ដោយ ឡុង សារេត
រាជធានីភ្នំពេញ៖ ក្រោយពីមានការឈា្លនពានរបស់ប្រទេសថៃមកលើអធិបតីភាពកម្ពុជា កើតមានឡើងជាបន្តបន្ទាប់ បានធ្វើឱ្យប្រជាពលរដ្ឋខ្មែរនៅទូទាំងប្រទេសមានការឈឺចាប់ដោយមិនអាចបំភ្លេចបាននូវសកម្មភាពរំលោភរំពានពីភាគីថៃ។ ដើម្បីឆ្លើយតបទៅទង្វើរបស់ភាគីថៃនេះ ប្រជាពលរដ្ឋខ្មែរបានធ្វើពហិការមិនគាំទ្រនិងប្រើប្រាស់ផលិតផលនាំចូលពីថៃ ដោយងាកគាំទ្រផលិតផលស្រុកមានសន្ទុះកាន់តែខ្លាំង បង្ហាញឱ្យពីមោទភាព និងភាពជឿជាក់ទៅលើផលិតផលដែលកែច្នៃដោយជាតិសាស្ត្ររបស់ខ្លួន។
តួយ៉ាងនៅក្នុងខែកញ្ញា និងតុលាឆ្នាំ២០២៥នេះ នៅពេលដែលវិស័យឯកជននិងក្រសួង ស្ថាប័នពាក់ពាន់រៀបចំព្រឹត្តិការណ៍ដាក់តាំងបង្ហាញផលិតផលក្នុងស្រុកមានជាបន្តបន្ទាប់កន្លងមកនេះ គេសង្កេតឃើញថាប្រជាពលរដ្ឋខ្មែរយ៉ាងច្រើនបានចូលរួមគាំទ្រទៅលើផលិតផលប្រើប្រាស់របស់ក្រុមហ៊ុន និងផលិតផលកែច្នៃរបស់សហគ្រាសនិងសិប្បកម្មក្នុងស្រុក យ៉ាងពេញទំហឹងតាំងពីចាប់ផ្តើមរហូតដល់ថ្ងៃបញ្ចប់ ពោលខុសប្លែកពីពេលមុន ឬឆ្នាំកន្លងទៅ។
ចំណែកអ្នកស្រី ស៊ូ វណ្ណា ប្រជាពលរដ្ឋម្នាក់រស់នៅក្រុងភ្នំពេញបានឱ្យដឹងថា ផលិតផលខ្មែរសព្វថ្ងៃមានគុណភាពមិនចាញ់ជាមួយនិងផលផលនាំចូលមកប្រទេសដទៃនោះទេ ហើយទៅថ្ងៃខាងមុខប្រសិន យើងឈប់ប្រើផលិតផលគេ ដោយងាកមកគាំទ្រ និងប្រើផលិតផលក្នុងស្រុកឱ្យបានគ្រប់គ្នា នោះវានឹងកាន់តែល្អសម្រាប់ប្រទេសកម្ពុជា ព្រោះផលិតផលក្នុងស្រុកធ្វើបានល្អតាំងពីសង្គមមកម្លេះ។
អ្នកស្រី ស៊ូ វណ្ណា ទទួលស្គាល់ថាកាលពីឆ្នាំកន្លងមកការផលិតនៅផលិតផលក្នុងស្រុកពិតជាមិនសូវសំបូរបែបច្រើនសម្រាប់ផ្គត់ផ្គង់ទៅលើទីផ្សារ ទាមទារឱ្យមានការនាំចូលមកពីខាងក្រៅបន្ថែម។ ប៉ុន្តែសព្វថ្ងៃនេះក្រុមហ៊ុន សហគ្រាស និងសិប្បកម្មនៅក្នុងស្រុក បានប្រឹងប្រែងផលិតបានច្រើនប្រភេទ ហើយមានគុណភាពស៊ឹងតែលើសផលិតផលនាំចូលមកពីខាងក្រៅទៀតផង។ ជាក់ស្តែងអ្នកស្រីពេញនិងគាំទ្រច្រើនជាងគេ ទៅលើផលិតផលមីជាតិ ហើយថែមទាំងសំណូមពរដល់ក្រុមហ៊ុនក្នុងស្រុកធ្វើការបង្កើនការផលិតនៅផលិតផលឱ្យបានច្រើនថែមទៀត ព្រោះចាប់ពីពេលនេះទៅមុខប្រជាពលរដ្ឋ គាំទ្ររហូតផលិតផលក្នុងស្រុករហូតហើយទោះបីតម្លៃខុសគ្នាតិចតួចក៏ដោយ។
