តូក្យូ៖ ដោយសារការបោះពុម្ពផ្សាយរបស់កាសែតបាននឹងកំពុងធ្លាក់ចុះយ៉ាងខ្លាំង ហើយប្តូរទៅរកប្រព័ន្ធផ្សព្វផ្សាយបែបឌីជីថលវិញ ធ្វើឱ្យរោងបោះពុម្ព តូនីជី (Tonichi Printing Co.) ដែលជាក្រុមហ៊ុនបោះពុម្ពកាសែតដ៏ធំមួយនៅទីក្រុងតូក្យូ ចាប់ផ្តើមប្តូរអាជីវកម្មថ្មី គឺបណ្តុះផ្សិតត្រចៀកកណ្តុរវិញម្តង។
យោងតាមគេហទំព័រដំណឹងកសិកម្មជប៉ុន (The Japan Agri News) បានចេញផ្សាយថា ក្រុមហ៊ុនបោះពុម្ពកាសែត បានចាប់ផ្តើមអាជីវកម្មដាំផ្សិតក្នុងអាគាររោងបោះពុម្ពរបស់កាសែត ម៉ៃនីជី (Mainichi Newspaper) ដែលជាសាខារបស់ក្រុមហ៊ុនបោះពុម្ព តូនីជី មានទីតាំងស្ថិតនៅក្រុងកាវ៉ាហ្គូជី ( Kawaguchi) ខេត្តសៃតាម៉ា (Saitama) ដែលដំណើរការរោងចក្របោះពុម្ពកាសែតដ៏ធំរបស់ប្រទេសជប៉ុន។
ក្រុមហ៊ុនសង្ឃឹមថា អាជីវកម្មបង្កើតថ្មីនេះអាចជួយរកប្រាក់ចំណូលសម្រាប់ទ្រទ្រង់ជីវភាពប្រចាំថ្ងៃដល់បុគ្គលិករបស់ខ្លួន ដោយកែច្នៃកន្លែងទំនេរ ដូចជាបន្ទប់សម្រាប់បោះពុម្ពកាសែត ត្រូវកែទៅជាកន្លែងបណ្តុះផ្សិតត្រចៀកកណ្ដុរ ដែលមានទំហំប្រហែល៨១ម៉ែត្រការ៉េ។
ក្រុមហ៊ុនបានទទួលយកប្រព័ន្ធគ្រប់គ្រងបរិស្ថានរួមបញ្ចូលគ្នាបន្ទាប់ពីការដាំដុះសាកល្បងលើកដំបូង។ ការងារបេះផ្សិតត្រូវធ្វើពេញ២៤ម៉ោង ដោយមានបុគ្គលិកខ្លះធ្វើការវេនយប់។
បុគ្គលិកក្រុមហ៊ុនម្នាក់ បាននិយាយពន្យល់ពីសក្តានុពលរបស់គម្រោងនេះថា «ផ្សិតត្រចៀកកណ្ដុរ ដែលដាំដុះក្នុងស្រុក អាចផ្គត់ផ្គង់តម្រូវការទីផ្សារនៅទូទាំងប្រទេសជប៉ុន បានត្រឹមតែប្រហែល១០ភាគរយប៉ុណ្ណោះ»។
បុគ្គលិករូបនេះ បាននិយាយទៀតថា រោងចក្របោះពុម្ព្កកាសែតរបស់ក្រុមហ៊ុន គឺស័ក្តិសមសម្រាប់ការដាំដុះផ្សិតត្រចៀកកណ្ដុរណាស់ ដោយមានការត្រួតពិនិត្យសីតុណ្ហភាព និងសំណើមយ៉ាងហ្មត់ចត់ នៅក្នុងរោងបណ្ដុះ ដើម្បីរក្សាគុណភាពដូចបោះពុម្ពកាសែតដែរ។
កម្មករភាគច្រើនធ្វើនៅក្នុងរោងពុម្ពកាសែតនេះ ធ្លាប់មានបទពិសោធន៍ក្នុងការគ្រប់គ្រងគ្រឿងចក្រ និងសូម្បីតែឧបករណ៍ប្រើនៅកន្លែងដាំដុះក៏ពួកគេអាចធ្វើបានដែរ។
នៅក្នុងរោងពុម្ពនេះ មានថ្នាល់បណ្តុះផ្សិតប្រហែល១ ៥០០រង អាចបណ្តុះផ្សិតត្រចៀកកណ្តុរបានប្រហែល៤០០គីឡូក្រាមក្នុងមួយខែ ហើយក្រុមហ៊ុនគ្រោងនឹងបន្ថែមថ្នាលបណ្តុះផ្សិតត្រចៀកកណ្តុរឱ្យដល់៥ ៦០០រងនាពេលអនាគត ដើម្បីផលិតផ្សិតត្រចៀកកណ្តុរបានបរិមាណជាង១២តោនក្នុងមួយឆ្នាំ។
ក្រុមហ៊ុនមានគោលបំណងដើម្បីសម្រេចបាននូវទំហំទឹកប្រាក់បានពីការលក់ផ្សិតប្រចាំឆ្នាំ ឱ្យលើសពី១០លានយ៉េន ឬស្មើនឹងជាង៦៨៤ ០០០ដុល្លារ និងអាចសងថ្លៃដើមមកវិញក្នុងរយៈពេលបីបួនឆ្នាំ។
ផលិតផលផ្សិតត្រចៀកកណ្ដុរដាំនៅក្នុងរោងពុម្ព មានលក់តាមអនឡាញ និងតាមភោជនីយដ្ឋាននានានៅក្នុងទីក្រុងតូក្យូ។ ក្រុមហ៊ុនក៏កំពុងតែផ្សព្វផ្សាយអំពីផលិតផលផ្សិតរបស់ខ្លួន ដើម្បីឱ្យគេទិញទៅធ្វើម្ហូបនៅតាមភោជនីយដ្ឋាននានា នៅក្នុងសាលារៀន និងអភិវឌ្ឍកែច្នៃផ្សិតស្ងួតផងដែរ៕
