ហាណូយ៖ ប្រធានការិយាល័យពាណិជ្ជកម្មវៀតណាមប្រចាំប្រទេសអេមីរ៉ាត អារ៉ាប់រួម បានឱ្យដឹងថា ការនាំចេញទំនិញកសិផលរបស់វៀតណាម ទៅកាន់ប្រទេសអេមីរ៉ាត អារ៉ាប់រួម បានធ្លាក់ចុះយ៉ាងខ្លាំងក្នុងរយៈពេលប្រាំមួយខែដំបូងនៃឆ្នាំ២០២៦ បើធៀបនឹងរយៈពេលដូចគ្នាក្នុងឆ្នាំ២០២៥។
ការនាំចេញបន្លែ និងផ្លែឈើ របស់វៀតណាមទៅកាន់តំបន់នេះ ត្រូវបានប៉ាន់ប្រមាណថា មានទំហំទឹកប្រាក់ចំនួនជិត៣៥លានដុល្លារ ធ្លាក់ចុះជិត៤២ភាគរយ គ្រាប់ស្វាយចន្ទីមានទំហំទឹកប្រាក់ចំនួនជាង២៥លានដុល្លារ ធ្លាក់ចុះជាង៧០ភាគរយ ម្រេចមានទំហំទឹកប្រាក់ចំនួនជាង៦លានដុល្លារ ធ្លាក់ចុះជាង៥០ភាគរយ និងអាហារសមុទ្រមានទំហំទឹកប្រាក់ចំនួនប្រមាណជាង១៦លានដុល្លារ ធ្លាក់ចុះជិត៣៤ភាគរយ។
ទោះបីជាយ៉ាងណាក៏ដោយ ដោយសារប្រទេសអេមីរ៉ាត អារ៉ាប់រួម ផលិតបន្លែ និងផ្លែឈើបានត្រឹមតែប្រហែល១០ ឬ១៥ភាគរយនៃតម្រូវការអាហារក្នុងស្រុករបស់ខ្លួន ដោយនៅតែពឹងផ្អែកយ៉ាងខ្លាំងលើការនាំចូលពីបរទេស។ ដូច្នេះ ឱកាសនៅតែមានច្រើនសម្រាប់ផលិតផលកសិកម្មរបស់វៀតណាម ដើម្បីបង្កើនការនាំចេញទៅកាន់ទីផ្សារនៅទីនោះ។
ក្រៅពីនាំចូលទីផ្សារអេមីរ៉ាត អារ៉ាប់រួម ប្រទេសអ៊ីស្រាអែលក៏ត្រូវបានគេចាត់ទុកថា ជាទីផ្សារមួយដ៏មានសក្តានុពលច្រើនសម្រាប់ផលិតផលកសិកម្មវៀតណាមផងដែរ។
ទីប្រឹក្សាពាណិជ្ជកម្មវៀតណាម ប្រចាំប្រទេសអ៊ីស្រាអែល បាននិយាយថា ការនាំចេញផលិតផលកសិកម្មសំខាន់ៗរបស់វៀតណាម ក៏ជាផលិតផល ដែលប្រទេសអ៊ីស្រាអែលត្រូវការនាំចូលយ៉ាងខ្លាំងសម្រាប់ការប្រើប្រាស់ និងបំពេញតម្រូវសង្វាក់ផលិតកម្ម ជាពិសេសផ្នែកចំណីអាហារ គ្រឿងឧបភោគបរិភោគ និងភេសជ្ជៈ។
ផលិតផលគ្រឿងសមុទ្រវៀតណាមបច្ចុប្បន្ន មានចំណែកទីផ្សារប្រហែល១១ ឬ១៣ភាគរយ នៃការនាំចូលផលិតផលសមុទ្រសរុបរបស់អ៊ីស្រាអែល ដូច្នេះផលិតផលគ្រឿងសមុទ្រវៀតណាមនៅតែមានសក្តានុពលខ្ពស់គួរឱ្យកត់សម្គាល់។ ផលិតផលគ្រឿងសមុទ្រក៏ជាក្រុមផលិតផលមួយ ក្នុងចំណោមកផលិតផលមួយចំនួន ដែលបានរក្សាកំណើនវិជ្ជមានក្នុងអំឡុងពេលបើកដំណើរការនាំចេញក្នុងឆ្នាំ២០២៦។
