គូឡាឡាំពួរ៖ «ស្តេចផ្លែឈើ» ជាពូជផ្លែទុរេនដ៏ជាទីស្រលាញ់ពេញចិត្តរបស់ប្រទេសម៉ាឡេស៊ី អាចទទួលបានងារជាស្តេចផ្លែទុរេន ក្នុងពេលឆាប់ៗនេះ ស្របពេលសមាគមអ្នកផលិតផ្លែទុរេន កំពុងតែជំរុញឱ្យរដ្ឋាភិបាលរបស់ខ្លួន ឱ្យដាក់ឈ្មោះជាផ្លូវការថា ជាផ្លែឈើរបស់ប្រទេស និងប្រកាសយករៀងរាល់ថ្ងៃទី៧ ខែកក្កដា ជាទិវាផ្លែទុរេនជាតិ។
សារព័ត៌មានរបស់ម៉ាឡេស៊ី បានរាយការណ៍ដោយដកស្រង់សម្តីប្រធានសមាគមអ្នកផលិតផ្លែទុរេនដែលបាននិយាយថា «ផ្លែទុរេនមិនមែនគ្រាន់តែជាផ្លែឈើមួយប្រភេទនោះទេ។ វាជាផ្នែកមួយនៃអត្តសញ្ញាណជាតិរបស់យើង។ ជនជាតិម៉ាឡេស៊ីគ្រប់រូប មិនថាមានប្រវត្តិបែបណាក៏ដោយ មានរឿងរ៉ាវពាក់ព័ន្ធឹងផ្លែទុរេន ការចងចាំ និងជាប្រពៃណី។ វាជារឿងមួយដែលបង្រួបបង្រួមយើងទាំងអស់គ្នា»។
បើគិតចាប់ពីតូបលក់ដូរតាមដងផ្លូវរហូតដល់ខ្ចប់ក្នុងប្រអប់សម្រាប់នាំចេញ ផ្លែទុរេនដ៏ល្បីល្បាញរបស់ប្រទេសម៉ាឡេស៊ី ជាពិសេស ពូជមូសាង ឃីង (Musang King) និងពូជប្លែកថន (Black Thorn) ទទួលបានកិត្តិនាមល្បីល្បាញទូទាំងពិភពលោក។ ការផ្តល់ឋានៈដល់ផ្លែទុរេននេះ គឺជាការចុះបញ្ជីបញ្ជាក់ពូជដំណាំសម្គាល់ភូមិសាស្ត្រ (Geographic Indicator) នៃទុរេនពូជមូសាង ឃីង ដែលត្រូវមានសុពលភាពរហូតដល់ខែមីនា ឆ្នាំ២០៣៤ បានបញ្ជាក់ជាថ្មីនូវភាពត្រឹមត្រូវរបស់វាថា ជាផលិតផលដ៏មានមោទនភាពរបស់ម៉ាឡេស៊ី។
លោកប្រធានសមាគម បាននិយាយថា «ការចុះបញ្ជីជាដំណាំសម្គាល់ភូមិសាស្ត្រ គឺប្រៀបដូចជាត្រានៅលើលិខិតឆ្លងដែនសម្រាប់ផ្លែទុរេន ពូជមូសាង ឃីង។ ការចុះបញ្ជីនេះបង្ហាញថា វាពិតជាផលិតផលផ្លែឈើរបស់ម៉ាឡេស៊ី។ វាជាផ្លែឈើ ដែលយើងទាំងអស់គ្នា អាចមានមោទនភាព ហើយវាបង្ហាញថា កសិករ និងអ្នកផលិតរបស់យើង បានបង្កើតម៉ាកយីហោជាសកលដោយមានប្រភពពីក្នុងប្រទេសម៉ាឡេស៊ី»។
លោកបានបន្ថែមថា ឧស្សាហកម្មទុរេន បានរួមចំណែករកប្រាក់ចំណូរាប់លានដុល្លារ ដល់ការនាំចេញផលិតផលកសិកម្មរបស់ប្រទេសម៉ាឡេស៊ី និងជួយបង្កើនកម្រិតជីវភាពដល់កសិករ និងអ្នកដាំដំណាំខ្នាតតូចរាប់ពាន់នាក់។
លោកបានមានប្រសាសន៍ថា ការទទួលស្គាល់ផ្លែទុរេនជាផ្លែឈើរបស់ជាតិ អាចជួយលើកកម្ពស់ដល់ការច្នៃប្រឌិត ការស្រាវជ្រាវ និងវិស័យកសិទេសចរណ៍ ជាពិសេសក្នុងអំឡុងពេលរដូវបុណ្យជាតិ។
លោកប្រធានសមាគម បានមានប្រសាសន៍ ដោយស្រមៃដល់ការប្រារព្ធពិធីបុណ្យជាតិ ដែលមានការទស្សនាកសិដ្ឋាន ការតាំងពិព័រណ៍ និងពិធីបុណ្យនានា ត្រូវរៀបចំនៅថ្ងៃទី៧ ខែកក្កដា រៀងរាល់ឆ្នាំដើម្បីអបអរសាទរដល់ផ្លែទុរេន។
លោកបានមានប្រសាសន៍ដោយមោទនភាពថា «នេះមិនមែនគ្រាន់តែជាផ្លែឈើទេ។ វាជាមោទនភាពជាតិ និងចំណង់ចំណូលចិត្ត»។
អគ្គនាយកនៃនាយកដ្ឋានកសិកម្មម៉ាឡេស៊ី បានបញ្ជាក់ថា ក្រសួងបានទទួលសំណើសុំចុះបញ្ជីផ្លែទុរេនសម្គាល់ភូមិសាស្ត្ររួចហើយ ដោយលោកកំពុងតែពិនិត្យដោយយកចិត្តទុកដាក់បំផុត។
លោកស្រីអគ្គនាយក បានពន្យល់ថា «កត្តាសំខាន់ៗមួយចំនួ ដូចជាផលប៉ះពាល់ផ្នែកសេដ្ឋកិច្ចសង្គម តម្លៃនាំចេញ បេតិកភណ្ឌវប្បធម៌ ការទទួលយកពីសាធារណជន និងសារៈសំខាន់នៃផ្លែឈើចំពោះឧស្សាហកម្មកសិកម្មជាតិ នឹងត្រូវយកមកពិចារណា»។
លោកស្រីបានសង្កត់ធ្ងន់ថា មិនទាន់មានការសម្រេចចិត្តណាមួយនៅឡើយទេ។ លោកស្រីបានមានប្រសាសន៍ថា «ប្រសិនបើសំណើនេះត្រូវបានគាំទ្រនាពេលអនាគត ការប្រកាសណាមួយនឹងត្រូវធ្វើឡើងដោយក្រសួង បន្ទាប់ពីទទួលបានការអនុម័តយល់ព្រមជាផ្លូវការពីរដ្ឋាភិបាលម៉ាឡេស៊ី»៕
