ដោយ ឡុង សារេត
ភ្នំពេញ៖ ក្រុមហ៊ុនក្នុងស្រុកមួយ ដែលមានទីតាំងស្ថិតក្នុងខេត្តឧត្តរមានជ័យ ចូលមកដល់ឆ្នាំ២០២៥នេះបានបង្ហាញផែនការទទួលទិញដំឡូងមីស្ងួត និងស្រស់ពីប្រជាកសិករនៅតាមតំបន់ ក្នុងបរិមាណពី១០ម៉ឺនទៅ២០ម៉ឺនតោន ក្នុងមួយឆ្នាំ ដើម្បីធ្វើការនាំចេញទៅកាន់ទីផ្សារបរទេស។
លោក ជុំ ចាន់ធឿន បុគ្គលិកផ្នែកទីផ្សារនៃក្រុមហ៊ុន ហង្ស ហាវេស បានឱ្យដឹងថា មកដល់បច្ចុប្បន្ននេះក្រុមហ៊ុនមានឃ្លាំងស្តុកដំឡូងមីទិញពីកសិករចំនួនពីរកន្លែង ស្ថិតនៅខេត្តកំពង់ស្ពឺ និងនៅក្នុងខេត្តព្រះសីហនុ ហើយនៅពេលកន្លងទៅក្រុមហ៊ុនទទួលទិញដំឡូងមីពីកសិករ គឺផ្អែកទៅលើបរិមាណ និងតម្លៃជាក់ស្តែងនៅលើទីផ្សារ។
លោកបានឱ្យដឹងថា ក្នុងឆ្នាំ២០២៥នេះ ក្រុមហ៊ុនគ្រោងទទួលទិញដំឡូងមីពីកសិករក្នុងបរិមាណចន្លោះពី១០ម៉ឺនតោនទៅ២០ម៉ឺនតោន នៅក្នុងមួយឆ្នាំ។ តួយ៉ាងនៅក្នុងរយៈប៉ុន្មានខែកន្លងមកនេះ ក្រុមហ៊ុនបានប្រមូលទិញដំឡូងមីកសិករបានជាងប្រាំម៉ឺនតោន នៃផែនការទិញដំឡូងមីសរុបប្រចាំ។
បើតាមតំណាងក្រុមហ៊ុនខាងលើ, សម្រាប់តម្លៃដំឡូងមី ក្រុមហ៊ុនទទួលទិញពីកសិករនៅតាមតំបន់ គឺពឹងផ្អែកទៅតាមថ្លៃនៅលើទីផ្សារ។ ចំពោះដំឡូងមីស្ងួតក្រុមហ៊ុនទិញក្នុងតម្លៃ៦៥០រៀល ទៅ៧០០រៀល និងដំឡូងមីស្រស់ ក្នុងតម្លៃចន្លោះពី១៥០រៀល ទៅ២០០រៀល ក្នុងមួយគីឡូក្រាម។
លោកបន្តថា បច្ចុប្បន្នក្រុមហ៊ុនផ្តោតសំខាន់ទទួលទិញដំឡូងមីស្ងួតច្រើនពីប្រជាកសិករ ហើយតម្លៃអាចប្រែប្រួលឡើងចុះ អាស្រ័យទៅលើតម្រូវការជាក់ស្តែងរបស់រោងចក្រនៅខាងក្រៅប្រទេស ខណៈបច្ចុប្បន្ននៅក្នុងប្រទេសចិន គេយកដំឡូងមីកែច្នៃធ្វើជាចំណីសត្វ និងធ្វើជាអេតាណុល។
បើតាមលោក ជុំ ចាន់ធឿន បានសង្កេតឃើញថា ប្រជាពលរដ្ឋក្នុងស្រុកបានដាំដំឡូងមីមានច្រើនហើយក្នុងពេលសព្វថ្ងៃនេះនៅជួបបញ្ហាខាងទីផ្សារ ហើយទន្ទឹមនិងនេះ ក្រុមហ៊ុន ហង្ស ហាវេស ក្លាយជាអ្នកទីពឹងរបស់កសិករសម្រាប់ការលក់ដូរផលិតផលរបស់ខ្លួនកុំឱ្យកកស្ទះ។ លើសពីនេះនៅពេលខាងមុខ ក្រៅពីទទួលទិញដំឡូងមីពីកសិករ ក្រុមហ៊ុននៅមានគម្រោងប្រមូលទិញពោតពីកសិករថែមទៀតដើម្បីជួយលើកស្ទួយទីផ្សារដល់កសិករ។
ប៉ុន្តែទោះជាបែបនេះក្តី, សម្រាប់គុណភាពដំឡូងមីរបស់ប្រជាកសិករក្នុងស្រុកនៅមិនទាន់អាចឆ្លើយតបទៅតាមស្តង់ដារ ដែលទីផ្សារចង់បាននោះទេ ដោយសារការដាំដុះរបស់កសិករនៅមានចំណុចកង្វះខាតខាងបច្ចេកទេស, ការថែទាំ,ការសម្ងួត និងការស្តុកទុកដំឡូងមីហាក់នៅមានកម្រិត។ ដូច្នេះលោកចង់ឃើញកសិករបង្កើនការយកចិត្តទុកដាក់សម្ងួតដំឡូងមីឱ្យស្របទៅតាមស្តង់ដារដើម្បីឱ្យដំឡូងមីលក់បានថ្លៃខ្ពស់។
យោងតាមរបាយការណ៍របស់អគ្គនាយកដ្ឋានកសិកម្ម បានបង្ហាញថា គិតត្រឹមរយៈពេលប្រាំបួនខែឆ្នាំ២០២៥នេះ ប្រទេសកម្ពុជាបាននាំចេញដំឡូងមីស្រស់ប្រមាណជិត៦០ម៉ឺនតោន ថយចុះ១៦ភាគរយ,នាំចេញចំណិតដំឡូងមីក្រៀមបានជាង១,៣លានតោន កើនឡើងប្រមាណ៥៧ភាគរយ និងនាំចេញម្សៅដំឡូងមីកើនឡើងជាង៨៣ភាគរយ បើប្រៀបធៀបនិងរយៈពេលដូចគ្នាឆ្នាំ២០២៤៕
