ហ្សាការតា៖ ក្រសួងកិច្ចការសមុទ្រ និងនេសាទ ឥណ្ឌូណេស៊ី បន្តពង្រីកលទ្ធភាពនាំចេញជលផលរបស់ខ្លួនចូលទៅកាន់ទីផ្សារប្រទេសចិន បន្ទាប់ពីអង្គភាពកែច្នៃត្រីជាង៦០០ស្ថាប័ន បានទទួលការយល់ព្រមពីប្រទេសចិន។
ប្រធានទីភ្នាក់ងារត្រួតពិនិត្យគុណភាព និងសុវត្ថិភាពផលិតផលជលផលសមុទ្រ បានមានប្រសាសន៍ថា អគ្គរដ្ឋបាលគយនៃសាធារណរដ្ឋប្រជាមានិតចិន បានចេញលិខិតអនុញ្ញាតសម្រាប់អង្គភាពកែច្នៃត្រីចំនួនប្រាំបីបន្ថែមទៀត កាលពីខែឧសភា ឆ្នាំ២០២៦ ដែលធ្វើឱ្យចំនួនសរុបកើនដល់៦៣៨ស្ថាប័ន។
លោកស្រីប្រធានបានបន្ថែមថា សំណើរបស់អង្គភាពកែច្នៃទាំងប្រាំបី ត្រូវបានអនុម័តតាមរយៈបណ្តាញទ្វេភាគីសម្រាប់ទទួលស្គាល់ទៅវិញទៅមក។
យោងតាមលោកស្រី បច្ចុប្បន្ននេះ ប្រទេសឥណ្ឌូណេស៊ី បាននាំចេញផលិតផលជលផលចំនួន១ ០៨០ប្រភេទទៅកាន់ប្រទេសចិន។ នៅឆ្នាំ២០២៥ បរិមាណនាំចេញទៅកាន់ប្រទេសចិនបានឈានដល់៤៩១ ៥២៨តោន ដែលមានតម្លៃ ជាទឹកប្រាក់ចំនួន១,០៤ពាន់លានដុល្លារ។
ផលិតផលជលផលសមុទ្រសំខាន់ៗ ត្រូវនាំចេញទៅកាន់ទីផ្សារប្រទេសចិន រួមមាន មឹកក្លាស្សេ សារាយសមុទ្រក្រៀម និងប្រភេទត្រីក្លាស្សេ ដូចជាត្រីផ្ទោង ត្រីគោ និងត្រីប្រម៉ា។
លោកស្រីប្រធានទីភ្នាក់ងារត្រួតពិនិត្យគុណភាព និងសុវត្ថិភាពផលិតផលសមុទ្រ បានជំរុញឱ្យតួអង្គផ្នែកធុរកិច្ច និងអ្នកពាក់ព័ន្ធទាំងអស់ ដែលទទួលបានលទ្ធភាពនាំចេញជលផលទៅកាន់ប្រទេសផ្សេងៗទៀត ត្រូវរក្សាការប្តេជ្ញាចិត្ត និងភាពស៊ីសង្វាក់គ្នាក្នុងការអនុវត្តស្តង់ដារអនាម័យ ក៏ដូចជាគោលការណ៍សុវត្ថិភាពចំណីអាហារ ទាំងក្នុងខ្សែច្រវាក់ផលិតកម្ម និងបរិក្ខារប្រើប្រាស់។
លោកស្រីបានកត់សម្គាល់ថា “នេះគឺដើម្បីរក្សាការទទួលយកផលិតផល និងពង្រឹងការជឿទុកចិត្តជាសកល ដែលនឹងជួយជំរុញការប្រកួតប្រជែង។”
ចំណែករដ្ឋមន្ត្រីក្រសួងកិច្ចការសមុទ្រ និងនេសាទ របស់ឥណ្ឌូណេស៊ី បានសង្កត់ធ្ងន់លើតម្រូវការក្នុងការធានាគុណភាពផលិតផលជាបន្តបន្ទាប់ ដើម្បីជំរុញឧស្សាហកម្មនេសាទបន្ថែមទៀត និងបង្កើតជាតួអង្គលេចធ្លោចំពេលយុគសម័យពាណិជ្ជកម្មសេរី។
