វ៉ាសិនតោន៖ កាលពីឆ្នាំ២០២៤ ក្រសួងកសិកម្មអាម៉េរិក បានបោះពុម្ពផ្សាយរបាយការណ៍សង្ខេបប្រចាំសប្តាហ៍អំពីការនាំចេញចុងថ្មីៗបំផុតនៃកសិផលរបស់ខ្លួនទៅកាន់ប្រទេសចិន ប៉ុន្តែ នាពេលថ្មីៗនេះ របាយការណ៍អំពីការលក់សណ្តែកសៀងទៅប្រទេសចិន លែងមានទៀតហើយ ព្រោះចិនឈប់ទិញសោះតែម្តង។
យោងតាមសារព័ត៌មាន ឌឹ ញូវយ៉ក ថែមស៍ បានឱ្យដឹងថា ប្រទេសចិនបានឈប់ទិញសណ្តែកសៀងពីអាម៉េរិក តាំងក្នុងខែឧសភា ឆ្នាំ២០២៥នេះ ដោយដាក់ពន្ធសងសឹកលើផលិតផលកសិកម្មនាំចូលពីសហរដ្ឋអាម៉េរិក បន្ទាប់ពីលោកប្រធានាធិបតី ដូណាល់ ត្រាំ បង្កើនការយកពន្ធលើទំនិញនាំចូលពីប្រទេសចិន។
សណ្តែកសៀង គឺជាផលិតផលនាំចេញដ៏ធំបំផុតតែមួយមុខគត់របស់អាម៉េរិកទៅកាន់ប្រទេសចិន ដែលមានតម្លៃជាទឹកប្រាក់ជាង១២,៦ពាន់លានដុល្លារ កាលពីឆ្នាំ២០២៤។ ប៉ុន្តែនៅពេលរដូវប្រមូលផលចូលមកដល់នៅទូទាំងសហរដ្ឋអាម៉េរិក បែរជាប្រទេសចិនធ្លាប់តែទិញយ៉ាងហោចណាស់ចំនួន៥២ភាគរយនៃទិន្នផលសណ្តែកសៀងសរុប មិនឃើញបញ្ជាទិញអ្វីទាំងអស់ សូម្បីតែសណ្តែកសៀងមួយគ្រាប់ក៏គ្មានដែរ។
គិតចាប់ថ្ងៃទី១ ខែកញ្ញា ឆ្នាំ២០២៥ ដែលជាពេលត្រូវចាប់ផ្តើមបើកទីផ្សារថ្មីសម្រាប់សណ្តែកសៀងប្រចាំឆ្នាំ ដើម្បីកសិករអាម៉េរិកអាចលក់ចេញផលិតផលសណ្តែកសៀងរបស់ពួកគាត់ ប៉ុន្តែ ផ្ទុយទៅវិញ ចិនមិនបានទិញសណ្តែកសៀងអាម៉េរិកសោះតែម្តង។
មូលហេតុបង្កឡើងដោយសារពន្ធសងសឹករបស់ចិនបានដាក់លើសហរដ្ឋអាម៉េរិក ដែលធ្វើឱ្យតម្លៃសណ្តែកសៀងអាម៉េរិក មិនមានតម្លៃសម្រាប់អ្នកទិញនៅក្នុងប្រទេសចិនឡើយ។ ពេញមួយរដូវក្តៅ កសិករអាម៉េរិក បានសង្ឃឹមថា រដ្ឋបាលរបស់លោកប្រធានាធិបតី ដូណាល់ ត្រាំ និងប្រទេសចិន អាចចរចារឈានដល់បង្កើតកិច្ចព្រមព្រៀងពាណិជ្ជកម្ម ដោយទម្លាក់អត្រាពន្ធលើដំណាំរបស់ពួកគេ ប៉ុន្តែរហូតមកដល់ពេលនេះ មិនមានការធូរស្រាលណាមួយកើតឡើងនោះទេ។
ក្រសួងកសិកម្មសហរដ្ឋអាម៉េរិក បានឱ្យដឹងថា ប្រទេសផ្សេងទៀត មានដូចជាប្រទេសអេហ្ស៊ីប កោះតៃវ៉ាន់ និងប្រទេសបង់ក្លាដែស កំពុងតែទិញសណ្តែកសៀងពីសហរដ្ឋអាម៉េរិក ប៉ុន្តែការនាំចេញសណ្តែកសៀងសរុបបានធ្លាក់ចុះ២៣ភាគរយនៅឆ្នាំ២០២៥នេះ។ ចំណេកផលវិបាកកំពុងតែកើតឡើងចំពោះកសិករអាម៉េរិក។ កាលពីចុងកញ្ញា ឆ្នាំ២០២៥នេះ រដ្ឋបាលលោក ដូណាល់ ត្រាំ បានសន្យាគាំទ្រប្រទេសអាហ្សង់ទីន ខណៈប្រទេសនេះប្រឈមមុខនឹងភាពចលាចលផ្នែកសេដ្ឋកិច្ច។ នៅថ្ងៃដដែលនោះដែរ ប្រទេសអាហ្សង់ទីនបានលើកលែងពន្ធលើការនាំចេញកសិផលសំខាន់ៗមួយចំនួន រួមទាំងសណ្តែកសៀងផងដែរ។
