ភ្នំពេញ៖ យោងតាមឧកញ៉ា សុង សារ៉ន បានបញ្ជាក់ថា ក្រុមហ៊ុន អេមរុ រ៉ាយស៍ ដែលត្រូវបានគេស្គាល់ថា ជាគំរូអាជីវកម្មមិនប៉ះពាល់ដល់បរិស្ថាន និងជាអ្នកត្រួសត្រាយផ្លូវក្នុងវិធីសាស្រ្តអាជីវកម្មប្រកបដោយបរិយាបន្ន។
យោងតាមក្រុមហ៊ុនខាងលើ គឺក្រុមហ៊ុនធ្វើការដោយផ្ទាល់ជាមួយកសិករខ្នាតតូច ដោយផ្តល់ជំនួយបច្ចេកទេស និងការធានាបាននូវទីផ្សារសម្រាប់ផលិតផលសរីរាង្គរបស់ពួកគេ។ វិធីសាស្រ្តនេះមិនត្រឹមតែធានាបាននូវការនាំចេញ ដែលមានគុណភាពខ្ពស់ប៉ុណ្ណោះទេ ប៉ុន្តែថែមទាំងអនុញ្ញាតឲ្យក្រុមហ៊ុនផ្តល់តម្លៃបុព្វលាភបន្ថែមដល់កសិករផងដែរ។
បើតាមរបាយការណ៍ពីក្រុមហ៊ុនបង្ហាញថា ក្រុមហ៊ុនសាជីវកម្មសហគមន៍កសិកម្មកម្ពុជា ដែលជាដៃគូសំខាន់ក្នុងការធ្វើពិពិធកម្មការនាំចេញកសិផល ផ្តោតលើការជួយគាំទ្រកសិករខ្នាតតូចទៅជាសហគ្រិន។ ក្រុមហ៊ុនសាជីវកម្មសហគមន៍កសិកម្មកម្ពុជា គាំទ្រសហគមន៍កសិកម្មដោយផ្តល់ជំនួយបច្ចេកទេស លទ្ធភាពទទួលបានទីផ្សារ និងការគាំទ្រផ្នែកហិរញ្ញវត្ថុ ជួយពួកគេបន្ថែមតម្លៃដល់ដំណាំកសិកម្ម និងលើកកម្ពស់ជីវភាពរបស់ពួកគេ។
សហគមន៍កសិកម្មនៅខេត្តព្រះវិហារ កាលពីថ្ងៃទី១៦ ខែកញ្ញា ឆ្នាំ២០២៥ កន្លងទៅបានចុះហត្ថលេខាលើកិច្ចសន្យាជំរុញកសិកម្មសរីរាង្គដ៏សំខាន់មួយ ដោយពង្រឹងភាពជាដៃគូរវាងសហគមន៍កសិកម្មនៅខេត្តព្រះវិហារ ក្រុមហ៊ុន អេមរុ រ៉ាយស៍ និងក្រុមហ៊ុនសាជីវកម្មសហគមន៍កសិកម្មកម្ពុជា។
ព្រឹត្តិការណ៍នេះ គឺជាជំហានដ៏សំខាន់មួយឆ្ពោះទៅមុខសម្រាប់វិស័យកសិកម្មសរីរាង្គរបស់កម្ពុជា ដោយធានាបាននូវស្ថិរភាពទីផ្សារសម្រាប់កសិករក្នុងស្រុក និងការពង្រឹងជំហរនៃវិស័យកសិកម្មរបស់ប្រទេសនៅក្នុងទីផ្សារពិភពលោក។
ព្រឹត្តិការណ៍នេះ ក៏ជាការបន្តនៃភាពជាដៃគូ ដែលបានចាប់ផ្តើមនៅក្នុងឆ្នាំ២០១៤ ស្របតាមចក្ខុវិស័យរបស់រាជរដ្ឋាភិបាលកម្ពុជាសម្រាប់វិស័យកសិកម្ម ដែលមានរចនាសម្ព័ន្ធ និងការគាំទ្រកាន់តែច្រើន។ភាពជោគជ័យនៃភាពជាដៃគូសាធារណៈ និងឯកជន ជាសក្ខីភាពមួយចំពោះកិច្ចខិតខំប្រឹងប្រែងសម្របសម្រួលរបស់អ្នកពាក់ព័ន្ធទាំងអស់ រួមទាំងក្រសួងកសិកម្ម រុក្ខាប្រមាញ់ និងនេសាទ និងក្រសួងពាណិជ្ជកម្ម។
ស្ថាប័នរបស់រាជរដ្ឋាភិបាលកម្ពុជា បានដើរតួនាទីយ៉ាងសំខាន់ក្នុងការផ្តល់នូវក្របខ័ណ្ឌគាំទ្រសម្រាប់ការធ្វើកសិកម្មតាមកិច្ចសន្យាតាមរយៈគោលនយោបាយ ការបណ្តុះបណ្តាល និងការសម្របសម្រួលទីផ្សារជាដើម។
តាមរយៈកិច្ចសហការជាមួយសហគមន៍កសិកម្ម២៩ និងកសិករជាង៣,៧០០នាក់ ក្រុមហ៊ុនអេមរុ រ៉ាយស៍ កំពុងធានាថា កសិករទទួលបានតម្លៃសមរម្យ ទីផ្សារមានស្ថិរភាព និងឱកាសនាំស្រូវសរីរាង្គកម្ពុជា ទៅកាន់ពិភពលោក។ ពួកយើងកំពុងកសាងមិនត្រឹមតែការរីកចម្រើនទេ ប៉ុន្តែថែមទាំងកសាងកិត្តិយស និងភាពរុងរឿងសម្រាប់សហគមន៍កសិកម្មរបស់យើងផងដែរ។
ក្រុមហ៊ុន អេមរុ រ៉ាយស៍ បានចុះកិច្ចព្រមព្រៀងទិញស្រូវសរីរាង្គចំនួន២៥,០០០តោន ពី២៩សហគមន៍កសិកម្ម ដែលផ្តល់អត្ថប្រយោជន៍ជាង៣,៧០០គ្រួសារ។ ក្នុងពេលជាមួយគ្នានេះដែរ ក្រុមហ៊ុនសាជីវកម្មសហគមន៍កសិកម្មកម្ពុជា នឹងចុះកិច្ចព្រមព្រៀងទិញដំឡូងមីសរីរាង្គប្រមាណ៥៥,០០០ តោនពីប្រាំបួនសហគមន៍កសិកម្ម ដែលផ្តល់អត្ថប្រយោជន៍ជាង១,៤០០គ្រួសារ។
កិច្ចសន្យានេះមានតម្លៃសរុបប្រមាណជា១២លានដុល្លារ ក្នុងនោះប្រមាណជាប្រាំលានដុល្លារសម្រាប់ស្រូវ និងប្រាំពីរលានដុល្លារសម្រាប់ដំឡូងមីសរីរាង្គ ដែលមានប្រហែល១,៥លានដុល្លារ ជាបុព្វលាភ ដែលនឹងត្រូវបង់ទៅឲ្យសហគមន៍ និងកសិករ។ ការណ៍នេះ គឺជាលទ្ធផលផ្ទាល់នៃការប្តេជ្ញាចិត្តរួមគ្នា របស់ដៃគូទាំងអស់ ដើម្បីជម្នះបញ្ហាប្រឈមដូចជាការប្រែប្រួលអាកាសធាតុ និងការអនុលោមតាមស្តង់ដារសរីរាង្គថ្មីរបស់សហភាពអឺរ៉ុប (EU Reg ២០១៨/៨៤៨)៕
