តៃប៉ិះ៖ អតីតបុគ្គលិកភោជនីយដ្ឋានជប៉ុនបីនាក់ ត្រូវតុលាការកោះតៃវ៉ាន់ផ្តន្ទាទោសឱ្យជាប់ពន្ធនាគារ ពីបទយកសាច់គោជប៉ុនផុតសុពលភាពប្រើប្រាស់ មកធ្វើម្ហូបឱ្យភ្ញៀវបរិភោគ នៅក្នុងហាងមួយដ៏ល្បីឈ្មោះ នៅកោះតៃវ៉ាន់។
បុរសជនជាតិជប៉ុនទាំងបីនាក់នេះ បានប្រព្រឹត្តអំពើល្មើសច្បាប់នៅចន្លោះខែមករា និងខែមីនា ឆ្នាំ២០២៤ ហើយត្រូវតុលាការតៃវ៉ាន់កាត់ទោសឱ្យជាប់ពន្ធនាគារម្នាក់ៗរយៈពេលពីរឆ្នាំ និងប្រាំបីខែ ព្រមទាំងត្រូវបណ្តេញចេញផងដែរ។ ចំណែកក្រុមហ៊ុនគ្រប់គ្រងភោជនីយដ្ឋានវិញ ត្រូវផាកពិន័យជាប្រាក់ចំនួនមួយលានដុល្លារតៃវ៉ាន់ ឬស្មើនឹង៣២ ៣០០ដុល្លារអាម៉េរិក។
ជាជនជាតិជប៉ុនទាំងបីនាក មានប្រធានក្រុមហ៊ុនភោជនីយដ្ឋាន អធិរាជសាច់គោជប៉ុន (Wagyu Emperor) ឈ្មោះ តុស៊ី សាកាម៉ូតុ (Toshi Sakamoto) អាយុ៣៥ឆ្នាំ, អ្នកគ្រប់គ្រងទូទៅភោជនីយដ្ឋាន ឈ្មោះ អាតស៊ូយ៉ា កុបូ (Atsuya Kubo) អាយុ២៥ឆ្នាំ និងមេចុងភៅ ឈ្មោះហ្ស៊ូហី យ៉ាម៉ាហ្សុអេ (Shohei Yamazoe) អាយុ៤២ឆ្នាំ។
ព្រះរាជអាជ្ញាអមតុលាការក្រុងថៃជុង (Taichung District Court) របស់កោះតៃវ៉ាន់ បាននិយាយថា នៅចន្លោះខែមករា និងខែមីនា ឆ្នាំ២០២៤ ភោជនីយដ្ឋាននេះបានប្រើសាច់គោកូបេរបស់ជប៉ុន ដែលហួសដឺឡេ ប៉ុន្តែប្រកាសថា ជាកំពូលសាច់គោអាំងរបស់ជប៉ុន។
សាច់គោប្រភេទនេះ ត្រូវភោជនីយដ្ឋាននេះលក់ក្នុងតម្លៃធម្មតាចំនួន២ ៧០០ដុល្លារតៃវ៉ាន់ ឬស្មើនឹង៨៣ដុល្លារអាម៉េរិក ហើយបានធ្វើម្ហូបឱ្យភ្ញៀវរហូតដល់២៩នាក់ ដែលមិនបានដឹងថា វាជាសាច់គោផុតកំណត់ប្រើប្រាស់ឡើយ។ អាជ្ញាធរមូលដ្ឋានរបស់កោះតៃវ៉ាន់ បាននិយាយថា ភោជនីយដ្ឋានបានចំណេញប្រាក់ពីលក់សាច់គោហួសដឺឡេចំនួន៧៨ ៣០០ដុល្លារតៃវ៉ាន់ ឬស្មើនឹង២ ៤១២ដុល្លារអាម៉េរិក ដែលរឹបអូសតាំងពីដំណាក់កាលស៊ើបអង្កេតម្លេះ។
ការស៊ើបអង្កេតបានចាប់ផ្តើមតាំងពីខែមេសា ឆ្នាំ២០២៤ បន្ទាប់ពីមានអ្នកប្តឹងចោទប្រកាន់ភោជនីយដ្ឋាននេះថា កំពុងប្រើប្រាស់គ្រឿងផ្សំហួសដឺឡេ។ ដូច្នេះ ក្រោយមកអ្នកត្រួតពិនិត្យសុវត្ថិភាពចំណីអាហាររបស់កោះតៃវ៉ាន់ បានរកឃើញសាច់គោហួសដឺឡេ ព្រមទាំងរកឃើញគ្រឿងផ្សំផ្សេងទៀតក៏ហួសដឺឡេដែរ។
តាមរយៈសំណុំរឿងព្រហ្មទណ្ឌនេះ អាជ្ញាធរមូលដ្ឋានរបស់កោះតៃវ៉ាន់ បានផាកពិន័យភោជនីយដ្ឋានជាទឹកប្រាក់ចំនួន១,៤៤លានដុល្លារតៃវ៉ាន់ ឬប្រហែលនឹងប្រាំសែនដុល្លារអាម៉េរិក ព្រមបានបញ្ជាឱ្យផ្អាកអាជីកម្មតែម្តង ហើយបញ្ជូនសំណុំរឿងនេះទៅតុលាការ ដើម្បីបើកសវនាការជំនុំជម្រះទោស។
