ប៉េកាំង៖ តម្លៃផ្លែទុរេនលក់រាយនៅក្នុងប្រទេសចិនបានធ្លាក់ចុះនៅឆ្នាំ២០២៦នេះ ដោយសារការនាំចូលកាន់តែច្រើនពីបណ្តាប្រទេសក្នុងតំបន់អាស៊ីអាគ្នេយ៍ង ហើយការដឹកជញ្ជូនមានភាពប្រសើរឡើង ដូច្នេះធ្វើតម្លៃធ្លាក់ចុះទាប បន្ទាប់ពីការផ្គត់ផ្គង់កាន់តែច្រើន ការដឹកជញ្ជូនកាន់តែមានប្រសិទ្ធភាព និងពន្ធគយទាបជាងពេលកន្លងទៅ។
ផ្លែទុរេនពូជល្អៗ កំពុងលក់ក្នុងតម្លៃ៤០ ទៅ៦០យ័ន ឬស្មើនឹង៥,៥៨ ទៅ៨,៣៦ដុល្លារ ក្នុងមួយគីឡូក្រាម បើធៀបនឹងតម្លៃលក់ក្នុងឆ្នាំ២០២៥ គឺពី៧០ ទៅ៩០យ័ន ឬស្មើនឹង៩,៧៦ ទៅ១២,៥៤ដុល្លារ ក្នុងមួយគីឡូក្រាម។ ចំណែកនៅតាមផ្សារទំនើបមួយចំនួនបានប្រកាសលក់ក្នុងតម្លៃពី២៧,៦យ័ន ឬស្មើនឹង៣,៨៤ដុល្លារ ក្នុងមួយគីឡូក្រាម។ ចំណែកផ្លែទុរេនទាំងសំបក ដែលមានទម្ងន់លើសពីពីរគីឡូក្រាម អាចរកទិញបានក្នុងតម្លៃ១៦៨យ័ន ឬស្មើនឹង២៣,៤២ដុល្លារ រួមទាំងតម្លៃដឹកជញ្ជូនផងដែរ។
ប្រទេសចិនបាននាំចូលផ្លែទុរេនស្រស់ចំនួន១៥៦,០០០តោន ក្នុងត្រីមាសទី១ នៃឆ្នាំ២០២៦នេះ គឺកើនឡើង២៩៤ភាគរយពីមួយឆ្នាំទៅមួយឆ្នាំ ពីបណ្តាប្រទេសក្នុងតំបន់អាស៊ីអគ្នេយ៍។
ការផ្គត់ផ្គង់កាន់តែច្រើនបានធ្វើឱ្យតម្លៃលក់ដុំធ្លាក់ចុះ នៅក្នុងទីផ្សារលក់ដុំក្នុងទីក្រុងប៉េកាំង ដោយផ្លែទុរេនចំណាត់ថ្នាក់លេខ១ បានធ្លាក់ចុះពីតម្លៃ៧៣យ័ន ឬស្មើ១០,១៨ដុល្លារ មកនៅត្រឹម១៦យ័ន ឬស្មើនឹង៣,៦២ដុល្លារ ក្នុងមួយគីឡូក្រាម នៅចន្លោះខែមេសា និងខែមិថុនា។
ការដឹកជញ្ជូនកាន់តែស្រួល ក៏ងាយរកទីផ្សារលក់ផ្លែទុរេនផងដែរ។ ក្នុងរដូវមមាញឹក ផ្លែទុរេនត្រូវដឹកជញ្ជូនតាមសេវាកម្មខ្សែសង្វាក់ត្រជាក់ មេគង្គ-ឡានឆាង (Lancang-Mekong Expres អាចទៅដល់ទីក្រុងគុនមីង ក្នុងរយៈពេលត្រឹមតែ២៦ម៉ោង ហើយបន្តចែកចាយដល់ទីក្រុងជាង៣០របស់ប្រទេសចិនក្នុងរយៈពេល៤៨ម៉ោង។
កាលពីថ្ងៃទី២២ ខែមិថុនា ឆ្នាំ២០២៦ ប្រទេសកម្ពុជា បានបើកសម្ពោធជាផ្លូវការនៃការដឹកជញ្ជូនកសិផលឆ្លងកាត់ពីកម្ពុជាទៅកាន់ទីផ្សារប្រទេសចិន ដោយឆ្លងកាត់ប្រទេសឡាវ ដោយមានតំណាងដៃគូវិស័យឯកជនកម្ពុជាចំនួន៣០ក្រុមហ៊ុន ជាអ្នកនាំចេញ។ នៅក្នុងថ្ងៃបើកសម្ពោធនោះដែរ គ៏មានការនាំចេញផ្លែទុរេនចំនួនបួនកុងទីន័រតាមរយៈច្រកនាំចេញថ្មីរបស់កម្ពុជាតាមរយៈប្រទេសឡាវ។
ការដឹកជញ្ជូនបែបនេះ ចំណេញពេលវេលាច្រើន ដោយចំណាយពេលត្រឹមតែមួយសប្តាហ៍នឹងដល់ទីផ្សារប្រទេសចិន ដែលជាសញ្ញាណវិជ្ជមាន និងជាកាលានុវត្តភាពថ្មីស្រឡាងសម្រាប់បងប្អូនកសិករ ក៏ដូចជាម្ចាស់អាជីវកម្មក្នុងវិស័យកសិកម្មនៅកម្ពុជា ក្នុងការចាប់យកឱកាស និងពង្រីកសក្តានុពលកសិផលខ្មែរនៅលើទីផ្សារអន្តរជាតិ។
ការបើកច្រកនាំចេញថ្មីឆ្លងកាត់តាមប្រទេសឡាវ បានកើតចេញពីកិច្ចខិតខំប្រឹងប្រែង និងការចរចាយ៉ាងសកម្មពីសំណាក់ថ្នាក់ដឹកនាំ និងមន្ត្រីជំនាញនៃក្រសួងកសិកម្ម រុក្ខាប្រមាញ់ និងនេសាទ ជាមួយនិងក្រសួងកសិកម្ម និងបរិស្ថានឡាវ ដើម្បីបើកផ្លូវ និងសម្របសម្រួលនីតិវិធីនានា ក្នុងការបើកច្រកថ្មីសម្រាប់ការដឹកជញ្ជូនឆ្លងកាត់កសិផលខ្មែរចំនួនប្រាំមួយមុខទៅកាន់ទីផ្សារចិន ដែលរួមមានផ្លែចេក ស្វាយ អង្ករ មៀនប៉ៃលិន ម្សៅដំឡូងមី និងផ្លែទុរេន៕ (ផាន់ អាណា)