ចំណែកអ្នកស្រី សោម វណ្ណី ប្រជាពលរដ្ឋរស់នៅស្រុកអង្គស្នួលខេត្តកណ្តាលបានឱ្យដឹងថា ការគាំទ្រផលិតផលខ្មែររបស់អ្នកស្រីគឺចង់បង្ហាញឱ្យឃើញថាអ្នកស្រីមានមោទនភាពដែលខ្មែរមានសមត្ថភាពអាចផលិតនៅផលិតផលបានដល់រាប់រយមុខក្នុងពេលបច្ចុប្បន្ន។
អ្នកស្រីបន្តថា ការចំណាយពេលចូលរួមគាំទ្រផលិតផលក្នុងស្រុក ឱ្យមានសន្ទុះទៅមុខកើនឡើងខ្លាំងក្លា គឺដើម្បីជួយឱ្យប្រទេសជាតិមានភាពរុងរឿង កុំឱ្យពលរដ្ឋពឹងផ្អែកតែទៅលើផលិតផលនាំចូលមកពីប្រទេសផ្សេង។ជាក់ស្តែងសម្រាប់ការគាំទ្រផលិតផលក្នុងពិព័រណ៍កន្លងទៅមានការពេញនិងគាំទ្រជាខ្លាំងទៅលើស្ករត្នោតក្នុងស្រុកដែលអាចកែច្នៃធ្វើជាកាហ្វេស្ករត្នោតបាន ក្រៅពីផលិតផលទឹកត្រី ទឹកដោះគោជូរ និងសាច់គោងៀត។
ទន្ទឹមនិងនេះ អ្នកស្រី សោម វណ្ណី បានអំពាវនាវទៅដល់ប្រជាពលរដ្ឋទាំងអស់ចូលរួមជួយគាំទ្រផលិតផលរបស់ខ្មែរឱ្យខ្លាំងក្លា ដែលជាស្នាដៃរបស់កូនខ្មែរដើម្បីផលិតក៏ដូចជាស្នាដៃទាំងនេះ បានទទួលស្គាល់នៅលើពិភព។
សូមជម្រាបជូនផងដែរថា ថ្មីៗកន្លងទៅនេះ,ឯកឧត្តម ហ៊ុន ម៉ានី ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជាមានប្រសាសន៍មានប្រសាសន៍សង្កត់ធ្ងន់ថា “ឆន្ទៈ មនស្ការ និងការចូលរួមរបស់បងប្អូនទាំងអស់ដែលបានគាំទ្រផលិតផលក្នុងស្រុកនេះគឺជាកំម្លាំងចិត្តដ៏ធំធេង និងមិនអាចកាត់ថ្លៃបានជូនដល់ក្រុមហ៊ុន រោងចក្រ សហគ្រាស សិប្បកម្ម និងផលិតករក្នុងស្រុក។ ដូចនេះសូមលើកទឹកចិត្តដល់ផលិតករទាំងអស់ សូមខិតខំបន្ថែមទៀតដើម្បីបង្កើនការផ្គត់ផ្គង់នូវផលិតផលនិងសេវារបស់ខ្លួនឱ្យកាន់តែមានភាពចម្រុះ សំបូរបែបដែលគិតគូរទាំងលើបរិមាណ ដើម្បីឆ្លើយតបទៅនិងតម្រូវការទីផ្សារក្នុងស្រុក។ ជាពិសេសបង្កើនការប្រើប្រាស់វត្ថុធាតុដើម ធាតុផ្សំនិងសម្ភារៈក្នុងស្រុកសម្រាប់ខ្សែច្រវាក់ផលិតកម្មរបស់ខ្លួន ដើម្បីគាំទ្រឱ្យមានស្ថិរភាពសម្រាប់បង្កើតឱកាសការងារដល់ប្រជាជនយើង”។
លើសពីនេះ ឯកឧត្តម ហ៊ុន ម៉ានី ក៏បានអំពាវនាវដល់បងប្អូនប្រជាពលរដ្ឋបន្តជឿជាក់ ជំរុញ គាំទ្រនិងប្រើប្រាស់ផលិតផលក្នុងស្រុកឱ្យបានជាប់ជាប្រចាំដើម្បីលើកទឹកចិត្តដល់ផលិតករ ក្នុងស្រុកដើម្បីឱ្យមានការលូតលាស់កាន់តែប្រសើរ។សម្រាប់គ្រួសារសហភាពសហព័ន្ធយុវជនកម្ពុជា ទោះបីរៀបចំព្រឹត្តិការណ៍នេះជាលើកទី១ក៏ដោយ សហភាពសហព័ន្ធយុវជនកម្ពុជាប្តេជ្ញាចិត្តបន្តរៀបចំព្រឹត្តិការណ៍ពិព័រណ៍នេះជារៀងរាល់ឆ្នាំបន្តបន្ទាប់ទៀត ដើម្បីឱ្យស្របទៅតាមបុព្វហេតុរបស់ ស.ស.យ.ក.ផងដែរ៕
