ដោយ ឡុងសារេត
ភ្នំពេញ៖ បើពុំមានការប្រែប្រួលនោះទេ គម្រោងនៃការនាំចេញដំឡូងមីស្រស់របស់កម្ពុជាប្រមាណប្រមាណលានតោនក្នុងមួយឆ្នាំ ទៅកាន់ប្រទេសវៀតណាម សម្រាប់រយៈពេលប្រាំឆ្នាំ នឹងចាប់ផ្តើមនៅចុងឆ្នាំ២០២៥នេះ បន្ទាប់ពីសហព័ន្ធដំឡូងមីកម្ពុជា និងសមាគមដំឡូងមីវៀតណាម បានចុះអនុស្សរណៈនៃការយោគយល់គ្នា កាលពីថ្ងៃទី២៣ ខែតុលា ឆ្នាំ២០២៥ នៅក្រសួងពាណិជ្ជកម្ម។
ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ មមានប្រសាសន៍ថា ដំឡូងមីកម្ពុជានៅពេលកន្លងមក ក្រៅពីនាំចេញទៅប្រទេសថៃ គឺនាំចេញទៅប្រទេសវៀតណាម។ សម្រាប់ការចុះអនុស្សរណៈនៃកការយោគយល់គ្នារវាងសហព័ន្ធដំឡូងមីកម្ពុជា ជាមួយសមាគមដំឡូងមីវៀតណាមពេលនេះ គឺបង្ហាញពីសក្ខីភាពនៃទំនាក់ទំនងរវាងប្រទេសទាំងពីរ កម្ពុជា-វៀតណាម ក្នុងការនាំចេញ នាំចូលដំឡូងមី។ បន្ថែមលើសពីនេះ ការចុះអនុស្សរណៈថ្ងៃនេះ គឺជាការប្តេជ្ញាចិត្តថា នឹងនាំចេញដំឡូងមីកម្ពុជាឱ្យបានប្រាំបួនលានតោន ក្នុងមួយឆ្នាំផងដែរ។
ឯកឧត្តមបានបន្តថា ក្នុងបរិមាណដំឡូងមី ដែលគ្រោងនាំចេញចំនួនប្រាំបួនលានតោនក្នុងមួយឆ្នាំទៅប្រទេសវៀតណាម មានការចុះហត្ថលេខាជាក់ស្តែងលក់ដំឡូងមីស្រស់ជាង៣,៣លានតោន ពីមួយក្រុមហ៊ុនកែច្នៃដំឡូងមីវៀតណាមចំនួនបួន ក្នុងនោះ មានក្រុមហ៊ុន ហុង ដូទី (Hung Duty) ទទួលទិញចំនួន១,៥លានតោន,ក្រុមហ៊ុន សាម ញុត (Sam Nhut) ទទួលទិញ៧៥០ពាន់តោន, ក្រុមហ៊ុន រោងចក្រកែច្នៃដំឡូងមី ស៊ុយ ង៉ោង (Suoi Ngo)ទទួលទិញ៧៥០ពាន់តោន និងក្រុមហ៊ុន ហៀន តាពីកា (Hien Tapioca Production) ទទួលទិញ៦៦០ពាន់តោន។
ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្មទទួលបន្ទុកវិស័យដំឡូងមីបានមានប្រសាសន៍ថា អនុស្សរណៈនៃការយោគយល់គ្នារវាងសហព័ន្ធដំឡូងមីកម្ពុជា ជាមួយសមាគមដំឡូងមីវៀតណាមចំនួនប្រាំបួនលានតោន ក្នុងមួយឆ្នាំនេះ មានសុពលភាពរយៈពេលប្រាំឆ្នាំ ហើយនៅក្នុងមួយឆ្នាំៗ និងមានការបង្កើនការលក់ ឬវៀតណាមទិញពីកម្ពុជាបន្ថែមលើសពីបរិមាណសរុបចន្លោះ៥ទៅ១០ភាគរយជារៀងរាល់ឆ្នាំ។
អនុស្សរណៈនៃការយោគយល់គ្នានេះ មានគោលបំណងពង្រឹង និងកែលម្អផលិតកម្ម ការកែច្នៃ និងជំរុញការទិញលក់ដំឡូងមីស្រស់ពីកម្ពុជាប្រមាណប្រាំបួនលានតោនក្នុងមួយឆ្នាំ គឺមានសុពលភាពរយៈពេលប្រាំឆ្នាំ និងអាចចាប់ផ្តើមនៅចុងឆ្នាំ២០២៥នេះ។
យោងតាមបណ្តាញទំនាក់ទំនងផ្លូវការរបស់សហព័ន្ធដំឡូងមីកម្ពុជា បានបង្ហាញថាអត្ថន័យនៃពិធីចុះអនុស្សារណៈនៃការយោគយល់គ្នា នាឱកាសនេះ ៖ទី១)-សំដៅលើការគាំទ្រ និងដោះដូរបច្ចេកទេសដាំដុះដំឡូងមីប្រកបដោយបច្ចេកទេសកសិកម្មទំនើប មានគុណភាព ត្រូវតាមស្តងដារ និងផ្តល់ទិន្នផលខ្ពស់សម្រាប់ផ្គត់ផ្គង់ដល់រោងចក្រកែច្នៃប្រកបដោយប្រសិទ្ធភាព, ទី២)-ធានាលើស្ថេរភាពតម្លៃដំឡូងមីក្នុងការផ្គត់ផ្គង់ទៅលើទីផ្សារសម្រាប់ប្រជាកសិករកម្ពុជា, ទី៣)-កាត់បន្ថយថ្លៃចំណាយក្នុងការដោះដូរពាណិជ្ចកម្មដំឡូងមីឆ្លងកាត់ព្រំដែនកម្ពុជា-វៀតណាម,ទី៤)-ផ្សាភ្ជាប់ពិធីសារផ្នែកទំនាក់ទំនងទ្វេភាគី លើការសម្រួលផ្នែកពាណិជ្ជកម្មរវាងស្ថាបនមានសមត្ថកិច្ចប្រចាំមាត់ច្រកឆ្លងកាត់ព្រំដែនកម្ពុជា-វៀតណាម និងទី៥)-ដើម្បីធ្វើជាកត្តលិករចាប់ផ្តើមពង្រឹងទំហំនៃការធ្វើពាណិជ្ជកម្មលើវិស័យដំឡូងមីកម្ពុជា-រៀតណាម៕
