កង់បេរ៉ា៖ រដ្ឋាភិបាលអូស្ត្រាលីបានឱ្យដឹងកាលពីសប្តាហ៍មុនថា ការប្រមូលផលស្រូវសាលីនាពេលខាងមុខ នឹងមានទំហំតូចបំផុតក្នុងរយៈពេលបីឆ្នាំកន្លងនេះ ដោយសារថ្លៃជីកសិកម្មខ្ពស់ និងលក្ខខណ្ឌអាកាសធាតុក្តៅស្ងួតនៅតំបន់មួយចំនួន បានប៉ះពាល់ដល់ការដាំដុះ និងទិន្នផល។
ទីភ្នាក់ងារព័ត៌មាន រ៉យទ័រ (Reuters) បានចេញតាមផ្សាយថា ប្រទេសអូស្ត្រាលី គឺជាប្រទេសនាំចេញស្រូវសាលី និងដំណាំកសិកម្មសំខាន់មួយរបស់ពិភពលោក។ ការធ្លាក់ចុះនៃទិន្នផលអាចនឹងកាត់បន្ថយការផ្គត់ផ្គង់សកល និងជំរុញឱ្យតម្លៃកើនឡើងបន្ថែមទៀត បន្ទាប់ពីតម្លៃស្រូវសាលី កាលពីខែមុន បានឡើងដល់កម្រិតខ្ពស់បំផុតក្នុងរយៈពេលពីរឆ្នាំចុងក្រោយនេះ។
ការិយាល័យសេដ្ឋកិច្ច វិទ្យាសាស្ត្រកសិកម្ម និងធនធានរបស់អូស្ត្រាលី បានឱ្យដឹងនៅក្នុងរបាយការណ៍ប្រចាំត្រីមាសថា អូស្ត្រាលីនឹងប្រមូលផលស្រូវសាលីបានចំនួន២៦,៧លានតោន នៅចុងឆ្នាំ២០២៦នេះ។ បរិមាណនេះ គឺទាបជាងទិន្នផលនារដូវកាលមុន ប្រមាណប្រាំបួនលានតោន និងទាបជាងមធ្យមភាគក្នុងរយៈពេលប្រាំរដូវកាលកន្លងមកថ្មីៗនេះ ប្រមាណប្រាំបីលានតោន។
យោងតាមទិន្នន័យរបស់ការិយាល័យសេដ្ឋកិច្ច វិទ្យាសាស្ត្រកសិកម្ម និងធនធានរបស់អូស្ត្រាលី បានឱ្យដឹងទៀតថា ថ្លៃជីកសិកម្មបានកើនឡើងយ៉ាងខ្លាំង ចាប់តាំងពីសង្គ្រាមនៅអ៊ីរ៉ង់ ដែលបានរារាំងដល់ការដឹកជញ្ជូនពីបណ្តាប្រទេសនៅតំបន់ឈូងសមុទ្រ។ តម្លៃជីខ្ពស់អាចបង្ខំឱ្យកសិករកាត់បន្ថយការប្រើប្រាស់ជី ដែលនឹងប៉ះពាល់ដល់សក្តានុពលទិន្នផល។
ទន្ទឹមនឹងនេះ តំបន់ធំៗនៅភាគខាងកើតនៃប្រទេសអូស្ត្រាលី មានបរិមាណទឹកភ្លៀងតិចតួចអស់រយៈពេលជាច្រើនខែ។ ទោះបីមានភ្លៀងធ្លាក់រាយប៉ាយ ក្នុងអំឡុងខែឧសភា ដែលបានជួយកែលម្អស្ថានភាពដំណាំក៏ដោយ ការិយាល័យឧតុនិយមអូស្ត្រាលី នៅតែព្យាករណ៍ថា នឹងមានបាតុភូត អេល នីណូ (El Nino) ហើយបរិមាណទឹកភ្លៀងនឹងទាបជាងកម្រិតមធ្យមក្នុងប៉ុន្មានខែខាងមុខ។
ទិន្នន័យដដែលបានបញ្ជាក់ថា “ការធានាឱ្យមានការផ្គត់ផ្គង់ជីគ្រប់គ្រាន់ និងទាន់ពេលវេលា ព្រមទាំងការទទួលបានទឹកភ្លៀងគ្រប់គ្រាន់ គឺជាកត្តាសំខាន់ដើម្បីសម្រេចបានទិន្នផលតាមការព្យាករណ៍បច្ចុប្បន្ន”។
ការិយាល័យសេដ្ឋកិច្ច វិទ្យាសាស្ត្រកសិកម្ម និងធនធានរបស់អូស្ត្រាលី បានប៉ាន់ប្រមាណថា ផ្ទៃដីដាំស្រូវសាលីនឹងធ្លាក់ចុះ១២ភាគរយ មកនៅត្រឹម១០,៩លានហិកតា ដែលជាកម្រិតទាបបំផុតចាប់តាំងពីឆ្នាំ២០២០។
ចំណែកផ្ទៃដីដាំស្រូវបាឡេ ដែលត្រូវការជីតិចជាងស្រូវសាលី ត្រូវបានរំពឹងថា នឹងកើនឡើងបួនភាគរយ ស្មើនឹង៥លានហិកតា ប៉ុន្តែទិន្នផលសរុបនឹងនៅតែធ្លាក់ចុះ១៥ភាគរយ មកនៅត្រឹមប្រមាណ១៤លានតោន។
សម្រាប់ដំណាំកាណូឡា ដែលត្រូវការជីច្រើន ប៉ុន្តែមានតម្លៃទីផ្សារខ្ពស់ជាងស្រូវសាលី ត្រូវបានព្យាករណ៍ថា នឹងធ្លាក់ចុះប្រាំមួយភាគរយ មកនៅត្រឹម៣,៥លានហិកតា ខណៈការប្រមូលផលនឹងធ្លាក់ចុះ២០ភាគករយ មកនៅត្រឹមជាង៦,២លានតោន។
បច្ចុប្បន្ន រដូវសាបព្រួសនៅក្នុងប្រទេសអូស្ត្រាលីជិតបញ្ចប់ហើយ ខណៈការប្រមូលផលត្រូវបានរំពឹងថា នឹងចាប់ផ្តើមនៅចុងឆ្នាំ២០២៦នេះ៕ (នៅ ស៊ីវុត្ថា)
