ម៉ានីល៖ ក្រសួងកសិកម្មប្រទេសហ្វីលីពីន កំពុងបង្កើនកិច្ចខិតខំប្រឹងប្រែង ដើម្បីកែប្រែមើមដំឡូងឈាមមាន់ ពីផលិតផលនាំចេញលក្ខណៈខ្នាតតូច ឱ្យទៅជាផលិតផលកសិកម្ម ដែលមានតម្លៃខ្ពស់របស់ប្រទេសនៅលើទីផ្សារអន្តរជាតិ។
ក្រសួងកសិកម្មបានឱ្យដឹងថា ការសម្របសម្រួលឧស្សាហកម្មឱ្យកាន់តែរឹងមាំ ការពង្រីកផលិតកម្ម និងការបង្កើតម៉ាកសញ្ញារួមមួយ អាចជួយដណ្តើមបានចំណែកទីផ្សារសកលលោកកាន់តែធំ ដែលកំពុងតែមានការរីកចម្រើនយ៉ាងឆាប់រហ័ស។
នៅក្នុងកិច្ចប្រជុំពិគ្រោះយោបល់ជាមួយកសិករ អ្នកកែច្នៃ អ្នកនាំចេញ អ្នកស្រាវជ្រាវ និងភាគីពាក់ព័ន្ធដទៃទៀត រដ្ឋមន្ត្រីក្រសួងកសិកម្ម លោក ហ្វ្រែនស៊ីស្កូ ធីវ ឡូរ៉ែល (Francisco Tiu Laurel) បាននិយាយថា រដ្ឋាភិបាលនឹងអនុវត្តយុទ្ធសាស្ត្រ ដែលដឹកនាំដោយវិស័យឧស្សាហកម្មផ្ទាល់ ជាជាងការកំណត់ដំណោះស្រាយពីថ្នាក់លើចុះក្រោម។
លោកបានសង្កត់ធ្ងន់ថា «ចង់កំណត់អត្តសញ្ញាណនូវតម្រូវការជាក់ស្តែងនៃវិស័យឧស្សាហកម្មនេះ។ ខ្ញុំមិនចង់ឱ្យក្រសួងកសិកម្មជាអ្នកសម្រេចជំនួសភាគីពាក់ព័ន្ធថា តើឧស្សាហកម្មនេះត្រូវការអ្វីខ្លះនោះទេ»។
ដោយលោកបានបន្ថែមថា តួនាទីរបស់ក្រសួងកសិកម្ម គឺផ្តល់ថវិកា គាំទ្រផ្នែកគោលនយោបាយ និងការស្រាវជ្រាវផ្អែកលើអាទិភាព ដែលកំណត់ដោយវិស័យឧស្សាហកម្មខ្លួនឯង។
ខណៈពេលផ្លែដូង ចេក ស្វាយ ម្នាស់ និងផ្លែទុរេន នៅតែជាផលិតផលនាំចេញសម្រាប់រកចំណូលបានច្រើន មើមដំឡូងឈាមមាន់ ក៏ជាផលិតផលកំពុងលេចធ្លោ និងមានសក្តានុពល សម្រាប់នាំចេញទៅកាន់ទីផ្សារអន្តរជាតិផងដែរ។
ទោះបីជាមានតម្រូវការខ្លាំងក៏ដោយ ភាគីពាក់ព័ន្ធបាននិយាយថា ឧស្សាហកម្មនេះនៅតែបន្តជួបការលំបាកជាមួយខ្សែច្រវាក់ផ្គត់ផ្គង់ ដែលនៅរាយប៉ាយ មិនទាន់បានចងក្រងគ្នាជាស្តង់ដារគុណភាពឱ្យស៊ីសង្វាក់គ្នា ពូជសម្រាប់ដាំដុះមិនគ្រប់គ្រាន់ និងការខ្វះខាតយុទ្ធសាស្ត្រទីផ្សារថ្នាក់ជាតិ។
