ប៉ារីស៖ ប្រទេសបារាំងបានប្រកាសពីផែនការផ្អាកការនាំចូលផ្លែឈើស្រស់ៗមួយចំនួន ដែលត្រូវបានរកឃើញថា មានសំណល់ថ្នាំគីមីសម្លាប់សត្វល្អិតលើសកម្រិត ហើយត្រូវបានហាមឃាត់ដាច់ខាតនៅក្នុងបណ្តាប្រទេសជាសមាជិកសហភាពអឺរ៉ុប។
នាយករដ្ឋមន្ត្រីបារាំង លោក សេបាស្ទៀន ឡឺគ័កនូ (Sebastien Lecornu) បានមានប្រសាសន៍ថា លោកប្រធានាធិបតីបារាំងនឹងចេញក្រឹត្យមួយ ដើម្បីទប់ស្កាត់ការនាំចូលផលិតផលផ្លែឈើណាមានផ្ទុកសំណល់ថ្នាំគីមីពុល ដោយវិធានការនេះត្រូវបានរឹតបន្តឹងជុំវិញការការពារអ្នកប្រើប្រាស់ និងការពារគោលនយោបាយកសិកម្មរបស់ប្រទេសបារាំង។
នៅក្នុងសេចក្តីថ្លែងការណ៍មួយចេញផ្សាយ កាលពីសប្តាហ៍មុន លោកនាយករដ្ឋមន្ត្រីបារាំង បានមានប្រសាន៍ថា ការផ្អាកនេះនឹងអនុវត្តចំពោះផ្លែឈើណាមានសំណល់សារធាតុថ្នាំគីមីចំនួនបួនប្រភេទ ដែលត្រូវបានហាមឃាត់ នៅក្នុងសហភាពអឺរ៉ុប មានដូចជា ឈ្មោះសារធាតុគីមី ម៉ង់កូហ្សែប (Mancozeb) គ្លុយហ្វូស៊ីណាត (Glufosinate) ត្យូផាណាត-មេទីល (Thiophanate-methyl) និងសារធាតុគីមីឈ្មោះ កាបង់ដាហ្សីម (Carbendazim)។ នៅពេលក្រឹត្យនេះចូលជាធរមាន ការនាំចូលផ្លែឈើស្រស់ៗណាមានសំណល់ថ្នាំពុលទាំងនេះ នឹងមិនត្រូវបានអនុញ្ញាតឱ្យចូលប្រទេសបារាំងទៀតទេ។
យោងតាមសេចក្តីថ្លែងការណ៍ដដែល វិធានការនេះគ្របដណ្តប់លើផ្លែឈើជាច្រើនប្រភេទ ដែលត្រូវនាំចូលប្រទេសបារាំង រួមមានផ្លែបឺរ ស្វាយ ផ្លែត្របែក ផ្លែក្រូចឆ្មារ ទំពាំងបាយជូរ និងផ្លែប៉ោម។ ទំនិញទាំងនេះមានប្រភពមកពីបណ្តាប្រទេសក្នុងតំបន់អាម៉េរិកខាងត្បូង និងមកពីតំបន់ផ្សេងទៀត ដែលមិនមែនជាសមាជិកសហភាពអឺរ៉ុប។
លោក សេបាស្ទៀន ឡឺគ័កនូ បានពិពណ៌នាអំពីការសម្រេចចិត្តនេះថា នេះគ្រាន់តែជាជំហានទីមួយ បម្រើឱ្យគោលបំណងពីរ។ ទីមួយ គឺដើម្បីការពារអ្នកប្រើប្រាស់ ដោយការអនុវត្តស្តង់ដារសុវត្ថិភាពចំណីអាហាររបស់សហភាពអឺរ៉ុប លើផលិតផលផ្លែឈើនាំចូល។ ទីពីរ គឺដើម្បីដោះស្រាយបញ្ហាការប្រកួតប្រជែងអយុត្តិធម៌ សម្រាប់កសិករបារាំង ដោយភ្ជាប់ទៅនឹងការប្រើប្រាស់ផលិតផលការពាររុក្ខជាតិ ដែលមិនមានការអនុញ្ញាតនៅក្នុងសហភាពអឺរ៉ុប ប៉ុន្តែនៅតែមាននៅក្នុងតំបន់ផលិតកម្មផ្សេងទៀត។
