ដោយ នៅ ស៊ីវុត្ថា
ភ្នំពេញ៖ ការនាំចេញគ្រាប់ស្វាយចន្ទីឆៅរបស់កម្ពុជាបានបន្តកើនឡើងក្នុងឆមាសទី១ ឆ្នាំ២០២៦ ខណៈទីផ្សារស្វាយចន្ទីពិភពលោកបានបង្ហាញនិន្នាការផ្លាស់ប្តូរទៅរកការកែច្នៃនៅក្នុងប្រទេសផលិត ដើម្បីបង្កើនតម្លៃបន្ថែម និងពង្រឹងខ្សែសង្វាក់ផ្គត់ផ្គង់ក្នុងស្រុក។
លោក អួន ស៊ីឡុត ប្រធានសមាគមគ្រាប់ស្វាយចន្ទីកម្ពុជា បានមានប្រសាសន៍ថា កម្ពុជាបាននាំចេញគ្រាប់ស្វាយចន្ទីឆៅ ប្រមាណ១,០៣លានតោន ទៅកាន់ប្រទេសវៀតណាម ក្នុងអំឡុងឆមាសទី១ ឆ្នាំ២០២៦ ដោយទទួលបានចំណូលពីការនាំចេញប្រមាណ១,៧៥១លានដុល្លារ ធៀបនិងរយៈពេលដូចគ្នា កាលពីឆ្នាំមុន គឺកើន ២៨ភាគរយ។
អ្នកជំនាញក្នុងវិស័យនេះ បានពន្យល់ថា ប្រទេសផលិតគួរបង្កើនសមត្ថភាពកែច្នៃក្នុងស្រុក ដើម្បីអាចទទួលបានចំណែកតម្លៃបន្ថែមកាន់តែច្រើនពីឧស្សាហកម្មស្វាយចន្ទី។
លោក អួន ស៊ីឡុត បានបញ្ជាក់ថា កម្ពុជានៅតែជាអ្នកផ្គត់ផ្គង់គ្រាប់ស្វាយចន្ទីឆៅដ៏សំខាន់មួយរបស់ពិភពលោក ជាពិសេសសម្រាប់ឧស្សាហកម្មកែច្នៃនៅប្រទេសវៀតណាម។ ប៉ុន្តែ ការពង្រីកការកែច្នៃក្នុងស្រុកមានសារៈសំខាន់ ដើម្បីបង្កើតការងារ បង្កើនតម្លៃផលិតផល និងពង្រឹងការប្រកួតប្រជែងរបស់កម្ពុជានៅក្នុងទីផ្សារអន្តរជាតិ។
នៅក្នុងឧស្សាហកម្មស្វាយចន្ទីគ្រាប់ស្វាយចន្ទីឆៅត្រូវឆ្លងកាត់ដំណើរការកែច្នៃ ដើម្បីយកសំបករឹង និងសំបកស្តើងចេញ ហើយទទួលបានផលិតផលហៅថា គ្រាប់ស្វាយចន្ទីគ្មានសំបក (Cashew Kernel) ដែលជាសាច់គ្រាប់ស្វាយចន្ទីសម្រាប់បរិភោគ ឬប្រើប្រាស់ក្នុងការផលិតអាហារផ្សេងៗ។ ផលិតផលកែច្នៃនេះមានតម្លៃខ្ពស់ជាងគ្រាប់ឆៅ។
ទីផ្សារស្វាយចន្ទីពិភពលោកកំពុងប្រឈមនឹងបញ្ហាផ្គត់ផ្គង់មិនស្មើគ្នា ការប្រែប្រួលថ្លៃដើម និងការប្រុងប្រយ័ត្នក្នុងការទិញពីអ្នកនាំចូល។ អ្នកវិភាគឧស្សាហកម្មបានលើកឡើងថា ការកែច្នៃឱ្យកាន់តែជិតប្រភពផលិត អាចជួយកាត់បន្ថយចំណាយ និងរក្សាតម្លៃបន្ថែមនៅក្នុងប្រទេសផលិត។
ក្នុងរយៈពេលប្រាំខែដំបូង ឆ្នាំ២០២៦ ប្រទេសនេះបាននាំចេញ គ្រាប់ស្វាយចន្ទីគ្មានសំបកចំនួន៤៤,៤០៣ តោន កើនឡើង៥១ភាគរយ បើធៀបនឹងរយៈពេលដូចគ្នាកាលពីឆ្នាំ២០២៥ ហើយការនាំចេញគ្រាប់ស្វាយចន្ទីគ្មានសំបកធំជាងគេទី២ បន្ទាប់ពីវៀតណាម។
អ្នកជំនាញឧស្សាហកម្មបានចាត់ទុកថា នេះជាគំរូមួយ ដែលប្រទេសផលិតផ្សេងទៀតអាចសិក្សា ដើម្បីពង្រឹងខ្សែសង្វាក់តម្លៃរបស់ខ្លួន។ ការវិនិយោគលើរោងចក្រកែច្នៃ និងការបន្ថែមតម្លៃផលិតផលនឹងក្លាយជាកត្តាសំខាន់ក្នុងការធ្វើឱ្យវិស័យស្វាយចន្ទីមានភាពប្រកួតប្រជែងកាន់តែខ្លាំងនៅលើទីផ្សារពិភពលោក៕
