អ៊ីស្លាម៉ាបាដ៖ រដ្ឋមន្ត្រីក្រសួងកិច្ចការសមុទ្រប៉ាគីស្ថាន កាលពីចុងសប្តាហ៍នេះ បានប្រកាសថា ការនាំចេញផលនេសាទ និងផលិតផលជលផលរបស់ប្រទេសប៉ាគីស្ថាន បានកើនឡើងលើសពី៥០០លានដុល្លារ ដែលនេះជាសមិទ្ធិផលដ៏សំខាន់សម្រាប់វិស័យសមុទ្រ និងសេដ្ឋកិច្ចបៃតង។
លោករដ្ឋមន្ត្រីបានមានប្រសាសន៍ថា គោលដៅសម្រេចបានទឹកប្រាក់ចំនួន៥០០លានដុល្លាររបស់រដ្ឋាភិបាលសម្រាប់ឆ្នាំមុន និងពន្ធបច្ចុប្បន្នត្រូវបានឈានដល់រយៈពេល៤៦ថ្ងៃ មុនដំណាច់ឆ្នាំ។
លោករដ្ឋមន្ត្រីបានចាត់ទុកថា ចំណុចសំខាន់នេះ គឺដោយសារការកែទម្រង់របស់រដ្ឋាភិបាល និងការកែលម្អការសម្របសម្រួល និងការពង្រីកទីផ្សារថ្មីៗ ក្នុងគោលបំណងពង្រឹងសេដ្ឋកិច្ចដែនសមុទ្រ និងជំរុញសក្តានុពលនៃនាំចេញ។
លោកក៏បានកោតសរសើរចំពោះកិច្ចខិតខំប្រឹងប្រែងសម្របសម្រួលដោយក្រសួងកិច្ចការសមុទ្រ នាយកដ្ឋានជលផលសមុទ្រ និងភាគីពាក់ព័ន្ធផ្សេងទៀត ដើម្បីលើកកម្ពស់ស្តង់ដារគុណភាព ធ្វើទំនើបកម្មវិស័យជលផល និងកែលម្អលទ្ធភាពក្នុងការនាំចេញទៅកាន់ទីផ្សារអន្តរជាតិ។ លោកក៏បានកោតសរសើរដល់ក្រុមប្រឹក្សាជលផលសមុទ្រ និងក្រុមការងាររបស់លោក ដែលបានខិតខំប្រឹងប្រែងសម្រេចគោលដៅបានមុនកាលកំណត់។
ដោយលើកឡើងពីការកើនឡើងនាពេលថ្មីៗនេះ លោករដ្ឋមន្ត្រីបាននិយាយថា ត្រី និងអាហារសមុទ្រប៉ាគីស្ថានទទួលបាននូវការយល់ព្រមជាលើកដំបូងដើម្បីធ្វើការនាំចូលទៅក្នុងទីផ្សាររបស់ប្រទេសរុស្ស៊ី។ រហូតមកដល់ពេលនេះក្រុមហ៊ុនចំនួន១៦របស់ប៉ាគីស្ថានត្រូវបានអនុញ្ញាតឱ្យនាំចេញអាហារគ្រឿងសមុទ្រទៅកាន់ទីផ្សារនៃប្រទេសរុស្ស៊ី។ លោកក៏បាននិយាយទៀតថា ការនាំចូលទៅកាន់ទីផ្សារនៃប្រទេសរុស្ស៊ីនេះ អាចជាការត្រួសត្រាយផ្លូវសម្រាប់នាំចេញទៅកាន់ទីផ្សារសហភាពសេដ្ឋកិច្ចអឺរ៉ាស៊ីផ្សេងទៀតផងដែរ។
