ដោយ ឡុង សរេត
សៀមរាប៖ យោធិនពិការម្នាក់ រស់នៅក្នុងមជ្ឈមណ្ឌលអភិវឌ្ឍន៍យោធិនពិការសម្តេចតេជោ គូលែន៣១៧ ខេត្តសៀមរាប បានក្លាយជាកសិករឆ្នើម ដែលអាចរកប្រាក់ចំណូលប្រចាំឆ្នាំ បានរហូតដល់១៧លានរៀល ពីការដាំដុះ និងការចិញ្ចឹមសត្វ នៅក្នុងវិស័យកសិកម្ម។
យោធិនពិការរូបនេះ ឈ្មោះ តឿ តូរិទ្ធី រស់នៅភូមិស្នារតេជោ សង្កាត់បល័ង្ក ក្រុងរុនតាឯកខេត្តសៀមរាប។
លោកមានផ្ទៃដីជាងមួយហិកតាសម្រាប់ដាំស្វាយចន្ទី ត្របែក និងចិញ្ចឹមគោល ហើយនៅពេលខាងមុខនេះ លោកត្រៀមដាំដុះដំណាំកាហ្វេបន្ថែមមួយមុខទៀត ក្នុងគោលបំណងបង្កើនប្រភពចំណូលជួយទ្រទ្រង់ជីវភាពគ្រួសារឱ្យល្អប្រសើ។ តួយ៉ាងចាប់ពីឆ្នាំ២០២៤ រហូតមកដល់បច្ចុប្បន្ននេះ លោកអាចរកប្រាក់ចំណូលបានក្នុងមួយឆ្នាំចន្លោះពី១៥លាន ទៅ១៧លានរៀល។
លោក តឿ តូរិទ្ធី បានរៀបរាប់ថា សម្រាប់ដំណាំត្របែក ក្នុងមួយខែផ្តល់ប្រាក់ចំណូលបានជាងមួយលានប្រាំសែនរៀល, ដំណាំស្វាយចន្ទីផ្តល់ចំណូលបានបួនលានរៀល ក្នុងមួយឆ្នាំ និងការចិញ្ចឹមគោអាចផ្តល់ចំណូលបានជាង១០លានរៀល ក្នុងមួយឆ្នាំ។ លើសពីនេះនៅថ្ងៃអនាគតបើដំណាំទុរេនដល់អាយុកាលផ្តល់ផល រួមនឹងគម្រោងដាំកាហ្វេសម្រេចឈានដល់ការដាំដុះបន្ថែម លោករំពឹងថា ជីវភាពកាន់តែល្អប្រសើថែមមួយកម្រិតទៀតជាក់ជាមិនខាន។
លោកវីរសេនីយ៍ទោ ង៉ែត សំនាង បម្រើការនៅមជ្ឈមណ្ឌលអភិវឌ្ឍន៍យោធិនពិការសម្តេចតេជោ គូលែន៣១៧ សៀមរាប បានចាប់អារម្មណ៍ជាខ្លាំងទៅលើការងារនៅក្នុងវិស័យកសិកម្មរបស់លោក តឿ តូរិទ្ធី ដោយលោកបញ្ជាក់ថា លោកមានសមត្ថភាពលេចធ្លោជាងគេក្នុងចំណោមយោធិនសរុប២៤៣នាក់។
លោក ង៉ែត សំនាង បានកត់សម្គាល់ថា ចំណុចលេចធ្លោរបស់យោធិនពិការ តឿ តូរិទ្ធី គឺការប្រមូលផលដំណាំមានជាប្រចាំខែជួយដល់គ្រួសារ និងមានចំណូលប្រចាំឆ្នាំ អាចទ្រទ្រង់ជីវភាពគ្រួសារ និងជាបុគ្គលគំរូដល់យោធិនផ្សេងទៀត។
បើតាមលោក ង៉ែត សំនាង មជ្ឈមណ្ឌលអភិវឌ្ឍន៍យោធិនពិការសម្តេចតេជោ គូលែន៣១៧ សៀមរាប មានយោធិនសរុប២៤៣នាក់ ក្នុងនោះយោធិន ដែលមានការចាប់អារម្មណ៍ប្រកបមុខរបរក្នុងវិស័យកសិកម្មមានពី៧០ទៅ៨០ភាគរយ៕
