ដោយ នៅ ស៊ីវុត្ថា
បាត់ដំបង៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា បានជំរុញឱ្យសហគមន៍កសិកម្មតាសីសាមគ្គី ស្ថិតនៅក្នុងខេត្តបាត់ដំបង រៀបចំសរសេរ ចងក្រង និងផ្សព្វផ្សាយគំរូអាជីវកម្មកសិកម្មជាសៀវភៅគំរូ ដើម្បីឱ្យសាលារៀន និងគ្រឹះស្ថានសិក្សានានា អាចយកទៅសិក្សាស្រាវជ្រាវ និងអភិវឌ្ឍបន្ថែមលើបច្ចេកទេសកសិកម្ម ឆ្ពោះទៅរកការអភិវឌ្ឍអាជីវកម្មកសិកម្មទំនើប នាពេលអនាគត។
ការលើកឡើងនេះ ធ្វើឡើងក្នុងឱកាសឯកឧត្តមដឹកនាំគណៈប្រតិភូក្រសួងអប់រំ យុវជន និងកីឡា ធ្វើទស្សនកិច្ច និងពិនិត្យសកម្មភាពការងារដាំដុះនៅសហគមន៍កសិកម្មតាសីសាមគ្គី និងមជ្ឈមណ្ឌលអភិវឌ្ឍន៍ជំនាញកសិកម្មតាសី ស្ថិតនៅភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង កាលពីថ្ងៃទី២៦ ខែកក្កដា ឆ្នាំ២០២៦។
ឯកឧត្តមបណ្ឌិតសភាចារ្យ ហង់ជួន ណារ៉ុន បានមានប្រសាសន៍ថា ការធ្វើកសិកម្មតាមបែបប្រពៃណីតែមួយមុខមិនអាចឆ្លើយតបទៅនឹងតម្រូវការអភិវឌ្ឍន៍នាពេលបច្ចុប្បន្នបានទេ ដូចគ្នានឹងការរៀនត្រឹមទ្រឹស្តីតែមួយមុខក៏មិនអាចដោះស្រាយបញ្ហាជាក់ស្តែងបានដែរ។ ដូច្នេះ ការអប់រំត្រូវផ្សារភ្ជាប់ជាមួយការអនុវត្តជាក់ស្តែង តាមរយៈការពង្រឹងទំនាក់ទំនងរវាងសាលារៀន សាកលវិទ្យាល័យ កសិដ្ឋាន និងសហគមន៍កសិកម្ម។
ឯកឧត្តមបានបញ្ជាក់ថា ដំណើរទស្សនកិច្ចនេះ មានគោលបំណងជំរុញការផ្សារភ្ជាប់ការអប់រំនៅក្នុងថ្នាក់រៀន ទៅនឹងការអនុវត្តផ្ទាល់នៅតាមកសិដ្ឋាន និងសហគមន៍ ដើម្បីលើកកម្ពស់គុណភាពធនធានមនុស្ស ឱ្យស្របតាមតម្រូវការទីផ្សារការងារ និងការអភិវឌ្ឍសេដ្ឋកិច្ចនៅមូលដ្ឋាន។
ក្នុងឱកាសនេះ ឯកឧត្តមបណ្ឌិតសភាចារ្យ ហង់ជួន ណារ៉ុន បានកោតសរសើរសហគមន៍កសិកម្មតាសីសាមគ្គី ដែលបានរៀបចំគំរូអាជីវកម្មកសិកម្មប្រកបដោយប្រសិទ្ធភាព និងបានចែករំលែកបទពិសោធន៍ជាក់ស្តែង ដែលអាចជាគំរូសម្រាប់សហគមន៍ផ្សេងៗ ព្រមទាំងរួមចំណែកកាត់បន្ថយការនាំចូលផលិតផលកសិកម្ម និងលើកកម្ពស់ជីវភាពរស់នៅរបស់ប្រជាពលរដ្ឋក្នុងតំបន់។
ជាមួយគ្នានេះ ឯកឧត្តមបានស្នើឱ្យរៀបចំសរសេរ ចងក្រង និងបោះពុម្ពផ្សាយគំរូអាជីវកម្មកសិកម្មនេះជាសៀវភៅឯកសារគំរូ ដើម្បីឱ្យសាលារៀន គ្រឹះស្ថានបណ្តុះបណ្តាល និងគ្រឹះស្ថានឧត្តមសិក្សា អាចយកទៅប្រើប្រាស់ជាឯកសារសិក្សាស្រាវជ្រាវ និងអភិវឌ្ឍចំណេះដឹងលើបច្ចេកទេសកសិកម្ម និងការគ្រប់គ្រងអាជីវកម្មកសិកម្មទំនើប។
ជាការឆ្លើយតប សហគមន៍កសិកម្មតាសីសាមគ្គីបានសម្តែងការគោរព និងថ្លែងអំណរគុណចំពោះអនុសាសន៍ដ៏មានតម្លៃរបស់ឯកឧត្តម ដោយចាត់ទុកថា ការចងក្រងគំរូអាជីវកម្មជាសៀវភៅនឹងក្លាយជាឯកសារសំខាន់សម្រាប់ការសិក្សា ការស្រាវជ្រាវ និងការអភិវឌ្ឍបច្ចេកទេសកសិកម្មនៅតាមគ្រឹះស្ថានអប់រំ។
សហគមន៍បានបញ្ជាក់ថា នឹងខិតខំស្វែងរកដៃគូអភិវឌ្ឍន៍ និងស្ថាប័នពាក់ព័ន្ធ ដើម្បីអនុវត្តតាមអនុសាសន៍នេះ ព្រមទាំងរៀបចំឯកសារផ្លូវការសម្រាប់រក្សាទុក និងប្រើប្រាស់ជាឯកសារយោងក្នុងសហគមន៍ និងសម្រាប់ការផ្ទេរចំណេះដឹងទៅកាន់អ្នកជំនាន់ក្រោយ។
បច្ចុប្បន្ន សហគមន៍កសិកម្មតាសីសាមគ្គី ដែលមានទីតាំងនៅភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង កំពុងផលិតបន្លែសុវត្ថិភាពដោយអនុវត្តតាមស្តង់ដារ GAP (Good Agricultural Practices) និងផ្គត់ផ្គង់ផលិតផលទៅកាន់ទីផ្សារបានជាប្រចាំគ្រប់រដូវកាល។ សហគមន៍ក៏កំពុងពង្រីកការដាំដុះក្នុងផ្ទះសំណាញ់ ដើម្បីបង្កើនគុណភាព និងសុវត្ថិភាពផលិតផល ដែលអាចឆ្លើយតបតាមតម្រូវការទីផ្សារ និងបង្កើនប្រាក់ចំណូលរបស់សមាជិក។
យោងតាមសហគមន៍ ការដាំដុះក្នុងផ្ទះសំណាញ់អាចកាត់បន្ថយការប្រើប្រាស់ថ្នាំគីមី ការពារដំណាំពីសត្វល្អិតចង្រៃ និងជួយបង្កើនទិន្នផល ខណៈការចំណាយលើការថែទាំមានប្រសិទ្ធភាពជាងការដាំដុះនៅទីវាល ដែលជួយបង្កើនប្រាក់ចំណេញ និងធានាការផ្គត់ផ្គង់បន្លែប្រកបដោយសុវត្ថិភាពជូនអ្នកប្រើប្រាស់៕
