ដោយ នៅ ស៊ីវុត្ថា
ភ្នំពេញ៖ រាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី (ADB) បានចុះហត្ថលេខាលើកិច្ចព្រមព្រៀងឥណទានសម្បទានក្នុងទំហំទឹកប្រាក់២៥០លានដុល្លារ សម្រាប់អនុវត្តកម្មវិធីអន្តរាគមន៍បន្ទាន់ដើម្បីរក្សាស្ថិរភាពសេដ្ឋកិច្ច (Rapid Intervention for Stabilization of the Economy Program – RISE) ដើម្បីគាំទ្រដល់ការឆ្លើយតបរបស់កម្ពុជា ចំពោះផលប៉ះពាល់ពីពហុវិបត្តិ និងភាពមិនប្រាកដប្រជានៃសេដ្ឋកិច្ចសកល។
ពិធីចុះហត្ថលេខាត្រូវបានធ្វើឡើងនៅថ្ងៃទី៣១ ខែកក្កដា ឆ្នាំ២០២៦ នៅទីស្តីការក្រសួងសេដ្ឋកិច្ច និងហិរញ្ញវត្ថុ ក្រោមវត្តមានឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកស្រី យ៉ាសមីន ស៊ីឌីគី (Yasmin Siddiqi) នាយិកា ADB ប្រចាំកម្ពុជា។ ពិធីនេះក៏មានការចូលរួមពីលោក នៀនសាន ចាង (Nianshan Zhang) អគ្គនាយកទទួលបន្ទុកនាយកដ្ឋានអាស៊ីអាគ្នេយ៍របស់ ADB ផងដែរ។
កម្មវិធីអន្តរាគមន៍បន្ទាន់ដើម្បីរក្សាស្ថិរភាពសេដ្ឋកិច្ចត្រូវបានអនុវត្តក្រោមក្របខណ្ឌយន្តការហិរញ្ញប្បទានប្រឆាំងវិបត្តិ (Countercyclical Support Facility-CSF) របស់ ADB និងមានគោលបំណងគាំទ្រការអនុវត្តកម្មវិធីអន្តរាគមន៍គ្រប់ជ្រុងជ្រោយ ឆ្លើយតបនឹងសភាពការណ៍ពហុវិបត្តិ របស់រាជរដ្ឋាភិបាល ដែលផ្តោតលើការបង្កើតការងារ ការរក្សាលំនឹងជីវភាពប្រជាពលរដ្ឋ និងការពង្រឹងភាពធន់នៃសេដ្ឋកិច្ច និងសង្គមកម្ពុជា។
កម្មវិធីនេះ ផ្តោតលើសមិទ្ធផលសំខាន់ចំនួនបី រួមមានការកាត់បន្ថយផលប៉ះពាល់ពីការប្រែប្រួលថ្លៃប្រេងឥន្ធនៈ ការផ្តល់ជំនួយហិរញ្ញវត្ថុ និងការគាំទ្រវិស័យកសិកម្មដល់គ្រួសារងាយរងគ្រោះ ព្រមទាំងការពន្លឿនការផ្លាស់ប្តូរទៅកាន់សេដ្ឋកិច្ចបៃតង ដើម្បីពង្រឹងភាពធន់ និងការឆ្លើយតបចំពោះវិបត្តិថាមពលនាពេលអនាគត។
រាជរដ្ឋាភិបាលបានចាត់ទុកថា ការទទួលបានហិរញ្ញប្បទានក្រោមក្របខណ្ឌ ហិរញ្ញប្បទានប្រឆាំងវិបត្តិ មិនត្រឹមតែជាការគាំទ្រផ្នែកហិរញ្ញវត្ថុដ៏សំខាន់ប៉ុណ្ណោះទេ ប៉ុន្តែថែមទាំងជាវិធានការទាន់ពេលវេលា ក្នុងការជួយទ្រទ្រង់សេដ្ឋកិច្ចកម្ពុជា ឱ្យឆ្លងផុតស្ថានភាពដ៏លំបាក និងរក្សាសន្ទុះកំណើនសេដ្ឋកិច្ចប្រកបដោយចីរភាព។
