វិញឡុង៖ ពូជស្រូវជប៉ុនកំពុងបង្ហាញពីការសម្របខ្លួនដ៏ជោគជ័យ នៅក្នុងតំបន់ដីសណ្ដរទន្លេមេគង្គ របស់វៀតណាម បន្ទាប់ពីការដាំដុះសាកល្បងចំនួនបីរដូវ ដែលបង្កើនទំនុកចិត្តសម្រាប់ការដាំដុះក្នុងទ្រង់ទ្រាយធំនៅក្នុងខេត្តវិញឡុង។
អនុប្រធានមន្ទីរកសិកម្ម និងបរិស្ថាន ខេត្តវិញឡុង បានអះអាងថា លទ្ធផលនៃការសាកល្បងដំបូងបង្ហាញថា ពូជស្រូវជប៉ុនអាចសម្របខ្លួនបានយ៉ាងល្អទៅនឹងលក្ខខណ្ឌកសិកម្មក្នុងស្រុក។ គម្រោងសាកល្បងនេះ បានចាប់ផ្តើមក្នុងរដូវក្តៅ និងរដូវរងា ឆ្នាំ២០២៥ តាមរយៈកិច្ចសហការរវាងមន្ទីរកសិកម្មខេត្ត និងអ្នកឯកទេសមកពីសាកលវិទ្យាល័យ នីអ៊ីហ្គាតា (Niigata) ក្នុងប្រទេសជប៉ុន។
ពូជស្រូវជប៉ុនចំនួនបីប្រភេទ រួមមាន អិនយូវន់ (NU1) ស៊ីនដៃហ្វាយ (Shindai5) និងពូជកូស៊ីហ៊ីការី (Koshihikari) ត្រូវបានដាំសាកល្បងក្រោមលក្ខខណ្ឌធម្មជាតិរបស់ខេត្តវិញឡុង។
លទ្ធផលនៃការសាកល្បងបង្ហាញថា ពូជនេះមិនត្រឹមតែលូតលាស់ល្អនៅលើដី និងអាកាសធាតុរបស់ខេត្តប៉ុណ្ណោះទេ ប៉ុន្តែថែមទាំងផ្តល់ផ្លែគ្រាប់ល្អ មានគុណភាពខ្ពស់ ព្រមទាំងគាំទ្រដល់ការអនុវត្តកសិកម្ម ដែលបំភាយឧស្ម័នកាបូនទាប ដើម្បីជួយកាត់បន្ថយការបំភាយឧស្ម័នផ្ទះកញ្ចក់។
ពូជស្រូវជប៉ុនមានជាតិអាមីឡូស (Amylose) ទាប ជាប្រភេទអង្ករបាយទន់ និងមានរសជាតិឆ្ងាញ់។ ចំណែកបច្ចេកទេសស្រោចស្រព បានកាត់ជួយបន្ថយការបំភាយឧស្ម័នមេតាន ចន្លោះពី២០ ទៅ ២៤ភាគរយ សម្រាប់ពូជស្រូវជប៉ុនដាំសាកល្បងក្នុងរដូវរងា ឆ្នាំ២០២៥-២០២៦។
លោកអនុប្រធាននាយកដ្ឋាន បាននិយាយទៀតថា នៅក្នុងដំណាក់សាកល្បង រដ្ឋបាលខេត្តវិញឡុង បានណែនាំបុគ្គលិកបច្ចេកទេសឱ្យបន្តតាមដានយ៉ាងដិតដល់ ដើម្បីធានាថា វិធីសាស្ត្រដាំដុះទាំងអស់ពិតជាគោរពតាមគោលការណបែបវិទ្យាសាស្ត្រ។
លោករំពឹងថា សាកលវិទ្យាល័យកាន់ធើ (Can Tho) និងសាកលវិទ្យាល័យត្រាវិញ (Tra Vinh) នឹងបន្តការគាំទ្រ ដោយបញ្ជូនអ្នកជំនាញ និងអ្នកវិទ្យាសាស្ត្រចូលរួមតាមដានការពិសោធន៍ និងវិភាគគុណភាពដី ទឹក និងគ្រាប់ស្រូវនៅក្រោយពែលប្រមូលផល។
ចំណែកការស្រាវជ្រាវនាពេលអនាគត ក៏នឹងវាយតម្លៃផងដែរ អំពីចំណង់ចំណូលចិត្តរបស់អ្នកបរិភោគ លទ្ធភាពធ្វើពាណិជ្ជកម្ម និងឱកាសផ្ទេរបច្ចេកវិទ្យា ដើម្បីកំណត់ថា តើគំរូនេះអាចពង្រីកបានដែរឬទេ ប្រសិនបើលទ្ធផលនៅតែល្អការរំពឹងទុក។
ព្រមជាមួយគ្នានេះដែរ ខេត្តគ្រោងនឹងបន្តសាកល្បងពូជដំណាំទាំងពីររដូវ ដើម្បីវាយតម្លៃបន្ថែមទៀត អំពីភាពស៊ីសង្វាក់គ្នានៃពូជដំណាំ ភាពធន់នឹងលក្ខខណ្ឌដាំដុះ ផលិតភាព និងគុណភាពគ្រាប់ស្រូវសម្រាប់ធ្វើពាណិជ្ជកម្ម។
គំនិតផ្តួចផ្តើមសាកល្បងពូជស្រូវជប៉ុននេះ កើតចេញពីអនុស្សរណៈនៃការយោគយល់គ្នា ដែលបានចុះហត្ថលេខា កាលពីដើមខែសីហា ឆ្នាំ២០២៤ រវាងខេត្តវិញឡុង និងខេត្តនីអ៊ីហ្គាតា របស់ប្រទេសជប៉ុន។
កិច្ចព្រមព្រៀងនេះគ្របដណ្តប់លើកិច្ចសហប្រតិបត្តិការចំនួនបួន រួមមានការធ្វើតេស្តពូជស្រូវថ្មី នៅ ខេត្តវិញឡុង ការកាត់បន្ថយការបំភាយឧស្ម័នមេតានពីផលិតកម្មកសិកម្ម ការលើកកម្ពស់សកម្មភាពនាំចេញ និងនាំចូលស្រូវអង្ករ និងការផ្លាស់ប្តូរកម្លាំងពលកម្មកសិកម្ម។
ចាប់តាំងពីកិច្ចព្រមព្រៀងនេះត្រូវបានចុះហត្ថលេខា អាជ្ញាធរខេត្តវិញឡុង បានធ្វើការយ៉ាងជិតស្និទ្ធជាមួយអាជ្ញាធរខេត្តនីអ៊ីហ្គាតា ដើម្បីពង្រឹងកិច្ចសហប្រតិបត្តិការជាក់ស្តែង ក្នុងគោលបំណងពង្រឹងទំនាក់ទំនងទ្វេភាគីរវាងវៀតណាម និងជប៉ុន៕ (ផាន់ អាណា)
