អូស្ត្រាលី៖ សត្វចៀមរស់រាប់ពាន់ក្បាល មានតម្លៃប្រមាណ១,២លានដុល្លារអូស្ត្រាលី ត្រូវចោរលួចចេញពីកសិដ្ឋានមួយកន្លែង ក្នុងប្រទេសអូស្ត្រាលី ធ្វើឱ្យកសិករនៅតាមកសិដ្ឋាននានាដេកមិនសូវលក់។
មន្ត្រីនគរបាលអូស្ត្រាលី បានបើកការស៊ើបអង្កេតបន្ទាប់ពីសត្វចៀម ប្រមាណ ៥៥០០ក្បាល បានបាត់ខ្លួនពីកសិដ្ឋានធំមួយ ក្នុងតំបន់ភាគកណ្តាល ឈៀងខាងលិចនៃរដ្ឋឃ្វីនឡែន ( Queensland) របស់ប្រទេសអូស្ត្រាលី។
មន្ត្រីនគរបាលបាននិយាយថា ចៀមទាំងអស់សុទ្ធតែមានបំពាក់ស្លាកសម្គាល់តាមប្រព័ន្ធបញ្ជាក់អត្តសញ្ញាណ ហើយត្រូវគេសង្ស័យថា ចោរអាចលួចក្នុងចន្លោះពីខែកុម្ភៈ ដល់ខែឧសភា ឆ្នាំ២០២៦នេះ។
ចៀមពូជ ដ័រពើ អាចសម្គាល់បានយ៉ាងងាយតាមរយៈក្បាល និងក មានពណ៌ខ្មៅស្រអាប់ ខុសពីដងខ្លួនរបស់វា ដែលមានពណ៌ស។
ក្រុមអ្នកស៊ើបអង្កេតមកពីក្រុមបង្ក្រាបបទល្មើសឧក្រិដ្ឋ ពាក់ព័ន្ធការចិញ្ចឹមសត្វ និងនៅតាមជនបទ (Rural and Stock Crime Squad) កំពុងអំពាវនាវសុំសហការផ្តល់ព័ត៌មានពីសាធារណៈជន ហើយស្នើឱ្យអ្នកបានឃើញសត្វណាមួយចៀមមានលក្ខណៈដូចការពិពណ៌នា ឬមានព័ត៌មានពាក់ព័ន្ធ សូមផ្តល់ព័ត៌មានដល់មន្ត្រីនគរបាល។
សេចក្តីថ្លែងការណ៍របស់មន្ត្រីនគរបាល បានបញ្ជាក់យ៉ាងច្បាស់ថា «ក្រុមអ្នកស៊ើបអង្កេតចង់ពិភាក្សាជាមួយអ្នកណាក៏ដោយ ដែលបានសង្កេតឃើញពីការផ្លាស់ទីរបស់សត្វចៀម សកម្មភាពដឹកជញ្ជូនសត្វ ឬសកម្មភាពប្រក្រតីផ្សេងទៀត នៅក្នុងតំបន់នេះ»។
លោក ប៉ូល អេល្លៀត (Paul Elliot) ស្នងការរងជាន់ខ្ពស់ទទួលបន្ទុកផ្នែកស៊ើបអង្កេត បាននិយាយថា ការលួចសត្វចៀមនេះ គឺជា «ក្តីបារម្ភដ៏ធំមួយ» សម្រាប់មន្ត្រីនគរបាល ហើយកំពុងជះផលប៉ះពាល់យ៉ាងធ្ងន់ធ្ងរដល់កសិករ និងសហគមន៍ចិញ្ចឹមសត្វ នៅក្នុងប្រទេសអូស្ត្រាលី។
លោកបាននិយាយថា «ការលួចសត្វចៀមនេះអាចធ្វើឱ្យខាតបង់ផ្នែកហិរញ្ញវត្ថុយ៉ាងច្រើន និងបង្កក្តីព្រួយបារម្ភបន្ថែមទៀតលើអាជីវកម្មកសិកម្ម ដែលកំពុងប្រឈមនឹងស្ថានភាពដ៏លំបាករួចទៅហើយ»។
លោកបានបន្ថែមថា «ការស៊ើបអង្កេតអាចមានភាពស្មុគស្មាញ ព្រោះវាកើតឡើងក្នុងភូមិសាស្ត្រដ៏ធំល្វឹងល្វើយ ដូច្នេះ យើងធ្វើការយ៉ាងជិតស្និទ្ធជាមួយអ្នកផលិតសត្វ មជ្ឈមណ្ឌលដេញថ្លៃសត្វ អ្នកដឹកជញ្ជូន និងភាគីពាក់ព័ន្ធក្នុងឧស្សាហកម្មសត្វ ដើម្បីកំណត់មុខសញ្ញាជនល្មើស និងទប់ស្កាត់សកម្មភាពឧក្រិដ្ឋកម្មបែបនេះ កុំឱ្យកើតឡើងទៀត»។
ករណីចោរលួចស្រដៀងគ្នានេះដែរ ធ្លាប់កើតឡើងនៅក្នុងកសិដ្ឋានចិញ្ចឹមសត្វមួយកន្លែង នៅភាគកណ្តាលរដ្ឋ ឃ្វីនឡែន ដោយធ្វើឱ្យកសិករខាតបង់ជាទឹកប្រាក់ជាង២សែនដុល្លារអូស្ត្រាលី។
កាលពីខែសីហា ឆ្នាំ២០២៦នេះ កសិករពីរនាក់ បានប្រកាសផ្តល់រង្វាន់ចំនួន២៥ ០០០ដុល្លារអូស្ត្រាលី សម្រាប់ព័ត៌មានទាំងឡាយណា ដែលនាំទៅដល់ការចាប់ខ្លួនចោរលួចគោជាង១៤០ក្បល ចេញពីកសិដ្ឋានមួយកន្លែង ក្នុងចន្លោះខែមេសា និងខែឧសភា៕ (ផាន់ អាណា)
