ដោយ នៅ ស៊ីវុត្ថា
ភ្នំពេញ៖ លោក ដេរិក យីប (Derek Yip) ឯកអគ្គរដ្ឋទូតអូស្ត្រាលីប្រចាំកម្ពុជា បានបង្ហាញក្តីរំពឹងថា ការនាំចូលមេគោពូជពីអូស្ត្រាលីចំនួន២២០ក្បាលបន្ថែមទៀត នឹងជួយបង្កើនសមត្ថភាពផលិតទឹកដោះគោស្រស់នៅក្នុងប្រទេស ដើម្បីឆ្លើយតបទៅនឹងតម្រូវការកំពុងកើនឡើង និងកាត់បន្ថយការពឹងផ្អែកលើការនាំចូលពីបរទេស ព្រមទាំងបង្កើតឱកាសការងារ និងជំរុញការអភិវឌ្ឍខ្សែច្រវាក់តម្លៃក្នុងវិស័យទឹកដោះគោកម្ពុជា។
ការលើកឡើងនេះ ធ្វើឡើងក្នុងឱកាសលោកបានអញ្ជើញទៅទស្សនាកសិដ្ឋាន គិរីសួគ៌ (Kirisu Farm) ក្នុងខេត្តតាកែវ ដើម្បីស្វាគមន៍មេគោស្ទាវ ពូជហូលស្តីន ហាយហ្វឺ (Holstein) ពីអូស្ត្រាលី ដែលទើបនាំចូលមកដល់កម្ពុជា។ ការនាំចូលលើកនេះ បានធ្វើឱ្យចំនួនហ្វូងគោសរុបរបស់កសិដ្ឋានកើនឡើងដល់ប្រមាណ១ ៤០០ក្បាល។
លោក ដេរិក យីប បានមានប្រសាសន៍ថា ការពង្រីកហ្វូងគោនេះនឹងជួយឱ្យកសិដ្ឋានអាចផលិតទឹកដោះគោស្រស់ យ៉ាអួ និងផលិតផលទឹកដោះគោផ្សេងៗ បានកាន់តែច្រើនសម្រាប់ផ្គត់ផ្គង់ទីផ្សារក្នុងស្រុក ស្របពេលតម្រូវការរបស់អ្នកប្រើប្រាស់កម្ពុជាកំពុងកើនឡើងជាបន្តបន្ទាប់។
លោកបន្តថា ភាពជាដៃគូរវាងអូស្ត្រាលី និងកសិដ្ឋានគិរីសួគ៌ គឺជាគំរូជោគជ័យមួយនៃកិច្ចសហប្រតិបត្តិការរវាងប្រទេសទាំងពីរ ក្នុងការអភិវឌ្ឍឧស្សាហកម្មកសិកម្មថ្មីៗ ពង្រីកទំហំពាណិជ្ជកម្ម លើកកម្ពស់សន្តិសុខស្បៀង និងរួមចំណែកកសាងសេដ្ឋកិច្ចកម្ពុជាឱ្យកាន់តែរីកចម្រើន និងមានវិបុលភាព។
លោកបានបញ្ជាក់ថា ផលិតផលទឹកដោះគោ ជាពិសេសទឹកដោះគោស្រស់ គឺជាប្រភពសារធាតុចិញ្ចឹមដ៏សំខាន់ ដែលជួយដល់ការលូតលាស់របស់ឆ្អឹង និងសាច់ដុំ។ ដោយសារតែការយល់ដឹងអំពីសុខភាពរបស់ប្រជាពលរដ្ឋកាន់តែកើនឡើង តម្រូវការផលិតផលទឹកដោះគោក៏កំពុងកើនឡើងយ៉ាងឆាប់រហ័សផងដែរ។ ទោះជាយ៉ាងណា ផលិតផលទឹកដោះគោ ដែលប្រើប្រាស់នៅកម្ពុជាភាគច្រើន នៅតែពឹងផ្អែកលើការនាំចូលពីបរទេស។