ព្រះរាជអាជ្ញាបានស្នើសុំឱ្យមានការផ្តន្ទាទោសជាអតិបរមា ដោយចោទប្រកាន់ថា អ្នកទាំងបីមានគំនិតមិនល្អចំពោះអ្នកស៊ើបអង្កេត បានគំរាមអ្នកសារព័ត៌មានចំពោះការផ្សាយព័ត៌មានអំពីករណីនេះ ហើយបាននិយាយថា ពួកគេនឹងមិនផ្តល់សំណងដល់អ្នកបរិភោគម្ហូបសាច់គោហួសសុពលភាពឡើយ។
កាលពីខែមេសា ឆ្នាំ២០២៥ អ្នកបរិភោគបានដាក់ពាក្យបណ្តឹង និងប្រកាសអំពីសុវត្ថិភាពម្ហូបអាហារ ដែលនាំឱ្យមានការត្រួតពិនិត្យដោយការិយាល័យសុខាភិបាលក្រុងថៃជុង និងការស៊ើបអង្កេតបឋមដោយព្រះរាជអាជ្ញា។ ចំណែកការិយាល័យស៊ើបអង្កេតរបស់ក្រសួងយុត្តិធម៌ បានឆែកឆេរភោជនីយដ្ឋាន ពិនិត្យមើលផលិតផលម្ហូបអាហារ និងរឹបអូសបង្កាន់ដៃ កំណត់ត្រាបញ្ជាទិញ បញ្ជីមុខម្ហូប និងបញ្ជីរៀបចំមុខម្ហូប។
ភោជនីយដ្ឋានអធិរាជសាច់គោជប៉ុន ត្រូវបានបង្កើតឡើងដោយលោក តាគូយ៉ា សាកាម៉ូតុ (Takuya Sakamoto) ដែលគ្រប់គ្រងក្រុមហ៊ុនផ្គត់ផ្គង់ម្ហូបអាហារនៅតៃវ៉ាន់ កាលពីខែកញ្ញា ឆ្នាំ២០២៤។ ព្រះរាជអាជ្ញាបាននិយាយថា ក្រោយមក ភោជនីយដ្ឋាននេះត្រូវបានប្រគល់ឱ្យបងប្រុសរបស់គាត់គ្រប់គ្រង គឺលោក តុស៊ី សាកាម៉ូតុ។
ព្រះរាជអាជ្ញាបាននិយាយថា អ្នកទាំងបីពិតជាបានដឹងថា សាច់គោកូបេ ដែលពួកគេបានទិញ គឺពិតជាហួសកាលបរិច្ឆេទកំណត់ប្រើប្រាស់មែន ប៉ុន្តែពួកគេនៅតែបន្តលក់សាច់គោនេះ និងផ្សព្វផ្សាយអំពីភោជនីយដ្ឋាននេះថា ជាកំពូល ភោជនីយដ្ឋានជប៉ុន ប្រចាំក្រុងថៃជុង កោះតៃវ៉ាន់។
ព្រះរាជអាជ្ញាបានបញ្ជាក់ថា “ចាប់ពីខែមករាដល់ខែមីនា ឆ្នាំ២០២៥ ពួកគេបានលក់ម្ហូបសាច់គោកទៅឱ្យអតិថិជនចំនួន២៩នាក់ ក្នុងតម្លៃ២ ៩០០ដុល្លារតៃវ៉ាន់សម្រាប់អតិថិជនម្នាក់ ហើយសង្ស័យពួកគេទទួលបានប្រាក់ចំណេញចំនួន៧៨ ៣០០ដុល្លារតៃវ៉ាន់ ដែលបណ្តាលឱ្យមានបញ្ហាសុខភាពធ្ងន់ធ្ងរ និងរំលោភសិទ្ធិអ្នកប្រើប្រាស់”។
ការស៊ើបអង្កេតបានរកឃើញថា សាច់គោកូបេល្អបំផុតមុនកាលបរិច្ឆេទ គឺនៅដើមខែធ្នូ ឆ្នាំ២០២៤ ប៉ុន្តែពួកគេបានបន្តលក់រហូតដល់ខែមីនាឆ្នាំ២០២៥។
ការចោទប្រកាន់ បានបញ្ជាក់ថា បុរសជនជាតិជប៉ុនទាំងបីនាក់បានបំពានច្បាប់ស្តីពីគ្រប់គ្រងសុវត្ថិភាពចំណីអាហារ និងអនាម័យ ដោយលក់អាហារហួសដឺឡេ។ ពួកគេក៏ជាប់ចោទពីបទឆបោកមានស្ថានទម្ងន់ទោស និងបទបង្កគ្រោះថ្នាក់ដល់សុខភាព ដែលមានចែងក្នុងក្រមព្រហ្មទណ្ឌរបស់កោះតៃវ៉ាន់៕ (ផាន់ អាណា)
