ហីជីមិញ៖ នៅតាមតំបន់ដីសណ្តទន្លេមេគង្គ ដែលគេស្គាល់ថា ជាឆ្នាំងបាយរបស់វៀតណាម ព្រោះមានដំណាំផ្នែកពាណិជ្ជករច្រើននោះ ពេលនេះបាននឹងកំពុងកាត់បន្ថយការទិញស្រូវក្នុងរយៈពេលប៉ុន្មានថ្ងៃថ្មីៗកន្លងមកនេះ ដោយសារព្រួយបារម្ភពីការពិបាកនាំចេញអង្ករទៅកាន់ប្រទេសហ្វីលីពីន។
ឈ្មួញកណ្តាលវៀតណាមម្នាក់ បាននិយាយថា «ខ្ញុំគ្រាន់តែទិញស្រូវដោយប្រុងប្រយ័ត្ន ដើម្បីលក់នៅក្នុងស្រុកសិន ដោយសារការនាំចេញត្រូវបានផ្អាក ដោយរង់ចាំសញ្ញាថ្មីពីអ្នកទិញ»។
សារព័ត៌មាន វៀតណាម អេចប្រេស បានផ្សាយថា នៅក្នុងខេត្ត ដុងថាប់ ភាគខាងត្បូងវៀតណាម បណ្តារោងម៉ាស៊ីនកិនស្រូវកំពុងប្រញាប់ប្រញាល់បំពេញការបញ្ជាទិញ ដែលមានស្រាប់ដើម្បីនាំចេញអង្ករទៅកាន់ប្រទេសហ្វីលីពីន ដោយផ្តល់អាទិភាពដល់កិច្ចសន្យាចាស់ ខណៈការទិញថ្មីត្រូវបានកាត់បន្ថយយ៉ាងខ្លាំង។
តម្លៃស្រូវវៀតណាម ពូជឈ្មោះ ដៃធំ៨ (Dai Thom 8) និងពូជឈ្មោះ អូអឹន១៨ (OM18) បានធ្លាក់ចុះបួនភាគរយក្នុងប៉ុន្មានសប្តាហ៍ថ្មីៗកន្លងមកនេះ ដោយធ្លាក់មកនៅត្រឹម១ ១០០ដុង ឬស្មើនឹង០,៤២ដុល្លារប៉ុណ្ណោះ ក្នុងមួយគីឡូក្រាម។
ក្រុមហ៊ុននាំចេញអង្ករមួយ មានទីស្នាក់ការនៅខេត្ត ដុងថាប់ បាននិយាយថា ការផ្អាកការនាំចូលអង្កររយៈពេល៦០ថ្ងៃរបស់ប្រទេសហ្វីលីពីន ដែលជាទីផ្សារធំបំផុតរបស់វៀតណាម បានរំខានដល់ផែនការអាជីវកម្ម។
តំណាងក្រុមហ៊ុនម្នាក់ បាននិយាយថា ការផ្អាកនេះកើតឡើងចំពេលរដូវប្រមូលផលស្រូវខ្ពស់បំផុតរបស់វៀតណាម ដូច្នេះវាបានធ្វើឲ្យជាប់គាំងកិច្ចសន្យានាំចេញ និងធ្វើឱ្យមានការចំណាយខ្ពស់លើការទិញស្រូវមកស្តុកទុក។
ពួកគេបាននិោយាយបន្ថែមថា ការកើនឡើងសម្ពាធផ្នែកហិរញ្ញវត្ថុ រួមផ្សំដោយអត្រាការប្រាក់ខ្ពស់ក្នុងការខ្ចីប្រាក់ និងពន្ធលើតម្លៃបន្ថែមប្រាំភាគរយ ដែលត្រូវបានដាក់ចាប់កាលពីថ្ងៃទី១ ខែកក្កដា ឆ្នាំ២០២៥នេះ បានបង្កើនការភ័យខ្លាចចំពោះការខាតបង់យ៉ាងច្រើនដល់ក្រុមហ៊ុនរបស់ខ្លួន។
