ដោយ រស្មី
ភ្នំពេញ៖ សមាគមស្វាយចន្ទីកម្ពុជាបានចាត់ទុកថា តម្រូវការគ្រាប់ស្វាយចន្ទីរបស់ប្រទេសចិន គឺជាទីផ្សារមួយល្អបំផុតលើសគេសម្រាប់កម្ពុជា ម្ល៉ោះហើយកម្ពុជាគប្បីពង្រីកឱ្យបានកាន់តែច្រើនពីព្រោះវាត្រូវនឹងប្រភេទស្វាយចន្ទី ដែលកសិករកម្ពុជាកំពុងនិយមដាំ ប៉ុន្តែសម្រាប់ទីផ្សារអឺរ៉ុប និងអាម៉េរិក មិនត្រូវនឹងកសិករកំពុងដាំស្វាយចន្ទី នាខណៈពេលនេះទេ។
លោក អូន ស៊ីឡុត ប្រធានសមាគមស្វាយចន្ទីកម្ពុជា បានបញ្ជាក់ថា សម្រាប់ទីផ្សារអឺរ៉ុប និងទីផ្សារអាម៉េរិក គេត្រូវការគ្រាប់ស្វាយចន្ទីប្រភេទ ដាប់បលយូ៣២០ (W320) ជាគ្រាប់ស្វាយចន្ទីប្រភេទតូច ដែលកសិករកម្ពុជាពុំសូវដាំទេ ហើយតម្លៃទៀតសោតក៍ថោក ហេតុនេះទីផ្សារអឺរ៉ុបគេច្រើនយកពីបណ្តាប្រទេសអាហ្រ្វិក និងវៀតណាមវិញ។ ចំណែកទីផ្សារនៅអាស៊ីបូព៌ា ជាពិសេសប្រទេសចិន គេត្រូវការគ្រាប់ស្វ័យចន្ទីប្រភេទដាប់បលយូ១៨០ (W180) ដែលជាប្រភេទស្វាយចន្ទីគ្រាប់ធំត្រូវនឹងគ្រាប់ចន្ទីពូជអឹម២៣ (M23) របស់កម្ពុជា។ ម្ល៉ោះហើយបើគម្ពុជាអាចទាក់ទាញទីផ្សារប្រទេសចិន គឺជាជម្រើសល្អបំផុតពីព្រោះវាត្រូវនឹងកសិករកម្ពុជាកំពុងពេញនិយមដាំ។
គ្រាប់ស្វាយចន្ទីប្រភេទ W180 គឺជាប្រភេទគ្រាប់ស្វាយចន្ទីសទាំងមូល ដែលមានគុណភាពខ្ពស់ និងធំជាងគេបំផុត ដែលគេតែងតែហៅថា “ស្តេចស្វាយចន្ទី”។ “W” តំណាងឱ្យពណ៌ស (White) និងទាំងមូល (Whole) ហើយ “180” មានន័យថា មានគ្រាប់ប្រហែល១៨០គ្រាប់ ក្នុងទម្ងន់មួយផោន ឬស្មើនឹង០,៤៥គីឡូក្រាម។ ចំណែក W320 មានន័យថា គ្រាប់ស្វាយចន្ទីស និងទាំងមូល មានទម្ងន់ចំនួន៣២០គ្រាប់ ក្នុងមួយផោន ឬស្មើនឹង០,៤៥គីឡូក្រាម។
លោកបានបញ្ជាក់បន្ថែមថា “ពិតណាស់តម្រូវការប្រភេទគ្រាប់ស្វាយចន្ទីខុសគ្នា ហេតុនេះយើងមិនអាចប្រជែងទីផ្សារអឺរ៉ុប និងអាម៉េរិកបានទេ ដោយសារតម្រូវការប្រភេទគ្រាប់ស្វាយចន្ទីខុសគ្នានេះឯង”។
លោកប្រធានសមាគមន៍ស្វាយចន្ទីកម្ពុជា បានបញ្ជាក់ឱ្យដឹងបន្ថែមថា មកដល់ពេលនេះគ្រាប់ស្វាយចន្ទី ដែលបានចុះបញ្ជីការពារពូជ នៅក្រសួងកសិកម្ម រុក្ខាប្រមាញ់ និងនេសាទ មានបួនប្រភេទដូចជាពូជអឹម២៣ (M-23) ពូជអឹម១០ (M-10) ពូជអាយអឹម៤ (IM-4) និងពូជអេក ០៩ (H-09)។
លោកបានប្រាប់ឱ្យដឹងទៀតថា សម្រាប់ដំណាំស្វាយចន្ទីនៅកម្ពុជាប្រមាណ៧០ភាគរយ ហើយដាំក្នុងលក្ខណៈទ្រង់ទ្រាយតូច គឺកសិករដាំជាលក្ខណៈគ្រួសារ និងមានតែប្រមាណ៣០ភាគរយប៉ុណ្ណោះ ដាំជាលក្ខណៈដីសម្បទានរបស់រាជរដ្ឋាភិបាល។
