ដោយ នៅ ស៊ីវុត្ថា
ភ្នំពេញ៖ រាជរដ្ឋាភិបាលកម្ពុជា តាមរយៈក្រសួង ស្ថាប័នពាក់ព័ន្ធ និងអាជ្ញាធរមូលដ្ឋាន បានចុះអន្តរាគមន៍ជួយសង្គ្រោះដំណាំស្រូវប្រមាណជិត១៥ម៉ឺនហិកតា បន្ទាប់ពីភាពរាំងស្ងួតបានប៉ះពាល់ដល់ផ្ទៃដីដាំដុះនៅក្នុងខេត្តចំនួនប្រាំបីសរុបជិតបីម៉ឺនហិកតា។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានថ្លែងថា គិតត្រឹមថ្ងៃទី៣០ ខែកក្កដា ឆ្នាំ២០២៦ ខេត្តរងផលប៉ះពាល់ដោយសារភាពរាំងស្ងួតមានចំនួនប្រាំបីខេត្ត រួមមាន ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង ប៉ៃលិន កំពង់ចាម កំពង់ធំ និងខេត្តសៀមរាប។ ចំណែកផ្ទៃដីដំណាំស្រូវរងផលប៉ះពាល់សរុបមានជាង២៨៩ ០០០ហិកតា។
លោកបានឱ្យដឹងថា រាជរដ្ឋាភិបាលបានចាត់វិធានការអន្តរាគមន៍ជាបន្ទាន់ តាមរយៈក្រសួងធនធានទឹក និងឧតុនិយម ព្រមទាំងក្រសួង ស្ថាប័ន និងអាជ្ញាធរពាក់ព័ន្ធ ដោយអាចជួយសង្គ្រោះផ្ទៃដីដំណាំស្រូវបានប្រមាណ១៤៧ ០០០ហិកតា ដែលធ្វើឱ្យស្ថានភាពដំណាំមានភាពប្រសើរឡើងវិញ។
លោកបានបន្តថា ការអន្តរាគមន៍របស់រាជរដ្ឋាភិបាល គួបផ្សំនឹងការចូលរួមសហការរបស់ប្រជាពលរដ្ឋ និងការធ្លាក់ភ្លៀងជាបន្តបន្ទាប់ក្នុងរយៈពេលកន្លងមក បានធ្វើឱ្យដំណាំស្រូវភាគច្រើនចាប់ផ្តើមលូតលាស់ឡើងវិញ។ ទោះជាយ៉ាងណា ដំណាំស្រូវមួយចំនួនអាចរងផលប៉ះពាល់ដល់គុណភាព និងទិន្នផល ដោយសារការខ្វះខាតទឹកក្នុងអំឡុងពេលកន្លងមក។
លោកបានបញ្ជាក់ថា ប្រសិនបើភ្លៀងនៅតែបន្តធ្លាក់នៅតាមតំបន់ទាំងនោះក៏អាចឆ្លងផុតពីស្ថានភាពរាំងស្ងួតបានដែរ។
បើតាមអ្នកនាំពាក្យរូបនេះ ភាពរាំងស្ងួតលើកនេះបណ្តាលមកពីឥទ្ធិពលនៃបាតុភូតអែលនីញ៉ូ (El Niño) ដែលធ្វើឱ្យបរិមាណទឹកក្នុងអាងស្តុកទឹក និងប្រព័ន្ធធារាសាស្ត្រនៅតំបន់មួយចំនួនមានកម្រិតទាបតាំងពីចុងឆ្នាំ២០២៥ ដែលបង្កការលំបាកក្នុងការផ្គត់ផ្គង់ទឹកសម្រាប់ការងារបង្កបង្កើនផលនៅដើមរដូវវស្សាឆ្នាំ២០២៦។