ក្រោយមក មិនយូរប៉ុន្មានក្រុមហ៊ុនចិន បានបញ្ជាទិញសណ្តែកសៀងអាហ្សង់ទីន ជាងមួយលានតោន ដែលធ្វើប្រទេសចិនមិនចាំបាច់ទិញនាំចូលសណ្តែកសៀងពីអាម៉េរិក។
របាយការណ៍របស់ក្រសួងកសិកម្មអាម៉េរិក បានឱ្យដឹងថា នៅ២០២៤ តម្លៃសណ្តែកសៀងរបស់ខ្លួនបានធ្លាក់ចុះមកនៅត្រឹមប្រហែល៣៦៧ដុល្លារប៉ុណ្ណោះក្នុងមួយតោន។
សណ្តែកសៀងនៅក្នុងសហរដ្ឋអាម៉េរិក នៅឆ្នាំ២០២៥នេះ លក់មិនទាន់ចេញនៅឡើយទេ ដោយសារប្រទេសចិន និងប្រទេសផ្សេងៗទៀត បានងាកទៅទិញសណ្តែកសៀងពីប្រទេសប្រេស៊ីល ដែលប្រមូលផលក្នុងខែកុម្ភៈ និងមីនា។ ជាធម្មតា ជាងពាក់កណ្តាលនៃការនាំចេញសណ្តែកសៀងរបស់អាម៉េរិក ត្រូវបានលក់នៅចន្លោះខែតុលា និងខែធ្នូ ហើយភាគច្រើនត្រូវបាននាំចេញទៅកាន់ទីផ្សារប្រទេសចិន។ ដូច្នេះ នៅឆ្នាំ២០២៥នេះ ប្រសិនបើអ្នកទិញមកពីប្រទេសចិន នៅតែមិនទាន់បញ្ជាទិញទៀត នោះកសិករដាំសណ្តែកសៀងអាម៉េរិកនឹងជួបការលំបាកជាក់ជាមិនខាន។
ការលក់មិនទាន់ចេញនូវផលិតផលសណ្តែកសៀង និងពោត ដែលនៅក្នុងរដ្ឋមួយចំនួនកំពុងបង្កើនការព្រួយបារម្ភថា នឹងមិនមានកន្លែងស្តុកទុកគ្រប់គ្រាន់សម្រាប់គ្រាប់ធញ្ញជាតិនៅពេលខាងមុខនេះទេ។ ចំណែកឈ្មួញកណ្តាលវិញ មានការភ័យខ្លាចចំពោះការប្រមូលទិញ និងរក្សាស្តុកទុកក្នុងឃ្លាំង ព្រោះមិនទាន់ច្បាស់ថា តើមានអ្នកទិញនាំចេញទៅទីផ្សារក្រៅប្រទេសដែរឬទេ នាពេលខាងមុខនេះ។
អ្នកនយោបាយមកពីរដ្ឋធ្វើកសិកម្មធំៗ របស់អាម៉េរិក ជាពិសេសសមាជិកគណៈកម្មាធិការព្រឹទ្ធសភា ស្តីពីកសិកម្ម អាហារូបត្ថម្ភ និងព្រៃឈើ បានលើកឡើងពីគ្រោះថ្នាក់ដល់កសិករអាម៉េរិក ដោយសារជម្លោះពាណិជ្ជកម្មជាមួយប្រទេសចិន ហើយបានអំពាវនាវឱ្យអ្នកចរចាប្រឹងស្វែងរកកិច្ចព្រមព្រៀងជាមួយប្រទេសចិនឡើងវិញ។
នាយកក្រុមប្រឹក្សាសេដ្ឋកិច្ចជាតិរបស់សេតវិមាន បាននិយាយកាលពីសប្តាហ៍មុនយ៉ាងដូច្នេះថា «យើងព្រួយបារម្ភយ៉ាងខ្លាំងចំពោះការពិត ដែលថាប្រទេសចិនបានបញ្ឈប់ការបញ្ជាទិញផលិតផលកសិកម្មរបស់យើង»។
នៅក្នុងសប្តាហ៍មុននោះដែរ លោកប្រធានាធិបតី ដូណាល់ ត្រាំ បាននិយាយថា លោកចង់បានប្រាក់មួយចំនួន ដែលបានប្រមូលពីពន្ធដើម្បីយកទៅជួយកសិករអាម៉េរិក។ ចំណែកលោកស្រីរដ្ឋមន្ត្រីក្រសួងកសិកម្មអាម៉េរិក បានទទួលស្គាល់ថា ការចរចាពាណិជ្ជកម្មរបស់លោក ដូណាល់ ត្រាំ គឺជារឿង «រញ៉េរញ៉ៃ និងមិនប្រាកដប្រជា និងជារឿងមិនធម្មតាក្នុងប្រវត្តិសាស្ត្រអាម៉េរិក»៕
