ទីក្រុងជឿងជូ៖ សិង្ហបុរី និងវៀតណាម កាលថ្ងៃទី៣០ ខែតុលា ឆ្នាំ២០២៥ បានចុះហត្ថលេខាលើកិច្ចព្រមព្រៀងមួយ ដែលវៀតណាមនឹងគាំទ្រការនាំចេញអង្ករក្នុងបិរមានគ្មានដែនកំណត់ ដែលបានព្រមព្រៀងគ្នាទៅវិញទៅមក ក្នុងការនាំចេញទៅកាន់ប្រទេសសិង្ហបុរីតាមពាក្យ នៅពេលមានការស្នើសុំពីរដ្ឋាភិបាល។
បើតាមការចុះផ្សាយរបស់សារព័ត៌មាន channel news asia បានឱ្យដឹងថា អនុស្សរណៈនៃកិច្ចសហប្រតិបត្តិការលើពាណិជ្ជកម្មអង្ករ ត្រូវបានចុះហត្ថលេខានៅក្នុងជំនួបដាច់ដោយឡែក នៅឯឱកាសកិច្ចប្រជុំកំពូលមេដឹកនៃសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក នាទីក្រុងជឿងជូ ប្រទេសកូរ៉េខាងត្បូង កាលសប្តាហ៍មុន។
នៅក្នុងសេចក្តីប្រកាសព័ត៌មានរួមរវាងក្រសួងពាក់ព័ន្ធនៃប្រទេសទាំងពីរ បាននិយាយថា អនុស្សរណៈនៃកិច្ចសហប្រតិបត្តិការ កសាង “មូលដ្ឋានគ្រឹះដ៏រឹងមាំ” សម្រាប់លើកកម្ពស់ពាណិជ្ជកម្មអង្ករប្រកបដោយស្ថិរភាព និងនិរន្តរភាព។ កិច្ចព្រមព្រៀងនេះនឹងជួយពង្រឹងសន្តិសុខស្បៀងទ្វេភាគីដោយជៀសវាងការរឹតបន្តឹងពាណិជ្ជកម្មមិនចាំបាច់។
កិច្ចព្រមព្រៀងនេះ ត្រូវបានចុះហត្ថលេខាដោយលោកស្រី ហ្គ្រេស ហ្វូ (Grace Fu) ទេសរដ្ឋមន្ត្រី រដ្ឋមន្ត្រីទទួលបន្ទុកទំនាក់ទំនងពាណិជ្ជកម្មសិង្ហបុរី លោកស្រី និងលោក ង្វៀង ហុងទៀន (Nguyen Hong Dien) រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម។
លោកស្រី ហ្គ្រេស ហ្វូ បានមានប្រសាសន៍ថា “នេះគឺជាអនុស្សរណៈនៃកិច្ចសហប្រតិបត្តិការលើកដំបូងរបស់សិង្ហបុរីលើពាណិជ្ជកម្មអង្ករ ដែលបានចុះហត្ថលេខាជាមួយដៃគូពាណិជ្ជកម្ម ហើយយើងរីករាយក្នុងការធ្វើដូច្នេះជាមួយវៀតណាម ដែលជាប្រទេសមួយក្នុងចំណោមប្រទេស ដែលមានប្រភពអង្ករធំជាងគេរបស់សិង្ហបុរី”។
លោកស្រីបានកត់សម្គាល់ថា ប្រទេសសិង្ហបុរី បាននាំចូលអាហារភាគច្រើន ហើយចៀសមិនផុតពីការផ្គត់ផ្គង់ស្បៀងអាហារមកពីជុំវិញពិភពលោកនោះទេ ចំពោះប្រទេសសិង្ហបុរី ដែលសព្វថ្ងៃបាននាំចូលអង្ករពី៣០ប្រទេស។
លោកស្រីបានមានប្រសាសន៍ថា “ការធានាភាពជាដៃគូជាសកល និងក្នុងតំបន់ គឺចាំបាច់សម្រាប់ធានាការផ្គត់ផ្គង់អង្ករប្រកបដោយស្ថិរភាពសម្រាប់ប្រទេសសិង្ហបុរី”។
ចំណែក លោក ង្វៀង ហុងទៀត បាននិយាយថា កិច្ចព្រមព្រៀងនេះ ជួយពង្រឹងការតភ្ជាប់រវាងសិង្ហបុរី និងវៀតណាម ហើយកំណត់ដំណាក់កាលសម្រាប់កិច្ចសហប្រតិបត្តិការប្រកបដោយស្ថិរភាព ចំពេលមានការប្រែប្រួលមិនអាចទាយទុកមុនបាននៃទីផ្សារពិភពលោក។ ការពង្រឹងកិច្ចសហប្រតិបត្តិការពាណិជ្ជកម្មអង្ករ គឺជាការបង្ហាញយ៉ាងច្បាស់នៃកិច្ចខិតខំប្រឹងប្រែងរួមគ្នា ដើម្បីធានាបាននូវភាពធន់នឹងខ្សែសង្វាក់ផ្គត់ផ្គង់ និងសន្តិសុខស្បៀងនៅក្នុងសហគមន៍អាស៊ាន។
រដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាមរូបនេះ បានមានប្រសាសន៍ដូច្នេះថា “ក្នុងពេលខាងមុខ យើងសង្ឃឹមថា អាជ្ញាធរមានសមត្ថកិច្ចនៃភាគីទាំងពីរនឹងបន្តសហការគ្នាយ៉ាងជិតស្និទ្ធ ដើម្បីពង្រីកការផ្គត់ផ្គង់ផលិតផលកសិកម្ម និងម្ហូបអាហារវៀតណាមដ៏មានកិត្យានុភាព និងមានគុណភាពខ្ពស់ទៅកាន់ទីផ្សារសិង្ហបុរី”។
លោកបានបន្ថែមថា កិច្ចព្រមព្រៀងនេះ គឺជាការជំហានទៅមុខយ៉ាងរឹងមាំមួយក្នុងការអនុវត្តភាពជាដៃគូយុទ្ធសាស្ត្រគ្រប់ជ្រុងជ្រោយ រវាងសិង្ហបុរី និងវៀតណាម នាឆ្នាំ២០២៥នេះ៕
