កៀវ៖ ប្រទេសអ៊ុយក្រែនបន្តកែលម្អវិស័យកសិកម្មរបស់ខ្លួនឱ្យស្របទៅតាមស្តង់ដារសហភាពអឺរ៉ុប ក្នុងគោលបំណងរក្សាភាពប្រកួតប្រជែងរបស់អ្នកផលិតក្នុងស្រុក។ ទន្ទឹមនឹងនេះ ការអនុលោមតាមតម្រូវការរបស់សហភាពអឺរ៉ុប ក៏កំពុងតែគាំទ្រដល់ការនាំចេញផលិតផលកសិកម្មអ៊ុយក្រែន ទៅកាន់ទីផ្សារថ្មីៗថែមទៀត។
លោក ថារ៉ាស់ វីស៊ុតស្គី (Taras Vysotsky) អនុរដ្ឋមន្ត្រីក្រសួងសេដ្ឋកិច្ច បរិស្ថាន និងកសិកម្ម អ៊ុយក្រែន បានមានប្រសាសន៍ថា ប្រទេសអ៊ុយក្រែនបានបញ្ចប់ដំណើរការត្រួតពិនិត្យ ឆ្នាំ២០២៥ នៃការចរចាស្តីពីសុវត្ថិភាពចំណីអាហារ គោលនយោបាយបសុព្យាបាល និងភូតគាមអនាម័យ។ ដំណើរការនេះរួមមានការពិនិត្យឡើងវិញនូវការណែនាំ និងបទប្បញ្ញត្តិរបស់សហភាពអឺរ៉ុប ដែលត្រូវអនុវត្តតាមក្នុងពេលអនាគត។
យោងតាមលោកអនុរដ្ឋមន្ត្រី ក្រុមហ៊ុនផលិតរបស់អ៊ុយក្រែនមួយចំនួនធំ បានអនុវត្តស្របតាមស្តង់ដារសហភាពអឺរ៉ុបរួចហើយ។ ជាងពាក់កណ្តាលនៃទំនិញនាំចេញរបស់អុយក្រែន គឺផលិតផលកសិកម្ម ចំណែកបណ្តាប្រទេសសហភាពអឺរ៉ុប នៅតែជាទីផ្សារគោលដៅដ៏សំខាន់សម្រាប់អុយក្រែន។
ប្រទេសអ៊ុយក្រែនក៏កំពុងរៀបចំអ្នកផលិត ឱ្យស្របតាមលក្ខខណ្ឌតម្រូវរបស់សហភាពអឺរ៉ុប
ដែលទើបតែធ្វើបច្ចុប្បន្នភាពទាក់ទងនឹងការប្រើប្រាស់ផលិតផលការពាររុក្ខជាតិ។ ការអនុវត្តតាមស្តង់ដារថ្មី ត្រូវគេរំពឹងថា នឹងចាប់ផ្តើមបន្តិចម្តងៗ ក្នុងដំណាក់កាលអន្តរកាលរហូតដល់ចុងឆ្នាំ២០២៨ ក្រោមកិច្ចព្រមព្រៀងសមាគម ដែលទើបតែកែសម្រួលឡើងវិញ។
សមាគមឧស្សាហកម្មអុយក្រែន បានប៉ាន់ប្រមាណថា ផ្ទៃដីកសិកម្មប្រហែល១០លានហិកតា អាចរងផលប៉ះពាល់ពីការរឹតបន្តឹងច្បាប់ ស្តីពីថ្នាំសម្លាប់សត្វល្អិត។ ដូច្នេះក្នុងរយៈពេលបណ្ដោះអាសន្ន គឺជាបញ្ហាសំខាន់នៅក្នុងដំណើរការចរចា។
ស្របពេលជាមួយគ្នានេះដែរ អ៊ុយក្រែន កំពុងពង្រីទីផ្សារនាំចេញបន្ថែមទៀតសម្រាប់ផលិតផលកសិកម្ម រួមមានប្រទេសជប៉ុន អារ៉ាប៊ីសាអូឌីត កូរ៉េខាងត្បូង សហរដ្ឋអាម៉េរិក និងប្រទេសវៀតណាម។ កិច្ចខិតខំប្រឹងប្រែងកំពុងផ្តោតសំខាន់លើលក្ខខណ្ឌតម្រូវការផ្នែកបសុព្យាបាល និងអនាម័យ ព្រមទាំងទាមទារឱ្យតាមសវនកម្មអន្តរជាតិ ដែលជាលក្ខខណ្ឌតម្រូវសម្រាប់ការនាំចេញទៅកាន់ទីផ្សារ។
ក្រសួងសេដ្ឋកិច្ច បរិស្ថាន និងកសិកម្ម អ៊ុយក្រែន ក៏បានរាយការណ៍ពីជំនួយឥតសំណងរបស់រដ្ឋជាបន្តបន្ទាប់ សម្រាប់គាំទ្រគម្រោងសាកវប្បកម្ម ផលិតកម្មផ្លែប៊ឺរី ការដាំដុះទំពាំងបាយជូរ និងគម្រោងសាងសង់ផ្ទះកញ្ចក់។ ចាប់តាំងពីដើមឆ្នាំ២០២៦រហូតមក ក្រុមហ៊ុនចំនួន២០បានទទួលជំនួយឥតសំណងជាទឹកប្រាក់ចំនួន២លានអឺរ៉ូ។ ក្នុងចំណោមទឹកប្រាក់សរុបនេះ អាជីវកម្មចំនួន១២ បានទទួលជំនួយឥតសំណងចំនួន១,២លានអឺរ៉ូ សម្រាប់គម្រោងសាកវប្បកម្ម ការដាំដុះផ្លែប៊ឺរី និងដំណាំទំពាំងបាយជូរ ខណៈពេលប្រតិបត្តិករផ្ទះកញ្ចក់ចំនួន៨ បានទទួលថវិកាចំនួន៩៨៥ ០០០អឺរ៉ូ។
ចាប់តាំងពីការចាប់ផ្តើមកម្មវិធីជំនួយឥតសំណងមក រដ្ឋាភិបាលអុយក្រែនបានបែងចែកថវិកាចំនួន៣៦,២លានអឺរ៉ូ ដល់អាជីវកម្មចំនួន៣៦១។ ក្នុងចំណោមទឹកប្រាក់នេះ បញ្ជូនទៅសហគ្រាសសាកវប្បកម្មផ្លែប៊ឺរី និងទំពាំងបាយជូរចំនួន២៥៨ ទទួលបានថវិកាចំនួន២៥,៣លានអឺរ៉ូ ស្របពេលគម្រោងផ្ទះកញ្ចក់ ទទួលបានថវិកាចំនួន១១,៦លានអឺរ៉ូ សម្រាប់អាជីវកម្មចំនួន១០២៕ (ញឹក សំអូន)
