ដោយ នៅ ស៊ីវុត្ថា
ភ្នំពេញ៖ រដ្ឋបាលខេត្តត្បូងឃ្មុំ បានត្រៀមផ្លែទុរេនជាង១២តោន សម្រាប់ទទួលស្វាគមន៍ប្រជាពលរដ្ឋមកពីគ្រប់មជ្ឈដ្ឋានចូលរួមនៅក្នុងព្រឹត្តិការណ៍ “ពិព័រណ៍ទុរេន ខេត្តត្បូងឃ្មុំ ឆ្នាំ២០២៦” នៅថ្ងៃទី១២ ខែមិថុនា ឆ្នាំ២០២៦ ខាងមុខនេះ នៅតំបន់ទន្លេសិប្បនិម្មិត “ខ្ញុំស្រឡាញ់ខេត្តត្បូងឃ្មុំ” ស្ថិតនៅឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ។
លោក ឈិន ចាន់ទី នាយករងទីចាត់ការរដ្ឋបាលខេត្តត្បូងឃ្មុំ បានប្រាប់ទូរទស្សន៍អនឡាញ ARDB ថា ការត្រៀមផ្លែទុរេនជាង១២តោននេះ ព្រោះតាមរយៈតួលេខរដ្ឋបាលខេត្តទទួលបាន អាចមានប្រជាពលរដ្ឋជាច្រើន ចង់មកលេងកម្សាន្ត និងភ្លក្សរសជាតិផ្លែទុរេនដែលដាំដុះក្នុងទឹកដីខេត្តត្បូងឃ្មុំ។
ជាមួយគ្នានេះ លោកបានពន្យល់ពីមូលហេតុ ដែលខេត្តរៀបចំ “ពិព័រណ៍ទុរេន ខេត្តត្បូងឃ្មុំ ឆ្នាំ២០២៦” នេះ ជាលើកទី១ ក្នុងគោលបំណងរំលឹកខួបលើកទី១២ឆ្នាំ នៃការបង្កើតរដ្ឋបាលខេត្តត្បូងឃ្មុំ, ការតស៊ូរបស់សម្តេចតេជោក្នុងការផ្តួលរំលំរបបប្រល័យពូជសាសន៍ ប៉ុល ពត រំលឹកខួបទី៤៩ ថ្ងៃទី២០ ខែមិថុនា ឆ្នាំ២០២៦ និងការជួយជំរុញផលិតផលក្នុងស្រុកឲ្យមានការរីកចម្រើនខាងលក់។
លើសពីនេះទៀត លោកថា “ពិព័រណ៍ទុរេន ខេត្តត្បូងឃ្មុំ ឆ្នាំ២០២៦” នេះ ដើម្បីជួយជំរុញទេសចរណ៍បៃតងឲ្យមានការរីកចម្រើន ព្រោះរដូវនេះជារដូវភ្លៀង និងបង្កើតកម្មវិធីណាត់អ្នកលក់ និងអ្នកទិញជួបគ្នា ក្នុងការជួយរកទីផ្សារកសិផលក្នុងស្រុកឲ្យកាន់តែរីកចម្រើន ដើម្បីជួយជំរុញការផ្សព្វផ្សាយកេរ្តិ៍ឈ្មោះទុរេន ខេត្តត្បូងឃ្មុំ ឱ្យមានការរីកចម្រើនព្រមទាំងទាក់ទាញភ្ញៀវទេសចរណ៍ចូលមកលេងកម្សាន្តខេត្តត្បូងឃ្មុំ ឲ្យកាន់តែច្រើនក្នុងរដូវភ្លៀង។
លោកបន្ថែមថា ខេត្តសង្ឃឹមថា នឹងមានអ្នកក្នុងខេត្ត និងក្រៅខេត្ត អញ្ជើញចូលរួមទស្សនា ទិញកសិផលរបស់ខេត្តត្បូងឃ្មុំ ឲ្យបាមនច្រើនកុះករ ចាប់ពីថ្ងៃទី ១២ ដល់ថ្ងៃទី ១៤ ខែមិថុនា ឆ្នាំ២០២៦ ខាងមុននេះ ជាពិសេសនៅថ្ងៃទី១២ ជាថ្ងៃភ្លក្សផ្លែទុរេន ចាប់ពីម៉ោង៤ល្ងាច។