លោកបានមានប្រសាសន៍ថា នេះគឺជា «បញ្ហាយុត្តិធម៌ពិតប្រាកដ និងយុត្តិធម៌សម្រាប់កសិកររបស់យើង»។
ដើម្បីគាំទ្រដល់ការអនុវត្តក្រឹតនេះ អាជ្ញាធរបារាំងនឹពង្រឹងការត្រួតពិនិត្យការនាំចូលតាមព្រំដែនឱ្យកាន់តែតឹងរ៉ឹង។ ការងារនេះនឹងត្រូវអនុវត្តដោយក្រុមអធិការកិច្ចជំនាញ ដែលមានភារកិច្ចផ្ទៀងផ្ទាត់ការអនុលោមភាពលើការនាំចេញផ្លែឈើ ដែលមានកម្រិតសំណល់ថ្នាំគីមីពុលស្របតាមស្តង់ដារបស់សហភាពអឺរ៉ុប។
ការព្យួរការនាំចូលនេះ សមស្របនឹងបរិបទថ្មីនៅក្នុងទ្វីបអឺរ៉ុប ដែលកាន់តែរឹតបន្តឹងនូវការអនុវត្តច្បាប់ស្តីពីអនាម័យ និងភូតគាមអនាម័យ។ កសិករក្នុងប្រទេសជាសមាជិកសហភាពអឺរ៉ុប បានលើកឡើងម្តងហើយម្តងទៀតអំពីការប្រកួតប្រជែងជាមួយការនាំចូលផលិផលផ្លែឈើ ដែលដាំដុះក្រោមក្របខ័ណ្ឌបទប្បញ្ញត្តិខុសគ្នាស្រឡះពីការអនុវត្តនៅក្នុងសហភាពអឺរ៉ុប។
ខណៈពេលរដ្ឋាភិបាលបារាំង ចេញវិធានការទប់ស្កាត់ក្នុងហេតុផលការពារសុខភាពសាធារណៈ វាក៏បង្កផលប៉ះពាល់ផ្នែកពាណិជ្ជកម្មផងដែរ។ ការរឹតបន្តឹងនេះអាចប៉ះពាល់ដល់ខ្សែសង្វាក់ផ្គត់ផ្គង់ និងលទ្ធភាពទទួលបានទីផ្សារសម្រាប់អ្នកនាំចេញផ្លែឈើពីបណ្តាប្រទេស ដែលមិនមែនជាសមាជិកសហភាពអឺរ៉ុប ចូលទៅកាន់ប្រទេសបារាំង។ ការសម្រេចចិត្តនេះក៏បង្ហាញពីការប្រឹងប្រែងបំពេញតាមអនុលោមភាពចំពោះសំណល់ថ្នាំគីមីពុល និងការអនុវត្តតាមបទប្បញ្ញត្តិស្តីការការពាររុក្ខជាតិ ដោយកំណត់លទ្ធភាពឱ្យនាំចូលទៅកាន់ទីផ្សារផលិតផលស្រស់ៗរបស់អឺរ៉ុប។
បណ្តាប្រទេសនាំចេញ និងប្រតិបត្តិករ ត្រូវបានគេរំពឹងថា នឹងតាមដានការអនុវត្តក្រឹត្យនេះយ៉ាងដិតដល់ ដោយសារវិធានការស្រដៀងគ្នានេះអាចមានឥទ្ធិពលលើការកាងារត្រួត្យពិនិត្យ និងលក្ខខណ្ឌនាំចូលនៅក្នុងប្រទេសជាសមាជិកសហភាពអឺរ៉ុបផ្សេងទៀត៕
