ដោយ អៀវ ឈៀងនី
ភ្នំពេញ៖ លោក សៀវ វិសុទ្ធ ម្ចាស់កសិដ្ឋានចិញ្ចឹមទាយកពង ខ្មែររីករាយ បានប្រាប់ទូរទស្សន៍អនឡាញ ARDBថា បញ្ហាសង្រ្គាមនៅមជ្ឈឹមបូពាជាបញ្ហាធ្ងន់ធ្ងរ ដែលជារឿងរបស់ពិភពលោក ហើយលោកមានការព្រួយបារម្មណ៍ជាខ្លាំង។
លោកបានមានប្រសាសន៍ថា ចំពោះកម្ពុជា ដែលជាប្រទេសកំពុងតែមានការអភិវឌ្ឍលើគ្រប់វិស័យ ផ្នែកកសិកម្មនេះ ក៏ជាផ្នែកមួយធំធេង ហើយវត្ថុធាតុដើម ដែលខ្មែរបានទិញគ្រប់សហគ្រាសធំៗ និងការបញ្ជាទិញពីមជ្ឈឹមបូពា ក៏មានការបិទច្រក ដែលហេតុផលទាំងអស់នេះហើយ ធ្វើឱ្យតម្លៃប្រែប្រួល មានន័យថា តម្លៃកើនឡើងខ្ពស់ ដូចជាប្រេងសាំង ប្រេងមាស៊ូត ជាតម្រូវការចាំបាច់មិនអាចខ្វះបាន។
ដោយសារខ្ញុំសរសេរខុស ពងគេពី ៧ម៉ឺន៥ពាន់គ្រាប់ ទៅ៨ម៉ឺនគ្រាប់ក្នុងមួយថ្ងៃ
លោកបានលើកឡើងទៀតថា ការកើនឡើងនេះ បានធ្វើកសិករ ប្រជាពលរដ្ឋទូទៅ មានការព្រួយបារម្មណ៍ ចំពោះផលប៉ះពាល់សេដ្ឋកិច្ច និងកក្តារស់នៅប្រចាំថ្ងៃរបស់ពួកគាត់ខ្លាំងខ្លាមែនទែន។
ទោះបីយ៉ាងណាលោក លោក សៀវ វិសុទ្ធ បានបង្ហាញជំនឿទុកចិត្តលើរាជរដ្ឋាភិបាលកម្ពុជា ដែលនឹងប្រើគ្រប់មធ្យោបាយ និងវិធីសាស្រ្ត ដើម្បីជួយសម្រួលបញ្ហាទាំងនេះបាន។
ពាក់ព័ន្ធចំពោះតម្លៃបច្ចុប្បន្ន លោក សៀវ វិសុទ្ធ បានគូសបញ្ជាក់ថា ពងទាបានឡើងថ្លៃបន្តិច បើធៀបទៅនិងខែមុនៗ។ លោកថា កសិករប្រឈមបញ្ហាធ្ងន់ធ្ងរ បញ្ហាទី១ ទាក់ទងទៅនិងការប្រើប្រាស់ចំណីសត្វនៅក្នុងស្រុកមានការកើនឡើងជាបន្តបន្ទាប់ បញ្ហាទី២ គឺបញ្ហាទីផ្សារ និងជាកម្លាំងមួយដ៏ធំ ដែលមានន័យថា វាអាចទៅមុខ ឬមិនអាចទៅមុខ គឺបញ្ហាទីផ្សារនេះឯង។