ទន្ទឹមនឹងតម្រូវការអ្នកប្រើប្រាស់ដ៏រឹងមាំ កិច្ចព្រមព្រៀងពាណិជ្ជកម្មសេរីកំពុងបង្កើតឧត្តមភាពប្រកួតប្រជែងបន្ថែមទៀត សម្រាប់ទំនិញវៀតណាមនៅមជ្ឈិមបូព៌ា។ ជាពិសេស កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយរវាងវៀតណាម និងអេមីរ៉ាត អារ៉ាប់រួម ដែលបានចូលជាធរមាន កាលពីថ្ងៃទី៣ ខែកុម្ភៈ ឆ្នាំ២០២៦ ពិតជាបានផ្តល់មូលដ្ឋានវិជ្ជមានសម្រាប់សហគ្រាសកសិកម្មវៀតណាម ក្នុងការពង្រឹងលទ្ធភាពនាំចូលទៅកាន់ទីផ្សារអេមីរ៉ាត អារ៉ាប់រួម។
ទំនិញនាំចេញសំខាន់ៗជាច្រើនរបស់វៀតណាម រួមមាន អាហារគ្រឿងសមុទ្រ គ្រាប់ស្វាយចន្ទី ម្រេច និងឈើ និងអនុព្រៃផលឈើ ទទួលបានការអនុគ្រោះពន្ធយ៉ាងច្រើន។
ចំណែកកិច្ចព្រមព្រៀងពាណិជ្ជកម្មសេរីជវៀតណាម-អ៊ីស្រាអែល ដែលបានចូលជាធរមាន កាលពីថ្ងៃទី១៧ ខែវិច្ឆិកា ឆ្នាំ២០២៤ ក៏បានពង្រីកឱកាសសម្រាប់នាំចូលទំនិញវៀតណាមទៅកានើទីផ្សារផងដែរ។ នៅឆ្នាំ២០២៥ ការនាំចេញសំខាន់ៗរបស់វៀតណាមទៅកាន់អ៊ីស្រាអែល រួមមានអាហារគ្រឿងសមុទ្រ គ្រាប់ស្វាយចន្ទី និងកាហ្វេ។
យោងតាមអ្នកជំនាញ បានឱ្យដឹងថា ដើម្បីធ្វើឱ្យការប្រើប្រាស់ប្រកបដោយប្រសិទ្ធភាពនៃការអនុគ្រោះពន្ធ អាជីវកម្មវៀតណាមត្រូវតែបំពេញតាមតម្រូវការទាក់ទងនឹងស្តង់ដារ វិញ្ញាបនបត្របញ្ជាក់គុណភាព និងការរៀបចំទីផ្សារឱ្យបានល្អ។
អគ្គលេខាធិការសមាគមម្រេច និងគ្រឿងទេសវៀតណាម បានមានប្រសាសន៍ថា តំបន់មជ្ឈិមបូព៌ាមានតម្រូវការខ្ពស់បំផុតសម្រាប់គ្រឿងទេសនៅលើពិភពលោក។ ប្រទេសអេមីរ៉ាត អារ៉ាប់រួម គឺជាទីផ្សារដ៏មានសក្តានុពល និងជាមជ្ឈមណ្ឌលភស្តុភារកម្ម ក្នុងតំបន់ដ៏សំខាន់មួយ ដោយតភ្ជាប់តំបន់មជ្ឈិមបូព៌ាជាមួយទ្វីបអាហ្វ្រិក អាស៊ីកណ្តាល និងអាស៊ីខាងត្បូង ដែលអាចឱ្យទំនិញវៀតណាម ជ្រៀតចូលក្នុងទីផ្សារក្នុងតំបន់កាន់តែទូលំទូលាយ។
បច្ចុប្បន្ន ប្រទេសវៀតណាមមានប្រៀបជាងគេក្នុងនាមជាអ្នកផ្គត់ផ្គង់ម្រេច សំបកទេព្វិរូ (ឈើអែម) និងផ្លែផ្កាចន្ទន៍ (ប៉ូចកាក់) ឈានមុខគេរបស់ពិភពលោក។ គ្រាន់តែនៅក្នុងទីផ្សារមជ្ឈិមបូព៌ា ម្រេច និងសំបកទេព្វិរូ របស់វៀតណាមមានចំណែកទីផ្សារប្រហែល៦០ភាគរយ។
