ប៊្រីធីសកូឡុំប៊ី៖ សមាគមកសិករដាំដំណាំហូបផ្លែ នៅក្នុងប្រទេសកាណាដា កំពុងអំពាវនាវឱ្យរដ្ឋាករទឹកសាធារណៈនៅក្នុងតំបន់ ផ្អាកការបិទទឹកសម្រាប់ធ្វើកសិកម្ម និងបង្កើតផែនការគ្រប់គ្រងទឹក ដោយមានការចូលរួមសម្របសម្រួលជាមួយកសិករដាំដំណាំ និងរដ្ឋបាលខេត្តប៊្រីធីស កូឡុំប៊ី (The Province of British Columbia) ភាគខាងលិចប្រទេសកាណាដា ស្របពេលស្ថានភាពគ្រោះរាំងស្ងួតនៅតែបន្តអូសបន្លាយនៅក្នុងតំបន់នេះ។
គិតត្រឹមថ្ងៃទី១៣ ខែកក្កដា ឆ្នាំ២០២៦ ផ្ទៃដីដាំដុំដំណាំហូបផ្លែ ដែលបានឈានចូលដល់ដំណាក់កាលត្រូវកាត់បន្ថយទឹក ត្រូវរដ្ឋាករទឹកសារណៈកាត់ផ្តាច់ការផ្គត់ផ្គង់ទឹកក្នុងរដូវដំណាំកំពុងតែលូតលាស់។ សមាគមកសិករដាំដំណាំហូបផ្លែ បាននិយាយថា រដ្ឋាករទឹកសាធារណៈបានកាត់បន្ថយការបែងចែកសម្រាប់ធ្វើកសិកម្មចំនួន៧០ភាគរយ ដោយគ្មានផែនការសម្របសម្រួល ដើម្បីឧបត្ថម្ភគាំទ្រដល់ចម្ការ និងកសិដ្ឋានរងផលប៉ះពាល់ ដោយគ្រោះរាំងស្ងួត។
ប្រធានសមាគមកសិករដាំដំណាំហូបផ្លែរបស់កាណាដា បានមានប្រសាសន៍ថា “គ្មាននរណាម្នាក់អាចប្រកែកថា គ្មានគ្រោះរាំងស្ងួតធ្ងន់ធ្ងរនោះទេ ហើយអ្នកដាំក៏មិនសុំឱ្យនរណាម្នាក់ផ្តល់ទឹក ដែលមិនមាននោះដែរ។ អ្វីដែលយើងកំពុងនិយាយនេះ គឺថា អ្នកមិនអាចបិទទឹកមិនផ្គត់ផ្គង់ទៅឱ្យកសិដ្ឋានរាប់រយ ដោយចាត់ទុកជាការរឹតបណ្តឹងដ៏ចាំបាច់នោះទេ។ នៅពេលការសម្រេចចិត្តបែបនេះអាចបំផ្លាញចម្ការ ដែលចំណាយពេលដាំដំណាំអស់២០ឆ្នាំ ដូច្នេះ អ្នកមានកាតព្វកិច្ចសម្របសម្រួលគ្នាឡើងវិញចំពោះសម្រេចចិត្តបែបនេះ។”
យោងតាមសមាគមកសិករដាំដំណាំហូបផ្លែ ការបិទទឹកប៉ះពាល់ដល់ផ្ទៃដីប្រហែល៨៥០ហិកតា ជាចម្ការប៉ោម និង ចម្ការឈើរី។ សមាគមបានប៉ាន់ប្រមាណថា ការខូចខាតនៅតាមចម្ការទាំងអស់នេះ អាចបណ្តាលឱ្យមានការខាតបង់ជាទឹកប្រាក់ជាង២៥០លានដុល្លារ ឬអាចច្រើនជាង៣០០លានដុល្លារ ប្រសិនបើរាប់បញ្ចូលចំណាយលើការផលិត ការវេចខ្ចប់ ការដឹកជញ្ជូន កម្លាំងពលកម្ម អ្នកផ្គត់ផ្គង់ និងអាជីវកម្មពាក់ព័ន្ធផ្សេងទៀត។
សមាគមដដែលនេះ បាននិយាយថា វិធានការកាត់បន្ថយកាត់បន្ថយការផ្គត់ផ្គង់កសិកម្មធ្វើឱ្យដំណាំលូតលាស់យឺត។ ប្រភពទឹកក្នុង ដែលអាចផ្គត់ផ្គង់ប្រព័ន្ធធារាសាស្រ្តដល់តំបន់ ប៉ុន្តែត្រូវមានការយល់ព្រមពីរដ្ឋបាលខេត្តមុនសិន។ ជម្រើសផ្សេងទៀតរួមទាំងការអនុញ្ញាតឱ្យមានប្រភពទឹកមានស្រាប់ និងការជួយឧបត្ថម្ភអណ្តូងសង្គ្រោះបន្ទាន់ ក៏នៅតែមិនទាន់ដោះស្រាយបានផង។
សមាគមកសិករដាំដំណាំហូបផ្លែ កំពុងអំពាវនាវឱ្យមានកិច្ចប្រជុំជាបន្ទាន់រវាងអ្នកដាំដំណាំ អាជ្ញាធរមូលដ្ឋាន និងរដ្ឋបាលខេត្ត ដើម្បីបង្កើតកាលវិភាគសម្រាប់ចាត់វិធានការកាត់បន្ថយការផ្គត់ផ្គង់ និងបញ្ជាក់ពីលទ្ធភាពទទួលបានទឹកសម្រាប់ធ្វើកសិកម្មនាពេលអនាគត។
ចំណែកអាជ្ញាធរស្រុកក្នុងតំបន់និយាយថា ខ្លួនបាននិងកំពុងសុំការយល់ព្រមពីរដ្ឋបាលខេត្ត និងបានរៀបចំកិច្ចប្រជុំពិភាក្សាជាមួយកសិករដាំដំណាំ។ ព្រមជាមួយគ្នានេះដែរ អាជ្ញាធរស្រុកក៏កំពុងលើកទឹកចិត្តដល់ការបែងចែកទឹករវាងដីកសិកម្ម និងតំបន់មិនធ្វើកសិកម្ម ជាពិសេសរដ្ឋាករទឹកសាធារណៈបានចេញបម្រាមមិនឱ្យប្រើប្រាស់ទឹកហួសកម្រិតសម្រាប់ស្រោចសួនស្មៅនៅតាមគេហដ្ឋាន ព្រោះរដ្ឋត្រូវការសន្សំទឹកនៅក្នុងអាងស្តុក ដើម្បីការពារបញ្ហាខ្វះទឹកដោយសារគ្រោះរាំងស្ងួត៕ (ផាន់ អាណា)
