ដោយ ឡុង សារេត
ភ្នំពេញ៖ កញ្ញា សុខ សម្ភ័ស មានស្រុកកំណើតនៅខេត្តតាកែវ ដែលទើបបញ្ចប់ការសិក្សាថ្នាក់បរិញ្ញាបត្រលើមុខជំនាញវិទ្យាសាស្ត្រកសិកម្មជំនាន់ទី៣៦ នៃសាកលវិទ្យាល័យភូមិន្ទកសិកម្ម បានចាប់យកមុខជំនាញវិទ្យាសាស្ត្រកសិកម្ម គឺដោយសារប្រទេសកម្ពុជាពឹងផ្អែកលើវិស័យកសិកម្ម ជាពិសេសការគ្រប់គ្រងដំណាំជាចំណុចស្នូលរបស់កម្ពុជា។
បើតាមកញ្ញា សុខ សម្ភ័ស មុខជំនាញវិទ្យាសាស្ត្រកសិកម្មគឺ ផ្តោតជាសំខាន់ទៅលើដំណាំ រាប់តាំងពេលចាប់ផ្តើមដំបូងរហូតដល់ពេលប្រមូលផល ចែកចាយលក់ទៅលើទីផ្សារ។ មុខជំនាញនៅក្នុងវិស័យកសិកម្មមានច្រើន ប៉ុន្តែកញ្ញាបានជ្រើសរើសយកជំនាញវិទ្យាសាស្ត្រកសិកម្មនេះ៖ទី១) ដោយសារចំណង់ចំណូលចិត្តលើមុខជំនាញវិទ្យាសាស្ត្រកសិកម្មផ្ទាល់, និងទី២)ប្រទេសកម្ពុជាសព្វថ្ងៃពឹងផ្អែកលើវិស័យកសិកម្ម ហើយការគ្រប់គ្រងដំណាំជាចំណុចស្នូលរបស់កម្ពុជា។
តួយ៉ាងបច្ចុប្បន្នកម្ពុជាបានបង្កើតសហគមន៍ទំនើបមានច្រើន ដែលទាមទារឱ្យមានអ្នកបច្ចេកទេសគ្រប់គ្រាន់ ដើម្បីស្វែងរកទីផ្សារមួយ ដែលមានតម្លៃស្ថិរភាព និងនិរន្តរភាព។ ដូច្នេះកញ្ញាសង្ឃឹមថា និស្សិតគ្រប់រូប រួមនិងអ្នកពាក់ព័ន្ធ និងយកមុខជំនាញទៅធ្វើការចែករំលែកបទពិសោធន៍ផ្សេងៗរបស់ខ្លួនជូនប្រជាកសិករ ដើម្បីលើកកម្ពស់ការផលិតនៅតាមគ្រួសារ និងសហគមន៍ ក៏ដូចជាសម្រាប់សង្គមជាតិទាំងមូល។
កញ្ញាបានបន្តថា កាលពីមុននិស្សិតក្នុងស្រុកមួយចំនួនតែងនិយាយថា រៀនមុខជំនាញកសិកម្ម គ្មានផលប្រយោជន៍អ្វីនោះទេ ។ ប៉ុន្តែក្នុងរយៈពេលបីឆ្នាំកន្លងមកនេះ រាជរដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ បានជ្រើសរើសមន្ត្រីកសិកម្មឃុំចំនួន១០០០នាក់ ដើម្បីជួយដល់វិស័យកសិកម្ម ជាពិសេសដំណាំស្រូវ ការការពារដំណាំ ការរកទីផ្សារជូនប្រជាកសិករ ចុះធ្វើការស្ទាប់ស្ទង់ជាមួយកសិករ តាមដានគ្រប់ពេលវេលា។ ដូច្នេះឃើញថា វិស័យកសិកម្មនៅកម្ពុជាមានសន្ទុះកើនឡើងច្រើន ទាំងស្ថិរភាពតម្លៃ ការស្វែងរកទីផ្សារ និងការប្រើប្រាស់បច្ចេកទេសទំនើបៗ បាននាំទៅដល់ប្រជាកសិករ ក៏ដូចជាការបង្កើតសហគមន៍កសិកម្មទំនើប និងការបង្កើតភ្នាក់ងារគ្រប់គ្រងកត្តាសត្វចង្រៃជាដើម។
សូមជម្រាបជូនផងដែរថា កាលពីពេលកន្លងទៅថ្មីៗនេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅរយៈពេល៤០ឆ្នាំកន្លងមកនេះ គ្រឹះស្ថានឧត្តមសិក្សាកសិកម្មចំនួនបីបានរួមចំណែកកសាងធនធានមនុស្សបានប្រមាណ៣១ ៨៤១នាក់ ក្នុងនោះនារីមានចំនួន៨ ៤២២នាក់ ឬ្ស្មើនឹង ២៤ភាគរយ ដោយក្នុងនោះសាកលវិទ្យាល័យភូមិន្ទកសិកម្មមាន១៤ ៩៨១នាក់, វិទ្យាស្ថានជាតិកសិកម្មព្រែកលៀបមាន១១ ៦៥១នាក់ និងវិទ្យាស្ថានជាតិកសិកម្មកំពង់ចាមមាន៥ ២០៩នាក់។
តាមការស្ទង់មតិកន្លងមកបានឱ្យដឹងថា និស្សិតបានបញ្ចប់ការសិក្សាប្រមាណ៩៨,៨ភាគរយទទួលបានការងារធ្វើ ក្នុងនោះភាគច្រើនលើសលប់បម្រើការក្នុងវិស័យឯកជន, ៩៨៣នាក់បានប្រឡងជាប់ជាមន្រ្តីកសិកម្មឃុំ ក្នុងនោះ៧៦៣នាក់ ជាអតីតនិស្សិតសាកលវិទ្យាល័យភូមិន្ទកសិកម្ម, ១៤០នាក់ ជាអតីតនិស្សិតវិទ្យាជាតិកសិកម្មព្រែកលៀប និង៨០នាក់ទៀត ជាអតីតនិស្សិតវិទ្យាស្ថានជាតិកសិកម្មកំពង់ចាម ខណៈមួយចំនួនទៀតបានបង្កើតអាជីវកម្មដោយខ្លួនឯង៕
