ដោយ ឡុង សារេត
ភ្នំពេញ៖ យោងតាមសមាគមវារីវប្បករនៅកម្ពុជា នៅថ្ងៃទី២៧ ខែកក្កដា ឆ្នាំ២០២៦ បានអំពាវនាវឱ្យស្ថាប័នពាក់ព័ន្ធមានវិធានការបន្ទាន់ ព្រោះតម្លៃកង្កែបសាច់មានការធ្លាក់ចុះខ្លាំង ចាប់តាំងពីខែមេសា ឆ្នាំ២០២៦ ពីតម្លៃជាង៧ ០០០រៀល មកដល់៥ ០០០រៀលក្នុងមួយគីឡូក្រាម គិតត្រឹមដើមសប្តាហ៍ទី៣ នៃខែកក្កដា ឆ្នាំ២០២៦។
សមាគមបញ្ជាក់ថា តម្លៃកង្កែបសាច់ធ្លាក់ចុះ ដោយសារអ្នកប្រមូលទិញកង្កែបសាច់ក្នុងស្រុកបានទម្លាក់តម្លៃទៅតាមតម្លៃកង្កែបនាំចូល។ ទាក់ទងនិងការធ្លាក់ចុះតម្លៃកង្កែបសាច់នេះ លោក គង់ គឹមឆាវ អ្នកចិញ្ចឹមកង្កែប និងជាប្រធានក្រុមអ្នកចិញ្ចឹមកង្កែប នៅស្រុកបា្រសាទបាគង ខេត្តសៀមរាប បានយល់ឃើញថា ការធ្លាក់ចុះតម្លៃកង្កែបសាច់នៅក្នុងតំបន់មួយរយៈចុងក្រោយនេះ បណ្តាលមកពីកក្តាធំៗ។
ទី១)ដោយសារការនាំចូលកង្កែបសាច់ច្រើនហួសហេតុពេក ស្របពេលកសិករនៅក្នុងស្រុកចិញ្ចឹមកង្កែបបានច្រើនជាហេតុធ្វើឱ្យតម្លៃធ្លាក់ចុះ។ ទី២) កង្កែកចិញ្ចឹមដោយកសិករក្នុងស្រុក មានរដូវចិញ្ចឹម។ ដូច្នេះការប្រមូលផលមានច្រើនក្នុងពេលដូចគ្នា ធ្វើឱ្យពិបាកក្នុងការផ្គត់ផ្គង់ចូលទីផ្សារ ខណៈពេលនៅក្នុងខេត្តសៀមរាប ខ្សត់ភ្ញៀវទេសចរណ៍ចូលមកកម្សាន្តធ្វើឱ្យការលក់កង្កែបមិនសូវបានច្រើន។
បើយោងតាមលោក គង់ គឹមឆាវ, កាលពីដើមខែកក្កដា កសិករជាសមាជិកចិញ្ចឹមកង្កែបសាច់នៅក្នុងតំបន់លក់បានថ្លៃ៦ ០០០រៀល ហើយសមាជិកខ្លះនៅតំបន់ឆ្ងាយលក់បានថ្លៃប្រមាណ៥ ៥០០រៀល ក្នុងមួយគីឡូក្រាម ហើយតម្លៃនេះសម្រាប់កសិករមិនទទួលបានផលចំណេញនោះទេ។ លុះត្រាតែលក់បានថ្លៃចាប់ពី៦៥០០រៀលឡើងទៅ ទើបរកបានប្រាក់ចំណេញ។
លោកលើកឡើងថា ក្នុងចំណោមក្រុមអ្នកចិញ្ចឹមកង្កែបសាច់ ដែលមានសមាជិក១៥គ្រួសារ អាចផ្គត់ផ្គង់កង្កែបសាច់ទៅលើទីផ្សារក្នុងតំបន់ បានចន្លោះពី៥តោន ទៅ៧តោនក្នុងមួយខែ។ តែនៅក្នុងមួយរយៈកន្លងមកនេះ លោកបានផ្អាកការចិញ្ចឹមរយៈពេល៣ខែ ដោយរំពឹងថា អាចចាប់ផ្តើមចិញ្ចឹមឡើងនៅខែសីហា បើសិនជាតម្រូវការ ក៏ដូចជាតម្លៃកង្កែបសាច់ងើបឡើងវិញ។
លោក រី វុទ្ធី ជាអ្នកចិញ្ចឹម និងជាប្រធានក្រុមអ្នកចិញ្ចឹមកង្កែប នៅខេត្តព្រៃវែង បានឱ្យដឹងថា បច្ចុប្បន្នកសិដ្ឋានមានកង្កែបមេពូជ១ ៥០០គូ ដែលអាចផលិតកូនកង្កែបពូជបានចន្លោះពី២០ ០០០ ទៅ៣០ ០០០កូនក្នុងមួយខែ ហើយទន្ទឹមនិងតម្លៃកង្កែបសាច់នៅតាមតំបន់មានការធ្លាក់ថ្លៃ លោកបានទម្លាក់តម្លៃកូនកង្កែបពូជរបស់ខ្លួនមកនៅចន្លោះពី១៥០រៀល ទៅ២០០រៀល ក្នុងកូនកង្កែបមួយក្បាល។
