ភ្នំពេញ៖ លោកឧកញ៉ា សុង សារ៉ន អគ្គនាយកក្រុមហ៊ុន អេមរុ រោយស៍ កំពុងតែជំរុញទាក់ទាញទុនវិនិយោគគម្រោងកែច្នៃផលិតផលចំណីអាហារ និងខ្សែច្រវាក់ស្រូវអង្ករ ដើម្បីលើកកម្ពស់តម្លៃបន្ថែម ជំរុញកំណើនសេដ្ឋកិច្វកសិកម្មទាំងមូលពីការផលិតដល់ទីផ្សារ។
នៅក្នុងជំនួបជាមួយនឹងអ្នកវិនិយោគថ្មីៗនេះ លោកឧកញ៉ា បានលើកឡើងថា កម្ពុជាយើងគួរមានសួនឧស្យាហកម្ម ដែលមានរោងចក្រសំខាន់ៗដូចជា អភិវឌ្ឍន៍ពូជ និង ផលិតពូជស្រូវ កិច្ចសន្យាផលិតកម្មស្រូវ រោងចក្រសម្ថួតស្រូវ រោងម៉ាស៊ីនកិនស្រូវ រោងចក្រកែច្នៃ វិចខ្ចប់អង្ករ រោងចក្រកែច្នៃកន្ទក់ អង្កាម អុសអង្កាម និងជីសរីរាង្គ ។
លើសពីនេះលោកឧកញ៉ា សុង សារ៉ន បានបញ្ជាក់ទៀត រោងចក្រកែច្នៃកន្ទក់សម្រាប់ធ្វើជាអាហាររបស់មនុស្ស រោងចក្រកែច្នៃម្សៅអង្ករសម្រាប់អាហារកុមារ និងគ្រឿងទេសសម្រាប់អាហារ រោងចក្រផលិតគុយទាវ រោងចក្រផលិតបាយ ព្រមទាំងរោងចក្រផលិតបាយងាយស្រួលដាំ រោងចក្រកែច្នែអាហារពេលព្រឹកផលិតពីអង្ករ ពោត រោងចក្រផលិតនំអង្ករ ដែលអាចបង្កើនតម្លៃបន្ថែមខ្ពស់។
កាលពីឆ្នាំ២០២៤ ក្រុមហ៊ុន អេមរុ រ៉ាយស៍ និងក្រុមហ៊ុនអាមរិក បានរួមគ្នាលើការកែច្នៃនាំចេញកន្ទក់របស់កម្ពុជាទៅទីផ្សារសហរដ្ឋអាមេរិក ហើយក្រុមហ៊ុន អេមរុ រ៉ាយស៍ និងក្រុមហ៊ុន Stabil Nutrition LLC បានចុះអនុស្សារណៈនៃការយោគយល់គ្នា កាលពីខែកញ្ញា ឆ្នាំ២០២៤ ក្រោមអធិបតីភាពឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ពោលគឺអំឡុងដំណើរទស្សនកិច្ចទាក់ទាញ និងជំរុញវិនិយោគរបស់សហរដ្ឋអាម៉េរិក។
តាមរយៈជំនួបនេះ ក្រុមហ៊ុន អេមរុ រ៉ាយស៍ បានរាយការណ៍ជូនឯកឧត្តមឧបនាយករដ្ឋមន្រ្តី អំពីផែនការវិនិយោគរបស់ក្រុមហ៊ុន និងក្រុមហ៊ុនដៃគូ Stabil Nutrition LLC និងបានជម្រាបជូនអំពីវឌ្ឍនភាពការងារ ដោយបាននិងកំពុងសិក្សាអំពីលទ្ធភាពបង្កើតរោងចក្រកែច្នៃកន្ទក់ នៅខេត្តកំពង់ធំ ដើម្បីផលិត និងកែច្នៃផលិតផលកន្ទក់ពីអង្ករសរីរាង្គរបស់កម្ពុជា ក្រោមកិច្ចគាំទ្រផ្នែកបច្ចេកទេសពីក្រុមហ៊ុន Stabil Nutrition LLC ដែលជាដៃគូ ដើម្បីឱ្យស្របតាមស្តង់ដារគុណភាព និងលក្ខណៈបច្ចេកទេស ព្រមទាំងបទប្បញ្ញត្តិនានា ដើម្បីនាំចូលទៅកាន់ទីផ្សារសហរដ្ឋអាមេរិក។
ការវិនិយោគលើរោងចក្រកែច្នៃកន្ទក់នេះ ពិតជាមានសារៈសំខាន់ក្នុងការនាំមកនូវអត្ថប្រយោជន៍ជាច្រើន រួមមានការបង្កើនប្រាក់ចំណូលសម្រាប់កសិករ ក៏ដូចជាការលើកទឹកចិត្តកសិករឱ្យចូលរួមក្នុងការអនុវត្តកសិកម្មប្រកបដោយនិរន្តរភាព ស្របតាមស្តង់ដារផលិតកម្មគុណភាពខ្ពស់។
ជាងនេះទៅទៀត ការវិនិយោគខាងលើនេះ នឹងក្លាយជាយុទ្ធសាស្ត្រដ៏មានសក្តានុពលក្នុងការកាត់បន្ថយកាកសំណល់ពីការកែច្នៃស្រូវ ដោយការបំប្លែងអនុផលទៅជាទំនិញមានតម្លៃ ,លើកកម្ពស់ប្រសិទ្ធភាពធនធាន, និងជំរុញឱ្យប្រទេសកម្ពុជាក្លាយជាតួអង្គសំខាន់ក្នុងវិស័យកសិកម្មប្រកបដោយនិរន្តរភាព និងផលិតផលអង្ករលំដាប់ខ្ពស់នៅលើទីផ្សារពិភពលោក៕
