កដ្ឋមណ្ឌូ៖ ដោយមានការគាំទ្រពីធនាគារអភិវឌ្ឍន៍អាស៊ី (ADB) រដ្ឋាភិបាលនេប៉ាល់ បានអនុវត្តវិធីសាស្ត្រខ្សែសង្វាក់តម្លៃបន្ថែម ដើម្បីជួយកសិករឱ្យផ្លាស់ប្តូរធ្វើកសិកម្មមានតម្លៃទាប ទៅជាដាំដំណាំមានផលចំណេញច្រើន។
គម្រោងនេះផ្តោតលើការបណ្តុះបណ្តាលផ្នែកបច្ចេកវិទ្យា ការបណ្ដុះបណ្ដាលជំនាញ ធាតុចូល និងការលើកកម្ពស់លទ្ធភាពលក់កសិផលចូលទៅកាន់ទីផ្សារ បន្ទាប់ពីបានជួយបង្កើនផលិតភាព និងប្រាក់ចំណូលយ៉ាងច្រើន ធ្វើឱ្យកសិករ អនុវត្តតាមដោយកើនឡើងរហូតដល់២៣៩ភាគរយ។
ការគាំទ្រចំគោលដៅបានពង្រឹងលទ្ធភាពរបស់ស្ត្រីកសិករនេប៉ាល់ក្នុងការទទួលបានហិរញ្ញវត្ថុ ជំនាញ និងឱកាសភាពជាអ្នកដឹកនាំ ដែលធ្វើឱ្យក្រុមស្ត្រី និងកសិពាណិជ្ជកម្ម ដែលដឹកនាំដោយស្ត្រីមានការរីកចម្រើនកាន់តែខ្លាំង។
ប្រជាជននេប៉ាល់ប្រមាណ៦១ភាគរយ ប្រកបរបរចិញ្ចឹមជីវិត តាមរយៈការធ្វើកសិកម្ម ប៉ុន្តែប្រាក់ចំណូលរបស់ពួកគាត់នៅមានកម្រិតទាបនៅឡើយ។ នេះគឺបណ្តាលមកពីកត្តាជាច្រើន រួមមានការដាំដុះដំណាំ ដែលបង្កើតប្រាក់ចំណូលតិចតួច កង្វះកន្លែងស្តុកទុក និងកែច្នៃ និងការលំបាកក្នុងការទទួលបានទីផ្សារ។ លើសពីនេះទៅទៀត ក្នុងប៉ុន្មានឆ្នាំថ្មីៗនេះ លំហូរនៃការនាំចូលផលិតផលមានតម្លៃថោកជាង បានធ្វើឱ្យបាត់បង់ផលិតភាពកសិកម្ម ហើយការធ្វើចំណាកស្រុកយ៉ាងច្រើនរបស់បុរសទៅកាន់ទីក្រុង និងក្រៅប្រទេស បានបង្កើនទម្ងន់ដល់ស្ត្រីក្នុងការធ្វើកសិកម្ម។
ដើម្បីជួយដោះស្រាយបញ្ហាប្រឈមដ៏ស្មុគស្មាញក្នុងការជំរុញប្រាក់ចំណូលរបស់កសិករ គម្រោងពិសេសមួយ បានធ្វើឱ្យកសិករជាស្ត្រី ជាតួអង្គសំខាន់ក្នុងកិច្ចខិតខំប្រឹងប្រែង ដើម្បីកំណត់រចនាសម្ព័ន្ធខ្សែសង្វាក់តម្លៃកសិកម្មឡើងវិញ។ គម្រោងនេះត្រូវបានគាំទ្រដោយហិរញ្ញប្បទានឥតសំណង ចំនួនជាង២០លានដុល្លារ ពីមូលនិធិអភិវឌ្ឍន៍អាស៊ីរបស់ធនាគារអភិវឌ្ឍន៍អាស៊ី ដែលផ្តល់ជំនួយដល់ប្រទេសក្រីក្រ និងងាយរងគ្រោះបំផុតនៅតំបន់អាស៊ី និងប៉ាស៊ីហ្វិក។ ចំណែកហិរញ្ញប្បទានចំនួន៥,៣៣លានដុល្លារ បានមកពីរដ្ឋាភិបាលនេប៉ាល់ និងចំនួន៧,៦២លានដុល្លារពីភាគីពាក់ព័ន្ធ និងហិរញ្ញប្បទានចំនួន០,៤៩ លានដុល្លារ ពីទីភ្នាក់ងារអភិវឌ្ឍន៍ហូឡង់។
ហិរញ្ញប្បទានឥតសំណងរបស់ធនាគារអភិវឌ្ឍន៍អាស៊ី ត្រូវបានផ្តល់ជាហិរញ្ញប្បទានឥតសំណង សម្រាប់កសិករ សហករណ៍ និងកសិពាណិជ្ជកម្ម ដែលបានវិនិយោគប្រាក់របស់ពួកគេជាមួយគម្រោងនេះ។
ប្រធាននាយកគម្រោងធនាគារអភិវឌ្ឍន៍អាស៊ីប្រចាំប្រទេសនេប៉ាល់ បានមានប្រសាសន៍ថា គម្រោងមិនមែនជាការវិនិយោគខ្នាតធំនោះទេ ផ្ទុយទៅវិញ បានផ្តោតលើការពង្រឹងខ្សែច្រវាក់តម្លៃទាំងស្រុង គិតចាប់ពីការផ្គត់ផ្គង់ធាតុចូលរហូតដល់ការនាំចូលកសិផលទៅកាន់ទីផ្សារ។
