ដោយ ហៃ ស៊ីណា
ភ្នំពេញ៖ ក្រុមហ៊ុន អេមរុរ៉ាយស៍ សហការជាមួយមន្ទីរពាណិជ្ជកម្មខេត្តព្រះវិហារ និងគម្រោងជំរុញទីផ្សារសម្រាប់កសិកម្មខ្នាតតូច (AIMS) បានរៀបចំទស្សនកិច្ចសិក្សា និងផ្លាស់ប្តូរបទពិសោធន៍ស្តីពីការផលិតពូជស្រូវបរិសុទ្ធ ព្រមទាំងពិធីចុះហត្ថលេខាលើកិច្ចសន្យាទិញ-លក់ស្រូវប្រណីតសម្រាប់រដូវប្រមូលផលឆ្នាំ២០២៦។
កម្មវិធីនេះ រៀបចំឡើងនៅខេត្តកំពង់ធំ កាលថ្ងៃទី១១ ខែកញ្ញា ឆ្នាំ២០២៦នេះ ដោយមានអ្នកចូលរួមប្រមាណ១៥៨នាក់ រួមមានតំណាងមន្ទីរពាណិជ្ជកម្មខេត្ត មន្ត្រីគម្រោង AIMS តំណាងក្រុមហ៊ុន អេមរុ រ៉ាយស៍ ថ្នាក់ដឹកនាំសហគមន៍កសិកម្ម ចង្កោមអាជីវកម្ម និងក្រុមផលិតមកពីស្រុកគោលដៅចំនួនប្រាំក្នុងខេត្តព្រះវិហារ រួមមានស្រុកជ័យសែន ឆែប គូលែន រវៀង និងស្រុកត្បែងមានជ័យ។
នៅក្នុងកម្មវិធីពេលព្រឹក អ្នកចូលរួមបានធ្វើទស្សនកិច្ចនៅស្ថានីយបង្កាត់ និងជ្រើសរើសពូជស្រូវបល្ល័ង្ក ក្នុងខេត្តកំពង់ធំ។ ទស្សនកិច្ចនេះបានផ្តល់ឱកាសដល់ថ្នាក់ដឹកនាំក្រុមផលិតឱ្យទទួលបានចំណេះដឹង និងបទពិសោធន៍ជាក់ស្តែងអំពីការជ្រើសរើសពូជបរិសុទ្ធ ការបន្សុទ្ធពូជ ការដកស្រូវច្រឡំលាយ និងការគ្រប់គ្រងគុណភាពពូជស្រូវ។
អ្នកចូលរួមក៏បានផ្លាស់ប្តូរបទពិសោធន៍ជាមួយអ្នកជំនាញបច្ចេកទេស និងសិក្សាអំពីពូជស្រូវចំនួន២៨ប្រភេទ ដើម្បីស្វែងយល់កាន់តែច្បាស់អំពីទិន្នផល ភាពធន់នឹងលក្ខខណ្ឌកសិបរិស្ថាន និងលក្ខណៈគុណភាពគ្រាប់ស្រូវ។
ការរក្សាភាពបរិសុទ្ធនៃពូជស្រូវ គឺជាកត្តាសំខាន់ក្នុងការធានាគុណភាព និងតម្លៃទីផ្សាររបស់ស្រូវប្រណីត និងស្រូវក្រអូបកម្ពុជា។ ចំណេះដឹងដែលទទួលបានពីទស្សនកិច្ចនេះ នឹងជួយកសិករកាត់បន្ថយការច្រឡំលាយពូជ បង្កើនស្ថិរភាពគុណភាពផលិតកម្ម និងឆ្លើយតបទៅនឹងតម្រូវការរបស់ទីផ្សារក្នុងស្រុក និងអន្តរជាតិ។
កិច្ចសន្យាទិញ-លក់ចំនួន៦២កិច្ចសន្យា ត្រូវបានចុះហត្ថលេខារវាងក្រុមហ៊ុនអេមរុរ៉ាយស៍ និងក្រុមផលិតចំនួន៦២ ក្រុម ដែលស្ថិតនៅក្រោមចង្កោមអាជីវកម្មស្រូវប្រណីតចំនួន២០។ កិច្ចសន្យាទាំងនេះគ្របដណ្តប់លើបរិមាណស្រូវប្រណីតតាមផែនការប្រមាណជាង៣៥ ០០០តោន សម្រាប់រដូវប្រមូលផលឆ្នាំ២០២៦។
ក្រុមផលិតទាំងនេះតំណាងឱ្យគ្រួសារកសិករចំនួន៣ ៤២១គ្រួសារ ដែលដាំដុះលើផ្ទៃដីជាង១២ ៥០០ហិកតា នៅទូទាំងខេត្តព្រះវិហារ។
តាមរយៈកិច្ចសន្យាទាំងនេះ កសិករដែលចូលរួមនឹងទទួលបានភាពកាន់តែច្បាស់លាស់អំពីទីផ្សារ និងមានការសម្របសម្រួលកាន់តែជិតស្និទ្ធជាមួយក្រុមហ៊ុន អេមរុ រ៉ាយស៍ លើការរៀបចំផែនការផលិតកម្ម ស្តង់ដារគុណភាព ការប្រមូលផល និងការប្រគល់ស្រូវ។ គំនិតផ្តួចផ្តើមនេះក៏ជួយពង្រឹងតួនាទីរបស់សហគមន៍កសិកម្ម និងក្រុមផលិត ក្នុងការតភ្ជាប់កសិករខ្នាតតូចទៅកាន់ទីផ្សារផ្លូវការ និងទីផ្សារដែលមានតម្លៃបន្ថែមខ្ពស់។
ក្រុមហ៊ុនអេមរុរ៉ាយស៍ បន្តប្តេជ្ញាចិត្តអភិវឌ្ឍភាពជាដៃគូផ្គត់ផ្គង់ប្រកបដោយការទទួលខុសត្រូវ និងបរិយាប័ន្នជាមួយកសិករ សហគមន៍កសិកម្ម និងស្ថាប័នរាជរដ្ឋាភិបាល។ តាមរយៈការរួមបញ្ចូលការអភិវឌ្ឍសមត្ថភាពបច្ចេកទេស ការគ្រប់គ្រងគុណភាពពូជ និងការតភ្ជាប់ទីផ្សារជាផ្លូវការ ក្រុមហ៊ុនមានគោលដៅរួមចំណែកបង្កើនប្រាក់ចំណូលរបស់កសិករ និងលើកកម្ពស់សមត្ថភាពប្រកួតប្រជែងរយៈពេលវែងរបស់វិស័យស្រូវប្រណីតកម្ពុជា។
កម្មវិធីនេះគឺជាជំហានដ៏សំខាន់មួយទៀតក្នុងការកសាងខ្សែច្រវាក់ផ្គត់ផ្គង់ប្រកបដោយតម្លាភាព ភាពជឿទុកចិត្ត និងផ្តល់ផលប្រយោជន៍ទៅវិញទៅមក ដោយតភ្ជាប់កសិករខ្នាតតូចកម្ពុជាទៅកាន់ទីផ្សារដែលមានស្ថិរភាព និងបង្កើនតម្លៃ ព្រមទាំងកិត្យានុភាពរបស់អង្ករកម្ពុជានៅលើទីផ្សារ៕