កម្ពុជា គឺជាប្រទេសសមាជិកដំបូងគេ ដែលទទួលបានការគាំទ្រក្រោមកម្មវិធីអន្តរាគមន៍បន្ទាន់ដើម្បីរក្សាស្ថិរភាពសេដ្ឋកិច្ច បន្ទាប់ពីក្រុមប្រឹក្សាភិបាល ADB អនុម័តកម្មវិធីនេះនៅថ្ងៃទី៣០ ខែកក្កដា ឆ្នាំ២០២៦ ហើយភាគីទាំងពីរបានចុះហត្ថលេខាលើកិច្ចព្រមព្រៀងនៅថ្ងៃបន្ទាប់។
ក្នុងឱកាសនេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានថ្លែងអំណរគុណដល់លោក ម៉ាសាតុ កាន់ដា (Masato Kanda) ប្រធាន ADB ដែលបានដាក់ចេញកញ្ចប់ហិរញ្ញប្បទានក្រោមក្របខណ្ឌហិរញ្ញប្បទានប្រឆាំងវិបត្តិ ដើម្បីឆ្លើយតបយ៉ាងឆាប់រហ័សចំពោះផលប៉ះពាល់ពីវិបត្តិនៅមជ្ឈិមបូព៌ា។ ឯកឧត្តមក៏បានថ្លែងអំណរគុណដល់ស្ថានតំណាង ADB ប្រចាំកម្ពុជា និងក្រុមបេសកកម្មរបស់ ADB ដែលបានសហការយ៉ាងជិតស្និទ្ធជាមួយរាជរដ្ឋាភិបាល ក្នុងការរៀបចំ និងបំពេញនីតិវិធីរហូតឈានដល់ការចុះហត្ថលេខាលើកិច្ចព្រមព្រៀងនេះ។
ឯកឧត្តមអគ្គបណ្ឌិតសភាចារ្យបានបញ្ជាក់ថា ការចុះហត្ថលេខានេះ បានឆ្លុះបញ្ចាំងពីទំនាក់ទំនងកិច្ចសហប្រតិបត្តិការដ៏រឹងមាំ ការគាំទ្រ និងការជឿទុកចិត្តរបស់ ADB ចំពោះរាជរដ្ឋាភិបាលកម្ពុជា។ ឯកឧត្តមក៏បានលើកឡើងថា ADB បានដើរតួនាទីជាកាតាលីករដ៏សំខាន់ ក្នុងការកៀរគរហិរញ្ញប្បទានអន្តរជាតិជួយកម្ពុជា ក្នុងអំឡុងពេលវិបត្តិសំខាន់ៗ ដូចជា ទឹកជំនន់ឆ្នាំ២០០០–២០០១ វិបត្តិហិរញ្ញវត្ថុពិភពលោកឆ្នាំ២០០៨ និងវិបត្តិកូវីដ-១៩។
ជាមួយគ្នានេះ លោក នៀនសាន ចាង បានវាយតម្លៃខ្ពស់ចំពោះភាពជាម្ចាស់ និងការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការរក្សាស្ថិរភាពសេដ្ឋកិច្ច និងលំនឹងជីវភាពប្រជាពលរដ្ឋ តាមរយៈការដាក់ចេញវិធានការឆ្លើយតបយ៉ាងទាន់ពេលវេលា ដើម្បីកាត់បន្ថយផលប៉ះពាល់លើប្រជាពលរដ្ឋ និងសេដ្ឋកិច្ច ព្រមទាំងពង្រឹងភាពធន់ចំពោះវិបត្តិថាមពលនាពេលអនាគត។
លោកបានបញ្ជាក់ថា ADB នឹងបន្តផ្តល់ការគាំទ្រយ៉ាងពេញទំហឹងដល់កម្ពុជា ក្នុងការដោះស្រាយបញ្ហាប្រឈមនានា និងជំរុញការអភិវឌ្ឍប្រកបដោយបរិយាបន្ន និងចីរភាព។
ក្នុងឱកាសនោះដែរ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានស្នើឱ្យ ADB បន្តផ្តល់ហិរញ្ញប្បទានសម្បទានដែលមានភាពបត់បែនខ្ពស់ដល់កម្ពុជា ក្នុងដំណាក់កាលអន្តរកាលបន្ទាប់ពីការចាកចេញពីចំណាត់ថ្នាក់ប្រទេសអភិវឌ្ឍន៍តិចតួចដើម្បីបន្តគាំទ្រការវិនិយោគលើវិស័យអាទិភាព និងរក្សាសន្ទុះនៃការអភិវឌ្ឍសេដ្ឋកិច្ចប្រកបដោយចីរភាព៕