បើតាមលោក ឈិន ចាន់ទី គិតត្រឹមឆ្នាំ២០២៦នេះ ខេត្តត្បូងឃ្មុំមាន ប្រជាពលរដ្ឋដាំទុរេន ៩៥៣២គ្រួសារ លើ ផ្ទៃដីដាំដុះទុរេនចំនួន៣ ០២៧ ហិកតា និង៤១៤ ០០០ ដើម ហើយស្រុកដែលដាំទុរេនច្រើនជាងគេ គឺស្រុកពញ្ញាក្រែក និងមេមត់ ប៉ុន្តែសម្រាប់ផ្ទៃដីប្រមូលផលមានត្រឹមតែ ១ ៨០០ហិកតាប៉ុណ្ណោះ ដោយក្នុងនេះ កសិករអាចប្រមូលទិន្នផលបានចំនួន ១៦,៧០តោនក្នុងមួយហិកតា។
ទាក់ទិននឹងការរៀបចំ «ពិព័រណ៍ទុរេន» នេះដែរ ខេត្តបាត់ដំបង ក៏នឹងរៀបចំពិព័រណ៍ «ទុរេន និងផ្លែឈើ» រយៈពេល ១០ថ្ងៃ ដោយគិតចាប់ពីថ្ងៃទី១០ ដល់ទី១៩ ខែកក្កដា ខាងមុខនេះ។ កម្មវិធីនេះនឹងរៀបចំឡើងនៅបរិវេណមុខសារមន្ទីរប្រវត្តិសាស្ត្រខេត្តបាត់ដំបង ក្រុងបាត់ដំបង និងមានប៊ូហ្វេទុរេនផងដែរ។ នេះជាលើកទី២ របស់ខេត្តបាត់ដំបងក្នុងការរៀបចំពិព័រណ៍ «ទុរេន» ។
ព្រឹត្តិការណ៍ទាំងពីរនេះ រៀបចំឡើងក្នុងគោលបំណងផ្ដល់ឱកាសឱ្យកសិករដាំបន្លែផ្លែឈើ និងដំណាំផ្សេងៗបានយកមកដាក់តាំងលក់ ដើម្បីរួមគ្នាលើកកម្ពស់ផលិតផលក្នុងស្រុក។ ទាំងរដ្ឋបាលខេត្តបាត់ដំបង និងរដ្ឋបាលខេត្តត្បូងឃ្មុំ បានអំពាវនាវឱ្យសាធារណជនចូលរួមទិញ និងភ្លក្សរសជាតិទុរេន បន្លែ រួមទាំងផ្លែឈើផ្សេងទៀតឱ្យបានកុះករ ដើម្បីរួមគ្នាលើកកម្ពស់ផលិតផលក្នុងស្រុក។
សូមរំលឹកថា «ព្រឹត្តិការណ៍ផ្លែឈើបាត់ដំបង» ឆ្នាំ២០២៥ លក់ផ្លែឈើបានសរុបចំនួន៥៤,៥តោន ក្នុងរយៈពេលប្រាំពីរថ្ងៃនៃការរៀបចំព្រឹត្តិការណ៍នេះ ដោយផ្លែទុរេន លក់បានចំនួន៤៥តោន ចំណែកផ្លែឈើចម្រុះផ្សេងទៀត រួមមាន សាវម៉ាវ មង្ឃុត និងសណ្តែកដី លក់បានចំនួន៩,៥តោន។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា បច្ចុប្បន្ន ប្រទេសកម្ពុជាមានផ្ទៃដីដាំដុះដំណាំទុរេនប្រមាណ១១ ០០០ហិកតា។ ក្នុងនោះផ្ទៃដីប្រមូលផលមានជាង៧ ០០០ហិកតា ដែលអាចផ្តល់ទិន្នផល ជាង១២០ ០០០តោនក្នុងមួយឆ្នាំ៕