ដើម្បីដោះស្រាយបញ្ហារាំងស្ទះទាំងនេះ ក្រសួងកសិកម្មបានគូសបញ្ជាក់ពីអាទិភាពចម្បងៗមួយចំនួន រួមទាំងការបង្កើតសហព័ន្ធមើមដំឡូងឈាមមាន់ ដើម្បីបង្រួបបង្រួមអ្នកផលិត អ្នកកែច្នៃ និងអ្នកនាំចេញឱ្យស្ថិតនៅក្រោមរបៀបវារៈឧស្សាហកម្មរួមតែមួយ។
ចំណែកស្ថាប័នស្រាវជ្រាវបានបង្ហាញពីការរីកចម្រើនគួរឱ្យកត់សម្គាល់ក្នុងការអភិវឌ្ឍន៍ពូជ រួមទាំងពូជដំឡូងឈាមមាន់ពណ៌ស្វាយ ដែលផ្តល់ទិន្នផលខ្ពស់ អាចបង្កើនផលិតកម្មក្នុងស្រុកបានយ៉ាងច្រើន។
ក្រសួងកសិកម្មហ្វីលីពីនបានណែនាំអ្នកស្រាវជ្រាវឱ្យពន្លឿនការដាក់ឈ្មោះ និងការវាយតម្លៃពូជថ្មីៗ ព្រមទាំងធ្វើការជាមួយវិស័យឯកជន ដើម្បីកំណត់ថា តើពូជណាខ្លះ ដែលឆ្លើយតបនឹងតម្រូវការខាងពាណិជ្ជកម្មបានល្អបំផុត។
ការបង្កើតម៉ាកសញ្ញា បានក្លាយជាបញ្ហាចម្បងមួយទៀតនៅក្នុងការពិភាក្សា ដោយភាគីពាក់ព័ន្ធបានអំពាវនាវឱ្យមានអត្តសញ្ញាណ «មើមដំឡូងឈាមមាន់ហ្វីលីពីន» តែមួយ ដើម្បីបែងចែកផលិតផលក្នុងស្រុកឱ្យដាច់ពីគូប្រជែងក្នុងតំបន់ ដែលមានតម្លៃថោកជាង។
លោករដ្ឋមន្ត្រីបានមានប្រសាសន៍ថា ក្រសួងកសិកម្មនឹងគាំទ្រដល់ការសិក្សាទីផ្សារឯករាជ្យមួយ ដើម្បីកំណត់ពីយុទ្ធសាស្ត្របង្កើតម៉ាកសញ្ញាដ៏ល្អបំផុតរបស់ខ្លួន ព្រមទាំងបន្តកិច្ចខិតខំប្រឹងប្រែងចុះបញ្ជី និងផ្សព្វផ្សាយមើមដំឡូងឈាមមាន់ហ្វីលីពីននៅលើឆាកអន្តរជាតិ។
លោករដ្ឋមន្ត្រីបានបញ្ជាក់ថា ការប្រកួតប្រជែងពិតប្រាកដ មិនមែនស្ថិតក្នុងចំណោមអ្នកដាំមើមដំឡូងឈាមមាន់ហ្វីលីពីនគ្នាឯងនោះទេ ប៉ុន្តែគឺជាមួយប្រទេសជិតខាង ក្នុងសហគមន៍អាស៊ានទាំងអស់។
លោករដ្ឋមន្ត្រីបានណែនាំដល់វិស័យឧស្សាហកម្មនេះ ឱ្យបង្កើតប្រព័ន្ធចំណាត់ថ្នាក់ស្តង់ដារសម្រាប់មើមដំឡូងឈាមមាន់ពណ៌ស្វាយ ដោយប្រើប្រាស់ឧបករណ៍វាស់ពណ៌ ដើម្បីពង្រឹងយុទ្ធនាការទីផ្សារ ការពារផ្លូវច្បាប់សម្រាប់មើមដំឡូងឈាមមាន់ហ្វីលីពីន និងប្រមូលផ្តុំការវិនិយោគលើតំបន់ផលិតកម្មណា ដែលមានសក្តានុពលប្រកួតប្រជែងខ្លាំងបំផុត៕ (ញឹក សំអូន)