គួរបញ្ជាក់ថា ចាប់ពីថ្ងៃទី២២ ដល់ថ្ងៃទី២៥ ខែកក្កដា ឆ្នាំ២០២៦ ក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារនៃនាយកដ្ឋានកសិឧស្សាហកម្ម ទៅធ្វើទស្សនៈកិច្ចនៅប្រទេសចិន ដើម្បីទាក់ទាញអ្នកវិនិយោគលើការកែច្នៃគ្រាប់ស្វាយចន្ទីកម្ពុជា។
ក្រសួងកសិកម្ម បានឱ្យដឹងថា ក្នុងដំណើរទស្សនកិច្ចនេះ មន្រ្តីក្រសួងបានជួបជាមួយក្រុមហ៊ុនបច្ចេកវិទ្យាកសិកម្ម ស្ថិតនៅទីក្រុងហាំងចូវប្រទេសចិន ដើម្បីជំរុញ និងស្រូបទាញអ្នកវិនិយោគចិន លើការកែច្នៃនៃវិស័យឧស្សាហកម្មស្វាយចន្ទីកម្ពុជាឱ្យកាន់តែរីកចម្រើន។
គួរបញ្ជាក់ថា ជាលទ្ធផលក្រោយពីទស្សនៈកិច្ច និងពិភាក្សាគ្នារួចមក ភាគីក្រុមហ៊ុន និងប្រតិភូកម្ពុជា បានឯកភាពគ្នាមួយចំនួន មានដូចជា៖ ទី១ ក្រុមហ៊ុននឹងលើកកម្ពស់ស្វាយចន្ទីកម្ពុជា ជាម៉ាកស្វាយចន្ទីសរីរាង្គ តាមរយៈការប្រមូលទិញគ្រាប់ស្វាយចន្ទីកម្ពុជាដោយផ្ទាល់ ដើម្បីកែច្នៃនៅប្រទេសចិន សម្រាប់នាំចេញទៅកាន់ទីផ្សារអឺរ៉ុប ជប៉ុន និងទីផ្សារក្នុងស្រុកតែម្ដង។ ទី២ ក្រុមហ៊ុនចិននឹងសិក្សាស្វែង និងវាយតម្លៃអំពីអនុលោមភាពគ្រាប់ស្វាយចន្ទីសរីរាង្គរបស់កម្ពុជា រួមទាំងស្វាយចន្ទីពូជអឹម២៣ និងពូជប្រពៃណី នៅតាមបណ្ដាខេត្តមានដាំដំណាំស្វាយចន្ទី។ ខេត្តគោលដៅ ដែលក្រុមហ៊ុនចិនត្រូវសិក្សាស្វែងយល់ មានដូច ជាខេត្តរតនគីរី ស្ទឹងត្រែង ក្រចេះ កំពង់ចាម កំពង់ធំ សៀមរាប និងខេត្តព្រះវិហារជាដើម នៅអំឡុងខែសីហា ឆ្នាំ២០២៦ ខាងមុខឆាប់ៗនេះ។
ទី៣ ក្រុមហ៊ុនបានបង្ហាញគោលបំណងក្នុងការមកវិនិយោគបង្កើតរោងចក្រកែច្នៃគ្រាប់ស្វាយចន្ទីតែម្ដង នៅខេត្តក្រចេះ និងបានស្នើសុំការគាំទ្រពីថ្នាក់ដឹកនាំនៃក្រសួងកសិកម្ម រុក្ខាប្រមាញ់ និងនេសាទ នូវលក្ខខណ្ឌអនុគ្រោះមួយចំនួន។ ទី៤ ក្រុមហ៊ុននឹងចូលរួមវេទិកាកសិធុរកិច្ច និងវេទិកានានា តាមការអញ្ជើញរបស់ភាគីកម្ពុជា នាពេលខាងមុខ។ ទី៥ ប្រតិភូម្ពុជាបានគាំទ្រដំណើរទស្សនកិច្ចរបស់តំណាងក្រុមហ៊ុនចិន មកកាន់ប្រទេសកម្ពុជា ក្នុងគោលបំណងសិក្សាស្វែងយល់ និងវាយតម្លៃស្វាយចន្ទីសរីរាង្គនៅកម្ពុជា និងលើកសំណើនេះជូនថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ដើម្បីស្នើសុំគោលការណ៍ជូននាយកដ្ឋានកសិឧស្សាហកម្ម ចូលរួមសម្របសម្រួលឱ្យបានសម្រេចជោគជ័យតាមផែនការ និងទី៦ ភាគីទាំងពីរនឹងទាក់ទងគ្នាជាបន្តទៀត ដោយមាននាយកដ្ឋានកសិឧស្សាហកម្ម ជាអង្គភាពទទួលបន្ទុកការងារសម្របសម្រួលជាមួយអង្គភាពពាក់ព័ន្ធ៕