ទាក់ទិននឹងបញ្ហានេះដែរ អង្គការឧតុនិយមពិភពលោក កាលពីថ្ងៃទី៣១ ខែកក្កដា ឆ្នាំ២០២៦ បានឱ្យដឹងថា បាតុភូតអែលនីញ៉ូ កំពុងបន្តពង្រឹងឥទ្ធិពលជាបន្តបន្ទាប់ ហើយត្រូវបានព្យាករថា នឹងក្លាយជាកត្តាសំខាន់ ដែលគ្របដណ្តប់លើលំនាំអាកាសធាតុសកល ក្នុងអំឡុងខែសីហា ដល់ខែតុលា ឆ្នាំ២០២៦។
អង្គការឧតុនិយមពិភពលោក បានបញ្ជាក់ថា បាតុភូតអែលនីញ៉ូ ដែលកំពុងវិវឌ្ឍនេះ រួមផ្សំជាមួយសីតុណ្ហភាពផ្ទៃមហាសមុទ្រប៉ាស៊ីហ្វិក ដែលនៅតែក្តៅខ្លាំងខុសប្រក្រតី និងលទ្ធភាពកើតមានបាតុភូតប៉ូលអាកាសធាតុមហាសមុទ្រឥណ្ឌាវិជ្ជមាន (Positive Indian Ocean Dipole – IOD) នឹងជះឥទ្ធិពលយ៉ាងខ្លាំងដល់លំនាំអាកាសធាតុនៅតំបន់ជាច្រើនជុំវិញពិភពលោក ក្នុងប៉ុន្មានខែខាងមុខ។
តាមការព្យាកររបស់អង្គការឧតុនិយមពិភពលោក បាតុភូតអែលនីញ៉ូ ត្រូវគេរំពឹងថា នឹងបន្តកាន់តែខ្លាំងក្នុងអំឡុងខែសីហា ដល់ខែតុលា ឆ្នាំ២០២៦ ដែលនឹងបង្កើនលទ្ធភាពឱ្យសីតុណ្ហភាពនៅតំបន់ភាគច្រើននៃពិភពលោកខ្ពស់ជាងកម្រិតមធ្យមធម្មតា។
ជាមួយគ្នានេះ លំនាំទឹកភ្លៀងក៏នឹងផ្លាស់ប្តូរ ដែលជាលក្ខណៈពិសេសនៃបាតុភូតអែលនីញ៉ូ ដោយតំបន់ខ្លះត្រូវបានព្យាករថា នឹងមានភ្លៀងធ្លាក់ច្រើនជាងធម្មតា ខណៈតំបន់ផ្សេងទៀតនឹងប្រឈមហានិភ័យខ្ពស់នៃភាពរាំងស្ងួត។
អង្គការឧតុនិយមពិភពលោក ក៏បានព្យាករផងដែរថា បាតុភូតប៉ូលអាកាសធាតុមហាសមុទ្រឥណ្ឌាវិជ្ជមាន ទំនងជានឹងកើតឡើង ដែលអាចពង្រឹងឥទ្ធិពលរបស់អែលនីញ៉ូ និងធ្វើឱ្យការប្រែប្រួលអាកាសធាតុនៅតំបន់មួយចំនួនកាន់តែធ្ងន់ធ្ងរ។
អង្គការឧតុនិយមពិភពលោកបានសង្កត់ធ្ងន់ថា ការព្យាករជាមុនទាំងនេះផ្តល់ឱកាសសម្រាប់ប្រទេសនានា អាជ្ញាធរ និងសហគមន៍ រៀបចំវិធានការត្រៀមទុកជាមុន ដើម្បីកាត់បន្ថយហានិភ័យ បង្កើនការសម្រេចចិត្តប្រកបដោយប្រសិទ្ធភាព និងការពារអាយុជីវិត ព្រមទាំងជីវភាពរស់នៅរបស់ប្រជាពលរដ្ឋ។
ជាមួយគ្នានេះ អង្គការឧតុនិយមពិភពលោក បានអះអាងថា បណ្តាញអ្នកជំនាញ និងស្ថាប័នសមាជិករបស់ខ្លួននៅទូទាំងពិភពលោក កំពុងសហការគ្នាយ៉ាងជិតស្និទ្ធ ដើម្បីតាមដានការវិវត្តនៃបាតុភូតអែលនីញ៉ូ ដោយផ្តល់ព័ត៌មានព្យាករណ៍ទាន់ពេលវេលា និងគាំទ្រដល់វិធានការកាត់បន្ថយផលប៉ះពាល់លើជីវិត និងជីវភាពរស់នៅរបស់ប្រជាជន៕
