វ៉ាស៊ីនតោន៖ ក្រុមសម្ព័ន្ធសុខភាពសាធារណៈ ការអភិរក្ស និងក្រុមតស៊ូមតិដើម្បីកសិករ បានដាក់ញត្តិមួយច្បាប់ជំរុញឱ្យទីភ្នាក់ងារការពារបរិស្ថាន ចេញបម្រាមហាមឃាត់គ្រឿងផ្សំជាថ្នាំពុលសម្រាប់សម្លាប់សត្វល្អិតជាច្រើនប្រភេទ ដែលប្រើក្នុងការផលិតដំណាមហូបផ្លែ និងបន្លែរបស់សហរដ្ឋអាម៉េរិក។
ញត្តិនេះផ្តោតលើថ្នាំសម្លាប់សត្វល្អិតប្រឆាំងមេរោគ ដែលបង្កហានិភ័យនៃភាពធន់នឹងឱសថក្នុងវេជ្ជសាស្ត្រសម្រាប់ព្យាបាលមនុស្ស និងសត្វ។
សំណើដែលដាក់ដោយមជ្ឈមណ្ឌលការពារជីវសាស្រ្តចម្រុះ និងជាតំណាងឱ្យក្រុមចំនួនប្រាំបួន បានស្នើសុំឱ្យទីភ្នាក់ងារការពារបរិស្ថានរបស់សហរដ្ឋអាម៉េរិក ហាមឃាត់ការប្រើប្រាស់ឱសថប្រភេទអុកស៊ីតេត្រាស៊ីគ្លីន (Oxytetracycline) និងស្ទ្រិបតូមីស៊ីន (Streptomycin) ដែលជាថ្នាំអង់ទីប៊ីយ៉ូទិក និយមប្រើប្រាស់យ៉ាងទូលំទូលាយនៅក្នុងចម្ការដំណាំ។
ថ្នាំអង់ទីប៊ីយ៉ូទិកទាំងពីរនេះ ត្រូវគេប្រើដើម្បីគ្រប់គ្រងជំងឺបាក់តេរីនៅក្នុងចម្ការដំណាំ មានដូចជាដំណាំក្រូច និងដំណាំប៉ោម ហើយក៏ត្រូវបានចាត់ចំណាត់ថ្នាក់ដោយអង្គការសុខភាពពិភពលោកថា ជាថ្នាំមានសារៈសំខាន់សម្រាប់សុខភាពមនុស្សផងដែរ។
ញត្តិនេះក៏រួមបញ្ចូលទាំងថ្នាំសម្លាប់មេរោគផ្សិត មានដូចជា ហ្គេនតាមីស៊ីន (Gentamicin) កាស៊ូហ្គាមីស៊ីន (Kasugamycin) អ៊ីបហ្វ្លូហ្វេណូឃ្វីន (Ipflufenoquin) និងថ្នាំទ្រីយ៉ាហ្សូល (Triazole) ដែលមួយចំនួនទាក់ទងនឹងថ្នាក់ថ្នាំអង់ទីប៊ីយ៉ូទិក ឬថ្នាំប្រឆាំងផ្សិត គេប្រើក្នុងពីធីព្យាបាលបែបវេជ្ជសាស្ត្រ។
ខ្លឹមសារក្នុងញត្តិដដែលនេះ បានបញ្ជាក់ថា «ការស្រាវជ្រាវ គឺច្បាស់ណាស់ថា ការប្រើប្រាស់ថ្នាំអង់ទីប៊ីយ៉ូទិក និងថ្នាំប្រឆាំងផ្សិតជាថ្នាំសម្លាប់សត្វល្អិត គឺបង្កការគំរាមកំហែងដល់សុខភាពសាធារណៈ ពីព្រោះវារួមចំណែកដល់ការវិវត្តនៃភ្នាក់ងារបង្កឱ្យរោគធន់នឹងថ្នាំ»។
ក្រុមដាក់ញត្តិបានអះអាងទៀតទៀតថា ការប៉ះពាល់នឹងថ្នាំប្រឆាំងមេរោគនៅក្នុងបរិស្ថានអាចបង្កផលប៉ះពាល់ដល់គុណភាពដី គុណភាពទឹក និងប៉ះពាល់ដល់ជីវិតសត្វព្រៃ រួមទាំងបង្កការព្រួយបារម្ភដល់សុខភាពមនុស្សផងដែរ។
ឱសថប្រភេទអុកស៊ីតេត្រាស៊ីគ្លីន និងស្ទ្រីបតូមីស៊ីន ត្រូវបានប្រើប្រាស់ក្នុងការផលិតជាថ្នាំសម្លាប់សត្វល្អិត ដែលមានចុះបញ្ជីរបស់ទីភ្នាក់ងារការពារបរិស្ថានជាង៥០ ហើយត្រូវបានប្រើក្នុងការផលិតកម្មដំណាំក្រូច និងដំណាំទទឹម។