នាយកផ្នែកស្រូវអង្ករនៃក្រុមហ៊ុននាំចេញរបស់វៀតណាមមួយ ឈ្មោះក្រុមហ៊ុន អានជីម៉ិច (Angimex) មាននិយាយថា «តម្លៃសម្រាប់ស្រូវរដូវវស្សា និងស្រូវរដូវប្រាំងអាចធ្លាក់ចុះយ៉ាងខ្លាំង»។
លោកបានកត់សម្គាល់ថា ការស្វែងរកទីផ្សារថ្មី គឺជាបញ្ហាប្រឈម ហើយប្រទេសនាំចូលផ្សេងទៀតអាចនឹងយកឱកាសនេះកេងយកចំណេញ ដើម្បីចរចាទិញក្នុងតម្លៃទាប។
អ្នកនាំចេញអង្ករវៀតណាម បានរាយការណ៍ថា ចាប់តាំងពីឆ្នាំ២០១៩ ការទទួលបានវិញ្ញាបនបត្របញ្ជាក់ភូតគាមអនាម័យសម្រាប់នាំចូលប្រទេសហ្វីលីពីន គឺជាដំណើរការដ៏វែងមួយ ដែលរារាំងដល់កិច្ចសន្យារយៈពេលវែង។ ទោះបីជាការផ្តល់អាជ្ញាប័ណ្ណតាមអ៊ីនធឺណិត បានចាប់ផ្តើមនៅថ្ងៃទី៧ ខែកក្កដា ឆ្នាំ២០២៥នេះក៏ដោយ នៅមានឯកសារច្រើនទៀត និងការចំណាយប្រាក់បន្ថែម នឹងធ្វើ៎ឱ្យបាត់បង់ប្រាក់ចំណេញ។
ប្រធានសមាគមស្បៀងអាហារវៀតណាម បាននិយាយនៅក្នុងលិខិតមួយច្បាប់ផ្ញើទៅកាន់ក្រសួងឧស្សាហកម្ម និងពាណិជ្ជកម្មវៀតណាម ដោយលើកឡើងថា ដោយសារប្រទេសហ្វីលីពីន មានចំនួនជិត៤៥ភាគរយនៃប្រាក់ចំណូលនាំចេញអង្កររបស់វៀតណាម ការផ្អាកការនាំចូលរបស់ហ្វីលីពីន បាននាំឱ្យមានការជាប់គាំងកិច្ចសន្យា ការកើនឡើងនៃសារពើភ័ណ្ឌ ការរឹតបន្តឹងលំហូរសាច់ប្រាក់ នឹងដាក់សម្ពាធឱ្យធ្លាក់ចុះតម្លៃស្រូវវៀតណាម។
ក្រសួងឧស្សាហកម្ម និងពាណិជ្ជកម្មវៀតណាម បាននិយាយថា ទន្ទឹមនឹងការផ្អាកការនាំចូលអង្កររបស់ប្រទេសហ្វីលីពីន កិច្ចសន្យានាំចូលសម្រាប់ខែសីហាជាច្រើន ត្រូវបានពន្យារពេល ដោយសារកង្វះវិញ្ញាបនបត្របញ្ជាក់ភូតគាមអនាម័យ ដែលចេញដោយប្រទេសហ្វីលីពីន។ ការផ្អាកនាំចូលនេះ បានបង្កើនហានិភ័យលើប្រាក់ចំណូលពន្ធ តម្លៃនាំចេញធ្លាក់ចុះ អត្រាប្រាក់ចំណេញតិច និងប៉ះពាល់ផ្ទាល់ដល់ប្រាក់ចំណូលរបស់កសិករវៀតណាម។
