ភ្នំពេញ៖ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានផ្តួចផ្តើមឱ្យភាគីចិនពិចារណាបង្កើតតំបន់កែច្នៃកសិឧស្សាហកម្មបៃតង កម្ពុជា-ចិន ដោយផ្តោតលើវិស័យសំខាន់ៗបី រួមមាន ការកែច្នៃគ្រាប់ស្វាយចន្ទី ការកែច្នៃជ័រកៅស៊ូ និងឧស្សាហកម្មឈើដាំ ដែលទាមទារការវិនិយោគគ្របដណ្តប់លើខ្សែច្រវាក់ផលិតកម្មទាំងមូល ចាប់ពីដំណាក់កាលផលិតវត្ថុធាតុដើមរហូតដល់ដំណាក់កាលកែច្នៃ និងនាំចេញ។
ការលើកឡើងនូវគំនិតផ្តួចផ្តើមនេះ បានធ្វើឡើងនៅថ្ងៃទី៨ ខែមិថុនា ឆ្នាំ២០២៦ ក្នុងឱកាស ដែលឯកឧត្តមអនុញ្ញាតឱ្យលោកស្រី ចុង ជៀ (Zhong Jie) ទីប្រឹក្សាទទួលបន្ទុកកិច្ចការសេដ្ឋកិច្ច និងពាណិជ្ជកម្មនៃស្ថានទូតចិនប្រចាំកម្ពុជា ចូលជួបសម្តែងការគួរសម និងជម្រាបលា ព្រមទាំងណែនាំលោក សៀ តុង (Xue Dong) ដែលត្រូវមកបំពេញបេសកកម្មបន្ត។
ក្នុងជំនួបនេះ ឯកឧត្តមអគ្គលេខាធិការបានវាយតម្លៃខ្ពស់ចំពោះសមិទ្ធផលការងាររបស់លោកស្រី ចុង ជៀ និងថ្លែងអំណរគុណចំពោះកិច្ចសហប្រតិបត្តិការដ៏ល្អប្រសើរក្នុងការជំរុញ និងទាក់ទាញវិនិយោគិនចិនឱ្យមកបណ្តាក់ទុននៅកម្ពុជា។
ជាមួយគ្នានេះដែរ ឯកឧត្តមក៏បានអបអរសាទរចំពោះលោក សៀ តុង ដែលត្រូវបានតែងតាំងជាទីប្រឹក្សាទទួលបន្ទុកកិច្ចការសេដ្ឋកិច្ច និងពាណិជ្ជកម្មនៃស្ថានទូតចិនប្រចាំកម្ពុជា និងបានបង្ហាញក្តីសង្ឃឹមថា ភាគីទាំងពីរនឹងបន្តពង្រឹងកិច្ចសហប្រតិបត្តិការដើម្បីជំរុញសកម្មភាពធុរកិច្ច និងការវិនិយោគរវាងកម្ពុជា និងចិន ឱ្យកាន់តែរីកចម្រើនថែមទៀត។
ឯកឧត្តម ជា វុទ្ធី ក៏បានស្នើឱ្យលោក សៀ តុង ជួយជំរុញ និងទាក់ទាញឧស្សាហកម្មខ្សែទឹកខាងលើ (Upstream Industries) ដែលបម្រើដល់ខ្សែច្រវាក់ផ្គត់ផ្គង់សម្រាប់វិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរមកវិនិយោគនៅកម្ពុជា ដើម្បីពង្រឹងខ្សែច្រវាក់ផ្គត់ផ្គង់ក្នុងស្រុក និងបង្កើនតម្លៃបន្ថែមដល់វិស័យឧស្សាហកម្មរបស់កម្ពុជា។
ជាការឆ្លើយតប លោក សៀ តុង បានថ្លែងអំណរគុណដល់ឯកឧត្តមអគ្គលេខាធិការចំពោះការទទួលជួប និងការផ្លាស់ប្តូរយោបល់ដ៏មានតម្លៃ។ លោកបានបញ្ជាក់ថា នឹងបន្តពង្រឹងកិច្ចសហប្រតិបត្តិការទ្វេភាគីរវាងប្រទេសទាំងពីរ និងទទួលយកគំនិតផ្តួចផ្តើម ក៏ដូចជាសំណូមពរនានារបស់ភាគីកម្ពុជា ដើម្បីពិនិត្យ និងជំរុញការអនុវត្តក្នុងអំឡុងពេលបំពេញបេសកកម្មការងាររបស់លោកនៅកម្ពុជា។
ជុំវិញគំនិតផ្តួចផ្តើមនេះដែរ លោក អួន ស៊ីឡុត ប្រធានសមាគមស្វាយចន្ទីកម្ពុជា បានសម្តែងការស្វាគមន៍ និងគាំទ្រចំពោះការផ្តួចផ្តើមបង្កើតតំបន់កែច្នៃកសិឧស្សាហកម្មបៃតង កម្ពុជា-ចិន ដែលផ្តោតលើការកែច្នៃគ្រាប់ស្វាយចន្ទី ការកែច្នៃជ័រកៅស៊ូ និងឧស្សាហកម្មដាំឈើនៅកម្ពុជា។
លោកបានបញ្ជាក់ថា ប្រទេសចិន គឺជាទីផ្សារដ៏ធំមួយសម្រាប់ផលិតផលស្វាយចន្ទី និងជាប្រទេសដែលមានតម្រូវការនាំចូលគ្រាប់ស្វាយចន្ទីក្នុងបរិមាណខ្ពស់បំផុតមួយនៅលើពិភពលោក។ ដូច្នេះ ការទាក់ទាញវិនិយោគិនចិនឱ្យមកវិនិយោគលើការកែច្នៃស្វាយចន្ទីនៅកម្ពុជា នឹងជួយបង្កើនតម្លៃបន្ថែមដល់ផលិតផលកសិកម្ម បង្កើតការងារ និងលើកកម្ពស់សមត្ថភាពប្រកួតប្រជែងរបស់វិស័យស្វាយចន្ទីកម្ពុជានៅលើទីផ្សារអន្តរជាតិ។
យោងតាមទិន្នន័យរបស់សមាគមស្វាយចន្ទីកម្ពុជា បានឱ្យដឹងថា នៅក្នុងឆ្នាំ២០២៥ កម្ពុជាបាននាំចេញគ្រាប់ស្វាយចន្ទីឆៅប្រមាណមួយលានតោន ទៅកាន់ទីផ្សារអន្តរជាតិ ក្នុងនោះក៏មានប្រទេសចិនផងដែរ ដោយទទួលបានប្រាក់ចំណូលមកវិញប្រមាណ១,៥ពាន់លានដុល្លារ គឺកើនឡើង២៧ភាគរយ ធៀបរយៈពេលដូចគ្នាឆ្នាំ២០២៤។
ប្រទេសកម្ពុជាមានដីសមស្របអាចដាំដុះដំណាំស្វាយចន្ទី ប្រមាណជា១,២៨លានហិកតា។ ចំពោះខេត្តកំពង់ធំមានផ្ទៃដីដាំដុះច្រើនជាងគេ គឺប្រមាណជាង១៤ម៉ឺនហិកតា បន្ទាប់មកមានខេត្តក្រចេះ ប្រមាណជាង១០ម៉ឺនហិកតា និងខេត្តរតនគិរីប្រមាណជា៩,៧ម៉ឺនហិកតា៕
