ភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) លោក គុយ បញ្ញា ប្រធាននាយកដ្ឋានអភិវឌ្ឍន៍យុទ្ធសាស្ត្រអាជីវកម្ម នៅថ្ងៃទី១២ ខែមិថុនា ឆ្នាំ២០២៦ បានអញ្ជើញចូលរួមជាវាគ្មិនក្នុង វេទិកាគយ និង FASMEC លើកទី១ ក្រោមប្រធានបទ «ការគាំទ្រ និងគាំពារសហគ្រាសធុនតូច និងមធ្យម ដើម្បីជំរុញផលិតកម្មក្នុងស្រុក និងសមត្ថភាពប្រកួតប្រជែង» ដោយផ្តោតលើប្រធានបទពិភាក្សា «ឱកាសពង្រីកអាជីវកម្ម និងជំរុញផលិតកម្មក្រោមយន្តការសេដ្ឋកិច្ចក្នុងប្រព័ន្ធ»។
វេទិកានេះមានការចូលរួមពីតំណាងក្រសួង ស្ថាប័នរដ្ឋ គ្រឹះស្ថានហិរញ្ញវត្ថុ និងភាគីពាក់ព័ន្ធជាច្រើន ព្រមទាំងថ្នាក់ដឹកនាំនៃសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ដើម្បីពិភាក្សាអំពីយន្តការ គោលនយោបាយ និងដំណោះស្រាយនានា សម្រាប់គាំទ្រដល់ការអភិវឌ្ឍសហគ្រាសធុនតូច និងមធ្យម (SMEs) នៅកម្ពុជា។
កម្មវិធីនេះត្រូវបានសម្របសម្រួលដោយឧកញ៉ាបណ្ឌិត ស៊ិន ចន្ធី អនុប្រធាន FASMEC និងមានវាគ្មិនមកពីស្ថាប័នសំខាន់ៗជាច្រើន រួមមាន ក្រសួងពាណិជ្ជកម្ម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ អគ្គនាយកដ្ឋានគយ និងរដ្ឋាករកម្ពុជា អគ្គនាយកដ្ឋានពន្ធដារ ក្រសួងបរិស្ថាន ធនាគារសហគ្រាសធុនតូច និងមធ្យម (SME Bank) និងធនាគារអភិវឌ្ឍន៍ជនបទ និងកសិកម្ម។
ក្នុងឱកាសនេះ លោក គុយ បញ្ញា បានចែករំលែកអំពីតួនាទីរបស់ធនាគារអភិវឌ្ឍន៍ជនបទ និងកសិកម្ម ក្នុងការគាំទ្រដល់សហគ្រាសធុនតូច និងមធ្យម តាមរយៈការផ្តល់ហិរញ្ញប្បទានដែលមានអត្រាការប្រាក់សមរម្យ និងមានភាពសមស្របទៅនឹងអាជីវកម្មរបស់សហគ្រាស។
លោកក៏បានលើកឡើងពីសារៈសំខាន់នៃការរៀបចំផែនការអាជីវកម្ម និងផែនការហិរញ្ញវត្ថុឱ្យបានច្បាស់លាស់ ដែលនឹងជួយឱ្យសហគ្រាសមានឱកាសកាន់តែច្រើនក្នុងការទទួលបានហិរញ្ញប្បទាន ពង្រីកទីផ្សារ ចូលរួមក្នុងខ្សែច្រវាក់ផ្គត់ផ្គង់ និងបង្កើនសមត្ថភាពប្រកួតប្រជែងទាំងក្នុង និងក្រៅប្រទេស។
ទន្ទឹមនឹងនេះ លោកបានគូសបញ្ជាក់ថា កត្តាសំខាន់មួយ ដែលសហគ្រាសមិនអាចមើលរំលងបាននោះ គឺការពង្រឹងអភិបាលកិច្ចសាជីវកម្ម និងការគ្រប់គ្រងអាជីវកម្មឱ្យមានប្រសិទ្ធភាព និងមានតម្លាភាព។
វេទិកាគយ និង FASMEC លើកទី១ ត្រូវបានរៀបចំឡើងនៅសាលាជាតិគយ ក្នុងគោលបំណងពង្រឹងការគាំទ្រ និងលើកកម្ពស់ការអភិវឌ្ឍសហគ្រាសធុនតូច និងមធ្យម ដើម្បីជំរុញផលិតកម្មក្នុងស្រុក បង្កើនផលិតភាព និងពង្រឹងសមត្ថភាពប្រកួតប្រជែងរបស់សហគ្រាសកម្ពុជា តាមរយៈកិច្ចសហប្រតិបត្តិការរវាងអគ្គនាយកដ្ឋានគយ និងរដ្ឋាករកម្ពុជា និងសម្ព័ន្ធសមាគមសហគ្រាសធុនតូច និងមធ្យមកម្ពុជា។
ក្នុងវេទិកានេះផងដែរ អ្នកជំនាញ និងភាគីពាក់ព័ន្ធបានរំលេចពីសារៈសំខាន់នៃវិស័យដឹកជញ្ជូន ដែលត្រូវបានចាត់ទុកជាចលករដ៏សំខាន់ក្នុងការជួយលើកកម្ពស់ប្រសិទ្ធភាពផលិតកម្ម កាត់បន្ថយថ្លៃដើម និងបង្កើនសមត្ថភាពប្រកួតប្រជែងរបស់សហគ្រាសធុនតូច និងមធ្យមនៅកម្ពុជា។
គួរបញ្ជាក់ថា កម្មវិធីនេះប្រព្រឹត្តទៅរយៈពេលពីរថ្ងៃ និងមានបទបង្ហាញជាច្រើនពាក់ព័ន្ធនឹងការចុះបញ្ជីអាជីវកម្មនៅក្រសួងពាណិជ្ជកម្ម នីតិវិធីគយសម្រាប់សហគ្រាសធុនតូច និងមធ្យម ការសម្របសម្រួលពាណិជ្ជកម្ម ការអនុវត្តកាតព្វកិច្ចពន្ធដារ ព្រមទាំងប្រធានបទសំខាន់ៗផ្សេងទៀត ដែលមានគោលបំណងជួយគាំទ្រ និងជំរុញការអភិវឌ្ឍវិស័យឯកជននៅកម្ពុជា៕