ក្រសួងឧស្សាហកម្ម និងពាណិជ្ជកម្មវៀតណាម បានព្រមានថា កត្តាស្តុកទំនិញធំៗ និងកត្តាតម្លៃធ្លាក់ចុះ នឹងបង្កើនសម្ពាធលើឥណទានសម្រាប់អាជីវកម្ម។ ដូច្នេះ ទាមទារឱ្យក្រុមហ៊ុនរក្សាទុនបម្រុង និងរង់ចាំការស្ទុះងើបឡើងវិញនៃទីផ្សារនាំចេញ ដើម្បីជៀសវាងការលក់ទាំងភ័យស្លន់ស្លោ ខណៈពេលលើកទឹកចិត្តឱ្យមានការសម្របសម្រួលក្នុងចំណោមក្រសួង ទីភ្នាក់ងារ និងសមាគម ដើម្បីកាត់បន្ថយហានិភ័យ ព្រមទាំងពង្រីកទីផ្សារនាំចេញទៅកាន់តំបន់មជ្ឈិមបូព៌ា អាហ្វ្រិក និងអាស៊ីភាគខាងជើង។
ដោយពន្យល់ពីការសម្រេចចិត្តរបស់ខ្លួនក្នុងការបញ្ឈប់នាំចូល ប្រទេសហ្វីលីពីនបាននិយាយថា ខ្លួនមានគោលបំណងការពារផលិតកម្មក្នុងស្រុក ចំពេលតម្លៃអង្ករក្នុងប្រទេសកំពុងធ្លាក់ចុះយ៉ាងខ្លាំង។
ជាការឆ្លើយតប សមាគមស្បៀងអាហារវៀតណាម បានជំរុញឱ្យក្រសួងពាណិជ្ជកម្មវៀតណាមសហការជាមួយហ្វីលីពីន ដើម្បីបញ្ជាក់អំពីប្រភេទអង្ករ ដែលរងផលប៉ះពាល់ និងដោះស្រាយបញ្ហានីតិវិធី ដើម្បីរក្សានិរន្តរភាពពាណិជ្ជកម្ម កាត់បន្ថយការខាតបង់ និងការពារផលប្រយោជន៍របស់កសិករវៀតណាម។
ប្រទេសវៀតណាម និងហ្វីលីពីន កំពុងអនុវត្តអនុស្សរណៈកិច្ចសហប្រតិបត្តិការពាណិជ្ជកម្មអង្ករដែលបានចុះហត្ថលេខា កាលពីថ្ងៃទី៣០ ខែមករា ឆ្នាំ២០២៤ និងមានប្រសិទ្ធភាពអនុវត្តរហូតដល់ចុងឆ្នាំ ២០២៨។
ឧស្សាហកម្មស្រូវអង្ករវៀតណាម កំពុងស្វែងតែរកការគាំទ្រពីក្រសួងពាក់ព័ន្ធនានា ដើម្បីធានាបាននូវការផលិត និងការនាំចេញដោយរលូន។
ក្រសួងឧស្សាហកម្ម និងពាណិជ្ជកម្មវៀតណាម បានស្នើឱ្យនាយករដ្ឋមន្ត្រីវៀតណាម ដឹកនាំក្រសួងហិរញ្ញវត្ថុវៀតណាម ប្រឹងពន្លឿនការបង្វិលសងមកវិញនូវពន្ធលើតម្លៃបន្ថែមសម្រាប់អ្នកនាំចេញអង្ករ និងរៀបចំផែនការទិញស្រូវបម្រុងជាតិសម្រាប់ឆ្នាំ២០២៥នេះ ដើម្បីដោះស្រាយការប្រែប្រួលទីផ្សារ។
សារព័ត៌មានវៀតណាម អេចប្រេស បានបញ្ជាក់ថា ក្នុងរយៈពេលប្រាំពីរខែដំបូងនៃឆ្នាំ២០២៥នេះ ការនាំចេញអង្កររបស់វៀតណាមទៅកាន់ប្រទេសហ្វីលីពីនបានធ្លាក់ចុះចំនួន១៣,៥ភាគរយ ពីមួយឆ្នាំទៅមួយឆ្នាំ ខណៈពេលទីផ្សារផ្សេងទៀត មានការកើនឡើងដូចជា ប្រទេសហ្គាណាមានចំនួន៥៣,៥ភាគរយ ប្រទេសកូតឌីវ័រចំនួន៩៦,៦ភាគរយ ចំណែកទីផ្សារក្នុងប្រទេសបង់ក្លាដែស កើនឡើង១៨៨ដង៕
