មជ្ឈមណ្ឌលអភិវឌ្ឍន៍ដំណាំខ្ពង់រាបនឹងក្លាយជាកន្លែងស្រាវជ្រាវដ៏សំខាន់ទៅលើពូជដំណាំក្នុងស្រុក
ខេត្តមណ្ឌលគិរី៖ លោក សុង ឃាង ប្រធានមន្ទីរកសិកម្ម រុក្ខាប្រមាញ់និងនេសាទខេត្តមណ្ឌលគិរីបានឱ្យដឹងថាមជ្ឈមណ្ឌលអភិវឌ្ឍន៍ដំណាំតំបន់ខ្ពង់រាបស្ថិតនៅក្នុងភូមិអូរស្ពានសង្កាត់ស្ពានមានជ័យក្រុងសែនមនោរម្យខេត្តមណ្ឌលគិរីនឹងក្លាយជាកន្លែងស្រាវជ្រាវសំខាន់មួយលើពូជដំណាំប្រចាំខេត្តមណ្ឌលគិរី ក៏ដូចជានៅកម្ពុជា។ លោកបន្តថា គម្រោងសាងសង់មជ្ឈមណ្ឌលអភិវឌ្ឍន៍ដំណាំខ្ពង់រាបនេះមានគោលបំណងធំៗចំនួន២៖ទី១)-សម្រាប់បណ្តុះបណ្តាលបច្ចេកទេសទំនើប ការដាំដុះបន្លែដល់កសិករ។ទី២)-ការផលិតពូជដំណាំ, ការពិសោធន៍ពូជដំឡូងបាំងសម្រាប់កម្ពុជា ដែលកន្លងមកក្រសួងកសិកម្មបានប្រកាសថា ប្រទេសកម្ពុជាអាចដាំដំឡូងបារាំងបាន នៅក្នុងខេត្តមណ្ឌលគិរី ប៉ុន្តែនៅជួបបញ្ហាក្នុងការរកពូជដំឡូងបារាំងនេះ។ បើតាមប្រធានមន្ទីរកសិកម្មខេត្តមណ្ឌលគិរី បច្ចុប្បន្ននៅក្នុងមជ្ឈមណ្ឌលអភិវឌ្ឍន៍ដំណាំខ្ពង់រាប បានសាកល្បងពិសោធន៍លើការដាំដុះបន្លែនៅលើដីខ្សាច់ និងនៅលើស្រកីដូងទទួលបានជោគជ័យ។ លោក សុង ឃាង បានគូសបញ្ជាក់ថា “មជ្ឈមណ្ឌលអភិវឌ្ឍន៍ដំំណាំខ្ពស់រាបនេះ មានសារសំខាន់ណាស់។ វាជាកន្លែងសិក្សាស្រាវជ្រាវទៅលើពូជដំណាំ ដោយសារនៅក្នុងមជ្ឈមណ្ឌលនេះ បានបំពាក់នូវសម្ភារៈបច្ចេកទេសធ្វើពិសោធន៍ល្អៗ សម្រាប់ពិសោធន៍លើជាលិកា ឬហៅថា បង្កាត់ពូជដោយការដាំដុះដោយជាលិកា។លើសពីនេះមជ្ឈមណ្ឌល មានកន្លែងសិក្សាដាំពីជាលិកាទៅលើការដាំនៅលើទឹក ឬហៅថា Hydrophonicនិងការដាំនៅក្នុងផ្ទះសំណាញ់”។ ទាក់ទងគម្រោងខាងលើ នៅថ្ងៃខាងមុខប្រទេសកម្ពុជាពុំចាំបាច់នាំចូលពូជដំឡូងបារាំងមកពីប្រទេសជិតខាងទៀតនោះឡើយ ពោលកម្ពុជាមានពូជដំឡូងបារាំងខ្លួនឯងហើយ បន្ទាប់ពីចំណាយពេលពិសោធន៍អស់រយៈពេល៣ឆ្នាំកន្លងមកនេះ។ លោក ភិន ផន កសិករទទួលបានការបណ្តុះបណ្តាលពីច្ចេកទេសដាំបន្លែពីមជ្ឈមណ្ឌលអភិវឌ្ឍន៍ដំណាំខ្ពង់រាប បានអះអាងថា លោកទទួលបានចំណេះជំនាញបានច្រើនទៅលើការសាកល្បងដាំស្ពៃក្តោប និងស្ពៃបូកគោនៅលើដីខ្សាច់ និងដាំនៅលើស្រកីដូង តាមរយៈអ្នកជំនាញប្រចាំនៅមជ្ឈមណ្ឌល។ លោក ភិន ផន យល់ឃើញថា ការបង្កើតនៅមជ្ឈមណ្ឌលអភិវឌ្ឍន៍ដំណាំខ្ពង់រាប នេះឡើងវាបានចូលរួមចំណែកជួយដល់កសិករដែលប្រកបមុខរបរដាំបន្លែបានច្រើន ទាក់ទងបច្ចេកទេសដាំដុះបន្លែ ហើយបើសិននៅក្នុងតំបន់មានមជ្ឈមណ្ឌលបែបនេះច្រើនកន្លែង […]