លោកបន្តថា នៅពេលកន្លងមកការផ្គត់ផ្គង់កង្កែបសាច់ទៅលើទីផ្សារ ក្នុងមួយខែមានពី៣០ ទៅ៣៥តោន។ ប៉ុន្តែបើសិនតម្លៃកង្កែបនៅតែបន្តធ្លាក់ចុះរយៈពេលយូរថែមទៀត កសិដ្ឋាននឹងកាត់បន្ថយការផលិតឱ្យមកនៅត្រឹម៣០០គីឡូក្រាមក្នុងមួយថ្ងៃ។
ស្របពេលកសិករចិញ្ចឹមកង្កែប នៅតាមតំបន់រងផលប៉ះពាល់ពីការប្រែប្រួលតម្លៃកង្កែបសាច់នៅលើទីផ្សារ, លោក រី វុទ្ធី បានអំពាវនាវ ក៏ដូចជាសំណូមពរឱ្យស្ថាប័នពាក់ព័ន្ធរឹតបណ្តឹង និងត្រួតពិនិត្យកង្កែបនាំចូល។
យោងតាមការអំពាវនាវ នៅលើបណ្តាញទំនាក់ទំនងផ្លូវការរបស់សមាគមខាងលើ បានបង្ហាញថា កាលពីថ្ងៃទី៨ ខែកក្កដា ឆ្នាំ២០២៦ សមាគមវារីវប្បករនៅកម្ពុជា បានព្យាករណ៍តម្លៃកង្កែបសាច់ ដែលកំពុងមាននិន្នាការធ្លាក់ចុះដោយសាររងឥទ្ធិពលពីផលិតកម្មកង្កែបសាច់នៅប្រទេសវៀតណាម។
តាមរយៈគណនីហ្វេសប៊ុក ដែលបង្ហោះតម្លៃវារីវប្បកម្ម នៅប្រទេសវៀតណាម តាំងពីឆ្នាំ២០២០មកនោះ បង្ហាញថាតម្លៃកង្កែបក្នុងមួយគីឡូក្រាម ក្នុងខេត្តដុងថាប់ និងខេត្តអាងយ៉ាង បានធ្លាក់ចុះជាលំដាប់ពី៣៩ ០០០ ទៅ៣៨ ០០០ ដុងក្នុងខែមិថុនា និង៣៣ ០០០ ទៅ៣២ ០០០ដុង ក្នុងខែកក្កដា ឬប្រហែល៤ ៩០០ ទៅ៥ ០០០រៀល។
សេចក្តីអំពាវនាវរបស់សមាគម បានលើកឡើងថា តម្លៃកង្កែបនៅក្នុងខេត្តដុងថាប់ និងខេត្តអាងយ៉ាង គិតជាលុយខ្មែរស្ថិតក្នុងចន្លោះប្រហែល៤ ៩០០ ទៅ៥ ០០០រៀល ក្នុងមួយគីឡូក្រាម។ ប៉ុន្តែសមាគមបានស្រាវជ្រាវឃើញថា តម្លៃកង្កែប ដែលនាំចូលពីប្រទេសវៀតណាម លក់ដល់ផែត្រីបោះដុំ នៅព្រែកព្នៅ មានតម្លៃត្រឹម៤ ៨០០រៀលប៉ុណ្ណោះ។ មួយវិញទៀត កង្កែបក្នុងស្រុកត្រូវបានបដិសេធពីអ្នកលក់ដុំ ដោយហេតុផលផ្សេងៗ ធ្វើឱ្យកង្កែបក្នុងស្រុកមិនអាចបញ្ចេញលក់បាន។ ប្រសិនបើមានការបង់ពន្ធត្រឹមត្រូវ បួករួមនឹងថ្លៃភស្តុភារកម្មផង កង្កែបនាំចូលពីប្រទេសវៀតណាម អាចលក់ក្នុងតម្លៃក្នុង៤ ៨០០រៀលបានទេ? តើអ្នកលក់ដុំកង្កែប បានកង្កែបពីខាងណាមកលក់ បើកង្កែបក្នុងស្រុកលក់អត់ចេញគ្រប់កន្លែង ខណៈកង្កែបក្នុងស្រុកអាចផ្គត់ផ្គង់ទីផ្សារប្រហែល១០តោន ក្នុងមួយថ្ងៃ។
សមាគមវារីវប្បករ នៅកម្ពុជាបានសន្និដ្ឋានថា ការនាំចូលលើសកូតាអនុញ្ញាត និងការនាំចូល ដែលមិនមានអាជ្ញាបណ្ណតាមច្រកព្រំដែនមួយចំនួន កំពុងធ្វើឱ្យកង្កែបសាច់ផលិតក្នុងស្រុកស្ទះលក់មិនចេញ ហើយតម្លៃកង្កែបសាច់នឹងបន្តធ្លាក់ចុះក្រោម៥ ០០០រៀល ក្នុងមួយគីឡូក្រាម៕
