ឌីលី៖ ប្រទេសវៀតណាម និងប្រទេសទីម័រខាងកើត បានឯកភាពគ្នាធ្វើឱ្យកាន់តែស៊ីជម្រៅនូវកិច្ចសហប្រតិបត្តិការលើវិស័យសន្តិសុខស្បៀង ជលផល ការអភិវឌ្ឍជនបទ និងការបណ្តុះបណ្តាលធនធានមនុស្ស ស្របពេលប្រទេសទីម័រខាងកើត ព្យាយាមពង្រឹងផលិតកម្មក្នុងស្រុក និងបង្កើតការងារបន្ថែមទៀត។
ភារធារីវៀតណាមប្រចាំនៅប្រទេសទីម័រខាងកើត លោក ផាម ប៊ិញដាំ (Pham Binh Dam) បានជួបជាមួយឧបនាយករដ្ឋមន្ត្រីទីម័រខាងកើត លោក ម៉ារីយ៉ាណូ អាសាណាមី សាប៊ីណូ លូប៉េស (Mariano Assanami Sabino Lopes) នៅទីក្រុងដីលី (Dili) ប្រទេសទីម័រខាងកើត កាលពីថ្ងៃទី២០ ខែកក្កដា ឆ្នាំ២០២៦ ដើម្បីពិភាក្សាអំពីវិធានការនានាសម្រាប់ពង្រីកកិច្ចសហប្រតិបត្តិការទ្វេភាគី។
លោកឧបនាយករដ្ឋមន្ត្រីទីម័រខាងកើត ដែលជារដ្ឋមន្ត្រីករសួងសម្របសម្រួលកិច្ចការសង្គម និងជារដ្ឋមន្ត្រីក្រសួងអភិវឌ្ឍន៍ជនបទ និងលំនៅឋានសហគមន៍ផងដែរនោះ បានឱ្យដឹងថា បច្ចុប្បន្នទីម័រខាងកើតផលិតស្បៀងអាហារក្នុងស្រុកបានប្រមាណតែ៤០ភាគរយប៉ុណ្ណោះនៃតម្រូវការក្នុងប្រទេស។
ដូច្នេះ ការពង្រឹងផលិតកម្មកសិកម្ម គឺពិតជាមានសារសំខាន់ ព្រោះមិនត្រឹមតែដើម្បីបង្កើនភាពគ្រប់គ្រាន់ផ្នែកស្បៀងអាហារប៉ុណ្ណោះទេ ប៉ុន្តែថែមទាំងដើម្បីសម្រេចបាននូវគោលដៅសេដ្ឋកិច្ចសង្គមកាន់តែទូលំទូលាយ រួមមាន អាហារូបត្ថម្ភកាន់តែប្រសើរ ការកាត់បន្ថយភាពក្រីក្រ ការបង្កើតការងារ និងប្រាក់ចំណូលកាន់តែមានស្ថិរភាពសម្រាប់គ្រួសារនៅតាមជនបទ។
ចំណែកលោកភារធារីវៀតណាមប្រចាំនៅប្រទេសទីម័រខាងកើត បាននិយាយថា ការចែករំលែកបទពិសោធន៍អំពីការអភិវឌ្ឍរបស់វៀតណាម កិច្ចសហប្រតិបត្តិការទ្វេភាគីក្នុងវិស័យសន្តិសុខស្បៀងអាចទទួលបានជោគជ័យដោយឈរលើមូលដ្ឋាននៃការបំពេញបន្ថែម។
ក្នុងរយៈពេលខ្លី ប្រទេសវៀតណាមនឹងបន្តផ្គត់ផ្គង់អង្ករមានគុណភាពល្អប្រកបដោយស្ថិរភាព ដែលឆ្លើយតបនឹងតម្រូវការទីផ្សាររបស់ទីម័រខាងកើត ដោយជួយរក្សាអង្ករជាទំនិញសំខាន់មួយក្នុងពាណិជ្ជកម្មទ្វេភាគី។ ចំណែកក្នុងរយៈពេលវែង លោកបានស្នើឱ្យពង្រីកកិច្ចសហប្រតិបត្តិការលើសពីពាណិជ្ជកម្ម ដើម្បីជួយពង្រឹងសមត្ថភាពផលិតកម្មក្នុងស្រុករបស់ទីម័រខាងកើត។