បានប៉ាន់ប្រមាណថា ការនាំចេញអាហារសមុទ្រប្រចាំឆ្នាំនេះ អាចកើនឡើងរហូតដល់៨០០លានដុល្លារ ដោយគ្រាន់តែការនាំចេញដំបូងទៅកាន់ប្រទេសរុស្ស៊ី ត្រូវបានគេព្យាករណ៍ថា នឹងនាំមកនូវប្រាក់ចំណូលប្រហែលជាង៣០០លានដុល្លារ។ដោយសំដៅលើលទ្ធផលនៃវិស័យជលផល លោករដ្ឋមន្ត្រីបានឱ្យដឹងថា វិស័យជលផលសមុទ្របានបង្ហាញពីកំណើនដ៏រឹងមាំ នៅក្នុងឆមាសទី១ នៃឆ្នាំសារពើពន្ធ២០២៥-២០២៦ ដោយការនាំចេញបានកើនឡើងដល់ជាង១២២ ៦២៩តោន ដែលមានតម្លៃជាង២៥លានដុល្លារ នៅចន្លោះខែកក្កដា និងខែធ្នូ ឆ្នាំ២០២៥។ ក្នុងខែដដែលកាលពីឆ្នាំមុន ការនាំចេញមានចំនួន ១០២ ៩៤២តោន ដែលមានតម្លៃជាង២០៨លានដុល្លារ។ ត្រីក្លាស្សេនៅតែជាប្រភេទត្រីនាំចេញធំជាងគេ ដោយមានការនាំចេញចំនួន២៦ ៦៦៩តោន ដែលមានតម្លៃ៥៣ ៣៣លានដុល្លារ។ បង្គាមានតម្លៃជាង៤០លានដុល្លារ និងម៉ឹកក្លាស្សេ មានតម្លៃ៣៦លានដុល្លារ។
ប្រទេសចិននៅតែជាទីផ្សារអាហារសមុទ្រធំជាងគេ ដោយបាននាំចូលជាង៨៣ ៦០២តោន ដែលមានតម្លៃ១៤៩លានដុល្លារ ឬជិត៥៩ភាគរយ នៃការនាំចេញអាហារសមុទ្រ។ ការនាំចេញទៅកាន់សហភាពអារ៉ាប់រួម ម៉ាឡេស៊ី និងជប៉ុន ក៏បានកើនឡើងផងដែរ ខណៈពេលកិច្ចខិតខំប្រឹងប្រែងធ្វើពិពិធកម្មបានពង្រីកឲ្យមានការនាំចេញទៅកាន់សហភាពអឺរ៉ុប អារ៉ាប៊ីសាអូឌីត វៀតណាម គុយវ៉ែត និងសហរដ្ឋអាមេរិក។ សន្ទុះនៃការនាំចេញប្រចាំខែមានចំនួន៥៦លានដុល្លារ ក្នុងខែវិច្ឆិកា និង៥៥លានដុល្លារក្នុងខែធ្នូ។ ប្រាក់ចំណូលមិនមែនជាពន្ធពីវិស័យជលផលបានកើនឡើងដល់១២៧លានដុល្លារ ដោយគិតពីឆ្នាំមុនបានត្រឹមតែ១១៨លានដុល្លា។
ការប្រកាសពីផែនការហេដ្ឋារចនាសម្ព័ន្ធដ៏ធំមួយរបស់លោករដ្ឋមន្ត្រី បាននិយាយថា រដ្ឋាភិបាលនឹងបង្កើតតំបន់កែច្នៃនិងនាំចេញអាហារសមុទ្រលើផ្ទៃដីទំហំ១០០ហិកតា ស្ថិតនៅក្នុងកំពង់ផែជលផល ដើម្បីលើកកម្ពស់ដល់សេដ្ឋកិច្ចបៃតង និងពង្រីកតួនាទីរបស់ខ្លួនក្នុងពាណិជ្ជកម្មអាហារសមុទ្រពិភពលោក។ តាមការប៉ាន់ប្រមាណគម្រោងនេះនឹងមានទឹកប្រាក់ចំនួន៦០ ទៅ៨០លានដុល្លារ សម្រាប់ការកែច្នៃខ្នាតមធ្យម និងខ្នាតធំសម្រាប់ត្រី និងបង្គា រួមជាមួយនឹងតម្លៃបន្ថែម និងកន្លែងវេចខ្ចប់សម្រាប់ការនាំចេញ។
លោកបានបន្ថែមទៀតថា តំបន់នេះនឹងរួមបញ្ចូលជាមួយនឹងការផ្ទុកនៅក្នុងកន្លែងត្រជាក់ ដែលមានសីតុណ្ហភាពចាប់ពី -១៨ដល់ -៤០អង្សាសេ នៅក្នុងរោងចក្រ និងស្ថានីយ៍បង្កក ដែលមានសមត្ថភាពក្នុងការផលិតពី៥០ ទៅ១០០តោនក្នុងមួយថ្ងៃ៕