លោកបានបន្ថែមថា ស្ថានភាពនេះបានបង្កើតឱកាសដ៏ល្អសម្រាប់អ្នកផលិតក្នុងស្រុក ក្នុងការពង្រីកផលិតកម្ម ដើម្បីឆ្លើយតបទៅនឹងតម្រូវការក្នុងប្រទេស។ អូស្ត្រាលីមានមោទនភាពក្នុងការគាំទ្រការពង្រីកវិស័យនេះ តាមរយៈភាពជាដៃគូពាណិជ្ជកម្ម និងកិច្ចសហប្រតិបត្តិការជាមួយកម្ពុជា។
ទាក់ទិននឹងការពង្រីកផលិតកម្មនេះ លោក ហ្ស៊ីវ សា (Ziv Sar) ប្រធានគ្រប់គ្រងកសិដ្ឋានគិរីសួគ៌ បានថ្លែងក្នុងកិច្ចសម្ភាសជាមួយទូរទស្សន៍អនឡាញ ARDB កន្លងមកថា បច្ចុប្បន្នកសិដ្ឋានមានហ្វូងគោជាង១ ២០០ក្បាល ក្នុងនោះមានគោប្រមាណ៦០០ក្បាលកំពុងផលិតទឹកដោះ ដែលអាចផ្គត់ផ្គង់ទឹកដោះគោស្រស់ចូលទីផ្សារបានប្រមាណពីរម៉ឺនលីត្រក្នុងមួយថ្ងៃ។
លោកបានបន្តថា បន្ទាប់ពីបាននាំចូលមេគោពូជពីប្រទេសអូស្ត្រាលីចំនួន២២០ក្បាលបន្ថែមទៀត ដែលទើបដឹកតាមយន្តហោះមកដល់កម្ពុជានាពេលថ្មីៗនេះ កសិដ្ឋានរំពឹងថា នៅដើមឆ្នាំ២០២៧ នឹងអាចបង្កើនសមត្ថភាពផលិតទឹកដោះគោស្រស់ឱ្យបានជាងបីម៉ឺនលីត្រក្នុងមួយថ្ងៃ ដើម្បីឆ្លើយតបទៅនឹងតម្រូវការក្នុងទីផ្សារកម្ពុជា ដែលកំពុងកើនឡើងជាបន្តបន្ទាប់។
បើតាមស្ថានទូតអូស្ត្រាលីប្រចាំកម្ពុជា កាលពីប្រមាណប្រាំមួយឆ្នាំមុន កសិដ្ឋានគិរីសួគ៌បាននាំចូលមេគោពូជ Holstein ពីអូស្ត្រាលីចំនួន៥៥០ក្បាល ដើម្បីបង្កើតកសិដ្ឋានផលិតទឹកដោះគោខ្នាតធំដំបូងគេនៅកម្ពុជា។ ការនាំចូលមេគោស្ទាវចំនួន២២០ក្បាល លើកនេះ គឺជាជំហានបន្តនៃការពង្រីកផលិតកម្ម ដើម្បីបំពេញតម្រូវការទីផ្សារដែលកំពុងកើនឡើង។
ការពង្រីកផលិតកម្មនេះ ត្រូវបានគាំទ្រដោយប្រទេសអូស្ត្រាលី តាមរយៈកម្មវិធី CAPRED (Cambodia Australia Partnership for Resilient Economic Development) ដែលជាកម្មវិធីអភិវឌ្ឍន៍សេដ្ឋកិច្ចរួមរវាងអូស្ត្រាលី និងកម្ពុជា។ កម្មវិធីនេះមានគោលបំណងលើកកម្ពស់ការវិនិយោគ ការប្រកួតប្រជែង និងការអភិវឌ្ឍវិស័យឯកជន ដើម្បីជំរុញកំណើនសេដ្ឋកិច្ចប្រកបដោយចីរភាពនៅកម្ពុជា៕