គម្រោងនេះផ្តោតលើកសិផលចំនួន១១មុខ ដែលផ្តល់ប្រាក់ចំណូលខ្ពស់ក្នុងមួយហិកតា និងល្អជាងដំណាំគ្រាប់ធញ្ញជាតិបុរាណ ដូចជាអង្ករ និងស្រូវសាលី។ ការគាំទ្របានពង្រឹងក្រុមកសិករឱ្យជួយស្ត្រីក្នុងការផលិត ការកែច្នៃ និងរកទីផ្សារ ផ្តល់មូលនិធិដល់សហគមន៍ និងផ្សាភ្ជាប់កសិករទៅនឹងអ្នកទិញ។ ជាលទ្ធផល ក្នុងរយៈពេលអនុវត្តគម្រោង ឆ្នាំ២០១១-២០១៩ កសិករបានអនវុត្តតាមកើនឡើងរហូតដល់២៣៩ភាគរយ ដោយប្តូរពីដំណាំធញ្ញជាតិ ទៅជាដំណាំមានតម្លៃខ្ពស់នៅលើផ្ទៃដីតែមួយ។
ការដាំដុះដំណាំថ្មី និងការកែប្រែផ្នត់គំនិតរបស់កសិករនេប៉ាល់ គឺជាវិធីសាស្រ្តជួយដោះស្រាយវដ្តជីវិតទាំងមូលនៃកសិផលដោយយកចិត្តទុកដាក់ក្នុងការបង្កើនតម្លៃបន្ថែមនៅពេលលក់ ដោយមានដំណាំសំខាន់ៗ ដូចជាសណ្តែក ទឹកឃ្មុំ ផ្សិត និងខ្ញី។ ដើម្បីជួយសម្រួលដល់ការដាំដុះរបស់កសិករ គម្រោងបានផ្តល់ពូជ និងជី រួមជាមួយផ្ទះកញ្ចក់ និងអង្គភាពវេចខ្ចប់កែច្នៃ។
ចណែកការលើកកម្ពស់សហគមន៍ គឺជាចំណុចស្នូលនៃភាពជោគជ័យរបស់គម្រោងនេះ ដោយកសិករបានបង្កើតជាមាត្រដ្ឋាន បង្កើតអំណាចសម្រាប់ចរចា និងធានាបាននូវការចូលរួមរបស់ស្ត្រី។ កន្លែងណាមិនទាន់សហគមន៍ គម្រោងនេះបានជួយបង្កើត ហើយប្រសិនបើកន្លែងណាមានសហគមន៍រួចហើយ គម្រោងជួយពង្រឹងពួកគេ។
ករណិជាក់ស្តែង ជាប្រពៃណីនៅក្នុងប្រទេសនេប៉ាល់ កសិករតែងតែរក្សាទុកពូជដំឡូងបារាំង នៅក្រោមគ្រែរបស់ពួកគេ ដែលនាំឱ្យមានការខាតបង់ច្រើន។ ប៉ុន្តែ គម្រោងនេះបានបង្កើតកន្លែងស្តុកត្រជាក់ ដែលជួយកាត់បន្ថយការខាតបង់ ដូច្នេះកសិករមានដំឡូងបារាំងច្រើនដើម្បីលក់ និងទទួលបានប្រាក់ចំណេញខ្ពស់។
ការទទួលបានឧបករណ៍ត្រឹមត្រូវក៏បានធ្វើឱ្យមានភាពខុសគ្នាយ៉ាងខ្លាំងផងដែរ។ ម៉ាស៊ីនកែច្នៃគ្រាប់ពូជបានជួយឱ្យសហគមន៍កសិកម្ម អាចបែងចែកគ្រាប់ធញ្ញជាតិមានគុណភាព និងអាចរកបានសម្រាប់ដាំដុះនៅរដូវកាលខាងមុខ ព្រមទាំងទទួលបានទិន្នផលខ្ពស់។ ឧបករណ៍កសិកម្មដូចជា ម៉ាស៊ីនភ្ជួរដី និងម៉ាស៊ីនដាំដំឡូង ក៏បានកាត់បន្ថយថ្លៃដើមផលិតកម្ម និងសន្សំសំចៃពេលវេលា ដែលធ្វើឱ្យពួកគេមានលទ្ធភាពប្រកួតប្រជែងជាមួយផលិតផលនាំចូល។
ការផ្លាស់ប្តូរបច្ចេកវិទ្យាដាំដុះ ត្រូវបានពង្រឹងតាមរយៈសមត្ថភាព និងការគាំទ្រទីផ្សារ។ គម្រោងនេះបានជួយក្រុមអភិវឌ្ឍផែនការវិនិយោគកសិពាណិជ្ជកម្មចំនួន៩៣២ ដោយកែលម្អលទ្ធភាពទទួលបានបច្ចេកវិទ្យា ដូច្នេះផលិតកម្មអាចត្រូវបានពង្រីក ដែលអាចធានាបានតាមរយៈកិច្ចសន្យាផ្គត់ផ្គង់ ដែលមាននូវស្ថិរភាព និងទទួលបានប្រាក់ចំណូលទៀតទាត់៕ (ផាន់ អាណា)