លោកមានការព្រួយបារម្មណ៍ជាខ្លាំង ដោយសារតម្លៃថ្លៃដើមផលិត មានការកើនឡើង ការដឹកជញ្ជូន ក៏ត្រូវការចំណាយខ្ពស់ ផលិតផលរបស់កសិករផលិតបានហើយ ចែកចាយ និងចរាចរនៅលើទីផ្សារបានតម្លៃទាបពេក អ្នកផលិតមិនអាចរត់ទៅមុខរួចទេ ណាមួយប្រឈមនិងប្រទេសជិតខាង ក៏គេធ្វើកសិកម្មដាំដុះ ចិញ្ចឹមសត្វដូចកសិករខ្មែរដែរ។ ប្រទេសកម្ពុជាទទួលរងនូវបញ្ហាទាំងអស់ហ្នឹងបន្ថែមទៀត ហេតុផលទាំងអស់ហ្នឹងហើយ ដែលធ្វើឱ្យកសិករបាក់ទឹកចិត្ត ជួបនូវទុក្ខផ្ទួនៗ។
លោក សៀវ វិសុទ្ធ បានប្រាប់ថា បច្ចុប្បន្នកសិដ្ឋានរបស់លោកមានចិញ្ចឹមទាយកពងចំនួន១០ម៉ឺនក្បាល ហើយកម្លាំងផលិតប្រចាំថ្ងៃបានពី៧៥ ០០០គ្រាប់ ទៅ៨០ ០០០គ្រាប់ក្នុងមួយថ្ងៃ។ ក្នុងនោះចំពោះសហគមអ្នកចិញ្ចឹមទាយកពង ដែលស្ថិតនៅក្នុងស្រុកខ្សាច់កណ្តាល ខេត្តកណ្តាល ប្រកបមុខរបរនេះមានរហូតទៅដល់ប្រាំឃុំ និងមានចិញ្ចឹមទាសរុបជាង មួយលានក្បាល ហើយកម្លាំងផលិតក្នុងមួយថ្ងៃៗ គឺបានរហូតដល់៨០ម៉ឺនគ្រាប់ ហើយបានចរាចរនៅតាមទីផ្សារក្នុងស្រុក ដូចជានៅទីក្រុងភ្នំពេញ ឬបណ្តាខេត្តនានា ដែលបច្ចុប្បន្នតម្លៃពងទានៅក្នុងទ្រុងទារបស់សហគមន៍ មិនទាន់ដឹកចេញទៅទីផ្សារ គឺតម្លៃពងលេខ១ ៣៥០រៀល លេខ២ បាន៣៣០រៀល លេខ៣ បាន៣២០រៀល លេខ៤ បាន៣០០រៀល។
ដោយឡែក ឈ្មួញកណ្តាលប្រមូលទិញពីកសិករយកទៅចែកចាយបន្តនៅទីប្រជុំជន បានតម្លៃពី៣៨០រៀល ទៅ ៤០០រៀលក្នុងមួយគ្រាប់ ជាតម្លៃក្នុងពេលបច្ចុប្បន្ននេះ។
ជាមួយគ្នានេះដែរ លោកបានសំណូមពរ និងជឿទុកចិត្តទៅលើរាជរដ្ឋាភិបាលថា នឹងគិតគូររកដំណោះស្រាយនាពេលខាងមុខឆាប់ៗ ដើម្បីធ្វើឱ្យតម្លៃប្រេងសាំង ប្រេងម៉ាសូត ធ្លាក់ថ្លៃមកវិញ ទោះបីមិនដល់ថ្លៃដើមក៏ដោយ ក៏ក្នុងតម្លៃណាមួយ ដែលជួយសម្រួលដល់ប្រជាពលរដ្ឋទូទៅ មិនថាតែកសិករ អាជីវករ គ្រប់ស្ថាប័នពាក់ព័ន្ធទាំងអស់ អាចបន្តជីវភាពរស់នៅ ដំណើរការសហគ្រាសរបស់ខ្លួនទៅមុខទៀតបាន។
កសិដ្ឋានចិញ្ចឹមទាយកពង ខ្មែររីករាយ ជាកសិដ្ឋានដ៏ធំមួយ ដែលបានបើកដំណើរការតាំងពីឆ្នាំ២០០៣មក។ បច្ចុប្បន្ន កសិដ្ឋានមួយនេះ មានទីតាំងស្ថិតនៅភូមិកណ្ដាល ឃុំសន្លុង ស្រុកខ្សាច់កណ្ដាល ខេត្តកណ្ដាល៕
