ដោយ នៅ ស៊ីវុត្ថា
កំពង់ឆ្នាំង៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមបណ្ដាញកសិករតេជោ នារសៀលថ្ងៃទី២១ ខែកក្កដា ឆ្នាំ២០២៦នេះ បានជំរុញឱ្យប្រជាកសិករនៅក្រុងកំពង់ឆ្នាំ ខេត្តកំពង់ឆ្នាំង ត្រូវប្តូរទម្លាប់ចាស់ដោយចាប់យករបៀបធ្វើកសិកម្មបែបថ្មី ក្នុងនោះគួររួមគ្នាចងក្រងជាក្រុមផលិត ដែលមានទាំងបច្ចេកទេស និងទីផ្សារ ព្រមទាំងងាកមកប្រើប្រាស់ឥណទានរបស់ ARDB ដើម្បីជួយពង្រីកអាជីវកម្មឲ្យកាន់តែរីកចម្រើន។
នៅក្នុងពិធីជួបសំណេះសំណាល និងសួរសុខទុក្ខប្រជាកសិករ នៅក្រុងកំពង់ឆ្នាំ ខេត្តកំពង់ឆ្នាំង ដែលមានការអញ្ជើញចូលរួមផងដែរពីលោកជំទាវ ប៊ន សុភី អភិបាលរងខេត្តកំពង់ឆ្នាំង តំណាងឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង លោក ទូច លីហួច អភិបាលរងក្រុងកំពង់ឆ្នាំ ថ្នាក់ដឹកនាំ និងមន្ត្រីកសិកម្ម អាជ្ញាធរមូលដ្ឋាន មន្ត្រីកសិកម្មព្រមទាំងប្រជាកសិករសរុបប្រមាណ២០០នាក់។
ឯកឧត្តមបណ្ឌិត កៅ ថាច បានលើកឡើងក្នុងពិធីនេះថា ដំណើរចុះជួបកសិករនាពេលនេះ គឺដើម្បីផ្សព្វផ្សាយព័ត៌មានអំពីសមាគមបណ្ដាញកសិករតេជោ និងកម្មវិធីឥណទានរបស់ ARDB ដែលជាធនាគារបម្រើគោលនយោបាយរបស់រាជរដ្ឋាភិបាល គឺមានអត្រាការប្រាក់ទាប ជាពិសេស ខេត្តកំពង់ឆ្នាំមានសក្តានុពលលើវិស័យកសិកម្ម រួមមានការដាំបន្លែ ការចិញ្ចឹមត្រី ការចិញ្ចឹមគោ មាន់ ទា និងការប្រកបរបរកសិកម្មចម្រុះ កំពុងតែបង្កើនប្រាក់ចំណូលដល់គ្រួសារពលរដ្ឋ។
ឯកឧត្តមបណ្ឌិតប្រតិភូបានចាត់ទុកការលើកកម្ពស់ជីវភាពប្រជាកសិករ គឺជាអាទិភាពរបស់រាជរដ្ឋាភិបាល ចាប់តាំងពីសម័យសម្ដេចតេជោ ហ៊ុន សែន អតីតនាយករដ្ឋមន្រ្តី ដែលបន្តរហូតដល់រាជរដ្ឋាភិបាលនីតិកាលទី៧ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានដាក់ចេញយុទ្ធសាស្រ្តបញ្ចកោណដំណាក់កាលទី១ និងគោលនយោបាយអាទិភាពជាច្រើនទៀត ដើម្បីលើកស្ទួយវិស័យកសិកម្ម និងការធានាស្ថិរភាពតម្លៃកសិផលនៅលើទីផ្សារ។
ទន្ទឹមនេះដែរ ឯកឧត្តមបណ្ឌិតប្រតិភូបានបញ្ជាក់ថា ក្រោយការប្រែប្រួលស្ថានភាពពាណិជ្ជកម្មតាមព្រំដែនជាមួយប្រទេសជិតខាង រាជរដ្ឋាភិបាលកម្ពុជា បានអន្តរាគមន៍យ៉ាងសកម្ម ដើម្បីដោះស្រាយការកកស្ទះកសិផល និងស្វែងរកទីផ្សារថ្មីសម្រាប់កសិករ។ ទន្ទឹមនឹងនេះ វិបត្តិខ្លះក៏បានបង្កើតជាឱកាសឱ្យកម្ពុជាពង្រឹងសមត្ថភាពកែច្នៃ និងពង្រីកការនាំចេញដោយខ្លួនឯងផងដែរ។
ពាក់ព័ន្ធនឹងការផ្តល់ហិរញ្ញប្បទាន ឯកឧត្តមបណ្ឌិត កៅ ថាច បានលើកទឹកចិត្តឱ្យកសិករក្នុងស្រុក ដែលមានគម្រោងផលិតកម្មចង់កែច្នៃកសិផល គឺអាចស្នើសុំឥណទានពីធនាគារ ARDB ក្នុងអត្រាការប្រាក់សមរម្យ ដើម្បីយកទៅពង្រីកការវិនិយោគលើការដាំដុះ ការចិញ្ចឹមសត្វ វារីវប្បកម្ម និងការកែច្នៃកសិផលខ្នាតតូច និងមធ្យម។
ចំណុចសំខាន់កសិករគួរនាំគ្នាវិនិយោគលើការប្រើប្រាស់ផ្ទះសំណាញ់ និងបច្ចេកវិទ្យាឲ្យបានសមស្រប ដើម្បីកាត់បន្ថយហានិភ័យពីការប្រែប្រួលអាកាសធាតុ និងជំងឺលើដំណាំ។ ការជំរុញឱ្យកសិករចូលរួមវគ្គបណ្ដុះបណ្ដាលបច្ចេកទេសឱ្យបានច្រើន មុននឹងពង្រីកការវិនិយោគ ដើម្បីធានាថា ផលិតកម្មមានគុណភាព និងមានទីផ្សារច្បាស់លាស់។
បន្ថែមពីនេះ ឯកឧត្តមបណ្ឌិតប្រតិភូក៏បានអំពាវនាវឱ្យប្រជាកសិករប្រមូលផ្តុំគ្នាជាក្រុម ឬសហគមន៍ផលិត ដើម្បីបង្កើនបរិមាណផលិតផល មានស្តង់ដារគុណភាព និងមានអំណាចចរចាជាមួយទីផ្សារ។ សមាគមបណ្ដាញកសិករតេជោនឹងដើរតួនាទីជាស្ពានតភ្ជាប់រវាងកសិករ និងទីផ្សារ គ្រឹះស្ថានហិរញ្ញវត្ថុ និងស្ថាប័នរដ្ឋ ព្រមទាំងជាខែលការពារផលប្រយោជន៍របស់កសិករ ដើម្បីឱ្យវិស័យកសិកម្មកម្ពុជាមានការរីកចម្រើនប្រកបដោយចីរភាព៕
