ភ្នំពេញ៖ រោងម៉ាស៊ីនកិនស្រូវក្នុងស្រុកចំនួន ១៤ គិតចាប់តាំងពីថ្ងៃទី២០ ខែសីហានេះ បាននិងកំពុងតែសហការប្រមូលទិញស្រូវសែនក្រអូប និងស្រូវស្រងែ ស្រូវ OM 5451ពីកសិករនៅតាមបណ្តាខេត្ត ដើម្បីចូលរួមចំណែកក្នុងការដោះស្រាយបញ្ហាទីផ្សារ និងរក្សាស្ថិរភាពតម្លៃ។
រោងម៉ាស៊ីនកិនស្រូវក្នុងស្រុកចំនួន ១៤នេះ មានទីតាំងស្ថិតនៅក្នុងរាជធានីភ្នំពេញ ខេត្តព្រៃវែង កំពង់ចាម ពោធិសាត់ បាត់ដំបង និងខេត្តបន្ទាយមានជ័យ។
សកម្មភាពប្រមូលទិញស្រូវចូលប្រចាំថ្ងៃរបស់ក្រុម ស៊ីធីរ៉ាយស៍ នៅថ្ងៃទី២០ ខែសីហា ឆ្នាំ២០២៥ ដែលមានទីតាំងនៅ ស្រុកថ្មគោល ខេត្តបាត់ដំបង ប្រមាណជា៥០ឡានធំ និង៦០ឡាន ប្រចាំថ្ងៃ បើគិតជាបរិមាណប្រហែលជា២០០០តោនក្នុងមួយថ្ងៃ ។
នៅរដូវដែលកំពុងច្រូតកាត់នេះ ក្រុមហ៊ុនបានប្រមូលទិញស្រូវស្រងែ ប្រហែលជាង៣០,០០០តោន និងសែនក្រអូបប្រហែល១០,០០០តោន ហើយមានគម្រោងបន្តការប្រមូលទិញស្រូវពីប្រជាកសិករប្រមាណ៦០, ០០០តោនទៀតក្នុងរដូវនេះ ។
ក្រុមហ៊ុននឹងបន្តទិញជារៀងរាល់ថ្ងៃពីកសិករ ដូច្នេះហេីយសូមបងប្អូនកុំបង្ខំសម្រុកច្រូតច្រេីនពេកក្នុងពេលតែមួយ ជៀសវាងការសល់ស្រូវនៅវាល ព្រោះសមត្ថភាពឡរសម្ងួតរបស់ម៉ាស៊ីននីមួយៗមានកំណត់ ។
សកម្មភាពក្រុម ស៊ីធីរ៉ាយស៍ ថ្ងៃទី២០សីហា ឆ្នាំ២០២៥ កំពង់ធំ បាត់ដំបង កោះញែក មមាញឹកប្រមូលស្រូវផងដែរ។ ក្រុមហ៊ុនបៃតងកម្ពុជារបស់ឧកញ៉ា ភូ ពុយ កាលពីរសៀលថ្ងៃទី១៨ ខែសីហា ឆ្នាំ២០២៥ បានចុះប្រមូលទិញស្រូវ នៅឃុំគោកបល្ល័ង្គ។ តម្លៃថ្ងៃនេះ ស្រង៉ែ៧៦០រៀលក្នុងគឺឡូក្រាម ស្រូវសែនក្រអូបតម្លៃ១ ០០០រៀល ក្នុងមួយគឹឡូក្រាម។ ជាក់ស្តែងកាលពីថ្ងៃ២០ ខែសីហា ឆ្នាំ ២០២៥ សហគមន៏ក្រុមហ៊ុនបៃតងកម្ពុជា ប្រមូលទិញស្រូវសែនក្រអូបប្រមាណជាង៤០០តោន នៅឃុំស្រះរាំង ស្រុកមង្គលបុរី ខេត្តបន្ទាយមានជ័យ។
ក្រុមហ៊ុនបៃតងកម្ពុជា បានប្រកាសថា «សូមបងប្អូនប្រជាកសិករ ដាក់វេនគ្នាច្រូត ហើយកុំបារម្មណ៍ថា គ្មានអ្នកប្រមូលទិញ ក្រុមហ៊ុនយេីងខ្ញុំនឹងនៅមួយបងប្អូនកសិករយើងជានិច្ច»។
បច្ចប្បន្នភាពរោងម៉ាស៊ីនសហការប្រមូលទិញស្រូវដើម្បីដោះស្រាយបញ្ហាទីផ្សារ និងរក្សាស្ថិរភាពតម្លៃ ដោយជួយដោះស្រាយបញ្ហាទីផ្សារឲ្យបានល្អប្រសើរមន្រ្តីកសិកម្មឃុំ និងអាជ្ញាធរមូលដ្ឋានកំពុងសម្របសម្រួលការប្រមូលផលស្រូវជាពិសេសស្រូវស្រងែ និងស្រូវសែនក្រអូបឲ្យបានដឹងមុនពីរបីថ្ងៃ ឬមួយសប្តាហ៍ ដើម្បីក្រុមហ៊ុនដឹងថា កន្លែងណាមានកសិករប្រមូលផលពូជអីក្នុងបរិមាណប៉ុន្មាន ដែលងាយស្រួលទាក់ទងជាមុនជាមួយរោងម៉ាស៊ីនឲ្យសហការគ្នា ដើម្បីត្រៀមឡានដឹក និងឡសម្ងួតជាមុន។ ដូច្នេះ សូមបងប្អូនប្រជាកសិករសហការជាមួយមន្រ្តីកសិកម្មឃុំ និងអាជ្ញាធរមូលដ្ឋាន។
ធនាគារអភិវឌ្ឍន៍ជនបទ និងកសិកម្ម (ARDB) ក៏បានសហការជាមួយបណ្តារោងម៉ាស៊ីនកិនស្រូវ ដើម្បីផ្តល់ទុនបន្ថែមសម្រាប់ប្រើប្រាស់លើការប្រមូលទិញស្រូវផងដែរ។
សូមបញ្ជាក់ថា ស្រូវមានទីផ្សារ ទុនប្រមូលទិញក៏មានដែរ តែសំខាន់ត្រូវបង្កើនការសហការគ្នាសម្របសម្រួលការប្រមូលផល ការប្រមូលទិញ ឲ្យត្រូវគ្នាជាមួយសមត្ថភាពសម្ងួត ហើយជៀសវាងការប្រមូលផលស្រូវខ្ចីពេក ដែលធ្វើឲ្យបាត់បង់គុណភាព៕