ទីភ្នាក់ងារការពារបរិស្ថាន បានអនុម័តជាលើកដំបូងលើការប្រើប្រាស់ឱសថអុកស៊ីតេត្រាស៊ីគ្លីន ជាបន្ទាន់លើដំណាំក្រូចនៅក្នុងរដ្ឋផ្លរីដា កាលពីឆ្នាំ២០១៦ ដើម្បីគ្រប់គ្រងជំងឺស្លឹកបៃតងរបស់ផ្លែក្រូច។ ក្រោយមក ការប្រើប្រាស់ឱសថនេះ ត្រូវបានបន្តសុពលភាពនៅឆ្នាំ២០១៨ សម្រាប់តំបន់ដាំដំណាំក្រូច នៅក្នុងរដ្ឋផ្លរីដា និងរដ្ឋកាលីហ្វ័រញ៉ា ដែលមានផ្ទៃដីសរុបប្រហែល៧០០ ០០០ហិចតា។
ចំណែកឱសថឈ្មោះ ស្ទ្រិបតូមីស៊ីន ក៏ត្រូវបានអនុញ្ញាតឱ្យប្រើជាថ្នាំបាញ់សម្លាប់សត្វល្អិត នៅឆ្នាំ២០១៨ផងដែរ។ ការស្ទង់មតិអំពីភូមិសាស្ត្រសហរដ្ឋអាម៉េរិក បានប៉ាន់ប្រមាណថា ឱសថឈ្មោះ អុកស៊ីតេត្រាស៊ីគ្លីន និងឱសថឈ្មោះ ស្ទ្រិបតូមីស៊ីន មានបរិមាណជាង៥៦តោន ត្រូវគេបាញ់លើដំណាំ នៅឆ្នាំ២០១៨។ ចំណែកបរិមាណមួយចំនួនទៀត ត្រូវបានប្រើនៅក្នុងចម្ការប៉ោម ដើម្បីគ្រប់គ្រងជំងឺរលួយភ្លើង។
នៅឆ្នាំ២០២៣ តុលាការឧទ្ធរណ៍សហរដ្ឋអាម៉េរិក បានលុបចោលការអនុម័តរបស់ទីភ្នាក់ងារការពារបរិស្ថានចំពោះការប្រើឱសថឈ្មោះ ស្ទ្រិបតូមីស៊ីន សម្រាប់ប្រើប្រាស់លើដំណាំក្រូច ដោយរកឃើញថា ទីភ្នាក់ងារមិនបានបំពេញតាមតម្រូវការក្រោមច្បាប់សហព័ន្ធ ស្តីពីថ្នាំសម្លាប់សត្វល្អិត ថ្នាំសម្លាប់ផ្សិត និងថ្នាំសម្លាប់សត្វកណ្ដុរ និងច្បាប់ ស្តីពីប្រភេទសត្វជិតផុតពូជ។ ចំណែកការអនុម័តឱ្យប្រើប្រាស់ឱសថឈ្មោះ អុកស៊ីតេត្រាស៊ីគ្លីន លើដំណាំក្រូច ត្រូវបានអនុញ្ញាតបន្តសុពលភាព។
យោងតាមអ្នកដាក់ញត្តិ បានឱ្យដឹងថា ការបាញ់ថ្នាំអង់ទីប៊ីយ៉ូទិក ក្នុងកំហាប់ទាបលើផ្ទៃដីមានធំៗអាចធ្វើបាក់តេរី មានធន់នឹងថ្នាំនៅក្នុងចម្ការ និងលើផ្ទៃដំណាំហូបផ្លែ ហើយអាចរីករាលដាលទៅលើតំបន់ផ្សេង។
ការរកឃើញពីមុន ដោយមជ្ឈមណ្ឌលគ្រប់គ្រង និងបង្ការជំងឺ ក្នុងឆ្នាំ២០១៧ បានបង្ហាញថា ការប្រើប្រាស់ថ្នាំសម្លាប់សត្វល្អិតប្រភេទអង់ទីប៊ីយ៉ូទិកទាំងនេះ អាចធ្វើបាក់តេរីធន់នឹងថ្នាំនៅក្នុងបរិស្ថាន។
ក្រុមមជ្ឈមណ្ឌលសម្រាប់ការពារជីវសាស្រ្តចម្រុះ បាននិយាយថា ដំណើរការដាក់ញត្តិអាចចំណាយពេលច្រើន និងអាចមានពាក្យបណ្តឹងតាមផ្លូវច្បាប់បន្ថែមទៀត ប្រសិនបើទីភ្នាក់ងារការពារបរិស្ថានបដិសេធមិនចាត់វិធានការតាមសំណើរខាងលើនេះ៕