លោកបានមានប្រសាសន៍ទៀតថា ប្រទេសវៀតណាមបានត្រៀមខ្លួនរួចជាស្រេចក្នុងការចែករំលែកជំនាញផ្នែកពូជដំណាំ បច្ចេកទេសដាំដុះ ប្រព័ន្ធធារាសាស្រ្ត យន្តការកសិកម្ម ការអភិរក្សក្រោយការប្រមូលផល និងការអភិវឌ្ឍខ្សែសង្វាក់តម្លៃកសិកម្ម។
ចំពោះវិស័យជលផលវិញ លោកឧបនាយករដ្ឋមន្ត្រីទីម័រខាងកើតបានកត់សម្គាល់ថា ដែនសមុទ្ររបស់ប្រទេសទីម័រខាងកើតមានទំហំធំជាងតំបន់ដីគោករបស់ខ្លួនចំនួនបួនដង និងមានធនធានសមុទ្រដ៏សម្បូរបែប។ ទោះជាយ៉ាងណាក៏ដោយ ប្រទេសទីម័រខាងកើតនៅតែប្រឈមមុខនឹងសមត្ថភាពទន់ខ្សោយក្នុងការនេសាទ ការស្តុកទុក និងការកែច្នៃ ដែលធ្វើឱ្យវិស័យនេះអាចរួមចំណែកតិចតួចដល់សេដ្ឋកិច្ចជាតិ។
លោកសង្ឃឹមថា ប្រទេសទាំងពីរនឹងពង្រឹងកិច្ចសហប្រតិបត្តិការលើការទាញយកផលនេសាទសមុទ្រ វារីវប្បកម្ម និងការកែច្នៃផលិតផលជលផល ដើម្បីកែលម្អការផ្គត់ផ្គង់ស្បៀងអាហារក្នុងស្រុក និងបង្កើតការងារសម្រាប់សហគមន៍ឆ្នេរសមុទ្រ មុននឹងពង្រីកទៅជាពាណិជ្ជកម្ម និងការនាំចេញ។
ចំណែកភាគីវៀតណាមបាននិយាយថា សហគ្រាសវៀតណាមមានគោលជំហរច្បាស់លាស់ ដើម្បីគាំទ្រដល់ការអភិវឌ្ឍជលផលរបស់ទីម័រខាងកើត តាមរយៈការសាងសង់កប៉ាល់ ការផ្ទេរបច្ចេកវិទ្យា វារីវប្បកម្ម បច្ចេកទេសនេសាទ កន្លែងផ្ទុកត្រជាក់ និងការកែច្នៃផលិតផលជលផល។
លោកបានលើកទឹកចិត្តដល់ធុរកិច្ចមកពីប្រទេសទាំងពីរ ឱ្យរួមគ្នាអភិវឌ្ឍគម្រោងផលិតកម្មនៅប្រទេសទីម័រខាងកើត ដែលរួមបញ្ចូលការវិនិយោគ ការបណ្តុះបណ្តាលវិជ្ជាជីវៈ និងការផ្ទេរបច្ចេកវិទ្យាបន្តិចម្តងៗ។
ភាគីទាំងពីរបានឯកភាពគ្នាបន្តពិគ្រោះយោបល់យ៉ាងជិតស្និទ្ធ និងកំណត់វិស័យអាទិភាពសម្រាប់កម្មវិធីកិច្ចសហប្រតិបត្តិការជាក់ស្តែង ព្រមទាំងបានសង្កត់ធ្ងន់ថា គំនិតផ្តួចផ្តើមផ្នែកសន្តិសុខស្បៀង គួរតែដើរទន្ទឹមគ្នានឹងការអភិវឌ្ឍជនបទ ការលើកកម្ពស់ជីវភាព ការបង្កើតការងារ និងការអភិវឌ្ឍធនធានមនុស្ស ដែលរួមចំណែកពង្រឹងស្ថិរភាពរយៈពេលវែង និងកំណើនប្រកបដោយចីរភាពរបស់ប្រទេសទីម័រខាងកើត៕ (ផាន់ អាណា)
