ដោយ លឹម សុនា
កំពង់ឆ្នាំង៖ កសិករនៅក្នុងសហគមន៍កសិកម្មក្រាំងលាវសាមគ្គី ដែលកសិផលរបស់ខ្លួនអាចលក់បានតម្លៃខ្ពស់សមរម្យ គ្មានការក្រឡុកតម្លៃពីឈ្មួញកណ្តាល និងមានទីផ្សារល្អជាងមុន។
សហគមន៍នេះស្ថិតនៅភូមិក្រាំងលាវ ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង មានសមាជិកជាង២៤០គ្រួសារ ដែលមានសកម្មភាពផលិតស្រូវសរីរាង្គ ដាំដុះបន្លែ ចិញ្ចឹមសត្វ ដើម្បីផ្គត់ផ្គង់ឱ្យក្រុមហ៊ុន សាលារៀន អង្គការ និងលក់ឲ្យអតិថិជនទូទៅ។
អ្នកស្រី ឃឹម សុគន្ធា ប្រធានសហគមន៍កសិកម្មក្រាំងលាវសាមគ្គី បានប្រាប់ ARDB TVថា សហគមន៍បានជួយរកទីផ្សារឲ្យសមាជិក នៅពេលពួកគាត់ប្រមូលផលបាន ដោយជួយលក់នៅតាមរយៈសហគមន៍ ដែលបានតម្លៃខ្ពស់ជាងឈ្មួញកណ្តាលទិញទូទៅ។ ជាក់ស្តែង បានសហគមន៍ចរចាទិញស្រូវបានតម្លៃ១ ១០០រៀល ទៅ១ ២០០រៀល តែឈ្មួញកណ្តាលទិញពីកសិករ បានតម្លៃត្រឹម៩០០រៀល ទៅ៩៥០រៀលប៉ុណ្ណោះ ក្នុងមួយគីឡូក្រាម។
ដើម្បីឲ្យការធ្វើទីផ្សារមានប្រសិទ្ធភាពខ្ពស់ និងមានឈ្មួញចូលមកទិញផលិតផលក្នុងសហគមន៍កាន់តែច្រើន អ្នកស្រី ឃឹម សុគន្ធា បានប្រាប់ឲ្យដឹងទៀតថា ដំបូងលោកស្រីចាប់ផ្តើមចងក្រងជាក្រុមផលិតឲ្យបានស្រេចជាមុនសិន រួចហើយចេញមុខចរចាជាមួយឈ្មួញកណ្តាល។ ក្រោយពេលចរចាតម្លៃត្រូវហើយ លោកស្រីក៏បង្ហាញឱ្យឈ្មួញឃើញជាកស្តែងនូវគុណភាពផលិតផលក្នុងសហគមន៍ និងពិភាក្សាជាមួយសមាជិកក្រុមថា តើសហគមន៍អាចផលិតបានគ្រប់ចំនួនតាមតម្រូវការ ដែលឈ្មួញចង់បានដែរ ឬទេ។ លើសពីនេះ ដើម្បីឲ្យការលក់ដូរកាន់តែទូលំទូលាយជាងមុន សហគមន៍បានផ្តួចផ្តើមគំនិតបង្រៀនសមាជិករបស់ខ្លួនឱ្យប្រើប្រាស់បណ្តាញទំនាក់ទំនងសង្គម ដូចជា Facebook ឬ TikTok ដើម្បីផ្សព្វផ្សាយ។
ទន្ទឹមនឹងនេហដែរ ដើម្បីឲ្យឈ្មួញមកទិញផលិតផលកាន់តែច្រើន លោកស្រីបានប្រើប្រាស់វិធីសាស្រ្តធ្វើទីផ្សាររួមគ្នា ដូចជាពេលមានកម្មវិធីសិក្ខាសាលា ឬការប្រជុំផ្សេងៗ គឺសហគមន៍មានផលិតផលយកទៅដាក់តាំងលក់ និងផ្សព្វផ្សាយឲ្យគេស្គាល់ពីផលិតរបស់សហគមន៍។ មួយវិញទៀត សហគមន៍ក៏ផ្តល់ឱកាសដល់អតិថិជនបានភ្ល័ក្សរសជាតិបន្លែ សាច់មាន់ អង្ករ ថា តើមានរសជាតិឆ្ងាញ់ ឬទេ បើអតិថិជនចាប់អារម្មណ៍នឹងយកទៅហូបបន្ត ហើយបន្តបង្ហោះរូបផលិតផលនៅលើបណ្តាញសង្គម។
ប្រធានសហគមន៍ដែលឡើងតំណែង កាលពីឆ្នាំ២០២៥រូបនេះ បានរៀបរាប់បន្តថា កាលពីមុនសហគមន៍លក់ផលិតផលបានតិចតួចប៉ុណ្ណោះ ប៉ុន្តែចាប់តាំងពីមានការបង្ហោះផ្សាយលើបណ្តាញសង្គមរួចមក ហាក់មានទីផ្សារល្អ និងទូលំទូលាយជាងការលក់នៅតាមតូប។ ម្យ៉ាងទៀត បន្លែ ត្រីសាច់ អង្ករ ជារបស់សហគមន៍ពិតប្រាកដ ដូច្នេះអតិថិជនមានសេចក្តីទុកចិត្ត ព្រោះផលិតផលមានប្រភពច្បាស់លាស់។
ទន្ទឹមនឹងនេះ ដើម្បីបង្កើនគុណភាពផលិតផលកសិកម្មឲ្យលក់បានតម្លៃល្អ ប្រសិនមានសមាជិកណាមួយខ្វះជំនាញ គឺសហគមន៍ជួយបណ្តុះបណ្តាល តាំងពីការចិញ្ចឹមសត្វ ការដាំបន្លែ ការធ្វើស្រែ រួមទាំងការរកទីផ្សារជូនពួកគាត់ថែមទៀត។
នៅពេលទិន្នផលដំណាំ ស្រូវ និងផលិតផលកសិកម្មផ្សេងទៀត របស់សមាជិកមានកំណើននៅលើទីផ្សារ ហើយអាចលក់បានតម្លៃខ្ពស់សមរម្យ សហគមន៍ជួយឲ្យកសិករមានជីវភាពធូរធា ទទួលបានប្រាក់ចំណូលសមរម្យ ព្រមទាំងជួយកាត់បន្ថយការធ្វើចំណាកស្រុក រកការងារធ្វើឆ្ងាយពីស្រុកភូមិ។
ការបង្កើតសហគមន៍នេះ គឺជាការចងក្រងជាក្រុមផលិត និងរកទីផ្សារ ដោយអាចតវ៉ាតម្លៃបាន មិនចាំបាច់បារម្ភរឿងបញ្ហាក្រឡុកតម្លៃពីឈ្មួញកណ្តាល ព្រោះកន្លងមកតម្លៃផលិតផល គឺអាស្រ័យតែលើមាត់របស់ឈ្មួញកណ្តាល ដែលចង់កេងចំណេញលើញើសឈាមរបស់កសិករ៕
