ម៉ានីល៖ បរិមាណចូលអង្កររបស់ប្រទេសប្រទេសហ្វីលីពីន គិតត្រឹមចុងខែឧសភា ឆ្នាំ២០២៦នេះ បានកើនឡើងប្រហែល១៥ភាគរយ ហើយកំពុងបង្កើនអង្ករស្តុកបម្រុង ដើម្បីការពារផលប៉ះពាល់ធ្ងន់ធ្ងរពីបាតុភូត អែលនីណូ មកលើផលិតកម្មស្រូវក្នុងប្រទេស។
ទិន្នន័យរបស់ការិយាល័យឧស្សាហកម្មដំណាំ បានបង្ហាញថា គិតចាប់ពីខែមករា ដល់ថ្ងៃទី២៨ ខែឧសភា ប្រទេសហ្វីលីពីនបាននាំចូលអង្ករចំនួន២,២២លានតោន ដែលជាបរិមាណខ្ពស់ជាងការនាំចូលអង្កររវាងខែមករា និងខែឧសភា ឆ្នាំ២០២៥ ចំនួន១,៩៣លានតោន។
ការនាំចូលអង្ករក្នុងខែឧសភា ឆ្នាំ២០២៦នេះ ឡើងដល់៥០៣ ១៣១តោន នៅទាបជាងឆ្នាំមុនបន្តិច ប៉ុន្តែ នេះគឺជាបរិមាណនាំចូលប្រចាំខែខ្ពស់បំផុតសម្រាប់ ឆ្នាំ២០២៦។
នៅក្នុងសន្និសីទសារព័ត៌មាន កាលពីថ្ងៃទី៣ មិថុនា ឆ្នាំ២០២៦ អនុរដ្ឋមន្ត្រី និងជាអ្នកនាំពាក្យក្រសួងកសិកម្ម ហ្វីលីពីន លោក អាណែល ឌឹ មេសា (Arnel de Mesa) បានមានប្រសាសន៍ថា ក្រសួងកំពុងទឹធានាការផ្គត់ផ្គង់ឱ្យបានគ្រប់គ្រាន់ ដោយសារបាតុភូតអេលនីណូ និងលក្ខខណ្ឌអាកាសធាតុផ្សេងទៀត។
ក្រសួងកសិកម្មហ្វីលីពីន បានព្យាករណ៍ថា ក្នុងករណីស្ថានភាពគ្រោះរាំងស្ងួតធ្ងន់ធ្ងរអាចកាត់បន្ថយផលិតកម្មស្រូវប្រមាណ៧០០ ០០០តោន។
លោក អាណែល ឌឹ មេសា បានមានប្រសាសន៍ទៀតថា ប្រសិនបើយើងគិតអំពីព្យុះនោះ គឺជាការខាតបង់ទិន្នផលស្រូវប្រហែលពី៥០០ ០០០ ទៅ៦០០ ០០០តោន។
លោកបានមានប្រសាសន៍ថា ការកើនឡើងនៃការនាំចូល គឺសមហេតុផល ដោយសារប្រទេសហ្វីលីពីន ចាំបាច់ត្រូវរៀបចំសម្រាប់ដោះស្រាយបញ្ហាណាមួយ ដែលកើតឡើងពីផលប៉ះពាល់របស់បាតុភូតអែលនីណូ មកលើផលិតកម្មស្រូវ។
លោកអនុរដ្ឋមន្ត្រី បានមានប្រសាសន៍ថា ប្រសិនបើគិតពីបរិមាណអង្ករនាំចូលនេះ គឺពិតជាច្រើនមែន ប៉ុន្តែបើគិតពីអតិផរណានៅក្នុងស្រុក ពេលនោះអង្ករនាំចូលពិតជាមានតម្លៃថោកជាង ដូច្នេខ្ញុំគិតថា នេះជាហេតុផលគ្រប់គ្រាន់ ដើម្បីបង្ហាញពីភាពត្រឹមត្រូវនៃមូលហេតុ ដែលត្រូវនាំចូលអង្ករក្នុងបរិមាណច្រើន។
លោកបានមានប្រសាសន៍បញ្ជាក់បន្ថែមថា “យើងអាចគិតថា យើងមានបរិមាណអង្ករគ្រប់គ្រាន់សម្រាប់ផ្គត់ផ្គង់នៅក្នុងប្រទេសរបស់យើង ដែលបានមកពីប្រភពពីកសិករក្នុងស្រុក ពីព្រោះការប្រមូលផលទើបតែបញ្ចប់ ហើយការនាំចូលរបស់យើងមានចំនួន២,២លានតោន។ យើងមិនខ្វះអង្ករសម្រាប់ផ្គត់ផ្គង់នៅក្នុងប្រទេសនោះទេ”។
យោងតាមទិន្នន័យេរបស់អាជ្ញាធរស្ថិតិហ្វីលីពីន បានឱ្យដឹងថា គិតត្រឹមត្រីមាសទី១ ឆ្នាំ២០២៦ ផលិតកម្មស្រូវនៅក្នុងប្រទេសហ្វីលីពីនបានធ្លាក់ចុះ៦,៣ភាគរយ មកនៅត្រឹម៤,លានតោន ដែលជាទិន្នផលទាបបំផុតនៅ ចាប់តាំងពីឆ្នាំ២០២០។
ចំណែកក្រសួងកសិកម្មហ្វីលីពីន បានព្យាករណ៍ពីទិន្នផលស្រូវហ្វីលីពីនសម្រាប់ឆ្នាំ២០២៦ នឹងធ្លាក់ពី២០,២៨លានតោន មកនៅត្រឹម១៩,៨៧លានតោន ដោយសារវិបត្តិមជ្ឈិមបូព៌ា និងបញ្ហារាំងស្ងួត។
ក្នុងពេលថ្មីៗកន្លងនេះ ក្រសួងកសិកម្មបានកោះប្រជុំក្រុមការងារ ដើម្បីពិភាក្សាអំពីបាតុភូតអែលនីណូរបស់ខ្លួនឡើងវិញ ដើម្បីបង្កើតវិធានការឆ្លើយតបប្រកបដោយប្រសិទ្ធភាព ចំពោះផលប៉ះពាល់អវិជ្ជមាន ដែលអាចកើតឡើងជាយថាហេតុដោយសារបញ្ហាអាកាសធាតុរាំងស្ងួតអូសបន្លាយពេលយូរ៕ (ផាន់ អាណា)