ក្រសួងកិច្ចការសមុទ្រ និងនេសាទរបស់ប្រទេសឥណ្ឌូណេស៊ី បានប្រកាសដាក់ចេញយុទ្ធសាស្ត្រសម្រាប់ឆ្នាំ២០២៦ ដើម្បីជំរុញ និងពង្រឹងការនាំចេញគ្រឿងសមុទ្រ តាមរយៈការជួយអាជីវករក្នុងស្រុកឱ្យអនុវត្តតាមតម្រូវការវិញ្ញាបនបត្រថ្មីៗរបស់សហរដ្ឋអាម៉េរិក និងសហភាពអឺរ៉ុប និងការពង្រីកទីផ្សារទៅក្រៅប្រទេសផ្សេងៗទៀតនៅជុំវិញពិភពលោក។
ក្រសួងនឹងជួយសម្របសម្រួលអ្នកនាំចេញ ដើម្បីឱ្យអនុលោមតាមវិញ្ញាបនបត្របញ្ជាក់ប្រភពត្រី (Catch Certification) របស់សហភាពអឺរ៉ុប និងក្រមប្រតិបត្តិនេសាទ ព្រមទាំងលក្ខខណ្ឌវិញ្ញាបនបត្រនាំចូលរបស់សហរដ្ឋអាម៉េរិក។
ប្រធានផ្នែកទីផ្សារនៃអគ្គនាយកដ្ឋានពង្រឹងភាពប្រកួតប្រជែងផលិតផលសមុទ្រ និងជលផល បានឱ្យដឹងថា គម្រោងផ្សេងៗទៀត ដែលក្រសួងបាននឹងកំពុងគិតគូរួមមាន ការរៀបចំបេសកកម្មពាណិជ្ជកម្ម ការផ្សព្វផ្សាយផលិតផលនៅលើឆាកអន្តរជាតិ និងការរៀបចំព្រឹត្តិការណ៍ផ្គូផ្គងអាជីវកម្ម (Business Matching)។ ជាមួយគ្នានេះ អ្នកនាំចេញត្រូវបានលើកទឹកចិត្តឲ្យប្រើប្រាស់អត្ថប្រយោជន៍ពន្ធអត្រាសូន្យភាគរយ ក្រោមកិច្ចព្រមព្រៀងភាពជាដៃគូសេដ្ឋកិច្ចរវាងឥណ្ឌូណេស៊ី និងជប៉ុន សម្រាប់ផលិតផលត្រីធូណាទំហំតូច និងធំ ដែលនឹងមានប្រសិទ្ធភាពចាប់ពីត្រីមាសទី១ ឆ្នាំ២០២៦ តទៅ។
ក្នុងឆ្នាំ២០២៥ ការនាំចេញគ្រឿងសមុទ្ររបស់ប្រទេសឥណ្ឌូណេស៊ីមានតម្លៃសរុប៦,២៧ពាន់លានដុល្លារ កើនឡើង៥,២ភាគរយ បើធៀបនឹងឆ្នាំមុន។ សហរដ្ឋអាម៉េរិកនៅតែជាទីផ្សារធំបំផុតរបស់ប្រទេសឥណ្ឌូណេស៊ី ដោយមានតម្លៃនាំចេញ១,៩៩ពាន់លានដុល្លារ ក្នុងនោះផលិតផលបង្គាឈានមុខគេ មានតម្លៃ១,៨៧ពាន់លានដុល្លារ។
យោងតាមទិន្នន័យរបស់ទីភ្នាក់ងារស្ថិតិជាតិឥណ្ឌូណេស៊ី បានឱ្យដឹងថា អតិរេកពាណិជ្ជកម្មវិស័យនេសាទរបស់ប្រទេសឥណ្ឌូណេស៊ី សម្រេចបាន៥,៦ពាន់លានដុល្លារ ក្នុងឆ្នាំ២០២៥ កើនឡើងបីភាគរយធៀបនឹងឆ្នាំ២០២៤៕ (ផាន់ អាណា)
