ដោយ នៅ ស៊ីវុត្ថា
ភ្នំពេញ៖ សហគ្រាសខ្នាតតូច និងមធ្យមនៅកម្ពុជា ដែលកំពុងប្រឈមនឹងបញ្ហាខ្វះទុនសម្រាប់ទ្រទ្រង់ និងពង្រីកអាជីវកម្ម នឹងមានឱកាសទទួលបានកម្ចីក្នុងអត្រាការប្រាក់៥ភាគរយ ជាមួយការអនុគ្រោះមិនចាំបាច់សងប្រាក់ដើមរហូតដល់ពីរឆ្នាំ។
ឱកាសនេះកើតចេញពីកិច្ចសហការថ្មីរវាងធនាគារអភិវឌ្ឍន៍ជនបទ និងកសិកម្ម (ARDB) និងសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ដែលបានចុះអនុស្សរណៈយោគយល់គ្នា នៅថ្ងៃទី២៧ ខែតុលា ឆ្នាំ២០២៦ ក្នុងវេទិកាថ្នាក់ជាតិ ស្តីពីហិរញ្ញប្បទានសម្រាប់សហគ្រាសធុនមីក្រូ តូច និងមធ្យម លើកទី១។
ក្រោមកិច្ចសហការនេះ សហគ្រាសធុនមីក្រូ តូច និងមធ្យម ដែលជាសមាជិក FASMEC នឹងទទួលបានអាទិភាពក្នុងការសិក្សា និងពិនិត្យសំណើកម្ចីឱ្យបានឆាប់រហ័ស ដើម្បីជួយសម្រួលការទទួលបានប្រភពទុនសម្រាប់ដំណើរការអាជីវកម្ម។
ចំណុចគួរឱ្យចាប់អារម្មណ៍ គឺការអនុគ្រោះមិនចាំបាច់សងប្រាក់ដើមរហូតដល់ពីរឆ្នាំ ដែលអាចជួយឱ្យម្ចាស់សហគ្រាសមានពេលវេលាប្រើប្រាស់ទុនសម្រាប់ផលិតកម្ម ការទិញសម្ភារៈ ឬការពង្រីកអាជីវកម្ម មុនចាប់ផ្តើមសងប្រាក់ដើម។
ឧកញ៉ា តែ តាំងប៉ ប្រធាន FASMEC បានលើកឡើងថា សហគ្រាសខ្មែរមួយចំនួនមិនត្រឹមតែខ្វះប្រភពទុនប៉ុណ្ណោះទេ ប៉ុន្តែថែមទាំងខ្វះចំណេះដឹងផ្នែកច្បាប់ បច្ចេកទេស ការរៀបចំរបាយការណ៍ហិរញ្ញវត្ថុ និងផែនការអាជីវកម្ម ដែលធ្វើឱ្យពួកគេពិបាកទទួលបានកម្ចីពីគ្រឹះស្ថានហិរញ្ញវត្ថុ។
លោកបញ្ជាក់ថា កិច្ចសហការជាមួយ ARDB មិនត្រឹមតែផ្តោតលើការសម្រួលប្រភពទុនប៉ុណ្ណោះទេ ប៉ុន្តែថែមទាំងការបណ្តុះបណ្តាល និងពង្រឹងសមត្ថភាពសហគ្រិន តាមរយៈសិក្ខាសាលា និងកម្មវិធីបណ្តុះបណ្តាលនៅទូទាំងប្រទេស ដើម្បីឱ្យសហគ្រាសមានសមត្ថភាពគ្រប់គ្រងអាជីវកម្ម និងបំពេញលក្ខខណ្ឌស្នើសុំកម្ចីបានប្រសើរឡើង។
ចំណែកអគ្គនាយក ARDB លោក កៅ ថាច បានចាត់ទុកសហគ្រាសធុនមីក្រូ តូច និងមធ្យម ជាឆ្អឹងខ្នងដ៏សំខាន់នៃសេដ្ឋកិច្ចកម្ពុជា ។ លោកបានសង្កត់ធ្ងន់ថា ការជួយសហគ្រិនខ្មែរឱ្យអាចបន្តអាជីវកម្ម និងជៀសផុតពីការដួលរលំ ត្រូវការការគាំទ្រជាក់ស្តែង មិនមែនត្រឹមតែការលើកទឹកចិត្តនោះឡើយ។
ទោះជាយ៉ាងណា ការទទួលបានអាទិភាពក្នុងការពិនិត្យសំណើកម្ចី និងទំហំកម្ចី អាស្រ័យលើលក្ខខណ្ឌ និងការវាយតម្លៃរបស់ធនាគារ ARDB។
គួរបញ្ជាក់ថា ARDB ជាធនាគារគោលនយោបាយ ដែលបង្កើតឡើងនៅឆ្នាំ១៩៩៨។ រយៈពេល២៨ឆ្នាំមកនេះ ARDB បានផ្តល់កម្ចី ដែលមានអត្រាការប្រាក់ទាប និងលក្ខខណ្ឌងាយស្រួលដល់កសិករ និងសហគ្រាសកែច្នៃ ដើម្បីអភិវឌ្ឍសេដ្ឋកិច្ចមូលដ្ឋាន និងជនបទ៕
