ និងបច្ចេកវិទ្យា ក៏នឹងត្រូវបានបញ្ចូលក្នុងក្រុមការងារ ដើម្បីបញ្ជាក់អំពី ហាឡាល់អន្តរជាតិ និងអនុលោមតាមគុណភាព ខណៈដែលកំពង់ផែត្រូវដើរតួនាទីយ៉ាងសំខាន់ក្នុងការដឹកជញ្ជូននាំចេញ។
លោកបានបញ្ជាក់ជាថ្មីអំពីការប្តេជ្ញាចិត្តរបស់រដ្ឋាភិបាល ក្នុងការធ្វើឱ្យប្រទេសប៉ាគីស្ថាន ក្លាយជាអ្នកផ្គត់ផ្គង់សាច់ ហាឡាល់ លំដាប់ខ្ពស់ ដែលអាចទុកចិត្តបានទូទាំងពិភពលោក តាមរយៈការធ្វើផែនការផ្អែកលើភស្តុតាង និងកិច្ចសហការរវាងរដ្ឋ និងឯកជន។
ប្រទេសប៉ាគីស្ថាន ជាប់ចំណាត់ថ្នាក់ទី២០ សម្រាប់ការនាំចេញសាច់គោក្នុងឆ្នាំ២០២៥ ខណៈលេខ១ បានទៅប្រទេសប្រេស៊ីល លេខ២ បានទៅប្រទេសអូស្ត្រាលី៕
៕
