ដោយ នៅ ស៊ីវុត្ថា
កំពង់ស្ពឺ៖ កសិករម្នាក់នៅស្រុកភ្នំស្រួច ខេត្តកំពង់ស្ពឺ បានទទួលជោគជ័យក្នុងការអភិវឌ្ឍចម្ការដាំដំណាំចម្រុះ ដោយអាចរកចំណូលសរុបបានជិតបីសែនដុល្លារ ក្នុងមួយឆ្នាំ ពីការដាំដូង ខ្នុរណាំងការ៉ុត និងទុរេន លើផ្ទៃដីសរុបប្រមាណ៣៦ហិកតា ខណៈប្រាក់ចំណេញសុទ្ធក្រោយកាត់ចំណាយមានជាងមួយសែនដុល្លារក្នុងមួយឆ្នាំ។
កសិកររូបនេះមានឈ្មោះ នួន ប៊ុនធឿន មានចម្ការស្ថិតនៅភូមិព្រីង ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ។
បច្ចុប្បន្នចម្ការរបស់លោកមានដើមទុរេនប្រមាណ១ ២០០ដើម ក្នុងនោះជាង១ ០០០ដើម បានចាប់ផ្តើមផ្តល់ផល។ ក្រៅពីនេះ លោកក៏ដាំខ្នុរណាំងការ៉ុត ជាង១០ ០០០ដើម និងដើមដូងជាង១ ២០០ដើម ដែលអាចប្រមូលផលលក់ជារៀងរាល់ថ្ងៃ។
លោក នួន ប៊ុនធឿន បានឱ្យដឹងថា លោកបានចាប់ផ្តើមអភិវឌ្ឍចម្ការនេះ តាំងពីឆ្នាំ២០១៤ ដោយផ្តោតលើការដាំខ្នុរជាមុន។ បន្ទាប់ពីខ្នុរចាប់ផ្តើមផ្តល់ផលក្នុងរយៈពេលប្រមាណពីរឆ្នាំ លោកបានយកប្រាក់ចំណូល ដែលរកបានទៅវិនិយោគបន្តលើការដាំទុរេន និងដូង ដើម្បីពង្រីកផលិតកម្ម បង្កើនប្រភេទដំណាំ និងកាត់បន្ថយហានិភ័យពីការពឹងផ្អែកលើដំណាំតែមួយមុខ។
បច្ចុប្បន្ន ចម្ការដាំដំណាំចម្រុះរបស់លោកអាចរកចំណូលសរុបបានជិតបីសែនដុល្លារក្នុងមួយឆ្នាំ។ បន្ទាប់ពីកាត់ចំណាយលើថ្លៃកម្មករ ជី ថ្នាំ ការថែទាំ ប្រព័ន្ធស្រោចស្រព និងការដាំជំនួសដំណាំចាស់ លោកអាចរកប្រាក់ចំណេញសុទ្ធបានជាងមួយសែនដុល្លារក្នុងមួយឆ្នាំ។
កសិកររូបនេះបានលើកឡើងថា ជោគជ័យដែលទទួលបាន មិនមែនកើតឡើងដោយចៃដន្យនោះទេ ប៉ុន្តែជាលទ្ធផលនៃការខិតខំប្រឹងប្រែង ការសិក្សាបច្ចេកទេសដាំដុះ ការស្វែងយល់ពីតម្រូវការទីផ្សារ និងការវិនិយោគជាបន្តបន្ទាប់អស់រយៈពេល១០ឆ្នាំ។
លោកបានផ្តល់អនុសាសន៍ដល់អ្នកមានបំណងវិនិយោគលើដំណាំហូបផ្លែថា មុនពេលចាប់ផ្តើម គួរសិក្សាឱ្យបានច្បាស់លាស់អំពីតម្រូវការទីផ្សារ លក្ខខណ្ឌដី និងអាកាសធាតុ ជ្រើសរើសពូជដំណាំសមស្រប ព្រមទាំងរៀនពីបច្ចេកទេសដាំដុះ និងការគ្រប់គ្រងចម្ការឱ្យបានត្រឹមត្រូវ។
លោកបញ្ជាក់ថា ការវិនិយោគដោយគ្មានផែនការច្បាស់លាស់ និងចំណេះដឹងគ្រប់គ្រាន់ អាចនាំឱ្យខាតបង់ទាំងដើមទុន ពេលវេលា និងកម្លាំងពលកម្ម។
ទាក់ទងនឹងបញ្ហានេះ អ្នកជំនាញកសិកម្មបានលើកឡើងថា ការអភិវឌ្ឍចម្ការដាំដំណាំចម្រុះ ដែលរួមបញ្ចូលដំណាំមានតម្លៃសេដ្ឋកិច្ចខ្ពស់ ដូចជាទុរេន ខ្នុរណាំងការ៉ុត និងដូង គឺជាយុទ្ធសាស្ត្រមួយជួយកាត់បន្ថយហានិភ័យពីការប្រែប្រួលទីផ្សារ និងអាកាសធាតុ ព្រមទាំងបង្កើនប្រភពចំណូលឱ្យកសិករបានពេញមួយឆ្នាំ។ ជាមួយនឹងការគ្រប់គ្រងត្រឹមត្រូវ និងការវិនិយោគរយៈពេលវែង គំរូចម្ការបែបនេះកំពុងក្លាយជាគំរូជោគជ័យមួយសម្រាប់កសិករដែលចង់អភិវឌ្ឍកសិកម្មឱ្យមាននិរន្តរភាព និងបង្កើនជីវភាពគ្រួសារ៕