ទោះជាយ៉ាងណាក៏ដោយ តម្រូវការកាន់តែតឹងរ៉ឹងទាក់ទងនឹងវិញ្ញាបនបត្រហាឡាល ការតាមដាន និងការអភិវឌ្ឍប្រកបដោយចីរភាព កំពុងបង្កបញ្ហាប្រឈមគួរឱ្យកត់សម្គាល់សម្រាប់សហគ្រាសវៀតណាម។
លើសពីនេះ ការកើនឡើងនៃថ្លៃដឹកជញ្ជូន និងការប្រកួតប្រជែងកាន់តែខ្លាំងពីផលិតផលប្រហាក់ប្រហែលគ្នា មានប្រភពមកពីប្រទេសប្រេស៊ីល ឥណ្ឌូនេស៊ី និងចិន តម្រូវឱ្យអាជីវកម្មវៀតណាម ត្រូវបង្កើនគុណភាព និងពង្រីកការកែច្នៃស៊ីជម្រៅ ដើម្បីកសាងម៉ាកយីហោប្រកបដោយនិរន្តរភាព។
មន្ត្រីជាន់ខ្ពស់ក្រសួងឧស្សាហកម្ម និងពាណិជ្ជកម្មវៀតណាម បាននិយាយថា សហគ្រាសវៀតណាមគួរតែពិនិត្យឡើងវិញនូវលេខកូដទំនិញ អនុលោមតាមវិធានប្រភពដើមផលិតផល និងវិនិយោគលើគុណភាព ដោយរួមបញ្ចូលគ្នានូវស្តង់ដារហាឡាល (Halal) សម្រាប់ជនមូស្លីម និងស្តង់ដារកូសឺរ (Kosher) សម្រាប់ជនជាតិជ្វីហ្វ។
សម្រាប់ភ្នាក់ងារគ្រប់គ្រងវិញ ចាំបាច់ត្រូវបន្តបំពេញក្របខ័ណ្ឌច្បាប់ហាឡាលជាតិ បង្កើនការផ្សព្វផ្សាយអំពីការប្តេជ្ញាចិត្តក្រោមកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ និងកិច្ចព្រមព្រៀងពាណិជ្ជកម្មសេរីវៀតណាម-អ៊ីស្រាអែល ដើម្បីគាំទ្រការអភិវឌ្ឍភស្តុភារកម្ម និងលើកកម្ពស់កិច្ចសន្ទនាលើបញ្ហាទាក់ទងនឹងវិធានការអនាម័យ និងភូតគាមអនាម័យទ្វេភាគី។
ដោយសារជម្លោះភូមិសាស្ត្រនយោបាយនៅតែបង្កហានិភ័យឥតឈប់ឈរ ការរក្សាទីតាំងឈរជើងរបស់ទំនិញកសិផលវៀតណាម នៅក្នុងទីផ្សារមជ្ឈិមបូព៌ា ដូច្នេះវាតម្រូវឱ្យសហគ្រាសវៀតណាម ត្រូវបង្កើនសមត្ថភាពរបស់ខ្លួន ដើម្បីបំពេញតាមស្តង់ដារផលិតផល ព្រមទាំងបង្កើនប្រសិទ្ធភាពដឹកជញ្ជូន និងបង្កើតប្រព័ន្ធចែកចាយសមស្រប។ កិច្ចខិតខំប្រឹងប្រែងបែបទាំងនេះនឹងជួយកសាង និងពង្រីកវត្តមានម៉ាកផលិតផលកសិកម្មវៀតណាម នៅក្នុងទីផ្សារដ៏មានសក្តានុពលខ្ពស់របស់ពួកអារ៉ាប់៕ (ផាន់ អាណា)
